Chɔŋ Tasoo 5:1-21
5 Wana o wana laalaŋ pɛ maa Chiisu cho Kiliti ni, mɛɛ chua Mɛlɛkaa o cho ni. Nduyɛ wana o wana kaala pɛ wana yɔŋgu yoomoo wo, kaalaa o kaala chuauwaa wana koŋ ni.
2 Te o yɔŋ pɛ miŋ kaala Mɛlɛka, nduyɛ miŋ bii sawala ndɔlaŋ, okoŋ naŋ cho sina ni maa ŋ kaala chuauwaa Mɛlɛkaa.
3 Nyɛ Mɛlɛka kaalaa sim ndo cho sawala ndɔlaŋ biyɔɔ ni. Nduyɛ sawala ndɔlaŋ la kindu biyɔɔ le.
4 Kanifuule, wana o wana* cho chua Mɛlɛkaa, o chii chieeŋndo yomɔɔ. Nduyɛ a laalaŋ naa naŋ yem chieeŋndo ni.
5 Nɛɛnɛ nɔla yɛ mbo yem chieeŋndo? Wana laalaŋ maa Chiisu cho Po Mɛlɛkaa ni wo.
6 Teleŋ Chiisu Kiliti hiŋndo, mɛŋndaŋ a koowaŋ ma wa. O cho ko mɛŋndaŋ te ma wa le, kɛ koowaŋ bɛɛ ma wa. Nduyɛ nyina Mɛlɛkaa cho lesei, kanifuule tonyaa nyina Mɛlɛkaa dimi ni.
7 Nyɔɔŋ sala yaa cho seileŋ timbioo ni:
8 nyina diandaa, mɛŋndaŋ, a koowaŋ. A nyɛ pilɔɔ okɔɔ kpe nyɔɔŋ muŋ timbi seileŋ ni.
9 Te ŋ laalaŋ pɛ seile waŋchieeya timbi leŋ, mɛɛ nyɛ Mɛlɛka dimi wo hiou poloŋ, kanifuule Mɛlɛka chɔm wana suu Po ndɔɔ cho wo.
10 Wana o wana dɔu pɛ laalaŋndo o Po Mɛlɛkaa niŋ, mɛɛ ndupila chii seileŋ timbiŋ o kɔl. Wana o wana dou laalaŋndo o Mɛlɛka niŋ te, mɛɛ o siiŋguu ndu wana lachoowaa. Kanifuule, o dou laalaŋndo o nyɛ Mɛlɛka dimi a Po ndɔɔ okɔɔ wo niŋ te.
11 Nyɛ Mɛlɛka dimi koŋ ndo cho ni maa, o ke naa yoomu fafɛɛŋndo. Nduyɛ o Po ndɔɔ niŋ naŋ sɔla yoomu koŋ ni.
12 Wana o wana wa pɛ o diompilɔɔ niŋ a Po Mɛlɛkaa, wana koŋ nɔ tiindaŋ yoomu fafɛɛŋndo. Kɛ wana ve o diompilɔɔ niŋ a Po Mɛlɛkaa le, o nɔ tiindaŋ yoomu fafɛɛŋ te.
13 Nya dɔu haa laalaŋndo o Po Mɛlɛkaa niŋnda, nya ya cho sɔɔŋ muŋ poonyiallo ni, le mi la sina maa la nɔ tiindaŋ yoomu fafɛɛŋndo.
14 Tiindaŋ naŋ nɔ o ndu niŋndo cho ni maa, nyɛ o nyɛ naŋ nyuna ndu pɛ mbo chɛlaŋ a hɛnaŋ ndɔɔ, nilaŋ o yaŋ naa ni.
15 Mɛɛ naŋ sina nuaa maa nyɛ o nyɛ naŋ nyuna ndu pɛ, nilaŋ o yaŋ naa ni yɛ, ŋ nɔ tiindaŋndo maa ŋ cho sɔla nyɛ naŋ nyuna ndu wo.
16 Wana o wana che pɛ puaapilɛnɔ ndɔɔ haki wana sɔla piɔm te wo tosaa, o nɔ mbo piɛi le ndu. Okoŋ, mi Mɛlɛka ke puaapilɛnɔ koŋ yoomoo.* Le wanaa tosa haki wana sɔla piɔm te wo wa hei cho ni. Haki wana tosa ma sɔla piɔmndo wo cho. O cho a hakioo hoo okɔɔ le ya dimul ndu le mbo piɛi le.
17 Nyɛ o nyɛ cho yɔŋ wɔɔŋ, hakioo o cho ni. A koŋ kpou, haki wana sɔla piɔm te wo cho.
18 Ŋ sina maa wanaa cho chuauwaa Mɛlɛkaa wa, a lambaŋ hakioo tosaa le. Kanifuule, Po Mɛlɛkaa cho nda hɔlteŋ choo, nduyɛ wana dɛnɛ wɔɔŋndo* nɔla nda nyɛ o nyɛ yɔŋ te.
19 Ŋ sina maa le Mɛlɛka naŋ cho ni. Kɛ chieeŋndo kpou, o cho o kpaaya wana dɛnɛ wɔɔŋndo bɛŋgu.
20 Ŋ sina maa Po Mɛlɛkaa hiŋ, mbo ke naa sinapɛŋgoo, le halikpeŋ miŋ sɔla kɔl kaloo a Mɛlɛka tonyaa okɔɔ. Nduyɛ ŋ cho o diompilɔɔ niŋ a ndu sanaa a Po ndɔɔ, Chiisu Kiliti. Ndu cho Mɛlɛka tonyaa ni a yoomu fafɛɛŋndo.
21 Chuauwaa niaa kaalaa, la sooluu piɔmnda le.
