Ɛsodɔɔ 3:1-22
3 Okoŋ, mi Muuse kandu chɔluaa Chɛtulo lefu ndɔ wa mandaa, wana soliaa lasalaa Midiaŋ. Mɛɛ o wa kɔlaŋ a chɔluaa o pollo niŋ ba paaleŋ le del lo, mbo fuuluu o pembii Mɛlɛka tonyaa Holuɛɛbi.
2 Okoŋ, mi maalikɛinɔ Chɛhowa wo chɔɔmuŋ ndu o bɔɔ leyiŋndo niŋ. Muuse wa tofaa, mbo cha yiŋndeŋ o bɔɔ niŋ, kɛ bɔɔ ve ŋɔ le.
3 Okoŋ mi Muuse dimi aa: “I cho lakɔ mi kɔ tofa suɛi kɔndɔfille hei mi sina le sabu bɔɔ cho ŋɔ le wo.”
4 Mɛɛ Chɛhowa che maa o sɔɔŋguu o bɔɔ ikɛi le chɔɔ nyɛ wa yɔŋnɔŋndo wo, mbo veelu ndu o bɔɔ niŋ aa: “Muuse! Muuse!” Mbo chɛl aa: “Ee.”
5 Okoŋ mbo dimul ndu aa: “Sɔɔŋguu o bɔɔ ikɛi le. Soli kɔwɛila* cho num o ŋpelu laŋ, kanifuule fondaŋ ŋ cho isisi wo, fondaŋ diandaa o cho ni.”
6 Mbo hiau lachi a suɛi aa: “Ya cho Mɛlɛka finyaa num aa mamaa ni, Mɛlɛka Ebilaham, Aase, a Chekɔpu wo.” Okoŋ mi Muuse viaŋ hɔlaa nduaa, kanifuule siooŋnde wa ndu le Mɛlɛka tonyaa tofaa.
7 Mi Chɛhowa dimi vɛlɛ aa: “I cho chɔɔ kpendekele mɔnɛi wanaa niaa cho biyɔɔ o Ichipi niŋndo, nduyɛ mi wa tueiyɔɔ chaŋnda nda cho le mɛɛ nda cho nda baŋɔɔ le wallo yɛ. I sina nyɛpalaa nda cho niŋndo.
8 Lelaŋ, I cho lakɔ mi kɔ piŋi nda waŋnda Ichipi o ba, nduyɛ mi soli nda o lɛŋnde leŋ niŋ, mi hiŋ a nda o lɛŋnde kɛndɛ kɛndɛleŋ niŋ, lɛŋnde cho le kuaŋnaŋ kɛ kɛ leŋ. Lɛŋnde milikiiyaŋ* a liaaŋ ma cho taaliaa leniŋ ndeŋ. Lɛŋnde Kenanaitiiya, Hitaitiiya, Amɔluaitiiya, Pɛluisaitiiya, Hivaitiiya, a lɛŋnde Chɛbusaitiiya.
9 A tonya, chaŋnda waŋnda Isɔluɛi cho laŋ la fuuluu naa ya chua. Nduyɛ, I che biyɔɔ wɔɔŋ waŋnda Ichipi cho nda wo, vɛlɛ a nyɛkindilaa nda cho nda handɔɔ choo wo.
10 Lelaŋ, I cho num viomɔɔ naa Felo chua, ma kɔ soli wanaa niaa Isɔluɛiya o lɛŋnde Ichipi leŋ niŋ.”
11 Kɛ mi Muuse nyuna Mɛlɛka tonyaa aa: “Wana maavɛɛ ya cho yɛ le mi kɔ sim Felo lachi, mi soli Isɔluɛiya o lɛŋnde Ichipi leŋ niŋ?”
12 Mi Mɛlɛka mulul ndu aa: “I cho wa latulu a num. Nduyɛ tamasi chɔm maa ya kɛsɛ vem num ni wo cho hoo ni: Te a kɔ soli nda pɛ o lɛŋnde Ichipi leŋ niŋ, la cho hunɔɔ ya Mɛlɛka tonyaa piɛi o pembei hei choo.”
