Ɛsɔdɔɔ 35:1-35
35 Okoŋ kɔɔli, mi Muuse chuuŋgiaa Isɔluɛiya kpou naapilɛ, mbo dimul nda aa: “Nyɛ Chɛhowa dimul naa le tosaa wo cho hoo ni:
2 La nɔ mi la tosa walta nyalaŋ o palɛi i ŋɔmpum bɛŋgu. Kɛ paale ŋɔmmɛu leŋ, paale diandaa leŋ le cho le nya ni, paale pɛŋgiaaleŋ le Chɛhowa. Wana o wana tosa wallo o paale leŋ choo pɛ, o nɔ mbo sɔla piɔmndo.
3 La nɔ mi la mɛndul leyiŋ o fondaŋnda nya cho ichali laŋ o Paale Pɛŋgiaaleŋ choo le.”
4 Mi Muuse dimul Isɔluɛiya kpou aa: “Nyɛ Chɛhowa dimi wo cho hoo ni,
5 ‘La yɔŋgu chuuŋgiaa le Chɛhowa. Wana o wana kɛɛsiaŋ pɛ o kɔl le mbo yɔŋgu chuuŋgiaa le Chɛhowa, o huŋ a ndu. La huŋ a kooliiyoŋ, kaniŋ humboŋ, chiliŋuŋ siaŋaŋ,*
6 kɛi buliiyo, kɛi yim yimndo, kɛi siaŋaa sɔɔtɔtɔɔ, fuŋnde kɛndɛ kɛndɛleŋ, yiiŋii chuiŋnda,
7 yaula saa nda yiŋ o nyɛma siaŋaŋ niŋndaŋ, yaula visiaa nɔ yiiŋnde tɔlɔkɔ laŋ, yɔmii akeesiaa ve,
8 chuɛiyaŋ le lambuilaŋ, baasamndo le chuɛima pɔyaŋ toosiaa a le nyɛm chuŋ kɛndɔŋ,
9 pouta ɔnisi laŋ, vɛlɛ a pouta cheleŋ le hɛɛnduuwo o doma biŋgioo* a o nyɛ nda handuŋ o takpa wo choo.
10 “‘Wana o wana chaa nyɛ a laba, o huŋ mbo toosiaa nyɛ o nyɛ Chɛhowa dimul naa le toosiaa.
11 Muŋ cho ni: tɛndiiyo a kolala nda kuumbuu lechoo laŋ kpou, nyɛm cho maa ŋ kela woŋ a wundɛila* ndɔlaŋ, kpɔlɔŋnda ndɔlaŋ, suŋgbuma nduaŋ, nyɛla ndɔla nda simi suŋgbuaŋ leniŋ ndaŋ,
12 kɔfu kpemaa a yɔmii nduɛi vilɛiye, kumbu ndɔɔ, kola bɛndoo le landɔɔ o tɛndiiyo niŋ,
13 tibiiyo* a yɔmii nduɛi vilɛiye, nyɛm ndɔŋ laandoŋ kpou, beedii* cho wa o yɔŋgaŋ o Mɛlɛka lo wo,
14 nyɛ kɛsiaa lambuiyo a nyɛm ndɔŋ laandoŋ, lambuila ndɔlaŋ a chuɛiyaŋ le laŋ mɛndullo,
15 bandu luamaa nyɛm chuŋ kɛndɔŋ a yɔmii nduɛi vilɛiye, chuɛiyaŋ le pɔyaa a nyɛm chuŋ kɛndɛ kɛndɔŋ, kola bɛndoo le landɔɔ o dio tɛndiiyo,
16 bandu luamaa lasalaa a kpasa ndɔ chiliŋii siaŋaa, yɔmii nduɛi vilɛiye a nyɛm ndɔŋ laandoŋ kpou, hɛŋgɛiyo a nyɛ nda kɛsi ndu lechoo wo,
17 kolalaŋ le lɛɛnduuwo o luŋ tɛndiiyo, suŋgbuma nduaŋ a nyɛla nda simi maŋ leniŋ ndaŋ, kola bɛndoo le landɔɔ o dio luŋ tɛndiiyo,
18 chiliŋuŋ siombu siombuŋ nda tuandu tɛndiiyo woŋ a yuei nduɛi, chiliŋuŋ siombu siombuŋ nda tuandu luŋ tɛndiiyo woŋ a yuei nduɛi,
19 domala womulaala kɛndɛ kɛndɛlaŋ le wallo o tɛndiiyo, domalaŋ le Elɔŋ wana soliaa lasalaa, vɛlɛ a domalaŋ le puaa nduaa cho wa wali wanaa soliaa lasalaa tosaa wa.’”
20 Okoŋ, mi Isɔluɛiya kpou faŋaŋ Muuse o hɔl, ma miiŋguŋ o tɛndiila ndalaŋ.
21 Mi wanaa kɔlta ndalaŋ la nyindu nda le chuuŋgiaa yɔŋgoo wa huŋ a chuuŋgiaa ndaa le Chɛhowa, le ma soliŋ ndu kpeku le tɛndii bɔŋaŋndo toosiaa, wali kɛ kɛ cho a ndu okɔɔ, a le domala wanaa soliaa lasalaa cho wa wallo laŋ toosiaa.
