Ɛsɔdɔɔ 32:1-35
32 Mɛɛ teleŋ tiŋ hiou, mi waŋnda cha maa Muuse cho bɔɔ viouwɔɔ o pembei choo. Le hei, ma kua naa Elɔŋ chua ma dimul ndu aa: “Chɔŋ ma toosial naa mɛlɛka mbo sim naa lachi. Kanifuule, ŋ sina nyɛ yɔŋnuŋ a Muuse wo hoo, po soli naa o lɛŋnde Ichipi leŋ niŋndo le.”
2 Okoŋ mi Elɔŋ dimul nda aa: “La sooluu kelaŋ ŋkooliiyoŋ laandaa nyaa, puaa nyaa, a chuaa nyaa laanduaa o lani mi la chuu ya.”
3 Le hei, mi waŋnda kpou kandu kelaŋ ŋkooliŋ wa nda o lani woŋ sooluuwo, ma kua a muŋ naa Elɔŋ chua.
4 Okoŋ mbo bii nda kooliiyoŋ o ba, mbo soliŋ chiliŋii nda sial nyɔɔŋ nde kpeku, mbo toosiaa nau fɔŋndɔɔ. Ma kandu dimioo aa: “Oo Isɔluɛi, Mɛlɛka naa cho hoo ni, o soli naa o lɛŋnde Ichipi leŋ niŋndo.”
5 Mɛɛ Elɔŋ che nyɛ wa yɔŋnɔŋndo wo, mbo taŋgul bandu luamaa lasalaa nau koŋ lachi. Okoŋ mbo dimi choo choo kpeleŋ aa: “Bɔŋaŋ bɛndoo cho wa siɔdii le Chɛhowa.”
6 Diimandɔɔ, ma pena chɔnɔŋ puŋ, ma kandu salala luamaa laŋ a salala kɔl nyulu laŋ solioo. Okoŋ kɔɔli, ma chal diolaŋ a kolɔɔ laŋ, nduyɛ ma wa yoomu ndaa tueiyɔɔ yeela.
7 Okoŋ mi Chɛhowa dimul Muuse aa: “Tol pembei chɔ chɔ, kanifuule wanaa num aa ŋ soli o lɛŋnde Ichipi leŋ niŋnda, a tosa suɛi dɛnɛ wɔɔŋ bɛndu.
8 Nɛi ya chɔm nda le kɔlaŋ lechoo wo, a keleŋa ndu bɔɔ malɔɔ. A toosiaa nau fɔŋndɔɔ le ndapila, ma beŋ ndu wulaŋ, nduyɛ ma soli salalaŋ o ndu lo okoŋ ma dimi aa, ‘Oo Isɔluɛi, Mɛlɛka naa cho hoo ni o soli naa o lɛŋnde Ichipi leŋ niŋndo.’”
9 Mi Chɛhowa dimul vɛlɛ Muuse aa: “I che maa waŋnda haa wanaa bolii kalaa nda cho ni.
10 Lelaŋ, luɛi naa tɛɛŋ te. I dɔɔnuŋ bɔɔ tumbe a nda. I cho nda tɛɛmbuu, okoŋ mi siiŋguu num kaale bɛnduleŋ.”
11 Mi Muuse nyɔɔlu Chɛhowa Mɛlɛka ndɔɔ aa: “Oo Chɛhowa, le yɛɛnɛ ma dɔɔnuŋ tumbe o kala kala nuaa a wanaa num aa ŋ soli o lɛŋnde Ichipi leŋ niŋ, a kpaaya num bɛndoo wa?
12 Te a tosa lende pɛ, Ichipiaŋnda cho dimi aa, ‘Yiyaŋ wɔɔŋndo ndoo nɔ a nda okɔɔ ni. Le nda diu diu wo o pemboŋ tɛɛŋ, nduyɛ mbo basu nda tɛɛ o lɛŋndeŋ choo o soli nda nanuŋ ni.’ Lelaŋ a yandii, pɔlullɔ kɔllo ma siŋga yiyaŋ numndo a kpundɛ ŋ kɛɛsiaa le wanaa numnda tusioo choo wo.
13 Loonuŋ a buɛiyaa numnda Ebilaham, Aase, a Isɔluɛi. Mi num oo chuel nda buŋgɛi, ma mɛnaŋ po aa: ‘I cho tosa mi chuauwaa nyaa* kui maa looŋ o choo choo niŋ, nduyɛ I cho nda lɛŋndeŋ ndeŋ kpou ke, lɛŋnde ya chuel chuauwaa nyaa* buŋgɛi, le mi le wa nyɛm kɛŋ nda le fɛɛŋ a fɛɛŋ ndeŋ.’”
14 Okoŋ, mi Chɛhowa siŋga yiyaŋ ndɔɔ a kpundɛ ndoo kɛɛsiaa le wanaa nduaa tusioo choo wo okɔɔ.
15 Okoŋ kɔɔli, mi Muuse muliŋ mbo tual pembei a pouta yɛndɛla tiɔɔŋnda sawalaŋ la wa la poonyiaa lechoo laŋ o ba. Pouta yɛndɛla tiɔɔŋndaŋ ndaŋ, o kɛ kɛ ndoo nɔ poonyiaa o kpeŋgoŋ vellaa velle.
