Ɛsɔdɔɔ 26:1-37
26 “La nɔ mi la toosiaa tɛndiiyo a kolala ŋpɛŋgɛlaŋ tɔ, la nda toosiaa a fuŋnde kɛndɛ kɛndɛleŋ, kɛi buliiyo, kɛi yim yimndo, vɛlɛ a kɛi siaŋa sɔɔtɔtɔɔ laŋ. Nduyɛ, mi la tuuliaa chɛlɔbiiya o kolalaŋ ndaŋ choo.
2 Kolala tɛndiilaŋ ndaŋ, o kɛ kɛ nɔ mbo wa bandei nɛiyo 42,* toŋgei nɛiyo 6. Kolalaŋ ndaŋ kpou, la nɔ mi la wa kpeŋkpeŋ.
3 La nɔ mi la chua kolalaŋ ndaŋ la ŋuɛɛnu, mi la sɔndu laŋ naapilɛ, mi la simnuŋ kola bɛndoo o pilɛ. Nduyɛ, mi la tosa vɛlɛ nyɛ pilɛ koŋ kpe a kolala ŋuɛɛnula tɔlaŋ.
4 La toosiaa nyɛlaŋ maa ŋkela a kɛi buliiyo, mi la bayiaa laŋ o bɔɔle kola bɛndu tɛndiiyo, nduyɛ mi la tosa vɛlɛ nyɛ pilɛ koŋ kpe a kola bɛndoo o pilɔɔ, naa la cho bɔŋa naapilɛ wa.
5 O kolala tɛndiila tiɔɔŋndaŋ ndaŋ, la nɔ mi la yiu yiu nyɛm cho muŋ maa ŋkela woŋ 50 o bɔɔle kola kɛ kɛ, le mi la mululaŋ hɔlla naa la cho bɔŋa naapilɛ wa.
6 La toosiaa doluŋndoŋ 50 a kooliiye, mi la mɔɔsa kolala tɛndiiyo naapilɛ a muŋ, okoŋ mi tɛndiiyo kpou simnuŋ nyɔɔ o pilɛ.
7 “Okoŋ kɔɔli, mi la toosiaa vɛlɛ kolalaŋ a yiiŋii chuiŋndo le tɛndiiyo kumbɔɔ. La nɔ vɛlɛ mi la toosiaa kolala tɛndiilaŋ 11.
8 Kolalaŋ ndaŋ, o kɛ kɛ nɔ mbo wa bandei nɛiyo 45, toŋgei nɛiyo 6. Kolala 11 laŋ ndaŋ la nɔ mi la wa kpeŋkpeŋ.
9 La chua kolalaŋ ndaŋ la ŋuɛɛnu, mi la sɔndu laŋ naapilɛ. Okoŋ mi la chua kolala tɛndiila ŋɔmpum ndaŋ la pilɛ laŋ, mi la sɔndu laŋ naapilɛ. Nduyɛ, mi la simbu simbuu kola ŋɔmpum tol o tɛndiiyo hɔlndɔ wo.
10 O kolala tɛndiila tiɔɔŋndaŋ ndaŋ, la nɔ mi la yiu yiu nyɛm cho muŋ maa ŋkela woŋ o kpeŋgoŋ, naa la cho bɔŋa naapilɛ wa. O bɔɔle kɛ kɛ kelaŋ 50.
11 La toosiaa doluŋndoŋ 50 a chiliŋii siaŋɛi,* okoŋ mi la wou muŋ o nyɛm cho muŋ maa ŋkela woŋ niŋ, le tɛndiiyo yiiyo mbo simnuŋ nyɔɔ o pilɛ.
12 Kola tɛndii cho hiouwɔɔ tɛndiiyo bandei amakɔɔ wo, la mal ndu o landaa lende.
13 Kolala cho tɛndiiyo hiouwɔɔ bandei, mi la wa la lɛɛndaa o kpeŋgoŋ vellaa velle laŋ, o kɛ kɛ nɔ mbo wa bandei nɛiyo le pilɛ a tɛndaa tɛɛŋ, le ndu kumbɔɔ.
14 “La nɔ mi la toosiaa vɛlɛ kolaa a yaula saa nda yiŋ o nyɛma siaŋaŋ niŋndo, le tɛndiiyo kumbɔɔ. Nduyɛ, mi la toosiaa vɛlɛ kolaa a yau visi nɔ yiiŋnde tɔlɔkɔ wo le ndu kumbɔɔ.
15 “La nɔ mi la toosiaa wundɛilaŋ* a yɔm akeesiaa wo le tɛndiiyo, nduyɛ mi la simi laŋ.
16 Wundɛi kɛ kɛ nɔ mbo wa helɔɔ nɛiyo 15, a toŋgei nɛiyo le diiŋ a tɛndaa tɛɛŋ.
17 O kɛ kɛ nɔ mbo nɔ yɔmnde i ŋiiŋ le bɔŋaa a chaaŋ ndɔ. Mɛɛ nuaa nya nɔ ni mi la toosiaa wundɛilaŋ kpou le tɛndiiyo.
18 La nɔ mi la toosiaa wundɛilaŋ 20 le tɛndiiyo kpeŋgii ba tou ve.
19 “La toosiaa nyɛla nda simi wundɛilaŋ leniŋ ndaŋ 40 a kanii humbuei le wundɛila 20 ndaŋ simioo leniŋ. Wundɛi kɛ kɛ nɔ mbo nɔ nyɛla nda simi ndu leniŋ ndaŋ la tiɔɔŋ, le yɔmii nduɛi ŋiiŋnde wouwo leniŋ.
