Ɛsodɔɔ 5:1-23
5 Okoŋ kɔɔli, mi Muuse nda Elɔŋ kua naa Felo chua, ma dimul ndu aa: “Nyɛ Chɛhowa, Mɛlɛka Isɔluɛiya dimi wo cho hoo ni, ‘Mal wanaa niaa ma kuɛ o pollo niŋ, ma kɔ bii bɔŋaŋndo loŋ le ya saŋgalaa.’”
2 Kɛ mi Felo nyuna nda aa: “O nɛɛnɛ cho yɛ Chɛhowa le mi diikuŋ ndu, mi mal Isɔluɛiya ma kuɛŋnuŋ? Pesiŋ bɛɛ I sina Chɛhowa le. Nduyɛ o fulawɔ okoŋ kɔɔli, I mel Isɔluɛiya ma kuɛ le.”
3 Kɛ ma dimul ndu aa: “Chɛhowa, Mɛlɛka Hibuluiya soo naa naa chua ni. Lelaŋ a yandii, chɛl naa miŋ kuɛ le tiŋ palɛi yaa o pollo niŋ, miŋ kɔ soli salaa o Chɛhowa Mɛlɛka naa lo. Te o cho koŋ te, o cho naa naa wɔɔŋndo tusi choo mbo diu naa, ɔɔ mbo diu naa a muɛi faŋnde.”
4 Mi masaa le Ichipi dimul nda aa: “Muuse nya Elɔŋ, le yɛɛnɛ nya yeema yɛ mi la kuuna waŋnda wallo tosaa? La miiŋgu wallo!”
5 Mi Felo hiau lachi a suɛi aa: “Nyapila cho chɔɔ mɛɛ waŋnda haa kui o lɛŋndeŋ ndeŋ niŋ yɛ. Mɛɛ la yeema nda ma mal wali nda cho tosaa wo?”
6 O paale pilɛ le leŋ choo, mi Felo dimul wanaa wa wallo bolleŋ nda a wanaa ndaa malaa* aa:
7 “Chɔŋ hau mbo kuɛ kɛ, la ke lɛ waŋnda haa ifueeŋ le kpilikioŋ lɔɔ le. Ndapila kɔ nuuviaa fueende.
8 Kɛ a koŋ kpou, la dimul nda maa kpilikiŋ cho nda kuee le lɔɔ lepaa o lepaa woŋ, i pilɛ bɛɛ a nɔ ma mɛi le lɔɔ le. La feŋal nda nyɛ o nyɛ lechoo le, kanifuule a cho pɛŋgiŋndo.* Le sabu koŋ nda cho chaŋndo ni aa, ‘Ŋ yeema miŋ kuɛ, miŋ kɔ soli salaa o Mɛlɛka naa lo!’
9 La chɔɔlu nda kindɔɔ a wallo mbo hiou maa paandu. La chɛl nda ma pɛŋgi le, yɔŋii nda yaŋ nilaŋ o choola nda cho nda dimullo laŋ.”
10 Okoŋ, mi wanaa wa wallo bolleŋ nda a wanaa ndaa malaa kua ma kɔ dimul waŋnda aa: “Nyɛ Felo dimi wo choo hoo ni, ‘I cho lɛ nya wa ifueeŋ ke le.
11 Nyapila kɔ nuuviaa fueende ba o ba nya saaluŋ ndi pɛ. Kɛ kpilikiŋ cho nya kuee le lɔɔ lepaa o lepaa woŋ, i pilɛ bɛɛ la mɛi le lɔɔ le.’”
12 Okoŋ, mi waŋnda saŋnuŋ ba o ba fee o lɛŋnde Ichipi leŋ niŋ le fueende nuuviaa.
13 Nduyɛ, wanaa wa nda bolleŋ nda wa hiouwɔɔ lachi a nda tooloo ma dimul nda aa: “La nɔ mi la chii wali nyaa tosa lepaa o lepaa, mɛɛ nyaa tosa ndu paandu teleŋ nya wa fueende sɔlaa wo yɛ.”
14 Mi wanaa Felo kɛsi wallo bolleŋ nda kandu wanaa ndaa malaa lɔɔ. Nduyɛ, Isɔluɛiya wanaa ndaa malaa haa wa ni. Mi wanaa wa wallo bolleŋ nda nyuna nda aa: “Le yɛɛnɛ la fuuluu kpilikioŋ lɔɔ maa paandu le? Lende i yɔŋnuŋ chiɛi a hau ni.”
15 Okoŋ, mi wanaa malaa o Isɔluɛiya tɛɛŋ kua ma kɔ ŋɔɔchiaŋ o Felo lo. Ma nyuna ndu aa: “Le yɛɛnɛ ŋ cho yɛ naa buɛiyaa numnda biyɔɔ o nɛi waa nuaa choo?
16 A cho naa ifueeŋ ke le, ma dimul naa vɛlɛ aa, ‘La lɔɔ kpilikioŋ!’ A cho naa buɛiyaa numnda lɔɔ, nduyɛ wanaa ŋ kɛsi wallo bolleŋ nda cho hei tosaa ni.”
17 Kɛ mbo dimi aa: “La cho pɛŋgiŋndo!* La cho pɛŋgiŋndo!* Le sabu koŋ nya cho dimioo ni aa, ‘Ŋ yeema miŋ kuɛ, miŋ kɔ soli salaa o Chɛhowa lo.’
18 La miiŋgu wallo! A cho lɛ nya wa ifueeŋ ke le. Kɛ a koŋ kpou, la nɔ mi la fuuluu kpilikioŋ lɔɔ maa paandu.”
19 Mɛɛ wanaa malaa o Isɔluɛiya tɛɛŋ tuei nyɛ Felo dimi wo maa, kpilikiŋ nda nɔ le lɔɔ lepaa o lepaa woŋ i pilɛ bɛɛ feŋaŋ lechoo le, ma luɛi o buulaŋ bɛndoo niŋ.
20 Mɛɛ nda fula o Felo lo, ma komal Muuse nda Elɔŋ. Nduyɛ a wa isisi loŋ ma wa nda chumndo.
21 Okoŋ ma dimul nda aa: “Maa Chɛhowa chɔ nyɛ nya tosa wo mbo kilul nya yamɛi. La tosa mi Felo a buɛiyaa nduaa tul naa leyɛ, nduyɛ mi la suaa nda muɛi faŋnde o ba le ma diu diu naa.”
22 Okoŋ mi Muuse piɛi o Chɛhowa lo, mbo dimi aa: “Oo Chɛhowa, le yɛɛnɛ ŋ chɛllɛ ma wa wanaa numnda dɛnɛ palaa waa nuaa tusioo choo? Le yɛɛnɛ ŋ vem yɛ ya?
23 Chɔŋ a paale ya kuɛ mi kɔ soo naa Felo chua o diola numndaŋ niŋ ndeŋ, hiouwɔɔ tuŋ o cho lachi a waŋnda haa nyɛpalaa tusioo choo ni. Nduyɛ i cho kpendekele maa a piŋi wɔ wanaa numnda le.”
Tɛɛsiaalaŋ
^ Isɔluɛiya tɛɛŋ nda hɛli wanaa malaa haa ni.
^ Ɔɔ “a cho siɛlɛiye tosaa.”
^ Ɔɔ “La cho siɛlɛiye tosaa.”
^ Ɔɔ “la cho siɛlɛiye tosaa.”