16 Mɛlɛka pila toosiaa pouta yɛndɛlaŋ ndaŋ ni. Nduyɛ poonyiaa wa lechoo wo bɛɛ, ndupila poonyiaa ndu ni.
17 Mɛɛ Chɔɔsuaa tuei waŋnda deŋioo o dɔɔŋgɔɔ niŋ, mbo dimul Muuse aa: “I cho tueiyɔɔ bɔɔluu bɛndoo o dɔɔŋgɔɔ niŋ maa bɔɔluu chɔu.”
18 Kɛ mi Muuse dimul ndu aa:
“O cho bɔɔluu kɔl kɛndɛ waŋnda yam chɔuwo wo le,Nduyɛ, o cho lachaŋ te nda cho mɛɛ nda yam nda nuaa o chɔuwo yɛ le.Kɛ bɔɔluu cheleŋ ya cho tueinɔŋndo o lani ni.”
19 Mɛɛ Muuse sɔɔŋguu dɔɔŋgɔɔ ikɛi, mbo cha nau fɔŋndɔ koŋ, nduyɛ mbo cha waŋnda yolaŋ, mbo duaunuŋ tumbe tau tau. Okoŋ, mbo mal pouta yɛndɛla wa ndu o ba laŋ o pembei bɛŋgu, mi la pesi wɔ wɔ.
20 Mbo chua nau fɔŋndɔ nda toosiaa koŋ ndo, mbo kɔ lom ndu, nduyɛ mbo chuii ndu mululu. Mbo chua pulta laŋ, mbo sɛŋi laŋ o mɛŋndaŋ niŋ, nduyɛ mbo tosa mi Isɔluɛiya kol mɛŋma maŋ.
21 Mi Muuse nyuna Elɔŋ aa: “Le yɛɛnɛ ŋ sim yɛ waŋnda haa lachi, ma tosa haki bɛndu waa nuaa?”
22 Mi Elɔŋ muli aa: “Duaunuŋ tumbe a ya le masanɔ nuu. Numpila sina kɛsɛ mɛɛ waŋnda haa nɔ yeemɛi le dɛnɛ wɔɔŋndo tosaa yɛ.
23 Nda dimul la ni aa, ‘Toosial naa mɛlɛka mbo sim naa lachi, kanifuule ŋ sina nyɛ yɔŋnuŋ a Muuse wo hoo, po soli naa o lɛŋnde Ichipi leŋ niŋndo le.’
24 Le hei, mi dimul nda aa, ‘Wana o wana nɔ pɛ kooliiye, o soli mbo chuu ya.’ Okoŋ mi wou muŋ o yiŋ, mi nau fɔŋndɔɔ hoo fula.”
25 Mi Muuse cha maa mi Elɔŋ mal waŋnda haa o ba ndaa choo. Le hei, ma tualnuŋ lasiɔmbu yaamɔɔwaa ndaa o hɔl.
26 Okoŋ mi Muuse kɔ sim o dio dɔɔŋgɔɔ sondoo, mbo dimi aa: “Wana o wana cho kumbuii Chɛhowa ve, o sɔɔŋguu ya ikɛi nanuŋ!” Okoŋ mi Livaiya kpou kɔ balu ndu.
27 Mi Muuse dimul nda aa: “Nyɛ Chɛhowa Mɛlɛka Isɔluɛiya dimi wo cho hoo ni, ‘Wana o wana sayiaŋ muɛi nduɛi faŋnde, mbo balu o dɔɔŋgɔɔ niŋ silɔ, okoŋ mbo dii bɛ ndɔ ɔɔ pɔmbɔ ndɔ, wana nda chiɛɛliaŋ ndo ɔɔ chaaŋ ndɔ kpɛɛluŋ ndo.’”
28 Mi Livaiya tosa mɛɛ Muuse dimul nda yɛ. O paale leŋ choo, ma diu diu puaa le 3,000.
29 Okoŋ mi Muuse dimul nda aa: “Chɔŋ hau kɔ kɛ, la wa a yɔŋgaŋ le wali Chɛhowa wo tosaa. Kanifuule, la chɔulaba puaa nyaa, bɛndaa nyaa a pɔmbuaa nyaa. Nduyɛ o cho nya salaa dɔwɔɔ paale hauleŋ ndeŋ.”
30 Diimandɔɔ, mi Muuse dimul waŋnda aa: “La tosa haki bɛndu bɛndoo. Lelaŋ, I cho lakɔ naa Chɛhowa chua o pembei choo, naapum dɔɔ mi soo o ndu lo, mbo mal nya haki.”
31 Mi Muuse miiŋgu naa Chɛhowa chua mbo dimul ndu aa: “Nuawɔ se haki bɛndu waŋnda haa tosa wo! A toosiaa mɛlɛka ŋkooliiyo le ndapila!
32 Kɛ a yandii, mal nda haki le nyɛ nda tosa wo. Te o cho koŋ te, mɛɛ wɔɔsuu diola nilaŋ o yau numndo niŋ.”
33 Kɛ mi Chɛhowa dimul Muuse aa: “Wana tosa hakioo a ya wo, ndu ya wɔɔsuu diolaŋ o yau nuu niŋ ni.
34 Lelaŋ, miiŋgu niko ma kɔ sim waŋnda lachi, ma kuɛ a nda o fondaŋ ya chɔm num ndo. Maalikɛinɔ nuu cho wa kɔlaŋ nya lachi. Nduyɛ paale ya cho nda yamɛi kilul teŋ, I cho nda nyɛpalaa tusi choo le haki ndaa.”
35 Okoŋ kɔɔli, mi Chɛhowa kandu waŋnda naa wɔɔŋndo tusioo choo, le nau fɔŋndɔ nda dimul Elɔŋ mbo toosial nda wo.
