Ɛsɔdɔɔ 34:1-35
34 Okoŋ, mi Chɛhowa dimul Muuse aa: “Siɔl pouta yɛndɛlaŋ la tiɔɔŋ maa la taselaŋ. Nduyɛ diomnda wa o pouta yɛndɛla tasela ŋ pɛl taŋ choo laŋ, I cho laŋ miŋgi poonyiaa lechoo.
2 Bɛɛndiaŋ le ma kuɛ siɔdii idii o Pembii Sanai Ve choo, ma kɔ sim ya lachi loŋ.
3 Kɛ wana o wana nɔ mbo kuɛ a num latulu le, nduyɛ wana o wana cheleŋ nɔ mbo wa o pembii keŋ choo le. Saa ni, chuiŋ ni, nau ni, a nɔ ma wa diolaŋ o pembii keŋ ikɛi le.”
4 Okoŋ, mi Muuse toosiaa pouta yɛndɛlaŋ la tiɔɔŋ maa la tase laŋ, mbo chaŋ idiiyo puŋ a laŋ o ba, mbo hel o Pembii Sanai Ve choo a mɛɛ Chɛhowa dimul ndu yɛ.
5 Okoŋ kɔɔli, mi Chɛhowa tual o yumbu yumboo niŋ, mbo kɔ sim ndu ikɛi loŋ, nduyɛ mbo yonda maa diola ndɔlaŋ la cho Chɛhowa ni.
6 Chɛhowa wa keekulaŋ ndu o hɔl mbo yonda aa: “Ya cho Chɛhowa ni. Ya cho Chɛhowa ni. Mɛlɛka nɔ nyiɛɛye a kɛndɛiyo. I cho wana dɔunuŋ tumbe chɔ chɔ le, nduyɛ kaala lo lechoo nuu cho bɔɔ. Le teleŋ o teleŋ, tonyaa ya dimi ni.
7 Waŋnda o waalaŋ niŋ ya chɔm kaala lo lechoo wo ni, mi mal waŋnda haki le biondɔŋnda ndalaŋ a le hakila ndalaŋ. Kɛ nduyɛ, wanaa dɛnɛ wɔɔŋnda nda, nyɛpalaa ya tusi nda choo ni. Nduyɛ mi tosa mi chuauwa, chuauwaa mamaa, a chuauwaa mamaa o chuauwaa mamaa kɔɔli sɔla fulamakɔɔlila wɔɔŋndaŋ le hakila finyaa ndaa tosa laŋ.”
8 Mi Muuse baŋ wulaŋ chɔ chɔ, mbo fuuluu hɔlla lɛŋ.
9 Okoŋ mbo dimi aa: “Oo Chɛhowa, mi che bɛɛ wanaa bolii kalaa naŋ cho ni, kɛ te I cho pɛ wana sɔvɛ num o hɔl, mɛɛ a yandii Chɛhowa, kɔ latulu a naa nduyɛ ma mal naa haki le hakila naalaŋ. Chua naa maa wanaa numnda naŋ cho ni.”
10 Okoŋ mi Mɛlɛka dimul ndu aa: “I cho kpemaa yii a nya. I cho sɔɔŋ kɔndɔfiliŋ bɛndoŋ tosa wanaa numnda kpou o hɔl. Nduyɛ o lɛŋndeŋ choo kpou a o kaalaŋ tɛɛŋ kpou, kani bɛɛ i waa lende yɔŋnuŋ ndɔ le. Wanaa nya cho tɛɛŋ nda kpou cho chɔ wali ya Chɛhowa cho tosa le nya wo, kanifuule suɛi kɔndɔfilii bɛnduei i cho wa ni.
11 “La yaŋ nilaŋ nyɛkɛndɛi o nyɛ ya cho nya hau dimullo wo. I cho Amɔluaitiiya, Kenanaitiiya, Hitaitiiya, Pɛluisaitiiya, Hivaitiiya, a Chɛbusaitiiya touwɔɔ nya lachi.
