Ɛsodɔɔ 6:1-30
6 Okoŋ, mi Chɛhowa dimul Muuse aa: “Numpila cho chɔ nyɛ ya cho Felo tosal lo. I cho ndu kindila a ba ni kpaaya bɛndoo mbo mal nda, nduyɛ mi kindila ndu a ba ni kpaaya bɛndoo mbo soli nda o lɛŋnde ndɔleŋ niŋ.”
2 Mi Mɛlɛka dimul Muuse aa: “Ya cho Chɛhowa ni.
3 Mi yaa chɔɔmuŋ Ebilaham, Aase, a Chekɔpu maa Mɛlɛka Kpaaya Kpou Kpou Wo ya cho ni. Kɛ diola nilaŋ Chɛhowa, I chɔm nda laŋ te.
4 Mi yii vɛlɛ kpemaa a nda le mi ke nda lɛŋnde Kenaŋ ndeŋ, naa nda wa ichali o sumialle wa.
5 I cho tueiyɔɔ chaŋnda waŋnda Isɔluɛi cho laŋ, a biyɔɔ lechɛ waŋnda Ichipi cho nda wo. Nduyɛ, I loonuŋ a kpema ya yii a finyaa ndaa mamaa wo.
6 “Lelaŋ, dimul Isɔluɛiya aa: ‘Ya cho Chɛhowa ni. I cho nya soli o wali lechɛ Ichipiaŋnda luei nya niŋndo, nduyɛ mi soli nya o chɛle ndaleŋ niŋ. I cho ba ni kpaaya bɛndoo siɛndi, mi tusi nda nyɛpalaa bɛndoo choo, okoŋ mi piŋi nya.
7 La cho simnɔŋ wanaa niaa, nduyɛ mi ya wa Mɛlɛka nyaa. La cho sina kpendekele maa ya cho Chɛhowa Mɛlɛka nyaa ni, o cho nya solioo o wali lechɛ nya cho niŋ Ichipi wo.
8 I cho lakɔ a nya o lɛŋnde ya chua buŋgɛi, mi mɛnaŋ le Ebilaham, Aase, a Chekɔpu kioo leŋ niŋ. I cho nya leŋ ke mi le wa le nya. Ya cho Chɛhowa ni.’”
9 Okoŋ kɔɔli, mi Muuse kɔ dimul Isɔluɛiya nyɛ Mɛlɛka dimul ndu wo. Kɛ a yeŋ ndu lani le, kanifuule a wa a kɔlta tambɛilaŋ le biyɔɔ lechɛ nda wa nda wo.
10 Mi Chɛhowa dimul Muuse aa:
11 “Kɔ naa Felo masaa le Ichipi chua, ma dimul ndu maa o mal Isɔluɛiya ma fula o lɛŋnde ndɔleŋ niŋ.”
12 Kɛ mi Muuse dimul Chɛhowa aa: “Isɔluɛiya yeŋ ya lani le. Vɛɛ Felo cho yɛ ya nilaŋ yaŋɔɔ, ya chiee hoo isɔɔ le wo?”*
13 Kɛ mi Chɛhowa dimul Muuse nda Elɔŋ nyɛ nda nɔ ma kɔ dimul Isɔluɛiya a Felo masaa le Ichipi wo, le halikpeŋ ma soli Isɔluɛiya o lɛŋnde Ichipi leŋ niŋ.
14 Wanaa wa yuŋgula leboltaŋ le kaale finyaa ndaa wa cho haa ni: Le kaale Lubɛŋ ndeŋ, Hanɔki, Palu, Hɛsilɔŋ, a Kaami. Yuŋgulaŋ ndaŋ la fula o kaale Lubɛŋ ndeŋ choo ni. Lubɛŋ yɛ, ndu wa po tase Isɔluɛi yo ni.
15 Le kaale Simiɔŋ ndeŋ, Chɛmuɛɛ, Chamiŋ, Ohadi, Chakiŋ, Sohaa, vɛlɛ a Siɔ, po chua Kenanaitiinɔɔ velu wo. Yuŋgulaŋ ndaŋ la fula o kaale Simiɔŋ ndeŋ choo ni.
16 Diola puaa Livai ya la cho laŋ ni: Kɛɛsiɔŋ, Kohati, a Meluali. Nduyɛ, nda wa yuŋgula leboltaŋ o kaale finya ndaleŋ choo ni. Livai chii wɔsilaŋ 137 mbo wu.
17 Puaa Kɛɛsiɔŋ nda cho haa ni a yuŋgula ndalaŋ: Libini a Simɛi.
18 Puaa Kohati wa cho haa ni: Amiluam, Isihaa, Hɛbulɔŋ, a Yuusiɛɛ. Kohati chii wɔsilaŋ 133 mbo wu.
19 Puaa Meluali wa cho haa ni: Maali a Musai.
Yuŋgula puaa Livai ya la cho laŋ ni, fulaa o pulale Livai leŋ choo.
20 Okoŋ mi Amiluam chua Chokɛbɛdi, yemaa finya ndɔ o nɔɔ niŋ, mbo vilul ndu Elɔŋ nda Muuse. Amiluam chii wɔsilaŋ 137 mbo wu.
21 Puaa Isihaa wa cho haa ni: Kolua, Nifɛki, a Sikili.
22 Puaa Yuusiɛɛ wa cho haa ni: Misiayɛɛ, Ɛlisafaŋ, a Sitilua.
23 Mi Elɔŋ chua Ilaisiɛba, chua Aminadabi wo o nɔɔ niŋ. Ilaisiɛba yɛ, yema ndɔ wa Naasiɔŋ ni. Mbo vilul ndu Nadabi, Abaihu, Ɛlieesa, a Itamaa.
24 Diola puaa Kolua wa la cho laŋ ni: Asiaa, Ɛlikana, a Abiaasa. Yuŋgulaŋ ndaŋ la fula o pulale Kolua leŋ choo ni.
25 Mi Ɛlieesa, po Elɔŋ ndo chua chua Putiɛɛ wo o pilɛ o nɔɔ niŋ, mbo vilul ndu Finihaasi.
Yuŋgula leboltaŋ o kaale Livai leŋ choo la cho laŋ ni a yuŋgula ndalaŋ.
26 Elɔŋ nda Muuse wo hoo Chɛhowa dimul ni aa: “La soli Isɔluɛiya o lɛŋnde Ichipi leŋ niŋ a kundalaŋ.”
27 Nduyɛ Muuse nda Elɔŋ ndo hoo kɔ soo o Felo lo ni, masaa le Ichipi, le ma soli Isɔluɛiya o Ichipi niŋ.
28 Paale Chɛhowa soo naa Muuse chua o lɛŋnde Ichipi leŋ niŋ ndeŋ,
29 mi Chɛhowa dimul Muuse aa: “Ya cho Chɛhowa ni. Kɔ dimul Felo, masaa le Ichipi nyɛ o nyɛ ya cho num dimullo.”
30 Okoŋ mi Muuse dimul Chɛhowa aa: “I cho wana chaa isɔɔ le.* Lelaŋ, vɛɛ Felo cho yɛ ya nilaŋ yaŋɔɔ?”
Tɛɛsiaalaŋ
^ Hibuluiye, “chɔchɔŋ nuŋ sɔla hivi chiɛi kɔɔli le.”
^ Hibuluiye, “chɔchɔŋ nuŋ sɔla hivi chiɛi kɔɔli le.”
