Ɛsodɔɔ 38:1-31
38 Mbo toosiaa bandu luamaa lasalaa a yɔm akeesiaa wo. Kpeŋguŋ ndɔŋ hiɔɔloŋ wa kpeŋkpeŋ. O wa bandei nɛiyo le ŋɔmmɛu a tɛndaa tɛɛŋ,* toŋgei nɛiyo le ŋɔmmɛu a tɛndaa tɛɛŋ, a helɔɔ nɛiyo le hiɔɔlu a tɛndaa tɛɛŋ.
2 Mbo toosiaa leelaŋ la hiɔɔlu o sɔŋgila ndɔla hiɔɔlu laŋ. Nduyɛ, mbo toosiaa laŋ latulu a bandu luamaa lasalaa. Okoŋ, mbo kumbu laŋ a chiliŋii siaŋɛi.*
3 Okoŋ kɔɔli, mbo toosiaa nyɛm laanduŋ bandu luamaa lasalaa kpou. Muŋ cho ni: baawalaŋ,* siɔbuiilaŋ,* hɛŋgɛilaŋ, chula saŋgilaŋ, a nyɛla chuaa leyiŋndaŋ. Nyɛm laandoŋ muŋ kpou, a chiliŋii siaŋɛi o toosiaa muŋ ni.
4 Mbo toosiaa kpasaa le bandu luamaa lasalaa a chiliŋii siaŋɛi, o kandu bandu luamaa lasalaa tiŋ lebɛŋgu.
5 Mbo toosiaa kelaŋ ŋ hiɔɔlu le sɔŋgila hiɔɔlula bandu luamaa lasalaa, o kpasa o toosiaa a chiliŋii siaŋɛi yo ikɛi, le yɔmii vilɛiye saa.
6 Okoŋ kɔɔli, mbo toosiaa yɔmii vilɛiye a yɔm akeesiaa wo, mbo kumbu ndi a chiliŋii siaŋɛi.
7 Okoŋ, mbo wou yɔmii vilɛi keŋ o kelaŋ cho o kpeŋguŋ bandu luamaa lasalaa woŋ, le kɔlaŋ a ndu. Mbo toosiaa bandu luamaa lasalaa hoo a pɛŋgɔŋ maa kɔfu.
8 Mbo toosiaa hɛŋgɛiyo, a nyɛ nda kɛsi ndu lechoo wo a chiliŋii siaŋɛi. Nduyɛ, tofaŋnda waŋ laanduaa wa wallo o tɛndii bɔŋaŋndo sondoo laŋ o soliŋ kpeku ni, le nyɔɔŋ muŋ toosiaa.
9 Okoŋ kɔɔli, mbo toosiaa luŋ tɛndiiyo. Le luŋndo kpeŋgii ba tou ve, mbo toosiaa kolala ŋpɛŋgɛlaŋ a fuŋnde kɛndɛ kɛndɛleŋ le lɛɛnduuwo. Nduyɛ, la wa bandei nɛiyo 150.
10 Mbo toosiaa suŋgbuaŋ 20 a nyɛla nda simi maŋ leniŋ ndaŋ 20 a chiliŋii siaŋɛi. Kɛ doluŋndoŋ a kelaŋ saa suŋgbuaŋ ndoŋ, a kanii humbuei o toosiaa muŋ ni.
11 Mbo toosiaa vɛlɛ kolalaŋ le lɛɛnduuwo o luŋndo kpeŋgii ba luaŋ nde. Nduyɛ, la wa bandei nɛiyo 150. Mbo toosiaa suŋgbuaŋ 20 a nyɛla nda simi maŋ leniŋ ndaŋ 20 a chiliŋii siaŋɛi. Kɛ doluŋndoŋ a kelaŋ saa suŋgbuaŋ ndoŋ, a kanii humbuei o toosiaa muŋ ni.
12 Kɛ le luŋndo ba paaleŋ le del lo, mbo toosiaa kolalaŋ le lɛɛnduuwo. Nduyɛ, la wa bandei nɛiyo 75. Mbo toosiaa suŋgbuaŋ tɔ a nyɛla nda simi maŋ leniŋ ndaŋ tɔ. Kɛ doluŋndoŋ a kelaŋ saa suŋgbuaŋ ndoŋ, a kanii humbuei o toosiaa muŋ ni.
13 Toŋgii tɛndiiyo hoo ba paaleŋ le chaŋ ndo wa nɛiyo 75.
14 Kolala wa la lɛɛndaa o dio tɛndiiyo kpeŋgei i pilɛi laŋ, la wa bandei nɛiyo 22 a nyɛɛmbɔ. Mbo toosiaa suŋgbuaŋ ma yaa, a nyɛla nda simi maŋ leniŋ ndaŋ la yaa.
15 Nduyɛ kolala wa la lɛɛndaa o dio luŋndo kpeŋgei i pilɛi laŋ, la wa bandei nɛiyo 22 a nyɛɛmbɔ. Mbo toosiaa suŋgbuaŋ ma yaa, a nyɛla nda simi maŋ leniŋ ndaŋ la yaa.
16 Kolala wa la lɛɛndaa o luŋ tɛndiiyo hoo laŋ kpou, a fuŋnde kɛndɛ kɛndɛleŋ nda toosiaa laŋ ni.
17 Mbo toosiaa nyɛla nda simi suŋgbuaŋ leniŋ ndaŋ a chiliŋii siaŋɛi. Kɛ doluŋndoŋ a kelaŋ saa suŋgbuaŋ ndoŋ, a kanii humbuei o toosiaa muŋ ni. Mbo kumbu suŋgbuma maŋ bolle a kanii humbuei. Kɛ nduyɛ, nyɛla saa suŋgbuma luŋ tɛndiiyo laŋ kpou, a kanii humbuei o toosiaa laŋ ni.
