Ɛsɔdɔɔ 7:1-25
7 Okoŋ, mi Chɛhowa dimul Muuse aa: “I tosa ma simnuŋ maa Mɛlɛka* le Felo, nduyɛ Elɔŋ bɛ num cho wa maa wana suaa le Mɛlɛka wo le num.
2 Nyɛ o nyɛ ya dimul num pɛ, hivul Elɔŋ bɛ num le mi ndu soo o Felo lo, okoŋ mbo mal Isɔluɛiya ma fula o lɛŋnde ndɔleŋ niŋ.
3 Le ya ndu, I cho chɛlɔɔ mi Felo luɛi bolle kalaleŋ,* nduyɛ mi tosa sɔɔŋ kɔndɔfilloŋ le kpaaya nuu chɔmndo, vɛlɛ a kaamaalaŋ tau o lɛŋnde Ichipi leŋ niŋ.
4 Kɛ Felo yeŋ niŋ nya lani le, nduyɛ I cho ba nuu handɔɔ o lɛŋnde Ichipi leŋ choo, mi tusi leŋ nyɛpalaa choo. Okoŋ mi soli wanaa niaa Isɔluɛiya, a cho faŋga bɛndu bɛndoo wa o lɛŋnde leŋ niŋ.
5 Te I siɛndi pɛ ba nuu Ichipi mi tusi ndu nyɛpalaa choo, okoŋ mi soli Isɔluɛiya nda tɛɛŋ, waŋnda Ichipi cho sina kɛsɛ maa ya cho Chɛhowa ni.”
6 Mi Muuse nda Elɔŋ tosa nyɛ Chɛhowa dimul nda wo. Ma tosa mɛɛ o mɛɛ o dimul nda yɛ.
7 Teleŋ Muuse nda Elɔŋ kɔ soo o Felo lo wo, Muuse wa wɔsilaŋ 80, nduyɛ Elɔŋ wa wɔsilaŋ 83.
8 Mi Chɛhowa dimul Muuse nda Elɔŋ aa:
9 “Te Felo dimul nya pɛ aa, ‘La tosa wɔ kaamaa,’ okoŋ a dimul Elɔŋ aa, ‘Chua tinda numndo ma mal Felo lachi.’ O cho simnɔŋ kɛu bɛndoo.”
10 Mi Muuse nda Elɔŋ kua naa Felo chua, ma tosa mɛɛ o mɛɛ Chɛhowa ndoo dimul nda yɛ. Mi Elɔŋ mal tinda ndɔɔ Felo nda buɛiyaa nduaa lachi, okoŋ mbo simnuŋ kɛu bɛndoo.
11 Kɛ mi Felo veelu wanaa kɔl kaluaa, mandiaa, vɛlɛ a wanaa maŋgalaa o Ichipi niŋ kpou, mi nda bɛɛ huŋ tosa nyɛ pilɛ koŋ kpe o maŋgala ndaa niŋ.
12 Mi wana o wana mal tinda ndɔɔ lɛŋ, okoŋ mi la simnuŋ kɛuwaa bɛnduaa. Kɛ mi kɛu* Elɔŋ ndo misi misi kɛuwaa ndaa* kpou.
13 A koŋ kpou, mi Felo tosa bolle kalaleŋ, nduyɛ mbo kɛɛ le nda nilaŋ yaŋɔɔ a mɛɛ Chɛhowa ndoo dimi yɛ.
14 Okoŋ mi Chɛhowa dimul Muuse aa: “Felo nɔ bɔɔ bolle kalaleŋ. O kɛɛ le wanaa niaa malɔɔ.
15 Felo cho lakɔ siɔdii idii o Pioo Nail. Lelaŋ pena chɔnɔŋ, ma chua tinda ndoo simnuŋ kɛuwo wo, ma kɔ chum ndu o pioo kɔŋgɔ.
