Ɛsodɔɔ 8:1-32
8 Okoŋ mi Chɛhowa dimul Muuse aa: “Kɔ o Felo lo ma dimul ndu aa, ‘Nyɛ Chɛhowa dimi wo cho hoo ni: “Mal wanaa niaa le ma kɔ piɛi ya.
2 Kɛ te a kɛɛ pɛ kpooŋ le nda malɔɔ ma kuɛ, I cho num kpundɔɔ tusi choo, mi sɔlla tiu o tanda numndo niŋ kpou.
3 Sɔlla cho piɔ o Pioo Nail niŋ cha, ma chɛŋ ndoŋ ma luɛi o numndo chiɛiniŋ, o lumui numndo niŋ, nduyɛ ma hel o numndo kpele. A cho vɛlɛ luɛiyɔɔ o chiɛila buɛiyaa numnda niŋ, chiɛila wanaa numnda, o nyɛla nya luam beediiyo laŋ niŋ, a o fondaŋnda* nya linda kpeyaŋndo laŋ niŋ.
4 Num ni, wanaa numnda ni, vɛlɛ a buɛiyaa numnda kpou, sɔlla cho nya tiu choo silɔ.”’”
5 Mi Chɛhowa dimul vɛlɛ Muuse aa: “Yulu tinda numndo o Pioo Nail choo, peela ndɔla pɔmbɔ laŋ, peela ndɔla bɛndu laŋ, a o dɛɛlala ndɔlaŋ choo kpou, le mi sɔlla fula ma tiu o lɛŋnde Ichipi leŋ niŋ silɔ.”
6 Okoŋ mi Elɔŋ siɛndi baa o peelaŋ Ichipi choo, mi sɔlla kandu fulaa ma tiu o lɛŋnde Ichipi leŋ niŋ silɔ.
7 Kɛ mi wanaa maŋgalaa bɛɛ tosa nyɛ pilɛ koŋ kpe o maŋgala ndaa niŋ. Ma tosa mi sɔlla fula ma tiu o lɛŋnde Ichipi leŋ niŋ silɔ.
8 Okoŋ mi Felo veelu Muuse nda Elɔŋ, mbo dimul nda aa: “La nyɔɔlu Chɛhowa le mbo faŋa ya a wanaa niaa sɔlla haa choo, kanifuule I yeema mi mal waŋnda haa ma kɔ soli salaa o ndu Chɛhowa lo.”
9 Kɛ mi Muuse dimul Felo aa: “O lo a num. Chɔm ya paale o bɛnda le num le mi nyɔɔlu Mɛlɛka mbo faŋa num, buɛiyaa numnda, a wanaa numnda sɔlla choo, a o chiɛila numndaŋ niŋndo. O Pioo Nail niŋ kinɛi nda cho lo ni.”
10 Okoŋ kɔɔli, mi Felo dimi aa: “Siɔdii.” Mi Muuse dimi aa: “Maa i yɔŋnuŋ a mɛɛ ŋ dimi yɛ, le halikpeŋ ma sina maa wana o wana cheleŋ cho maa Chɛhowa Mɛlɛka naa le.
11 Num ni, buɛiyaa numnda ni, a wanaa numnda, sɔlla cho nya faŋaŋ choo a o chiɛila numndaŋ niŋ. O Pioo Nail niŋ kinɛi nda cho lo ni.”
12 Mi Muuse nda Elɔŋ faŋaŋ Felo o hɔl. Nduyɛ, mi Muuse nyɔɔlu Chɛhowa le mbo faŋa sɔlaa o yɔŋ Felo choo wa.
13 Okoŋ mi Chɛhowa tosa a mɛɛ Muuse nyuna ndu yɛ. Mi sɔlla kandu wuoo o chiɛilaŋ ndalaŋ niŋ, o bɛɛla ndalaŋ, a o chiɔɔŋ ndaŋ niŋ.
14 Ma diu diu nda kundalaŋ tau tau, nduyɛ mi lɛŋndeŋ le kandu chuŋndo.
15 Mɛɛ Felo che maa sɔlla chuu wu, mbo hiau lachi a bolle kala leŋ tosaa, mbo kɛɛ le nda nilaŋ yaŋɔɔ a mɛɛ Chɛhowa dimi yɛ.
16 Mi Chɛhowa dimul Muuse aa: “Dimul Elɔŋ aa, ‘Lɔɔ lɛŋndeŋ a tinda numndo, le mi chundoo simnuŋ muiya* o lɛŋnde Ichipi leŋ niŋ kpou.’”
17 Ma tosa mɛɛ o dimul nda yɛ. Okoŋ mi Elɔŋ luaa lɛŋndeŋ a tinda ndɔɔ, mi chundoo o lɛŋnde Ichipi leŋ niŋ kpou simnuŋ muiya. Nduyɛ, ma kandu waŋnda chieeya a chɔluaa kisi kisioo.
18 Mi wanaa maŋgalaa bɛɛ kindiŋ le nyɛ pilɛ koŋ kpe tosaa, le ma soli muiya o maŋgala ndaa niŋ, kɛ a tiuba le. Muiya wa wɔ hiouwɔɔ lachi a waŋnda chieeya vɛlɛ a chɔluaa kisi kisioo.
