Ɛsodɔɔ 37:1-29
37 Okoŋ, mi Bɛsalɛɛ toosiaa kɔfoo a yɔm akeesiaa wo. O wa bandei nɛiyo le yaa a tɛndaa tɛɛŋ,* toŋgei nɛiyo le diiŋ a tɛndaa tɛɛŋ, a helɔɔ nɛiyo le diiŋ a tɛndaa tɛɛŋ.
2 Mbo kumbu kɔfoo hoo leniŋ a o kɔɔ a koolii kɛndɛ kɛndɛi, nduyɛ mbo balu kooliiye hɛɛnduuwo o kɔfoo balɔɔ chɛ chɛ amaluaŋ.
3 Okoŋ kɔɔli, mbo toosiaa kelaŋ ŋ hiɔɔlu a kooliiye, mbo hɛɛnduu muŋ o peluŋ hiɔɔluŋ kɔfoo hoo amaluaŋ. Kumbuii kɛ kɛ kelaŋ ŋ muuŋ.
4 Mbo toosiaa vɛlɛ yɔmii vilɛiye i ŋiiŋ a yɔm akeesiaa wo, mbo kumbu ndi a kooliiye.
5 Mbo wou yɔmii vilɛi keŋ o kelaŋ cho o kpeŋguŋ kɔfoo woŋ le kɔlaŋ a ndu.
6 Mbo toosiaa kumbu kɔfoo hoo a koolii kɛndɛ kɛndɛi. O wa bandei nɛiyo le diiŋ a tɛndaa tɛɛŋ, a toŋgei nɛiyo le diiŋ a tɛndaa tɛɛŋ.
7 Mbo luaa kooliiye a haamɛiyo,* okoŋ mbo toosiaa chɛlɔbiiya a ŋiɔɔŋ o kpeŋguŋ muuŋ ndoŋ o kumbu kɔfoo choo.
8 O pilɛ wa kpeŋgei hei, mi o pilɔɔ wa kpeŋgei i pilɛi. Mbo toosiaa chɛlɔbiiya haa o kpeŋguŋ muuŋ ndoŋ o kumbu kɔfoo choo.
9 Kumbaŋnda ndalaŋ la wa la pɛɛŋgaa choo choo, mi la kumbu kumbu kɔfoo. Hɔlla wa nda a mululaŋ vellaa velle, ma tundu bolle o kumbu kɔfoo choo.
10 Okoŋ, mbo toosiaa vɛlɛ tibiiyo* a yɔm akeesiaa wo. O wa bandei nɛiyo le yaa, toŋgei nɛiyo le pilɛ a tɛndaa tɛɛŋ, a helɔɔ nɛiyo le diiŋ a tɛndaa tɛɛŋ.
11 Mbo kumbu ndu a koolii kɛndɛ kɛndɛi, nduyɛ mbo balu kooliiye hɛɛnduuwo chɛ chɛ o tibiiyo amaluaŋ.
12 Okoŋ mbo toosiaa kandoo o tibiiyo balɔɔ chɛ chɛ, nduyɛ o wa toŋgei a ba kɔllo kpeŋ. Mbo balu kooliiye hɛɛnduuwo o kandu koŋ chɛ chɛ.
13 Mbo toosiaa vɛlɛ kelaŋ ŋ hiɔɔlu a kooliiye, mbo hɛɛnduu muŋ o sɔŋgila hiɔɔlu laŋ, naa peluŋ hiɔɔluŋ tibiiyo cho wa.
14 Kelaŋ muŋ wa ŋ holaa kpɛɛluŋ a kandoo, le yɔmii vilɛiye wouwo leniŋ le kɔlaŋ a tibiiyo.
15 Mbo toosiaa yɔmii vilɛiye a yɔm akeesiaa wo, mbo kumbu ndi a kooliiye le kɔlaŋ a tibiiyo.
16 Okoŋ kɔɔli, mbo toosiaa nyɛm laanduŋ tibiiyo hoo a koolii kɛndɛ kɛndɛi. Muŋ cho ni: taalalaŋ, hɛŋgɛilaŋ, a taalala bɛndula nda wou salala mamuɛilaŋ leniŋ ndaŋ.
17 Mbo luaa koolii kɛndɛ kɛndɛi a haamɛiyo, mbo toosiaa nyɛ kɛsiaa la lambuiyo. Tum ndɔɔ, buŋgɛi nduɛi, lɔɔla ndɔlaŋ, taalala ndɔlaŋ, kpɛɛŋ ndɔŋ, a nyɛla cho maa lapeeŋge laŋ kpou, la wa la biilaŋ.
