Ɛsodɔɔ 39:1-43
39 Ma toosiaa domala womulaala kɛndɛ kɛndɛlaŋ a kɛi buliiyo, kɛi yim yimndo, vɛlɛ a kɛi siaŋa sɔɔtɔtɔɔ le wallo tosaa o tɛndii bɔŋaŋndo. Ma toosiaa nyɛla wana soliaa lasalaa le Elɔŋ, a mɛɛ Chɛhowa dimul Muuse yɛ.
2 Mbo toosiaa doma biŋgioo* a kooliiye, kɛi buliiyo, kɛi yim yimndo, kɛi siaŋa sɔɔtɔtɔɔ, vɛlɛ a fuŋnde kɛndɛ kɛndɛleŋ.
3 Ma luaa kooliiye a haamɛiyo, mi i simnuŋ kpaŋkpaŋnda lɛfɛ lɛfɛ laŋ, okoŋ mbo tɛɛndiaa laŋ muii muii maa lakɛi, mbo muuliaŋ ndaŋ a kɛi buliiyo, kɛi yim yimndo, kɛi siaŋa sɔɔtɔtɔɔ, a fuŋnde kɛndɛ kɛndɛleŋ. Nduyɛ, mbo huau doma biŋgioo a kɛilaŋ ndaŋ.
4 Ma toosiaa domaa hoo a pɛŋgɔŋ le ndu bɔŋaa o choŋgula tiɔɔŋndaŋ.
5 Nduyɛ, yaule womulaale wa le yiyaa o doma biŋgioo choo le ndu saa nyɛkɛndɛi leŋ, a nyɛm pilɛŋ muŋ kpe nda toosiaa leŋ niŋ. Muŋ cho ni: kooliiye, kɛi buliiyo, kɛi yim yimndo, kɛi siaŋa sɔɔtɔtɔɔ, vɛlɛ a fuŋnde kɛndɛ kɛndɛleŋ, a mɛɛ Chɛhowa dimul Muuse yɛ.
6 Okoŋ, ma hɛɛnduu pouta ɔnisi laŋ o nyɛla nda toosiaa a kooliiye laŋ niŋ. Nduyɛ, ma poonyiaa Isɔluɛi puaa nduaa diolaŋ lechoo, mɛɛ nda poonyiaa nuaa o kelɛi choo yɛ.
7 Mbo handu laŋ o pɛŋgɛŋ doma biŋgioo choo o choŋgulaŋ, le loonɔŋndo a Isɔluɛi puaa nduaa, a mɛɛ Chɛhowa dimul Muuse yɛ.
8 Okoŋ kɔɔli, mbo toosiaa nyɛ wana soliaa lasalaa handuŋ o takpa wo a kooliiye, kɛi buliiyo, kɛi yim yimndo, kɛi siaŋa sɔɔtɔtɔɔ, vɛlɛ a fuŋnde kɛndɛ kɛndɛleŋ. Ndu bɛɛ, o huawaa o wa ni maa doma biŋgioo.
9 Mɛɛ nda tuu nyɛ wana soliaa lasalaa handuŋ o takpa wo tɛɛŋ, kpeŋguŋ hiɔɔloŋ wa kpeŋkpeŋ. Nduyɛ, bandii nduɛi a toŋgii nduɛi o kɛ kɛ wa toŋgu baa le yaa.*
10 Ma holi pouta baa kalalaŋ lechoo pulaŋ ma hiɔɔlu. Pouta wa o pulale taseleŋ choo laŋ la cho laŋ ni: lɔbi, topaasi, a ɛmɔluadi.
11 O pulale diiŋ ndɔ leŋ choo: tɔkuɛɛsi, safaluɛɛ, a chasipaa.
12 O pulale yaa ndɔ leŋ choo: pou lɛsiɛm ndo,* aketi, a amɛtisi.
13 O pulale hiɔɔlu leŋ choo: kilisoluɛi, ɔnisi, a chadi. Ma wou laŋ o nyɛla nda toosiaa a kooliiye laŋ niŋ.
14 Poutaŋ ndaŋ laa sim le diola puaa 12 Isɔluɛi velu wa. Nduyɛ, la wa la poonyiaa mɛɛ nda poonyiaa nuaa o kelɛi choo yɛ. Diola kɛ kɛ laa sim le kaaleŋ le pilɛ o kaala 12 ndaŋ tɛɛŋ.
