Ɛsodɔɔ 40:1-38
40 Mi Chɛhowa dimul Muuse aa:
2 “Paale taseleŋ o paŋgii tasei niŋ, a nɔ ma simi tɛndii bɔŋaŋndo.
3 Okoŋ, ma luei kɔfu laSawaa o tɛndiiyo niŋ, nduyɛ ma landu kola bɛndoo ndu lachi.
4 A nɔ ma luei tibiiyo* o tɛndiiyo niŋ, ma hɛɛnduu nyɛm ndɔŋ lechoo, okoŋ ma luei nyɛ kɛsiaa la lambuiyo, ma mɛndul lambuilaŋ.
5 Okoŋ kɔɔli, ma chua bandu luamaa nyɛm chuŋ kɛndɛ nda toosiaa a kooliiye wo, ma kɛsi ndu kɔfu laSawaa lachi, nduyɛ ma landu kola bɛndoo o dio tɛndiiyo.
6 “A nɔ ma kɛsi bandu luamaa lasalaa o dio tɛndii bɔŋaŋndo lachi.
7 Nduyɛ ma chua hɛŋgɛiyo, ma kɛsi ndu tɛndii bɔŋaŋndo a bandu luamaa lasalaa tɛɛŋ, okoŋ ma wou mɛŋndaŋ leniŋ.
8 Lɛɛnduu kolalaŋ o luŋ tɛndiiyo balɔɔ silɔ, okoŋ ma landu kola bɛndoo o dio luŋ tɛndiiyo.
9 Okoŋ kɔɔli, ma chua chuɛiyaŋ le pɔyaa, ma pɔya tɛndiiyo a nyɛ o nyɛ cho leniŋ, le mi ndu a nyɛm ndɔŋ laandoŋ kpou simnuŋ ŋ diandaa.
10 A nɔ ma pɔya bandu luamaa lasalaa a nyɛm ndɔŋ laandoŋ kpou, le mbo simnuŋ bandu luamaa lasala hiou diondɔɔ kpou wo.
11 Nduyɛ, ma pɔya hɛŋgɛiyo a nyɛ nda kɛsi ndu lechoo wo, le mbo simnuŋ o diandaa.
12 “Okoŋ, ma hiŋ a Elɔŋ nda puaa nduaa o dio tɛndii bɔŋaŋndo ikɛi, ma pulu nda.*
13 Wou Elɔŋ domala wanaa soliaa lasalaa ma pɔya ndu le mbo wa o diandaa, mbo wa wana soliaa lasalaa le ya.
14 Okoŋ kɔɔli, ma hiŋ a puaa nduaa, ma wou nda domala vilɛilaŋ.
15 A nɔ ma pɔya nda mɛɛ ŋ pɔya finya nda yɛ, le ma wa wanaa soliaa lasalaa le ya. Pɔya nda cho sɔla wo cho chɔm ni maa a cho wa wanaa soliaa lasalaa le fɛɛŋ a fɛɛŋ.”
16 Mi Muuse tosa nyɛ o nyɛ Chɛhowa dimul ndu. Mbo tosa lende kinɛi.
17 O wɔsi diiŋ ndɔɔ niŋ, paŋgii tasei, malɔ le pilɛ, mi Muuse simi tɛndiiyo.
18 Mɛɛ o wa ndu simioo, mbo kɛsi nyɛla nda simi suŋgbuaŋ a wundɛilaŋ* leniŋ ndaŋ, mbo wou wundɛilaŋ, mbo wou kpɔlɔŋndaŋ, nduyɛ mbo simi suŋgbuaŋ.
19 Okoŋ mbo pɛŋgɛliaa kolalaŋ o tɛndiiyo choo, nduyɛ mbo pɛŋgɛliaa vɛlɛ kolala cheleŋ o laŋ choo, a mɛɛ Chɛhowa dimul ndu yɛ.
