Ɛsodɔɔ 25:1-40
25 Okoŋ, mi Chɛhowa dimul Muuse aa:
2 “Dimul Isɔluɛiya le ma yɔŋgu chuuŋgiaa le ya. Wana o wana kɔl ndɔɔ nyindu pɛ le mbo yɔŋgu chuuŋgiaa, la bii ndu chuuŋgiaa o ba.
3 Chuuŋgiaala nya nɔ mi la bii waŋnda o ba laŋ la cho laŋ ni: kooliiyoŋ, kaniŋ humboŋ, chiliŋii siaŋɛi,*
4 kɛi buliiyo, kɛi yim yimndo, kɛi siaŋa sɔɔtɔtɔɔ, fuŋnde kɛndɛ kɛndɛleŋ, yiiŋii chuiŋndo,
5 yau saa nda yiŋ o nyɛma siaŋaŋ niŋndo, yau visi nɔ yiiŋnde tɔlɔkɔ wo, yɔm akeesiaa wo,
6 chuɛiyaŋ le lambuilaŋ, baasamndo le chuɛima pɔyaŋ toosiaa, nyɛm chuŋ kɛndɛ kɛndɔŋ,
7 pouta ɔnisi laŋ, vɛlɛ a pouta cheleŋ le hɛɛnduuwo o doma biŋgioo* choo a o nyɛ nda handuŋ o takpa wo.
8 La nɔ mi la toosial la fondaa le ya piɛiyo, okoŋ mi wa nya tɛɛŋ.
9 Mɛɛ ya cho nya chɔm yɛ, lende nya nɔ ni mi la toosiaa ndu a nyɛ o nyɛ cho wa leniŋ.
10 “La nɔ mi la toosiaa kɔfoo hoo a yɔm akeesiaa wo. O nɔ mbo wa bandei nɛiyo le yaa a tɛndaa tɛɛŋ,* toŋgei nɛiyo le diiŋ a tɛndaa tɛɛŋ, helɔɔ nɛiyo le diiŋ a tɛndaa tɛɛŋ.
11 La kumbu kɔfoo hoo leniŋ a o kɔɔ a koolii kɛndɛ kɛndɛi, nduyɛ mi la balu kooliiyoŋ hɛɛnduuwo o kɔfoo hoo balɔɔ chɛ chɛ amaluaŋ.
12 Okoŋ mi la toosiaa kelaŋ ŋ hiɔɔlu a kooliiye, mi la hɛɛnduu muŋ o peluŋ hiɔɔluŋ kɔfoo hoo amaluaŋ. Kumbuii kɛ kɛ kelaŋ ŋ muuŋ.
13 La nɔ mi la toosiaa yɔmii vilɛiye a yɔm akeesiaa wo, mi la kumbu ndi a kooliiye.
14 La wou yɔmii vilɛi keŋ o kelaŋ cho o kpeŋguŋ kɔfoo woŋ, le kɔlaŋ a ndu.
15 Yɔmii vilɛi keŋ nɔ mi i wa o kelaŋ kɔfu koŋ niŋ. La nɔ mi la soli ndi le.
16 Sawala ya cho num ke o pouta yɛndɛlaŋ choo laŋ, a nɔ ma wou laŋ o kɔfu koŋ niŋ.
17 “La toosiaa kumbu kɔfoo hoo a koolii kɛndɛ kɛndɛi, mbo wa bandei nɛiyo le yaa a tɛndaa tɛɛŋ, toŋgei nɛiyo le diiŋ a tɛndaa tɛɛŋ.
18 La nɔ mi la lɔɔ kooliiye a haamɛiyo, okoŋ mi la toosiaa chɛlɔbiiya a ŋiɔɔŋ. Nduyɛ, mi la kɛsi nda o kpeŋguŋ muuŋ ndoŋ o kumbu kɔfoo choo.
19 La toosiaa chɛlɔbiiya a ŋiɔɔŋ o kpeŋguŋ muuŋ ndoŋ, o kumbu kɔfoo choo. Hoo wa kpeŋgei hei, mi o pilɔɔ wa kpeŋgei i pilɛi.
20 Chɛlɔbiiya haa nɔ ma pɛɛŋga kumbaŋnda ndalaŋ choo choo, le mi la kumbu kɔfoo, nduyɛ ma mululaŋ hɔlla vellaa velle. A nɔ ma tundu bolle o kumbu kɔfoo choo.
21 A nɔ ma handu kumboo hoo o kɔfoo choo, nduyɛ ma wou sawala ya cho num ke o pouta yɛndɛlaŋ choo laŋ o kɔfoo niŋ.
22 I cho num chɔɔmɔŋ o kumbu koŋ choo, nduyɛ mi soo o num ndo. Sawala kɛ kɛ ya cho num ke le Isɔluɛiya, o chɛlɔbiiyaa ŋiɔɔŋaa cho o kɔfoo choo wa tɛɛŋ ya cho num laŋ chɔm ni.
23 “La nɔ mi la toosiaa vɛlɛ tibiiyo* a yɔm akeesiaa wo, mbo wa bandei nɛiyo le yaa, toŋgei nɛiyo le pilɛ a tɛndaa tɛɛŋ, a helɔɔ nɛiyo le diiŋ a tɛndaa tɛɛŋ.
