Chɔŋ Tasoo 4:1-21
4 Chaaŋaa niaa kaalaa, o cho yooŋgula nya tuɛi laŋ kpou le nya nɔ mi la laalaŋ maa o Mɛlɛka lo le la fula le. Kɛ la yaasiaa laŋ nyɛkɛndɛi le sinaa te o Mɛlɛka lo kpeekpei la fula ni. Kanifuule, wanaa lachoowaa dimi maa le Mɛlɛka nda suaa ni wa, a bɔɔbɔɔ cho niŋ o chieeŋndo niŋ.
2 Mɛɛ nya looku yooŋgu fula o Mɛlɛka lo wo sina yɛ cho hoo ni: Yooŋgu kɛ kɛ chɔm pɛ maa mi Chiisu Kiliti huŋ o chieeŋndo choo o iwana chieeya, mɛɛ o Mɛlɛka lo yooŋgu koŋ fula ni.
3 Kɛ yooŋgu kɛ kɛ chɔm a Chiisu okɔɔ le, mɛɛ o fula o Mɛlɛka lo le. Wana simul Kiliti wo, yooŋgu ndɔɔ cho koŋ ni. Ndu nya tuei ni maa o nɔ le hunɔɔ, nduyɛ o cho niŋ pɛŋ o chieeŋndo niŋ.
4 Chuauwaa niaa kaalaa, le Mɛlɛka nya cho ni, nduyɛ la chii nda yomɔɔ. Kanifuule, wana cho diompilɛ a nya wo nɔ kpaayaa mbo hiau wana cho diompilɛ a chieeŋndo wo poloŋ.
5 Le chieeŋndo nda cho ni. Le saboo hoo nda suaa a nyɛm cho o chieeŋndo niŋndoŋ okɔɔ ni, nduyɛ mi chieeŋndo yaŋ nda nilaŋ.
6 Kɛ naa naa, le Mɛlɛka naŋ cho ni. Wana o wana sina pɛ Mɛlɛka, ndu yaŋ naa nilaŋ ni. Wana o wana cho le Mɛlɛka le, o yeŋ naa lani le. O hei niŋ naŋ sina teŋgeŋndo yooŋgu tonya fula o Mɛlɛka lo wo tɛɛŋ a yooŋgu lachoowaa ni.
7 Chaaŋaa niaa kaalaa, ŋ hiounuŋ lachi a kaaliaŋndo vellaa velle, kanifuule o Mɛlɛka lo kaalaa chɛŋ ni. Wana o wana kaala pɛ, mɛɛ chua Mɛlɛkaa o cho ni, nduyɛ o sina Mɛlɛka.
8 Wana kaala le, mɛɛ o sina Mɛlɛka le, kanifuule kaalaa Mɛlɛka cho ni.
9 Mɛɛ Mɛlɛka chɔm naa kaalaa yɛ cho hoo ni: Mbo yɔŋ Po ndɔ pilɔɔ kpe o chieeŋndo choo le miŋ sɔla yoomoo sanaa o ndu niŋ.
10 Kaala koŋ cho yɛ ni, o cho nuaa maa naa le kaala Mɛlɛka le, kɛ ndu kaala naa ni. Okoŋ, mbo yɔŋ Po ndɔɔ le mbo huŋ soliŋ sala le hakila naalaŋ, miŋ miiŋgu o diompilɔɔ niŋ a Mɛlɛka.
11 Chaaŋaa niaa kaalaa, te nuaa kpɛ Mɛlɛka kaala naa ni, mɛɛ naa bɛɛ i cho naa kuee le miŋ kaaliaŋ vellaa velle.
12 Wana o wana chi wɔ Mɛlɛka lepilɛ bɛɛ le. Kɛ te ŋ hiou pɛ lachi a kaaliaŋndo vellaa velle, Mɛlɛka cho lo diompilɛ a naa, nduyɛ mi kaala ndɔɔ simnuŋ walaŋ naa o lakɔl.
13 O hei niŋ naŋ sina ni maa ŋ cho o diompilɔɔ niŋ a ndu, mi ndu bɛɛ wa o diompilɔɔ niŋ a naa, kanifuule o ke naa nyina ndɔɔ.
14 O fulawɔ okoŋ kɔɔli, naapila bɛɛ che, nduyɛ miŋ wa seileŋ timbioo maa Finyaa yɔŋ Po ndɔɔ le mbo piŋi chieeŋndo.
15 Wana o wana chɛl pɛ maa Po Mɛlɛkaa Chiisu cho ni, Mɛlɛka cho wa diompilɛ a wana koŋ, mi wana koŋ bɛɛ wa diompilɛ a Mɛlɛka.
16 Ŋ sina niŋ mɛɛ kpɛ Mɛlɛka kaala naa yɛ, nduyɛ ŋ laalaŋ a kaala o nɔ le naa wo.
Kaalaa Mɛlɛka cho ni. Nduyɛ wana o wana hiou pɛ lachi a kaalaa chɔmndo, wana koŋ cho wa diompilɛ a Mɛlɛka, mi Mɛlɛka bɛɛ wa diompilɛ a ndu.
17 O hei niŋ, kaala ndɔ cho naa o lakɔl lo cho simnɔŋ walaŋ, okoŋ miŋ wa fɛɛsɛŋ le suɛi* o paale kɔɔsɔleŋ choo, kanifuule mɛɛ ndu* cho yɛ, lende koni naa bɛɛ cho o chieeŋndo hoo choo ni.
18 Kaalaa nɔ isiooŋ te. Nduyɛ kaala kpeekpeiyo tuau siooŋnde ni, kanifuule mi siooŋnde kuuna naa sɔɔŋ bɔɔbɔɔ tosaa. Lelaŋ, te waŋndo nɔ pɛ siooŋnde, mɛɛ kaala cho ndu o kɔl lo cho walaŋ te.
19 Miŋ chɔm kaalaa, kanifuule Mɛlɛka fɛlɛŋ kaala naa.
20 Wana o wana dimi pɛ aa, “I kaala Mɛlɛka,” kɛ mbo tul puaapilɛnɔ ndɔɔ leyɛ, mɛɛ wana lachoowaa o cho ni. Kanifuule, wana o wana kaala puaapilɛnɔ ndɔ o cho chɔɔ wo le, mɛɛ o nɔla mbo kaala Mɛlɛka o chi wɔ le wo le.
21 Sawa o ke naa wo cho ni maa, wana o wana kaala Mɛlɛka pɛ, mɛɛ o nɔ vɛlɛ mbo kaala puaapilɛnɔ ndɔɔ.
