Ɛsɔdɔɔ 36:1-38
36 “Bɛsalɛɛ, Oholiabi, a wanaa chaa nyɛ a laba wa kpou cho nyɛm cho a tɛndiiyo okɔɔ woŋ kpou toosiaa ni, a mɛɛ Chɛhowa dimi yɛ. Chɛhowa ke nda taasioo le ma toosiaa muŋ nyɛkɛndɛi.”
2 Okoŋ kɔɔli, mi Muuse veelu Bɛsalɛɛ, Oholiabi, wana o wana chaa nyɛ a laba mi Chɛhowa ke ndu taasioo, a wana o wana kɔl ndɔɔ nyindu ndu le mbo yɔŋguŋ le wallo.
3 Chuuŋgiaala Isɔluɛiya yɔŋgu le wali tɛndiiyo laŋ kpou, ma bii laŋ Muuse o ba. Kɛ idii o idii, waŋnda wa tuŋ hiouwɔɔ lachi a kɔlaŋ a chuuŋgiaala ndalaŋ o ndu lo.
4 Mɛɛ nda kandu wali tɛndiiyo, wanaa chaa nyɛ a laba ma wa wali tɛndii koŋ tosaa wa kpou wa hunɔɔ a pilɛŋ pilɛŋnda,
5 ma dimul Muuse aa: “Waŋnda cho hunɔɔ a nyɔɔŋ tau mbo hiau pɛŋ mɛɛ Chɛhowa nyuna le wallo hoo tosaa yɛ.”
6 Okoŋ, mi Muuse dimi le ma yonda o dɔɔŋgɔɔ niŋ kpou aa: “Wana pɔnɔ ni, wana lanɔ ni, wana o wana huŋ lɛ a chuuŋgiaa le wali tɛndiiyo le.” Le hei, ma kuuna waŋnda hunɔɔ a chuuŋgiaala ndalaŋ.
7 Nyɛm waŋnda chuuŋgiaa le wali tɛndiiyo tosaa woŋ wa tau, mbo hiau mɛɛ muŋ yeemaŋ yɛ.
8 Okoŋ, mi wanaa chaa nyɛ a laba wa toosiaa tɛndiiyo a kolala ŋpɛŋgɛlaŋ tɔ, la nda toosiaa a fuŋnde kɛndɛ kɛndɛleŋ, kɛi buliiyo, kɛi yim yimndo, vɛlɛ a kɛi siaŋa sɔɔtɔtɔɔ laŋ. Nduyɛ, mbo* tuuliaa chɛlɔbiiya lechoo.
9 Kolalaŋ ndaŋ, o kɛ kɛ wa bandei nɛiyo 42,* a toŋgei nɛiyo 6. Kolalaŋ ndaŋ kpou, la wa kpeŋkpeŋ.
10 Okoŋ, mbo chua kolala tɛndiiyo hoo la ŋuɛɛnu mbo suandu laŋ naapilɛ, nduyɛ mbo chua la ŋuɛɛnu laŋ la pilɛ laŋ mbo suandu laŋ naapilɛ.
11 Okoŋ kɔɔli, mbo toosiaa nyɛlaŋ maa ŋkela a kɛi buliiyo, mbo bayiaa laŋ o bɔɔle kola bɛndu tɛndiiyo, naa la bɔŋa naapilɛ wa. Nduyɛ mbo tosa vɛlɛ nyɛ pilɛ kpe a kola bɛndu tɛndiiyo o pilɔɔ.
12 Mbo toosiaa nyɔɔŋ 50 maa ŋkela le kola tɛndiiyo o pilɛ, nduyɛ mbo toosiaa vɛlɛ nyɔɔŋ 50 maa ŋkela le kola tɛndiiyo o pilɔɔ. Okoŋ mbo hɛɛnduu muŋ o bɔɔle kola kɛ kɛ, naa la bɔŋa naapilɛ wa.
13 O mɛɛlulaŋ kpɔŋ, mbo toosiaa doluŋndoŋ 50 a kooliiye, mbo mɔɔsa kolala tɛndiiyo naapilɛ a muŋ, okoŋ mi tɛndiiyo simnuŋ nyɔɔ o pilɛ.
14 Mbo toosiaa vɛlɛ kolala tɛndiiyo a yiiŋii chuiŋndo, le tɛndiiyo kumbɔɔ. Mbo toosiaa kolalaŋ 11.
15 Kolalaŋ ndaŋ, o kɛ kɛ wa bandei nɛiyo 45, a toŋgei nɛiyo 6. Kolala 11 laŋ ndaŋ la wa kpeŋkpeŋ.
16 Okoŋ, mbo chua kolala tɛndiiyo hoo la ŋuɛɛnu mbo suandu laŋ naapilɛ, nduyɛ mbo chua la ŋɔmpum ndaŋ la pilɛ laŋ mbo suandu laŋ naapilɛ.
17 Mbo toosiaa nyɔɔŋ 50 maa ŋkela, mbo bayiaa muŋ o bɔɔle kola tɛndiiyo, naa la bɔŋa wa. Nduyɛ, mbo tosa vɛlɛ nyɛ pilɛ koŋ kpe a kola tɛndiiyo o pilɔɔ.
