Ɛsodɔɔ 33:1-23
33 Mi Chɛhowa dimul vɛlɛ Muuse aa: “Faŋaŋ a wanaa ŋ fula o lɛŋnde Ichipi leŋ niŋnda o fondaa hoo, mi la hiou lachi a kɔlaŋ. La kɔ o lɛŋnde ya chuel Ebilaham, Aase, a Chekɔpu buŋgɛi leŋ niŋ. Mi dimul nda aa, ‘Chuauwaa nyaa mamaa* ya cho lɛŋndeŋ ndeŋ ke ni.’
2 I cho maalikɛinɔɔ yɔŋ nya lachi, okoŋ mbo tou Kenanaitiiya, Amɔluaitiiya, Hitaitiiya, Pɛluisaitiiya, Hivaitiiya, a Chɛbusaitiiya.
3 La kɔ o lɛŋnde milikiiyaŋ* a liaaŋ ma cho taaliaa leniŋ ndeŋ. Kɛ I cho lakɔ latulu a nya le, yɔŋii ya kei nya diu diu o nɛi tɛɛŋ, kanifuule la cho bɔɔ wanaa bolii kala.”
4 Mɛɛ waŋnda tuei yooŋgu wɔɔŋndo hoo, ma kandu mɔnɛi biyɔɔ, nduyɛ wana pilɛ bɛɛ wounuŋ nyɛm ndɔŋ kɛvɛlɔŋ te.
5 Mi Chɛhowa dimul Muuse aa: “Dimul Isɔluɛiya aa, ‘Wanaa bolii kalaa nya cho ni. Ndoo lo niŋ chobe mi yaa kuɛ nya tɛɛŋ, mi diu diu nya. Lelaŋ, la wounuŋ ndɔ nyɛm nyaŋ kɛvɛlɔŋ te haaa mi yiyaŋ nyɛ ya cho nya tosal lo.’”
6 Lelaŋ chɔŋ o Pembii Holuɛɛbi Ve kɔ kɛ, Isɔluɛiya wounuŋ ndɛ nyɛm ndaŋ kɛvɛlɔŋ te.
7 Okoŋ mi Muuse faŋa tɛndii ndɔɔ o dɔɔŋgɔɔ niŋ, mbo kɔ simi ndu tiŋ landaŋ a dɔɔŋgɔɔ. Mbo veelu ndu aa tɛndii bɔŋaŋndo. Nduyɛ wana o wana ndoo yeema pɛ Chɛhowa nyunaa le nɛi chɔmaa, ndoo nɔ mbo kuɛ o tɛndii bɔŋaŋ wa koŋ landaŋ a dɔɔŋgɔɔ wo.
8 Dimioo nuaa mi Muuse ndoo kuɛ o tɛndiiyo, mi waŋnda kpou ndaa chɛŋ ma sim o tɛndiila ndalaŋ sondoo. Okoŋ, ma lo Muuse nuaa haaa mbo luɛi o tɛndiiyo niŋ.
9 Dimioo nuaa mi Muuse ndoo luɛi o tɛndiiyo niŋ, mi yumbu yumbu ikpuŋgbaa ndoo tol, mbo sim o tɛndiiyo sondoo, okoŋ mi Mɛlɛka soo o Muuse lo.
10 Te waŋnda kpou ndaa che pɛ yumbu yumbu ikpuŋgbaa isisi o tɛndiiyo sondoo, mi wana o wana ndoo chɛŋ mbo baŋ wulaŋ o tɛndii ndɔɔ sondoo.
11 Mi Chɛhowa ndoo soo naa Muuse chua hɔlla a hɔlla, mɛɛ waŋndo suaa nuaa o chaaŋ ndɔ wanachioo lo yɛ. Te Muuse ndoo miiŋgu pɛ o dɔɔŋgɔɔ niŋ, Chɔɔsuaa, po Nuŋ ndo, wana ndɔ malaa ndoo lo o tɛndiiyo ni.
12 Mi Muuse dimul Chɛhowa aa: “A dimul la aa, ‘Sim waŋnda haa lachi ma kuɛ a nda,’ kɛ a chɔm ndɔ ya wana ŋ cho viomɔɔ miŋ kuɛ latulu wo le. Le handɔɔ lechoo, a dimul la maa a sina ya nyɛkɛndɛi,* nduyɛ maa I cho wana sɔvɛ num o hɔl.
13 Lelaŋ a yandii, te I cho pɛ wana sɔvɛ num o hɔl, mɛɛ tosa mi sina nɛila numndaŋ le mi sina num, nduyɛ mi hiou lachi a waa wana sɔvɛ num o hɔl. Loonuŋ maa wanaa numnda waŋnda haa cho ni.”
14 Mbo dimul ndu aa: “Ya pila cho lakɔ latulu a num, nduyɛ I cho tosa ma sɔla pɛŋgioo.”
15 Okoŋ mi Muuse dimul ndu aa: “Te numpila kue niŋ a naa latulu le, mɛɛ tosa miŋ faŋaŋ o fondaa hoo le.
16 Vɛɛ waŋnda cho yɛ looku sina maa ya a wanaa numnda cho wanaa sɔvɛ num o hɔl? Te o cho ma kuɛ a naa latulu le, vɛɛnɛ waŋnda o lɛŋndeŋ choo kpou cho yɛ sina yɛ yiɔɔ wanaa numnda tɛɛŋ a waŋnda apiliaa?”
17 Mi Chɛhowa dimul vɛlɛ Muuse aa: “I cho tosa nyɛ ŋ dimi wo, kanifuule a cho wana sɔvɛ ya o hɔl, nduyɛ I sina num nyɛkɛndɛi.”
18 Okoŋ mi Muuse dimul ndu aa: “A yandii, tosa mi che paŋgele numndo.”
19 Kɛ mbo dimul ndu aa: “I cho num keeku o hɔl, ma che mɛɛ ya cho wana kɛndɛ yɛ. Nduyɛ, I cho tosa ma sina maa diola nilaŋ la cho Chɛhowa ni. Wana ya yeema pɛ mi chua wana sɔvɛ, I chua ndu wana sɔvɛ. Nduyɛ wana ya yeema pɛ mi tuiinuŋ inyiɛɛ, ndu ya tuiinuŋ inyiɛɛ ni.”
20 Mbo dimi vɛlɛ aa: “A nɔla ma che hɔlaa niaa le, kanifuule wanachioo nɔla mbo che ya mbo wa yoomu le.”
21 Mi Chɛhowa dimul ndu vɛlɛ aa: “Nuawɔ fondaa ya ikɛi nanuŋ. Kɔ sim o pou koŋ choo.
22 Te I wa pɛ keilaŋ num o hɔl le ma che paŋgele nuu, I cho num wou o pou tɛndɛiyo tɛɛŋ, mi handu num ba nuu o hɔl haaa mi hiou.
23 Te I hiou pɛ, I faŋa num ba nuu o hɔl, okoŋ a che ya kɔɔ. Kɛ hɔlaa niaa nda, a cho nda chɔ le.”