12 La wa yekeŋ. La yii kpemaa a wanaa nya cho komal o lɛŋnde nya cho kɔlaŋ ndeŋ niŋnda le, yɔŋii i wa yaŋɔɔ leŋ le nya.
13 Kɛ la nɔ mi la puusiaa bandula ndala luamaa lasalalaŋ, nduyɛ mi la pesi pesi suŋgbuma nda toosiaa a poutaŋ ndaŋ, vɛlɛ a suŋgbuma iyɔm nda simi le sooluuwo waŋ.*
14 La nɔ mi la beŋ mɛlɛka cheleŋ lawu le ndu sooluu le, kanifuule ya Chɛhowa, ya pilɛ kpe nya nɔ ni mi la piɛi. A tonya, ya cho Mɛlɛka nya nɔ mi la piɛiyo ni.
15 La wa yekeŋ. La yii kpemaa a waŋnda o lɛŋndeŋ niŋ te. Kanifuule, te a wa pɛ kaa ihini nɔɔlɛiyo tosaa a mɛlɛkaa ndaa, nduyɛ ma soli salaa o mɛlɛkaa ndaa lo, waŋndo cho nya veelu mi la kɔ dio sala ndɔɔ.
16 Okoŋ, la cho chuauwaa ndaa laanduaa apum chua, mi la ke puaa nyaa o nɔlaŋ niŋ, nduyɛ te chuaa ndaa laandaa kaŋ wa pɛ kaa ihini nɔɔlɛiyo tosaa a mɛlɛkaa ndaa, a cho tosa mi puaa nyaa bɛɛ tosa kaa ihini nɔɔlɛiyo a mɛlɛkaa ndaa.
17 “La toosiaa mɛlɛkaa a chiliŋnde le.
18 “La nɔ mi la bii Bɔŋaŋ Beedii Nɔ Yiisii* Leniŋ te Wo. Le palɛi i ŋɔmmɛu, la nɔ mi la wa beedii nɔ yiisii leniŋ te wo dioo a teleŋ kpeekpeiyo o paŋgii Abibi* ve niŋ, a mɛɛ ya dimul nya yɛ. Kanifuule, o paŋgii Abibi ve niŋ nya fula o lɛŋnde Ichipi leŋ niŋ ni.
19 “Puaa nyaa tasiaa kpou,* le ya nda cho ni. Nduyɛ chuauwaa piaanduaa tasiaa chɔluaa nyaa kuam nda kpou, o wa nau ɔɔ saa, le ya nda cho ni.
20 Chuale tasele sofɛlɔɔ cho komɔɔ leŋ, la nɔ mi la baŋa leŋ a saa. Kɛ te la baŋa leŋ te, mɛɛ la yom leŋ kɛsei. La nɔ mi la baŋa po tase kɛ kɛ o chuauwaa nyaa tɛɛŋ, nduyɛ wana o wana nɔ mbo hiŋ ya lachi bala fondo le.
21 “La nɔ mi la tosa walta nyalaŋ le palɛi i ŋɔmpum, kɛ o paale ŋɔmmɛu leŋ choo, la nɔ mi la pɛŋgi. O yɔŋ bɛɛ aa teleŋ la wayiaa ɔɔ teleŋ chiɔɔŋ kuauwaa, la nɔ mi la pɛŋgi.
22 “Te la wa pɛ kuluŋ tasoŋ kowɔɔ o chiɔɔŋ nyaŋ niŋ, la nɔ mi la bii Bɔŋaŋ Chiɔɔŋ Kuauwaa* a Bɔŋaŋ laBafɛiyo* o wɔsioo mɛɛlulaŋ.
23 “Bɛmbɔɔ le yaa o wɔsioo niŋ, puaa nyaa kpou nɔ ma chuuŋgiaŋ ya Chɛhowa, masanɔ tonyaa lachi, Mɛlɛka Isɔluɛiya.
24 I cho kaala cho nya lachi laŋ touwɔɔ, nduyɛ mi tosa mi tanda nyaa wa tau. Teleŋ nya cho wa kɔlaŋ bɛmbɔɔ le yaa o wɔsioo niŋ ya Chɛhowa Mɛlɛka nyaa lachi wo, I cho tosa wana o wana helu niŋ lɛŋnde nyaleŋ te.