18 Kola bɛndu wa o landaa o dio luŋ tɛndiiyo wo, a kɛi buliiyo, kɛi yim yimndo, kɛi siaŋa sɔɔtɔtɔɔ, vɛlɛ a fuŋnde kɛndɛ kɛndɛleŋ nda toosiaa ndu ni. O wa bandei nɛiyo 30, a helɔɔ nɛiyo le ŋɔmmɛu a tɛndaa tɛɛŋ. Nduyɛ, helɔɔ pilɔɔ kpe a kolala wa la lɛɛndaa o luŋ tɛndiiyo laŋ.
19 Suŋgbuma ndɔma hiɔɔluaŋ a nyɛla nda wou maŋ leniŋ ndaŋ, a chiliŋii siaŋɛi nda toosiaa maŋ ni. Mbo toosiaa doluŋuŋ suŋgbuaŋ maŋ a kanii humbuei. Nduyɛ, mbo kumbu bolii suŋgbuaŋ maŋ a nyɛla saa laŋ ndaŋ a kanii humbuei.
20 Chiliŋuŋ siombu siombu nda kindu tɛndiiyo woŋ, a ŋ balu luŋ tɛndiiyo woŋ kpou, a chiliŋii siaŋɛi nda toosiaa muŋ ni.
21 Nyɔɔŋ muŋ nda soliŋ kpeku ni le tɛndiiyo taŋgullo, koŋ cho ni, tɛndii laSawaa. Livaiya Muuse dimul ni le ma chɔm nyɔɔŋ muŋ, nduyɛ Itamaa, po Elɔŋ wana soliaa lasalaa wa nda bolleŋ ni.
22 Mi Bɛsalɛɛ, po Yului wo, po mama Hɔɔ wo, fulaa o kaale Chuda leŋ choo tosa nyɛ o nyɛ Chɛhowa dimul Muuse.
23 Oholiabi, po Ahisamaki wo, fulaa o kaale Daŋ ndeŋ choo wa wana ndɔ malaa ni. O wa wana chaa nyɛ a laba, mi ndoo hɔu kolalaŋ, nduyɛ mi ndoo lɔɔ kolaa a kɛi buliiyo, kɛi yim yimndo, kɛi siaŋa sɔɔtɔtɔɔ, a fuŋnde kɛndɛ kɛndɛleŋ.
24 Kooliŋ nda soliŋ kpeku le wallo o fondaŋ diandaa woŋ wa talɛŋndoŋ 29,* a siɛkɛlloŋ 730,* a mɛɛ nda tuu siɛkɛlloŋ o fondaŋ diandaa yɛ. Kooliiyoŋ muŋ a kooliŋ nda yɔŋgu sala keeliaa woŋ, nyɛ pilɔɔ kpe ŋ wa ni.
25 Kaniŋ humbuŋ wanaa nda poonyiaa diolaŋ nda wa talɛŋndoŋ 100, a siɛkɛlloŋ 1,775, a mɛɛ nda tuu siɛkɛlloŋ o fondaŋ diandaa yɛ.
26 Wana o wana nda poonyiaa diolaŋ chɔŋ wɔsilaŋ 20 kɔ kɛ, mi o kɛ kɛ huŋ a siɛkɛlle tɛndaa tɛɛŋ, a mɛɛ nda tuu siɛkɛlloŋ o fondaŋ diandaa yɛ. Nduyɛ wanaa nda poonyiaa diolaŋ nda a wa kpou kpou 603,550.
27 Talɛŋndoŋ 100 nda soliŋ kpeku ni le nyɛla nda simi suŋgbuaŋ leniŋ ndaŋ toosiaa o fondaŋ diandaa, a le nyɛla nda simi suŋgbuaŋ le kola bɛndoo landɔɔ laŋ toosiaa. Nyɛla nda simi suŋgbuaŋ leniŋ ndaŋ 100 le talɛŋndoŋ 100. O kɛ kɛ talɛŋnde i pilɛ.
28 Mbo chua siɛkɛlluŋ 1,775 woŋ ŋ tiŋ, mbo toosiaa doluŋndoŋ le suŋgbuaŋ saa, mbo kumbu maŋ bolle, nduyɛ mbo tosa mi ma biilaŋ.
29 Chiliŋii siaŋɛi nda yɔŋgu tooloo* ve wa talɛŋndoŋ 70 a siɛkɛlloŋ 2,400.
30 A muŋ o toosiaa nyɛla nda simi suŋgbuaŋ leniŋ ndaŋ ni le dio tɛndii bɔŋaŋndo, bandu luamaa lasalaa, kpasa ndɔɔ, nyɛm ndɔŋ laandoŋ kpou,
31 nyɛla nda simi suŋgbuaŋ leniŋ o luŋ tɛndiiyo balɔɔ a o dio tɛndiiyo wo, chiliŋuŋ siombu siombu nda kindu tɛndiiyo woŋ, vɛlɛ a chiliŋuŋ siombu siombu nda kindu luŋ tɛndiiyo woŋ kpou.
Tɛɛsiaalaŋ
^ Tofa Tɛɛsiaa B14.
^ Ɔɔ “kapaa.”
^ Ɔɔ “pɔkiilaŋ.”
^ Ɔɔ “peelelaŋ.”
^ Talɛŋnde i pilɛ, lusul ndɔɔ wa le kilolaŋ 34 a nyɛ lechoo. Tofa Tɛɛsiaa B14.
^ Tofa Tɛɛsiaa B14.
^ Ɔɔ “le sala keeliaa.”