18 Nyɛ kɛsiaa la lambuiyo hoo ndoo nɔ lɔɔlaŋ la ŋɔmpum. Kpeŋgei hei la yaa, kpeŋgei i pilɛi la yaa.
19 Lɔɔ kɛ kɛ o kpeŋgei i pilɛ choo ndoo nɔ taalalaŋ la yaa, la tiilaŋ maa bil lapeeŋge yɔm amɔŋ ndo, a kpiɔɔŋ, vɛlɛ a nyɛla cho maa lapeeŋge laŋ. Mbo tosa nyɛ pilɛ koŋ kpe a lɔɔla cho kpeŋgei i pilɛi laŋ. Mɛɛ nuaa o toosiaa lɛuwuŋ ŋɔmpum nyɛ kɛsiaa la lambuiyo hoo ni.
20 Buŋgɛi nyɛ kɛsiaa la lambuiyo hoo ndii nɔ taalalaŋ la hiɔɔlu, la tiilaŋ maa bil lapeeŋge yɔm amɔŋ ndo, a kpiɔɔŋ, vɛlɛ a nyɛla cho maa lapeeŋge laŋ.
21 Lɔɔla tiɔɔŋnda tasela fula o buŋgɛi nyɛ kɛsiaa la lambuiyo hoo laŋ, laa nɔ kpɛi lebɛŋgu. La diiŋ ndɔ laŋ laa nɔ kpɛi lebɛŋgu, nduyɛ la tiɔɔŋnda mɛɛlaalaŋ bɛɛ laa nɔ kpɛi lebɛŋgu. Mɛɛ nuaa o tosa a kpɛɛŋ ŋɔmpum nyɛ kɛsiaa la lambuiyo hoo ni.
22 Koolii kɛndɛ kɛndɛi nda lɔɔ a haamɛiyo ni le nyɛ kɛsiaa la lambuiyo, kpɛɛŋ ndɔŋ, a lɛuwuŋ ndɔŋ toosiaa. Nduyɛ muŋ kpou wa ŋ biilaŋ.
23 Okoŋ kɔɔli, mbo toosiaa lambuila nyɛ kɛsiaa la lambuiyo hoo la ŋɔmmɛu, kpanyala ndɔlaŋ, a nyɛla ndɔla chuaa leyiŋndaŋ a koolii kɛndɛ kɛndɛi.
24 A koolii kɛndɛ kɛndɛi talɛŋnde i pilɛ,* o toosiaa ndu ni, latulu a nyɛm ndɔŋ laandoŋ kpou.
25 Mbo toosiaa bandu luamaa nyɛm chuŋ kɛndɔŋ a yɔm akeesiaa wo. Kpeŋguŋ ndɔŋ hiɔɔloŋ wa kpeŋkpeŋ. O wa bandei nɛiyo le pilɛ a tɛndaa tɛɛŋ, toŋgei nɛiyo le pilɛ a tɛndaa tɛɛŋ, a helɔɔ nɛiyo le yaa. Mbo toosiaa ndu latulu a leela ndɔlaŋ.
26 Mbo kumbu ndu a koolii kɛndɛ kɛndɛi lechoo, kpeŋguŋ ndɔŋ kpou, vɛlɛ a leela ndɔlaŋ. Mbo balu kooliiye hɛɛnduuwo amaluaŋ chɛ chɛ.
27 Mbo hɛɛnduu kelaŋ nda toosiaa a kooliiye woŋ ŋ muuŋ o kpeŋgoŋ vellaa velle, o fondaŋ o balu kooliiye hɛɛnduuwo chɛ chɛ wo bɛŋgu. O kelaŋ muŋ niŋ ndaa wou yɔmnde ni le kɔlaŋ a ndu.
28 Okoŋ kɔɔli, mbo toosiaa yɔmii vilɛiye a yɔm akeesiaa wo, mbo kumbu ndi a kooliiye.
29 Mbo toosiaa chuɛima diandaŋ le pɔyaa vɛlɛ a nyɛm chuŋ kɛndɛ kɛndɔŋ, nduyɛ mbo muuliaŋ muŋ nyɛkɛndɛi.
Tɛɛsiaalaŋ
^ Tofa Tɛɛsiaa B14.
^ Ɔɔ “malatoo.”
^ Ɔɔ “tabalioo.”
^ Talɛŋnde i pilɛ, lusul ndɔɔ wa le kilolaŋ 34 a nyɛ lechoo. Tofa Tɛɛsiaa B14.