15 Ma toosiaa yuei a koolii kɛndɛ kɛndɛi maa yuei kpeendaa, ma baa ndi o nyɛ wana soliaa lasalaa handuŋ o takpa wo.
16 Ma toosiaa nyɛlaŋ la tiɔɔŋ vɛlɛ a kelaŋ ŋ muuŋ a kooliiye, ma bayiaa kelaŋ muuŋ ndoŋ o kpeŋguŋ muuŋ nyɛ wana soliaa lasalaa handuŋ o takpa wo.
17 Okoŋ kɔɔli, ma wou yuei ŋiiŋ nda toosiaa a kooliiye ve, o kelaŋ muuŋ cho o kpeŋguŋ muuŋ nyɛ wana soliaa lasalaa handuŋ o takpa wo.
18 Okoŋ, ma chua sondola tiɔɔŋnda yuei ŋiiŋnde hei, ma kei ndi o nyɛla ŋkooliila tiɔɔŋndaŋ niŋ, ma bayiaa ndi o choŋgula tiɔɔŋndaŋ o doma biŋgioo lachi.
19 Okoŋ kɔɔli, ma toosiaa kelaŋ ŋ muuŋ a kooliiye, ma wou muŋ o kpeŋguŋ muuŋ ndoŋ o nyɛ wana soliaa lasalaa handuŋ o takpa wo bɛŋgu, o doma biŋgioo choo.
20 Ma toosiaa vɛlɛ kelaŋ ŋ muuŋ a kooliiye, ma wou muŋ o doma biŋgioo lachi o pɛŋgɔŋ muuŋ ndoŋ amatou, o yaule womulaaleŋ amaluaŋ, naa le bɔŋa a doma biŋgioo wa.
21 O mɛɛlulaŋ kpɔŋ, ma kei yoole buliileŋ o kelaŋ wa o nyɛ wana soliaa lasalaa handuŋ o takpa wo, ma baa leŋ o kelaŋ wa o doma biŋgioo woŋ, le halikpeŋ mi nyɛ wana soliaa lasalaa handuŋ o takpa wo hini nyɛkɛndɛi o doma biŋgioo choo, o yaule womulaaleŋ amaluaŋ, a mɛɛ Chɛhowa dimul Muuse yɛ.
22 Okoŋ kɔɔli, mbo toosiaa doma bala biŋgi wa o doma biŋgioo bɛŋgu wo a kɛi buliiyo.
23 Domaa hoo wa o kumbiaa tɛɛŋ maa doma chɔu, nduyɛ ma balu ndu sɔndɔɔ chɛ chɛ o bololaŋ yɔŋii o sɛɛsa.
24 Okoŋ kɔɔli, ma muuliaŋ kɛi buliiyo, kɛi yim yimndo, kɛi siaŋa sɔɔtɔtɔɔ, ma toosiaa pɔmɛkilanetiiyaŋ, okoŋ ma bayiaa maŋ o misala domaa hoo balɔɔ chɛ chɛ.
25 Ma toosiaa bambaŋ a koolii kɛndɛ kɛndɛi, ma bayiaa muŋ o pɔmɛkilanetiiyaŋ tɛɛŋ, o misala doma bala biŋgioo balɔɔ chɛ chɛ.
26 A baa pɛ bambɛi i pilɛ, a baa pɔmɛkilanetiileŋ le pilɛ. Nduyɛ, a lo tosaa lende haaa ma balu muŋ bayiaa o misala domaa hoo chɛ chɛ. Domaa hoo wana soliaa lasalaa ndoo wounuŋ niŋ le wallo tosaa, a mɛɛ Chɛhowa dimul Muuse yɛ.
27 Ma toosiaa vɛlɛ domala vilɛilaŋ a fuŋnde kɛndɛ kɛndɛleŋ le Elɔŋ nda puaa nduaa.
28 Ma toosiaa vɛlɛ mɔsillo a fuŋnde kɛndɛ kɛndɛleŋ, kolaa le yiinɔŋndo o lebol a fuŋnde kɛndɛ kɛndɛleŋ, vɛlɛ a lɛmbɛla biŋgilaŋ a fuŋnde kɛndɛ kɛndɛleŋ.