22 Wana o wana kɔl ndɔɔ nyindu, wana pɔnɔ ni wana lanɔ ni, a wa tuŋ hunɔɔ a peniiyoŋ, kelaŋ lanioŋ, kelaŋ ŋsooŋ, a nyɛm kɛvɛlɛŋ cheleŋ. A wa vɛlɛ hunɔɔ a nyɛm yɛ yɛŋ cheleŋ nda toosiaa a kooliiye woŋ. Mi nda kpou huŋ a salala ndala ŋkooliilaŋ* o Chɛhowa lo.
23 Wana o wana ndoo nɔ kɛi buliiyo, kɛi yim yimndo, kɛi siaŋa sɔɔtɔtɔɔ, fuŋnde kɛndɛ kɛndɛleŋ, yiiŋii chuiŋnda, yaula saa nda yiŋ o nyɛma siaŋaŋ niŋndaŋ, a yaula visiaa nɔ yiinde tɔlɔkɔ laŋ, mbo huŋ a muŋ.
24 Mi wanaa ndaa nɔ kaniŋ humboŋ a chiliŋuŋ siaŋaŋ nda kpou huŋ a chuuŋgiaa ndaa o Chɛhowa lo. Nduyɛ, mi wanaa ndaa nɔ yɔmii akeesiaa ve le wali suu o suu tosaa wa bɛɛ huŋ a ndi.
25 Mi waŋ laanduaa ndaa chaa womullo wa kpou huŋ a nyɛm nda womulloŋ. Muŋ cho ni: kɛi buliiyo, kɛi yim yimndo, kɛi siaŋa sɔɔtɔtɔɔ, a fuŋnde kɛndɛ kɛndɛleŋ.
26 Mi waŋ laanduaa ndaa chaa womullo nduyɛ mi kɔlta ndalaŋ la nyindu nda wa kpou womul yiiŋii chuiŋndo.
27 Mi yuŋgula leboltaŋ la huŋ a pouta ɔnisi laŋ, vɛlɛ a pouta cheleŋ le hɛɛnduuwo o doma biŋgioo choo, a o nyɛ nda handuŋ o takpa wo choo.
28 Ma huŋ vɛlɛ a baasamndo, chuɛiyaŋ le mɛndullo, chuɛiyaŋ le pɔyaa, vɛlɛ a nyɛm chuŋ kɛndɔŋ.
29 Wana o wana kɔl ndɔɔ nyindu, wana pɔnɔ ni wana lanɔ ni, ma huŋ a nyɛ le wali Chɛhowa dimul Muuse wo tosaa. Mi Isɔluɛiya yɔŋgu Chɛhowa kela ndalaŋ, a mɛɛ nda kɛɛsiaŋ o lakɔl lɛ.
30 Okoŋ mi Muuse dimul Isɔluɛiya aa: “Chɛhowa hɛli Bɛsalɛɛ, po Yului wo, ndu yɔŋnuŋ ni maa po mama Hɔɔ wo, fulaa o kaale Chuda leŋ choo.
31 O ke ndu nyina ndɔɔ mbo sɔla taasioo, sinapɛŋgoo, vɛlɛ a kɔl kaloo le tosaa wali suu o suu nda toosiaa nyɔɔŋ a laba,
32 le nyɔɔŋ tuuliaa, le wallo a kooliiye, kanii humbuei, chiliŋii siaŋɛi,
33 vɛlɛ a wallo le poutaŋ siɔlɔɔ a laŋ hɛɛnduuwo kpɛ kpɛ, nduyɛ mbo chaa nyɛ o nyɛ toosiaa a yɔmnde.
34 O dɔu Bɛsalɛɛ a Oholiabi, po Ahisamaki wo o kɔl le ma pɛɛku acheleŋnda. Ahisamaki yɛ, o kaale Daŋ ndeŋ choo o fula ni.
35 O ke nda taasioo le ma chaa wali laba kɛ kɛ tosaa, kolaa hɔwɔɔ, wɔmullo a kɛi buliiyo, kɛi yim yimndo, kɛi siaŋa sɔɔtɔtɔɔ, a fuŋnde kɛndɛ kɛndɛle wana luaa lakolaa toosiaa leŋ. Puaa haa cho wa wali suu o suu tosaa, nduyɛ ma bɛɛndiaa nyɛ o nyɛ nda tuuliaa a laba.
Tɛɛsiaalaŋ
^ Ɔɔ “kapaa.”
^ Tofa Tɛɛsiaa.
^ Ɔɔ “finɛtelela.”
^ Ɔɔ “tabalioo.”
^ Ɔɔ “bulu.”
^ Ɔɔ “salala keeliaa laŋ.”
