Ɛsɔdɔɔ 27:1-21
27 “La toosiaa bandu luamaa lasalaa a yɔm akeesiaa wo. O nɔ mbo wa bandei nɛiyo le ŋɔmmɛu a tɛndaa tɛɛŋ, a toŋgei nɛiyo le ŋɔmmɛu a tɛndaa tɛɛŋ. O nɔ mbo nɔ kpeŋgoŋ ŋ hiɔɔlu, nduyɛ mbo wa helɔɔ nɛiyo le hiɔɔlu a tɛndaa tɛɛŋ.
2 Sɔŋgi kɛ kɛ o bandu luamaa lasalaa nɔ mbo nɔ lioo o pilɛ. A nɔ ma toosiaa laŋ latulu a bandu luamaa lasalaa, nduyɛ ma kumbu bandu luamaa lasalaa kpu a chiliŋii siaŋɛi.*
3 La toosiaa vɛlɛ baawalaŋ* le pultaŋ kɔndɔɔ, latulu a siɔbuiilaŋ,* hɛŋgɛilaŋ, chula saŋgilaŋ, a nyɛla chuaa leyiŋndaŋ. La nɔ mi la toosiaa nyɛm ndɔŋ laandoŋ kpou a chiliŋii siaŋɛi.
4 La toosiaa kpasaa a chiliŋii siaŋɛi le bandu luamaa lasalaa, nduyɛ mi la toosiaa kelaŋ ŋ hiɔɔlu a chiliŋii siaŋɛi le sɔŋgila ndɔla hiɔɔlu laŋ.
5 Okoŋ, mi la sɔɔŋa kpasaa hoo o kandu bandu luamaa lasalaa tiŋ lebɛŋgu o kpeŋguŋ muuŋ ndoŋ vellaa velle.
6 Okoŋ, mi la toosiaa yɔmii vilɛiye a yɔm akeesiaa wo, le bandu luamaa lasalaa, mi la kumbu ndi a kooliiye.
7 Yɔmnde hei nya cho sɔɔŋa o kelaŋ cho o kpeŋguŋ muuŋ bandu luamaa lasalaa woŋ niŋ ni, le kɔlaŋ a ndu.
8 La bɛɛndiaa ndu a pɛŋgɔŋ, mbo wa maa kɔfu. La toosiaa ndu mɛɛ o chɔm nya o pembei choo yɛ.
9 “Okoŋ kɔɔli, mi la toosiaa luŋndo tɛndiiyo balɔɔ silɔ, nduyɛ mi la lɛɛnduu kolala kɛndɛ kɛndɛlaŋ o luŋndo kpeŋgii ba tou ve. Kpeŋgei hei nɔ mi i wa bandei nɛiyo 150.
10 Kpeŋgei hei nɔ mi i nɔ suŋgbuaŋ 20, a nyɛla nda toosiaa a chiliŋii siaŋɛi laŋ 20, le maŋ wouwo leniŋ. Doluŋndoŋ a kelaŋ saa suŋgbuaŋ ndoŋ nɔ miŋ wa ŋ bɛɛndiaa a kanii humbuei.
11 Kolala cho wa la lɛɛndaa o luŋndo kpeŋgii ba luaŋ ndo laŋ, la nɔ mi la wa bandei nɛiyo 150. Kpeŋgei hei nɔ mi i nɔ suŋgbuaŋ 20, a nyɛla nda toosiaa a chiliŋii siaŋɛi laŋ 20, le maŋ wouwo leniŋ. Doluŋndoŋ a kelaŋ saa suŋgbuaŋ ndoŋ nɔ miŋ wa ŋ bɛɛndiaa a kanii humbuei.
12 Kolala cho wa la lɛɛndaa o luŋndo ba paaleŋ le del lo laŋ, la nɔ mi la wa bandei nɛiyo 75. Kpeŋgei hei nɔ mi i nɔ suŋgbuaŋ tɔ, a nyɛla nda simi maŋ leniŋ ndaŋ tɔ.
13 Luŋndo hoo, toŋgii nduɛi ba paaleŋ le chaŋ ndo nɔ mi i wa nɛiyo 75.
14 Kolala cho wa la lɛɛndaa o dio tɛndiiyo kpeŋgei i pilɛ laŋ, la nɔ mi la wa bandei nɛiyo 22 a nyɛɛmbɔ. La simi suŋgbuaŋ ma yaa, a nyɛla nda simi maŋ leniŋ ndaŋ la yaa.
15 Kolala cho wa la lɛɛndaa o kpeŋgei i pilɛi laŋ, la nɔ mi la wa bandei nɛiyo 22 a nyɛɛmbɔ. Okoŋ, mi la simi suŋgbuaŋ ma yaa, a nyɛla nda simi maŋ leniŋ ndaŋ la yaa.
16 “La nɔ mi la handu kola bɛndoo le luɛiyɔɔ o luŋ tɛndiiyo, mbo wa bandei nɛiyo 30. La toosiaa kolaa hoo a kɛi buliiyo, kɛi yim yimndo, kɛi siaŋa sɔɔtɔtɔɔ, vɛlɛ a fuŋnde kɛndɛ kɛndɛleŋ. Nduyɛ mi la toosiaa suŋgbuaŋ ma hiɔɔlu a nyɛla nda simi maŋ leniŋ ndaŋ la hiɔɔlu.
17 Suŋgbuma balu tɛndiiyo waŋ kpou, nyɛla saa maŋ ndaŋ, a doluŋuŋ ndɔŋ, ŋ nɔ miŋ wa ŋ toosiaa a kanii humbuei. Kɛ nduyɛ, nyɛla nda simi suŋgbuaŋ leniŋ ndaŋ, la nɔ mi la wa la toosiaa a chiliŋii siaŋɛi.
18 Luŋ tɛndiiyo nɔ mbo wa bandei nɛiyo 150, a toŋgei nɛiyo 75. Nduyɛ kola cho ndu wa o balaa wo nɔ mbo wa helɔɔ nɛiyo le ŋɔmmɛu a tɛndaa tɛɛŋ. A nɔ ma toosiaa ndu a fuŋnde kɛndɛ kɛndɛleŋ. Nyɛla nda simi suŋgbuma tɛndiiyo leniŋ ndaŋ, la nɔ mi la wa la bɛɛndiaa a chiliŋii siaŋɛi.
19 Nyɛm laanduŋ nda cho wa wallo o tɛndiiyo hoo woŋ kpou, kɔ bii a chiliŋuŋ siombu siombu nda kindu tɛndiiyo woŋ, vɛlɛ a chiliŋuŋ siombu siombu nda kindu kola balu tɛndiiyo woŋ kpou, a chiliŋii siaŋɛi nda nɔ ni ma toosiaa muŋ.
20 “Dimul Isɔluɛiya le ma hiŋ a chuɛima ɔlifiima kɛndɛ kɛndɛma nda chu a laba waŋ le lambuilaŋ, le halikpeŋ mi la wa biyɔɔ teleŋ o teleŋ.
21 Lambuila cho o tɛndii bɔŋaŋndo niŋ o kola bɛndoo ikɛi naa kɔfu laSawaa cho wa kinɛi, Elɔŋ nda puaa nduaa nɔ ni ma wa laŋ mɛndullo ichɔl Chɛhowa lachi, mi la lo biyɔɔ haaa mi paaleŋ le sɛ. Nduyɛ hei cho wa maa sawaa le Isɔluɛiya, chuauwaa ndaa mamaa, a chuauwaa mamaa o chuauwaa ndaa mamaa kɔɔli.