18 Okoŋ kɔɔli, mbo toosiaa doluŋndoŋ 50 a chiliŋii siaŋɛi, le tɛndiiyo yiiyo mbo simnuŋ nyɔɔ o pilɛ.
19 Mbo toosiaa kola tɛndiiyo a yiiŋii saa nda yiŋ o nyɛma siaŋaŋ niŋndo, vɛlɛ a kola yau visi nɔ yiiŋnde tɔlɔkɔ wo le kumbɔɔ o kola koŋ choo.
20 Okoŋ, mbo toosiaa wundɛila* tɛndiiyo a yɔm akeesiaa wo mbo simi laŋ.
21 Wundɛi kɛ kɛ wa helɔɔ nɛiyo 15, a toŋgei nɛiyo le diiŋ a nyɛɛmbɔ.
22 Wundɛilaŋ ndaŋ, o kɛ kɛ ndoo nɔ yɔmnde i ŋiiŋ le bɔŋaa a chaaŋ ndɔ. Mɛɛ nuaa o toosiaa wundɛilaŋ kpou le tɛndiiyo ni.
23 Okoŋ, mbo toosiaa wundɛilaŋ 20 le tɛndiiyo kpeŋgii ba tou ve.
24 Mbo toosiaa nyɛla nda simi laŋ leniŋ ndaŋ 40 a kanii humbuei, le wundɛila 20 ndaŋ simioo leniŋ. Wundɛi kɛ kɛ ndoo nɔ nyɛla nda simi ndu leniŋ ndaŋ la tiɔɔŋ, le yɔmii nduɛi ŋiiŋnde wouwo leniŋ.
25 Mbo toosiaa vɛlɛ wundɛilaŋ 20 o tɛndiiyo ba luaŋ ndo,
26 a nyɛla nda simi laŋ leniŋ ndaŋ 40 a kanii humbuei. Wundɛilaŋ ndaŋ, o kɛ kɛ ndoo nɔ nyɛla nda simi ndu leniŋ ndaŋ la tiɔɔŋ. Kumbuii kɛ kɛ o pilɛ.
27 Mbo toosiaa wundɛilaŋ la ŋɔmpum o tɛndiiyo amakɔɔ kpeŋgii ba paaleŋ le del lo.
28 Mbo toosiaa vɛlɛ la tiɔɔŋ o sɔŋgila tiɔɔŋnda tɛndiiyo amakɔɔ.
29 Wundɛilaŋ ndaŋ la wa la bɔŋaa chɔŋ lebɛŋgu haaa o kelɛi tasei. Mɛɛ nuaa o toosiaa wundɛila tiɔɔŋndaŋ o sɔŋgilaŋ ni.
30 Kpou kpou, wundɛilaŋ la ŋɔmaa a nyɛla nda simi laŋ leniŋ ndaŋ 16, la nda toosiaa a kanii humbuei laŋ. Wundɛi kɛ kɛ ndoo nɔ nyɛla nda simi ndu leniŋ ndaŋ la tiɔɔŋ.
31 Okoŋ, mbo toosiaa kpɔlɔŋndaŋ la ŋuɛɛnu a yɔm akeesiaa wo, le wundɛilaŋ o tɛndiiyo kpeŋgii ba tou ve.
32 Mbo toosiaa vɛlɛ kpɔlɔŋndaŋ la ŋuɛɛnu le wundɛilaŋ o tɛndiiyo kpeŋgii ba luaŋ nde, a kpɔlɔŋndaŋ la ŋuɛɛnu le wundɛilaŋ amakɔɔ o tɛndiiyo ba paaleŋ le del lo.
33 Mbo toosiaa kpɔlɔŋndo o wundɛilaŋ tɛɛŋ, chɔŋ o tɛndiiyo kpeŋgei i pilɛ haaa kpeŋgei i pilɛi.
34 Mbo kumbu wundɛilaŋ ndaŋ a kooliiye, nduyɛ mbo toosiaa kelaŋ a kooliiye le kpɔlɔŋndaŋ ndaŋ saa. Okoŋ kɔɔli, mbo kumbu kpɔlɔŋnda laŋ a kooliiye.
35 Okoŋ mbo toosiaa kola bɛndoo a kɛi buliiyo, kɛi yim yimndo, kɛi siaŋa sɔɔtɔtɔɔ, vɛlɛ a fuŋnde kɛndɛ kɛndɛleŋ, nduyɛ mbo tuuliaa chɛlɔbiiya lechoo.
36 Mbo toosiaa suŋgbuaŋ ma hiɔɔlu a yɔm akeesiaa wo, mbo kumbu maŋ a kooliiye. Mbo toosiaa vɛlɛ doluŋndoŋ a kooliiye, vɛlɛ a nyɛla nda simi suŋgbuaŋ leniŋ ndaŋ la hiɔɔlu le suŋgbuma maŋ.
37 Okoŋ kɔɔli, mbo toosiaa kola bɛndoo o dio tɛndiiyo a kɛi buliiyo, kɛi yim yimndo, kɛi siaŋa sɔɔtɔtɔɔ, vɛlɛ a fuŋnde kɛndɛ kɛndɛleŋ,
38 latulu a suŋgbuaŋ ma ŋuɛɛnu vɛlɛ a doluŋndoŋ le kola koŋ landɔɔ. Nduyɛ, mbo kumbu suŋgbuma maŋ bolle vɛlɛ a kelaŋ ndɔŋ a kooliiye. Kɛ nyɛla ŋuɛɛnula nda simi maŋ leniŋ ndaŋ, a chiliŋii siaŋɛi nda toosiaa laŋ ni.