16 Dimul ndu aa, ‘Chɛhowa, Mɛlɛka Hibuluiya vem ya naa num chua ni. Nduyɛ o dimi aa: “Mal wanaa niaa ma kɔ piɛi ya o pollo niŋ.” Kɛ mɛɛ naŋ suaa bɛɛ nuaa yɛ, a kɛɛ le ndu diikɔŋndo.
17 Nyɛ ya Chɛhowa dimi wo choo hoo ni: “Hei cho tosa ma sina maa ya cho Chɛhowa ni. I cho mɛŋndaŋ o Pioo Nail niŋ lɔɔ a tinda cho ya o ba wo, mi ma simnuŋ koowaŋ.
18 Suuwaa cho o Pioo Nail niŋnda kpou cho wu, nduyɛ mi mɛŋndaŋ ma chuŋ. Le hei, Ichipiaŋnda nɔ lɛ niŋ pɛŋ iyeema le maŋ kolɔɔ le.”’”
19 Okoŋ mi Chɛhowa dimul Muuse aa: “Dimul Elɔŋ aa, ‘Chua tinda numndo ma siɛndi baa o peelaŋ Ichipi choo, peela ndɔla bɛŋndaŋ, peela ndɔla pɔmbɔ laŋ, dɛɛlala ndɔlaŋ, a o fondaŋnda ndɔla mandaa mamɛŋndaŋ choo kpou, le mi ma simnuŋ koowaŋ.’ Koowaŋ ma cho tiu o lɛŋnde Ichipi leŋ niŋ kpou, nduyɛ o nyɛm laanduŋ nda toosiaa a yɔmnde vɛlɛ a poutaŋ ndoŋ niŋ bɛɛ, ma cho wa.”
20 O lepilɛ niŋ kpe, mi Muuse nda Elɔŋ tosa mɛɛ Chɛhowa dimul nda yɛ. Mi Elɔŋ heelu tindaa, mbo luaa mɛŋma wa o Pioo Nail niŋndaŋ Felo a buɛiyaa nduaa kpou o hɔl, nduyɛ mi mɛŋndaŋ kpou ma simnuŋ koowaŋ.
21 Mi suuwaa wa o peelo wa kpou wu, nduyɛ mi mɛŋndaŋ ma kandu chuŋndo. Waŋnda Ichipi ndaa nɔla lɛ ma kol mɛŋma wa o Pioo Nail niŋndaŋ te. Kanifuule, mi mɛŋma wa o lɛŋnde Ichipi leŋ niŋndaŋ kpou ma simnuŋ koowaŋ.
22 Kɛ, mi wanaa maŋgalaa o Ichipi niŋ bɛɛ tosa nyɛ pilɛ koŋ kpe a taasi nda maŋgalaa. Le hei, mi Felo hiau lachi a bolle kalaleŋ, nduyɛ mbo kɛɛ le nda nilaŋ yaŋɔɔ a mɛɛ Chɛhowa ndoo dimi yɛ.
23 Okoŋ mi Felo miiŋguŋ o chiɛi ndɔɔ. Nduyɛ, nyɛ yɔŋnuŋ hoo wo bɛɛ yusa ndu pɛŋ kɔl te.
24 Le hei, mi Ichipiaŋnda kpou kandu sooŋndaŋ touwɔɔ o Pioo Nail holnɔŋndo le ma sɔla mɛŋma kolaŋ. Kanifuule, ndaa tiuba ma kol mɛŋma wa o Pioo Nail niŋndaŋ te.
25 Chɔŋ a paale Chɛhowa siiŋguu mɛŋndaŋ o Pioo Nail niŋ koowaŋ ndeŋ, le palɛi i ŋɔmmɛu kpulukuu ma wa lende.
Tɛɛsiaalaŋ
^ Hibuluiye, “I siiŋguu num Mɛlɛka.”
^ Ɔɔ “I cho kɔl Felo wo kindi poŋ.”
^ Hibuluiye, “tinda.”
^ Hibuluiye, “tindala ndalaŋ.”
