Kɔliŋtiaŋ Tasoo 6:1-20
6 Te suɛi keekaŋ nya pɛ tɛɛŋ nya chaaŋ num wana laalaŋndo, vɛ ma kuɛ a suɛi keŋ o lemasa, o wanaa cho sawala Mɛlɛkalaŋ tolɔɔ kɔɔli le wa lo? Vɛ a kue a ndi o wanaa laalaŋnda* lo le?
2 La sina nuaa maa wanaa diandaa le cho hunɔɔ chieeŋndo yamɛi kilul te? Te nya cho hunɔɔ chieeŋndo yamɛi kilul ni, baa la suliŋ le sɔɔŋ pɔmpɔmbɔŋ toosiaa nyapila tɛɛŋ te?
3 La sina nuaa maa ŋ cho hunɔɔ maalikɛiya yamɛi kilul te? Vɛ niko mi la bumba sɔɔŋ waa chieeŋ naŋ toosiaa?
4 Te la nɔ pɛ sɔɔŋ waa chieeŋ naŋ le toosiaa, baa wanaa kundaa che maa a suliŋ te wa nya hɛli ni le nya sɔɔŋ toosiaa tɛɛŋ?
5 Suɛi hei cho bɔɔ suɛi lasiɔmbu le nya. Baa wana taasioo opilɛ bɛɛ cho nya tɛɛŋ, o nɔla mbo toosiaa suɛi keekaŋ puaapiliaa tɛɛŋnde le?
6 Puaapilɛnɔ chaŋ ko, o kɔ bii sei chaaŋ ndɔ wana laalaŋndo o lemasa, le mi wanaa cho wanaa laalaŋ te wa kɔɔsa nda.
7 Te la kuɛ pɛ a puaapiliaa nyaa o lemasa, la tolnuŋ lasiɔmbu. Te puaapilɛnɔ numndo tosal num pɛ suɛi wɔɔŋnde, vɛ a biunuŋ te? O bɛnda ma chɛl mi nyɛ numndo wa ndu choo.
8 Keŋ nya mɛi tosaa ni, mi la wa puaapiliaa nyaa sɔɔŋ wɔɔŋndoŋ tosallo, nduyɛ mi la chua nyɛm ndaŋ.
9 La sina nuaa maa wanaa sendu le wa luei niŋ o Masale Mɛlɛkaleŋ niŋ te le? La hui nyapila le. Wanaa kaa ihini nɔɔlɛiya,* wanaa sooluu piɔmnda wa, wanaa suundɛiya, waŋ piaanduaa chɛl mi waŋ piaanduaa hini a nda wa, waŋ piaanduaa hini a waŋ piaanduaa wa,
10 viiya, wanaa nɔ hɔlte bɛnduleŋ nda, wanaa kolaa, wanaa yiou waŋnda wa, a wanaa chua nyɛm pilaŋ a lediɔɔmu wa luei niŋ o Masale Mɛlɛkaleŋ niŋ te.
11 Lende nya pumnda wa paandu ni. Kɛ mi Mɛlɛka pulu nya, mbo dindi nya fo. Mbo siiŋguu nya wanaa sandaa o diola Masanɔ naa Chiisu Kiliti laŋ niŋ vɛlɛ a nyina diandaa.
12 I nɔ di mi tosa nyɛ o nyɛ fee, kɛ o cho sɔɔŋ kpou le mala wana le. I nɔ di mi tosa nyɛ o nyɛ fee, kɛ I cho chɛlɔɔ mi nyɛ o nyɛ nɔ ya kpaayaa choo le.
13 Nyɛdiaa le demboo o cho ni, mi demboo wa le nyɛdiaa. Kɛ Mɛlɛka cho hunɔɔ nyɛm sala tiɔɔŋ ndoŋ siiŋguu nyɛ fondoo fuu. Dialloŋ cho le kaa ihini nɔɔlɛiyo* le, kɛ le Masanɔɔ, nduyɛ mi Masanɔɔ ndu wa le dialloŋ.
14 Mi Mɛlɛka miŋgi Masanɔɔ yoomu. Nduyɛ naa bɛɛ te ŋ vi pɛ, o cho naa hunɔɔ miŋgi yoomu a kpaaya ndɔɔ.
15 La sina nuaa maa dialuŋ nyaŋ cho diompilɛ a dialuŋ Kiliti woŋ te? Baa I nɔ pa mi chua dialuŋ cho diompilɛ a Kiliti woŋ, mi mɔɔsa muŋ a chua suundɛi bɛndoo? Pɛ pɛ bɛɛ!
16 La sina nuaa maa wana mɔɔsa pɛ dialuŋ ndɔŋ a chua suundɛi bɛndoo, maa nda ŋiɔɔŋ dialle ipilɛ le nda cho le? Kanifuule, Mɛlɛka dimi aa, “Nda ŋiɔɔŋ cho simnɔŋ dialle ipilɛ.”
17 Wana o wana cho pɛ o mɔɔsaa a Masanɔɔ, mɛɛ a nɔ yiyaŋnda pilɛlaŋ.
18 La wou laba* o kaa ihini nɔɔlɛiyo* niŋ te. Haki kɛ kɛ cheleŋ waŋndo tosa pɛ, o piiliaŋ dialuŋ ndɔŋ te. Kɛ te waŋndo tosa pɛ kaa ihini nɔɔlɛiyo, mɛɛ dialuŋ ndɔŋ o tosal hakioo ni.
19 La sina nuaa maa dialuŋ nyaŋ cho ko maa chiɛi lepiɛi le nyina diandaa nya sɔla Mɛlɛka o ba wo le? La cho lɛ le nyapila le,
20 kanifuule Mɛlɛka chii nya piondɔɔ kpali. Lelaŋ, la saŋgala Mɛlɛka o dialuŋ nyaŋ niŋ.
Tɛɛsiaalaŋ
^ Kilikiiye, “wanaa diandaa.”
^ Tofa Tɛɛsiaa.
^ Kilikiiye, pɔniaa. Tofa Tɛɛsiaa.
^ Kilikiiye, “nyaanuŋ.”
^ Kilikiiye, pɔniaa. Tofa Tɛɛsiaa.