13 Kɛ mi Muuse nyuna Mɛlɛka tonyaa aa: “Te o yɔŋ yɛ mi kuɛ naa Isɔluɛiya chua mi kɔ dimul nda aa, ‘Mɛlɛka finyaa nyaa mamaa vem ya naa nya chua ni,’ okoŋ ma nyuna ya aa, ‘Vɛɛnɛ o nɔ yɛ diolaŋ?’ Yɛɛnɛ ya cho yɛ nda dimul?”
14 Mi Mɛlɛka dimul Muuse aa: “I Cho Simnɔŋ Nyɛ Ya Yeema Mi Simnuŋ Ndo.”* Mbo dimi vɛlɛ aa: “Nyɛ ŋ nɔ ma dimul Isɔluɛiya wo cho hoo ni, ‘I Cho Simnɔŋ vem ya naa nya chua ni.’”
15 Okoŋ mi Mɛlɛka dimul vɛlɛ Muuse aa:
“Nyɛ ŋ nɔ ma dimul Isɔluɛiya wo cho hoo ni, ‘Chɛhowa, Mɛlɛka finyaa nyaa mamaa, Mɛlɛka Ebilaham ndo, Mɛlɛka Aase wo, a Mɛlɛka Chekɔpu wo vem ya naa nya chua ni.’ Diola nilaŋ la cho laŋ ni le fɛɛŋ a fɛɛŋ. Nduyɛ, a diolaŋ ndaŋ yuŋgulaŋ kpou nɔ ni mi la loonuŋ a ya le fɛɛŋ a fɛɛŋ.
16 Lelaŋ, kɔ ma chuuŋgiaa waŋ banaa Isɔluɛi, okoŋ ma dimul nda aa, ‘Chɛhowa, Mɛlɛka finyaa nyaa mamaa, Mɛlɛka Ebilaham, Aase a Chekɔpu wo chɔɔmuŋ ya, mbo dimul la aa: “I mulul nya hɔlla, nduyɛ mi cha nyɛ o nyɛ nda cho nya tosallo o lɛŋnde Ichipi leŋ niŋ.
17 Lelaŋ ya dimi ni maa, I cho nya piŋi Ichipiaŋaa cho nya nyɛpalaa tusioo choo wa o ba, okoŋ mi hiŋ a nya o lɛŋnde Kenanaitiiya, Hitaitiiya, Amɔluaitiiya, Pɛluisaitiiya, Hivaitiiya, a o lɛŋnde Chɛbusaitiiya niŋ, lɛŋnde milikiiyaŋ a liaaŋ ma cho taaliaa leniŋ ndeŋ”’.
18 “A tonya, a cho num nilaŋ yaŋɔɔ, okoŋ mi num a waŋ banaa Isɔluɛi kuɛ naa masaa le Ichipi chua, mi la dimul ndu aa: ‘Chɛhowa, Mɛlɛka Hibuluiya soo naa naa chua ni. Lelaŋ a yandii, chɛl naa miŋ kuɛ le tiŋ palɛi yaa o pollo niŋ, miŋ kɔ soli salaa o Chɛhowa Mɛlɛka naa lo.’
19 Kɛ I sina kɛsɛ maa masaa le Ichipi cho chɛlɔɔ le mbo mal nya mi la kuɛ le. Mɛɛ mi baŋ ndu le ndi tosaa.
20 I cho kpaaya nuu soliŋ kpeku, mi tusi lɛŋnde Ichipi leŋ nyɛpalaa bɛndoo choo a sɔɔŋ kɔndɔfiliŋ bɛnduŋ ya cho tosa loŋ ndoŋ. Koŋ cho tosa mbo mal nya mi la kuɛ.
21 I cho tosa mi waŋnda Ichipi che Isɔluɛiya wanaa sɔvɛ. Nduyɛ te la wa kɔlaŋ pɛ, la kue niŋ bala fondo le.
22 Wana lanɔ kɛ kɛ nɔ mbo nyuna wana lanɔ Ichipiaŋnɔ nda chiɛɛliaŋ ndo, ɔɔ o cho o ndu lo chiɛiniŋ ndo, le mbo ke ndu kaniŋ humboŋ, kooliiyoŋ, vɛlɛ a nyɛla chuɛɛnaŋ ndaŋ, mi la wou puaa nyaa a chuaa nyaa laanduaa. La cho nyɛm sulaŋ o lɛŋnde Ichipi leŋ niŋ chua, mi la kuɛŋnuŋ a muŋ.”