24 La kumbu tibiiyo hoo mulaa a koolii kɛndɛ kɛndɛi, nduyɛ mi la balu kooliiyoŋ hɛɛnduuwo chɛ chɛ o tibiiyo amaluaŋ.
25 La nɔ mi la toosiaa kandoo o tibiiyo balɔɔ chɛ chɛ, mbo wa toŋgei a ba kɔllo kpeŋ, nduyɛ mi la balu kooliiyoŋ hɛɛnduuwo o kandu koŋ chɛ chɛ.
26 La toosiaa kelaŋ ŋ hiɔɔlu a kooliiye, mi la handu muŋ o sɔŋgila hiɔɔlu laŋ, naa peluŋ hiɔɔluŋ tibiiyo cho wa.
27 Kelaŋ muŋ nɔ miŋ wa ŋ handaa kpɛɛlaŋ a kandoo, le yɔmii vilɛiye wouwo leniŋ, le kɔlaŋ a tibiiyo.
28 La nɔ mi la toosiaa yɔmii vilɛi keŋ a yɔm akeesiaa wo, nduyɛ mi la kumbu ndi a kooliiye, le kɔlaŋ a tibiiyo.
29 “La toosiaa vɛlɛ nyɛm laandoŋ, taalalaŋ, hɛŋgɛilaŋ, a taalala bɛndula nda wou salala mamuɛilaŋ leniŋ ndaŋ. Nduyɛ, la toosiaa nyɔɔŋ muŋ a koolii kɛndɛ kɛndɛi.
30 La nɔ mi la wa beedii cho o yɔŋgaŋ o ya lo wo kɛsioo o tibii koŋ choo ya lachi le teleŋ o teleŋ.
31 “La lɔɔ koolii kɛndɛ kɛndɛi a haamɛiyo, mi la toosiaa nyɛ kɛsiaa la lambuiyo. Tum ndɔɔ, buŋgɛi nduɛi, lɔɔla ndɔlaŋ, taalala ndɔlaŋ, kpɛɛŋ ndɔŋ, a nyɛla cho maa lapeeŋge laŋ kpou, la nɔ mi la wa la biilaŋ.
32 Nyɛ kɛsiaa la lambuiyo hoo nɔ mbo nɔ lɔɔlaŋ la ŋɔmpum. Kpeŋgei hei la yaa, kpeŋgei i pilɛi la yaa.
33 Lɔɔ kɛ kɛ o kpeŋgei i pilɛ choo nɔ mbo nɔ taalalaŋ la yaa, la tiilaŋ maa bil lapeeŋge yɔm amɔŋ ndo, a kpiɔɔŋ, vɛlɛ a nyɛla cho maa lapeeŋge laŋ. Nyɛ pilɛ koŋ kpe nya nɔ ni mi la tosa a lɔɔla cho kpeŋgei i pilɛi laŋ. Mɛɛ nuaa lɛuwuŋ ŋɔmpum nyɛ kɛsiaa la lambuiyo hoo nɔ le waa ni.
34 Buŋgɛi nyɛ kɛsiaa la lambuiyo hoo nɔ mbo nɔ taalalaŋ la hiɔɔlu, la tiilaŋ maa bilta peeŋgela yɔm amɔŋ ndo, a kpiɔɔŋ, vɛlɛ a nyɛla cho maa lapeeŋge laŋ.
35 Lɔɔla tiɔɔŋnda tasela fula o buŋgɛi nyɛ kɛsiaa la lambuiyo hoo laŋ, la nɔ mi la nɔ kpɛi lebɛŋgu. Kpɛi nɔ mi i wa vɛlɛ o la diiŋndɔ laŋ bɛŋgu, nduyɛ la tiɔɔŋnda mɛɛlaalaŋ bɛɛ kpɛi nɔ mi i wa lebɛŋgu. Mɛɛ nuaa nya nɔ ni mi la tosa a kpɛɛŋ ŋɔmpum cho wa o nyɛ kɛsiaa la lambuiyo hoo wo ni.
36 La lɔɔ koolii kɛndɛ kɛndɛi a haamɛiyo, okoŋ mi la toosiaa nyɛ kɛsiaa la lambuiyo. Nyɛ kɛsiaa la lambuiyo hoo kpou, kpɛɛŋ ndɔŋ ni, lɛuwuŋ ndɔŋ ni, la nɔ mi la wa la biilaŋ.
37 La nɔ mi la toosiaa lambuilaŋ la ŋɔmmɛu le nyɛ kɛsiaa la lambuiyo hoo. Okoŋ te la mɛndul laŋ pɛ, la wa nyɛ teŋgaa yɔŋgoo nyɛ kɛsiaa la lambuiyo hoo lachi.
38 Kpanyalaŋ a nyɛla chuaa leyiŋnda nyɛ kɛsiaa la lambuiyo hoo, a koolii kɛndɛ kɛndɛi nya nɔ ni mi la toosiaa laŋ.
39 La toosiaa ndu latulu a nyɛm laandoŋ muŋ, a koolii kɛndɛ kɛndɛi talɛŋnde i pilɛ.*
40 La nɔ mi la toosiaa nyɔɔŋ muŋ, mɛɛ ya chɔm nya o pembei hei choo yɛ.
Tɛɛsiaalaŋ
^ Ɔɔ “kapaa.”
^ Tofa Tɛɛsiaa.
^ Tofa Tɛɛsiaa B14.
^ Ɔɔ “tabalioo.”
^ Talɛŋnde i pilɛ, lusul ndɔɔ wa le kilolaŋ 34 a nyɛ lechoo. Tofa Tɛɛsiaa B14.