25 “Kooma nya soli salaa o ya lo waŋ, la muuliaŋ maŋ a nyɛ o nyɛ nɔ yiisiiyo leniŋ te. Nduyɛ, sala nya cho soli le Bɔŋaŋ Hiouwɔɔ Choo Wo biyɔɔ wo, o nɔ mbo lɔl kuya le.
26 “Tɔlɔɔla tasela kɛndɛ kɛndɛla nya kuau o chiɔɔŋ nyaŋ niŋndaŋ, la nɔ mi la hiŋ a laŋ o chiɛi ya Chɛhowa Mɛlɛka nyaa niŋ.
“La yau chuiŋ chuaa o mɛɛma kala ndɔ waŋ niŋ te.”
27 Mi Chɛhowa dimul vɛlɛ Muuse aa: “A nɔ ma poonyiaa diomndaŋ ndaŋ, kanifuule a laŋ ya cho kpemaa yii a num vɛlɛ a Isɔluɛiya ni.”
28 Le palɛi 40 a nyumndaŋ 40, Muuse wa o Pembei choo latulu a Chɛhowa. O di nyɛdiaa* le, nduyɛ o kol mamɛŋ te. Mbo* poonyiaa diomnda kpemalaŋ o pouta yɛndɛlaŋ choo, laŋ la cho yɛ Sawala Tɔ Laŋ ni.
29 Okoŋ kɔɔli, mi Muuse tual o Pembii Sanai Ve choo. Nduyɛ pouta yɛndɛla tiɔɔŋnda sawalaŋ la wa la poonyiaa lechoo laŋ la wa ndu o laba. Mɛɛ Muuse tol pembei, o sina bɛɛ pɛŋ maa hɔlla wa ndu ŋɛlɛŋgi ŋɛlɛŋgi le mɛɛ nda wa suukaŋndo nda Mɛlɛka yɛ le.
30 Mɛɛ Elɔŋ nda Isɔluɛiya kpou che Muuse, ma cha ndu hɔlla iŋɛlɛŋgi ŋɛlɛŋgiei, ma yɔŋ sioŋnde le ndu sɔɔŋguuwo ikɛi.
31 Kɛ mi Muuse veelu nda, okoŋ mi Elɔŋ a yuŋgula leboltaŋ kpou o Isɔluɛi niŋ kua naa ndu chua, mbo suaa o nda lo.
32 Okoŋ kɔɔli, mi Isɔluɛiya kpou sɔɔŋguu ndu ikɛi, mbo chɔm nda sawala Mɛlɛka ke ndu o Pembii Sanai Ve choo laŋ kpou.
33 Te Muuse ndoo chii pɛ suɛi o nda lo, o kumbu hɔlaa nduaa a kola waaŋgaa wo.
34 Kɛ te ndoo luɛi pɛ Chɛhowa lachi le mbo soo o ndu lo, o faŋaŋ kola waaŋgaa wo o hɔl haaa mbo fula. Okoŋ o fula, o kɔ chɔm Isɔluɛiya nyɛ Mɛlɛka dimul ndu wo.
35 Te Isɔluɛiya ndaa che pɛ maa hɔlla cho Muuse ŋɛlɛŋgi ŋɛlɛŋgi, o miŋgiŋ kola waaŋgaa wo o hɔl, haaa mbo miiŋgu o tɛndiiyo niŋ le suɛi o Mɛlɛka lo.
Tɛɛsiaalaŋ
^ Tofa Tɛɛsiaa.
^ Ɔɔ “Bulu Nɔ Lɛvɛŋ.”
^ Tofa Tɛɛsiaa B15.
^ Hibuluiye, “nyɛ o nyɛ kumbi pulii vialɛi.”
^ Ɔɔ “Bɔŋaŋ Nya Bii Te Lɔɔlaŋ la Ŋɔmmɛu la Hiou pɛ Wo.”
^ Ɔɔ “Bɔŋaŋ laYɛkpɔɔ.”
^ Hibuluiye, “beedii.”
^ O sim le Chɛhowa.