29 Nduyɛ ma muuliaŋ fuŋnde kɛndɛ kɛndɛleŋ, kɛi buliiyo, kɛi yim yimndo a kɛi siaŋa sɔɔtɔtɔɔ, ma toosiaa kolala ŋpɛŋgɛlaŋ, a mɛɛ Chɛhowa dimul Muuse yɛ.
30 O mɛɛlulaŋ kpɔŋ, ma toosiaa kpaŋkpaŋ ŋɛlɛŋgi ŋɛlɛŋgioo a koolii kɛndɛ kɛndɛi le chɔmndo maa Elɔŋ cho o yɔŋgaŋ o Mɛlɛka lo. Nduyɛ, ma poonyiaa lechoo mɛɛ nda poonyiaa o kelɛi choo yɛ aa: “Le Chɛhowa diondɔɔ cho ni.”
31 Okoŋ, ma yii ndu o mɔsillo choo a yoole nda toosiaa a kɛi buliiyo leŋ, a mɛɛ Chɛhowa dimul Muuse yɛ.
32 Nduyɛ, wali kɛ kɛ wa a tɛndii bɔŋaŋndo okɔɔ, ma chii ndu tosa. Mi Isɔluɛiya tosa nyɛ o nyɛ Chɛhowa dimul Muuse. Ma tosa lende kinɛi.
33 Okoŋ kɔɔli, ma huŋ a tɛndiiyo, kolala ndɔlaŋ, a nyɛm ndɔŋ kpou naa Muuse chua. Muŋ cho ni: doluŋndoŋ, wundɛilaŋ,* kpɔlɔŋndaŋ, suŋgbuaŋ a nyɛla nda simi suŋgbuaŋ leniŋ ndaŋ,
34 kola nda toosiaa a yiiŋii saa ma yiŋ o nyɛma siaŋaŋ niŋndo, kola yau visi nɔ yiiŋnde tɔlɔkɔ wo, kola bɛndoo le landɔɔ o tɛndiiyo niŋ,
35 kɔfu laSawaa a yɔmii nduɛi vilɛiye, kumbu ndɔɔ,
36 tibiiyo,* nyɛm ndɔŋ laandoŋ kpou a bulu cho o yɔŋgaŋ o Mɛlɛka lo wo,
37 nyɛ kɛsiaa lambui nda toosiaa a koolii kɛndɛ kɛndɛi yo, lambuila wa o lepula laŋ, nyɛm ndɔŋ laandoŋ kpou a chuɛiyaŋ le mɛndullo,
38 bandu luamaa lasala nda toosiaa a kooliiye wo, chuɛiyaŋ le pɔyaa, nyɛm chuŋ kɛndɔŋ, kola dio tɛndiiyo,
39 bandu luamaa lasala nda toosiaa a chiliŋii siaŋɛi yo, kpasa nda toosiaa a chiliŋii siaŋɛi yo, yɔmii nduɛi vilɛiye, nyɛm ndɔŋ laandoŋ kpou, hɛŋgɛiyo a nyɛ nda kɛsi ndu lechoo wo,
40 kolalaŋ le lɛɛnduuwo o luŋ tɛndiiyo, suŋgbuma nduaŋ a nyɛla nda simi maŋ leniŋ ndaŋ, kolaa le luɛiyɔɔ o dio luŋ tɛndiiyo, yuei nduɛi a chiliŋuŋ ndɔŋ siombu siomboŋ, nyɛm laandoŋ kpou le wallo tosaa o tɛndii bɔŋaŋndo niŋ,
41 domala womulaala kɛndɛ kɛndɛlaŋ le wallo o tɛndiiyo, domalaŋ le Elɔŋ wana soliaa lasalaa, vɛlɛ a domalaŋ le puaa nduaa cho wa wali wanaa soliaa lasalaa tosaa wa.
42 Nyɛ o nyɛ Chɛhowa dimul Muuse le tosaa, mi Isɔluɛiya tosa ndu kpou.
43 Mɛɛ Muuse mɛɛndaŋ wali nda tosa wo kpou, mbo cha maa mɛɛ o mɛɛ Chɛhowa dimul ndu yɛ, lende nda tosa ni. Okoŋ, mbo duau nda sala.
Tɛɛsiaalaŋ
^ Tofa Tɛɛsiaa.
^ Tofa Tɛɛsiaa B14.
^ Pou baa kala wana sina a ndu okɔɔ kpeekpei le wo.
^ Ɔɔ “finɛtelelaŋ.”
^ Ɔɔ “tabalioo.”