20 Okoŋ kɔɔli, mbo chua Sawalaŋ mbo wou o Kɔfoo niŋ, nduyɛ mbo sɔɔŋiaa yɔmii vilɛiye o Kɔfoo, mbo handu kumboo lechoo.
21 Mbo luei Kɔfoo o tɛndiiyo niŋ, nduyɛ mbo landu kola bɛndoo Kɔfoo lachi le ndu kumbɔɔ, a mɛɛ Chɛhowa dimul ndu yɛ.
22 Okoŋ kɔɔli, mbo kɛsi tibiiyo o tɛndii bɔŋaŋndo niŋ amaluaŋ, o kola bɛndoo lachi.
23 Mbo hɛɛnduu beediiyo o lepula o tibiiyo choo Chɛhowa lachi, a mɛɛ Chɛhowa dimul ndu yɛ.
24 Mbo simi nyɛ kɛsiaa la lambuiyo tibiiyo lachi o tɛndiiyo niŋ ba tou wo.
25 Nduyɛ, mbo mɛndul lambuilaŋ Chɛhowa lachi, a mɛɛ Chɛhowa dimul ndu yɛ.
26 Okoŋ kɔɔli, mbo kɛsi bandu luamaa nyɛm chuŋ kɛndɛ nda toosiaa a kooliiye wo kola bɛndoo lachi o tɛndiiyo niŋ,
27 le waa nyɛm chuŋ kɛndɔŋ lomɔɔ lechoo, a mɛɛ Chɛhowa dimul ndu yɛ.
28 Okoŋ, mbo landu kola bɛndoo o dio tɛndii bɔŋaŋndo.
29 Mbo kɛsi bandu luamaa lasalaa o dio tɛndiiyo lachi, le mbo wa salala luamaa laŋ a salala ŋkultaŋ solioo lechoo, a mɛɛ Chɛhowa dimul ndu yɛ.
30 Mbo chua vɛlɛ hɛŋgɛiyo, mbo kɛsi ndu tɛndii bɔŋaŋndo a bandu luamaa lasalaa tɛɛŋ. Okoŋ, mbo wou mɛŋndaŋ leniŋ le waa peloŋ a balaŋ pulɔɔ.
31 Loŋ Muuse, vɛlɛ a Elɔŋ nda puaa nduaa ndaa pulu balaŋ a peloŋ ni.
32 Tuupa mi ndaa luɛi o tɛndii bɔŋaŋndo niŋ ɔɔ ma sɔɔŋguu bandu luamaa lasalaa ikɛi, ndaa nɔ fɛlɛŋ ma dindiŋ, a mɛɛ Chɛhowa dimul ndu yɛ.
33 O mɛɛlulaŋ kpɔŋ, mbo lɛɛnduu kolalaŋ o luŋ tɛndiiyo balɔɔ silɔ a o bandu luamaa lasalaa, nduyɛ mbo landu kola bɛndoo o dio luŋ tɛndiiyo.
Okoŋ, mi Muuse chii wali Mɛlɛka ke ndu wo tosa.
34 Okoŋ kɔɔli, mi yumbu yumboo kumbu tɛndii bɔŋaŋndo kpu, nduyɛ mi paŋgele Chɛhowa wo tiu o tɛndiiyo niŋ silɔ.
35 Muuse ndoo tiuba mbo luɛi o tɛndii bɔŋaŋndo niŋ te, kanifuule yumbu yumboo wa lechoo, nduyɛ paŋgele Chɛhowa wo wa o tiuwaa leniŋ silɔ.
36 Boondii Isɔluɛiya wa keiyo dɔɔŋgɔlaŋ kilaa ve kpou, te yumbu yumboo ndoo faŋaŋ dɔɔ pɛ o tɛndiiyo choo, ndaa puusiaa dɔɔŋgɔɔ a hiou lachi a kɔlaŋ.
37 Kɛ nduyɛ, te yumbu yumboo ndoo feŋaŋ o tɛndiiyo choo le, Isɔluɛiya bɛɛ ndaa feŋaŋ o dɔɔŋgɔɔ le haaa mɛɛ paale o cho faŋaŋ ndeŋ.
38 O balɔɔ Isɔluɛiya wa niŋ ndo kpou, mi ndaa che yumbu yumbu Chɛhowa wo o tɛndiiyo choo ipala, nduyɛ mi ndaa che yiŋndeŋ lechoo ichɔl.