19 Le hei, mi wanaa maŋgalaa dimul Felo aa: “Suei Mɛlɛkɛi* cho hei tosaa ni!” Kɛ mi Felo hiau lachi a bolle kalaleŋ tosaa, nduyɛ mbo kɛɛ le nda nilaŋ yaŋɔɔ a mɛɛ Chɛhowa dimi yɛ.
20 Okoŋ mi Chɛhowa dimul Muuse aa: “Pena chɔnɔŋ siɔdii idii puŋ ma kɔ sim Felo lachi. Te o wa pɛ kɔlaŋ o Pioo Nail, a dimul ndu aa, ‘Nyɛ Chɛhowa dimi wo cho hoo ni: “Mal wanaa niaa le ma kɔ piɛi ya.
21 Kɛ te a kɛɛ pɛ le wanaa niaa malɔɔ, num ni, buɛiyaa numnda ni, vɛlɛ a wanaa numnda, I cho tosa mi yɔluaa tiu nya choo kpou. Nduyɛ ma pɛ o chiɛila numndaŋ niŋ cha. Chiɛilaŋ o Ichipi niŋ kpou, I cho tosa mi yɔluaa pɛ leniŋ cha. Nduyɛ ba o ba nda* wa pɛ, I cho tosa mi yɔluaa tiu lɛŋ silɔ.
22 O paale leŋ choo, I cho tanda Koosiɛŋ ndo manda naa wanaa niaa cho wa, nduyɛ mi tosa yɔlɔ kɛ kɛ fuuluu loŋ te. Hei cho tosa ma sina kɛsɛ maa ya Chɛhowa, I cho o lɛŋndeŋ ndeŋ niŋ.
23 I cho teŋgeŋndo chɔm wanaa niaa tɛɛŋ a wanaa numnda. Nduyɛ, siɔdii kaamaa hoo cho yɔŋnɔŋ ni.”’”
24 Mi Chɛhowa tosa mɛɛ o dimi yɛ. Mi yɔluaa fula kunda bɛndoo, ma luɛi o chiɛi Felo wo niŋ a o chiɛila buɛiyaa nduaa niŋ. Nduyɛ ma tiu o lɛŋnde Ichipi leŋ niŋ silɔ. Mi yɔluaa haa mal kpundɔɔ o lɛŋnde Ichipi leŋ niŋ.
25 O mɛɛlulaŋ kpɔŋ, mi Felo veelu Muuse nda Elɔŋ, mbo dimul nda aa: “La kɔ mi la kɔ soli salaa le Mɛlɛka nyaa o lɛŋndeŋ ndeŋ niŋ.”
26 Kɛ mi Muuse dimi aa: “O bɛnda miŋ tosa keŋ te, kanifuule chɔluaa naŋ cho salaa soli o Chɛhowa Mɛlɛka naa lo wa, Ichipiaŋnda hɛnaŋ a nda kposoŋ te. Nduyɛ, te ŋ soli pɛ chɔluaa waa lende salaa waŋnda Ichipi o hɔl, a cho naa vii vii a poutaŋ.
27 Ŋ yeema miŋ kuɛ kɔla tiŋ palɛi yaa o pollo niŋ, miŋ kɔ soli salaa loŋ o Chɛhowa Mɛlɛka naa lo, mɛɛ o dimul naa yɛ.”
28 Okoŋ mi Felo dimi aa: “Awa. I cho nya malɔɔ mi la kɔ soli salaa o Chɛhowa Mɛlɛka nyaa lo o pollo niŋ. Kɛ la kua levil te pa. La nyɔɔlu Mɛlɛka nyaa le ya.”
29 Mi Muuse dimi aa: “I cho faŋaŋ num o hɔl, mi kɔ nyɔɔlu Chɛhowa, le halikpeŋ mbo tosa mi yɔluaa cho num, buɛiyaa numnda, a wanaa numnda paaliaŋndo wa faŋaŋ nya choo siɔdii. Kɛ num Felo, a nɔ ma mal taaba taabaa, le waŋnda haa kuunaa ma kɔ soli salaa o Chɛhowa lo.”
30 Okoŋ mi Muuse faŋaŋ Felo o hɔl, mbo kɔ nyɔɔlu Chɛhowa.
31 Mi Chɛhowa tosa a mɛɛ Muuse dimi yɛ. Mbo tosa mi yɔluaa wa Felo, buɛiyaa nduaa, a wanaa nduaa paaliaŋndo wa faŋaŋ. O pilɛ bɛɛ lo le.
32 Kɛ mi Felo tosa vɛlɛ bolle kala leŋ, mbo kɛɛ le waŋnda malɔɔ ma kuɛŋnuŋ.
Tɛɛsiaalaŋ
^ Ɔɔ “hɛŋgɛila.”
^ Muiya haa velaŋ a nyaa kisiaa pɔmbuaa wa o Ichipi niŋ a teleŋ koŋ nda.
^ Ɔɔ “kpaaya Mɛlɛkaa.”
^ Koŋ cho ni, Ichipiaŋnda.