20 La nɔ mi la toosiaa wundɛilaŋ 20 le tɛndiiyo ba luaŋ ndo.
21 Nduyɛ, mi la toosiaa nyɛla nda simi laŋ leniŋ ndaŋ 40 a kanii humbuei, le wundɛila 20 ndaŋ simioo leniŋ. Wundɛi kɛ kɛ nɔ mbo nɔ nyɛla nda simi ndu leniŋ ndaŋ la tiɔɔŋ, le yɔmii nduɛi ŋiiŋnde wouwo leniŋ.
22 Kɛ le tɛndiiyo amakɔɔ ba paaleŋ le del lo, la nɔ mi la toosiaa wundɛilaŋ la ŋɔmpum.
23 La toosiaa wundɛilaŋ la tiɔɔŋ o sɔŋgila tiɔɔŋnda tɛndiiyo hoo amakɔɔ.
24 Wundɛilaŋ ndaŋ la nɔ mi la wa la bɔŋaa chɔŋ lebɛŋgu haaa o bolleŋ o kelɛi tasei. Nuaa nya nɔ ni mi la toosiaa wundɛila tiɔɔŋndaŋ, nduyɛ laŋ la cho wa o sɔŋgila tiɔɔŋndaŋ ni.
25 La nɔ mi la toosiaa wundɛilaŋ la ŋɔmaa, nduyɛ mi la toosiaa nyɛla nda simi laŋ leniŋ ndaŋ 16 a kanii humbuei. Wundɛi kɛ kɛ nɔ mbo nɔ nyɛla nda simi ndu leniŋ ndaŋ la tiɔɔŋ, le yɔmii nduɛi ŋiiŋnde wouwo leniŋ.
26 “La toosiaa kpɔlɔŋndaŋ la ŋuɛɛnu a yɔm akeesiaa wo, le wundɛilaŋ o tɛndiiyo kpeŋgii ba tou ve,
27 kpɔlɔŋndaŋ la ŋuɛɛnu le wundɛilaŋ kpeŋgii ba luaŋ nde, a kpɔlɔŋndaŋ la ŋuɛɛnu le tɛndiiyo amakɔɔ ba paaleŋ le del lo.
28 Kpɔlɔŋ cho wa o wundɛilaŋ tɛɛŋ ndo nɔ mbo chɛŋ o tɛndiiyo kpeŋgei i pilɛ haaa kpeŋgei i pilɛi.
29 “La nɔ mi la kumbu wundɛilaŋ ndaŋ a kooliiye, nduyɛ mi la toosiaa kelaŋ a kooliiye le kpɔlɔŋndaŋ ndaŋ saa. Kpɔlɔŋnda laŋ bɛɛ, la nɔ mi la kumbu laŋ a kooliiye.
30 Mɛɛ ya chɔm nya o pembei choo le tɛndiiyo hoo toosiaa yɛ, lende nya nɔ ni mi la toosiaa ndu.
31 “La toosiaa kola bɛndoo a kɛi buliiyo, kɛi yim yimndo, kɛi siaŋa sɔɔtɔtɔɔ, vɛlɛ a fuŋnde kɛndɛ kɛndɛleŋ. Nduyɛ, mi la tuuliaa chɛlɔbiiya o kolalaŋ ndaŋ choo.
32 La nɔ mi la lɛɛnduu laŋ o suŋgbuaŋ ma hiɔɔlu, ma nda toosiaa a yɔm akeesiaa wo ma kumbu maŋ a kooliiye waŋ. Nduyɛ, mi la toosiaa doluŋndoŋ a kooliiye le kolalaŋ ndaŋ baa. La nɔ mi la wou suŋgbuaŋ maŋ o nyɛla hiɔɔlula nda toosiaa a kanii humbuei le suŋgbuaŋ wouwo leniŋ ndaŋ.
33 La landu kola bɛndu koŋ o nyɛm cho maa ŋ kela woŋ bɛŋgu, okoŋ mi la luei kɔfu laSawaa* o kola bɛndoo amakɔɔ. Kola bɛndoo hoo cho piɔu Fondaŋ Diandaa a Fondaŋ Hiou Diondɔɔ Wo tɛɛŋ ni.
34 La nɔ mi la handu kumboo o kɔfu laSawaa choo, o Fondaŋ Hiou Diondɔɔ Wo niŋ.
35 “La kɛsi tibiiyo* kola bɛndoo ikɛi o tɛndiiyo niŋ ba luaŋ ndo, mi nyɛ kɛsiaa la lambuiyo wa ikɛi o tɛndiiyo niŋ ba tou wo.
36 La nɔ mi la toosiaa kola bɛndu cho wa o landaa o dio tɛndiiyo wo a kɛi buliiyo, kɛi yim yimndo, kɛi siaŋa sɔɔtɔtɔɔ, vɛlɛ a fuŋnde kɛndɛ kɛndɛleŋ.
37 La toosiaa suŋgbuaŋ ma ŋuɛɛnu a yɔm akeesiaa wo le kola bɛndoo landɔɔ, nduyɛ mi la kumbu maŋ kpu a kooliiye. Doluŋuŋ nda cho kolalaŋ ndaŋ baa woŋ bɛɛ, ŋ nɔ miŋ wa ŋ toosiaa a kooliiye. La nɔ mi la toosiaa nyɛla nda simi suŋgbuaŋ leniŋ ndaŋ la ŋuɛɛnu a chiliŋii siaŋɛi* le suŋgbuaŋ maŋ.
Tɛɛsiaalaŋ
^ Tofa Tɛɛsiaa B14.
^ Ɔɔ “kapaa.”
^ Ɔɔ “finɛtelelaŋ.”
^ Koŋ cho ni, Kɔfu Kpemaa. Tofa Tɛɛsiaa.
^ Ɔɔ “tabalioo.”
^ Ɔɔ “kapaa.”
