Kɔliŋtiaŋ Tasoo 8:1-13
8 Nyɛ ya nɔ le dimioo a nyɛdiaa lasooluuwo okɔɔ wo cho hoo ni: Ŋ sina maa ŋ nɔ kɔl kaloo. Kɔl kaloo tosa mi wana heeluŋ. Kɛ kaalaa ndu, mbo taŋgul wana.
2 Wana o wana yiyaŋ pɛ maa o sina nyɛ, mɛɛ o sina wɔ ndu mɛɛ o nɔ le ndu sinaa yɛ le.
3 Kɛ wana o wana kaala Mɛlɛka pɛ, mɛɛ Mɛlɛka sina wana koŋ.
4 A nyɛdiaa lasooluuwo dioo okɔɔ ndu, ŋ sina maa piɔmnda cho nyɛ o nyɛ o chieeŋndo niŋ te. Nduyɛ ŋ sina maa Mɛlɛka ndupilɛ kpe cho ni.
5 Waŋnda chua nyɛm bɔɔbɔɔ maa mɛlɛkaa ŋ cho ni, o wa o choo choo niŋ ɔɔ o lɛŋndeŋ choo. Mi che bɛɛ “mɛlɛkaa” kaŋ a “masaa” kaŋ cho tau,
6 kɛ le naa, Mɛlɛka ndupilɛ kpe cho ni. Ndu cho Finya naa ni, o toosiaa nyɛ o nyɛ fee wo. Le ndu naa bɛɛ ŋ cho ni. Masanɔɔ ndupilɛ kpe cho ni, Chiisu Kiliti. O sabu ndɔɔ niŋ naa kpou a nyɛ o nyɛ fee toosiaŋ ni.
7 Kɛ o cho waŋnda kpou le nɔ sinapɛŋgoo hoo le. Apum le mɛɛ nda wa paandu piɔmnda sooluuwo yɛ, te a de pɛ nyɛdiaa, nduyɛ ma yiyaŋ maa nyɛdiaa lasooluuwo o cho ni, mi kɔl nda iyamaa paaliaŋ nda, kanifuule o cho o kala le.
8 O cho nyɛdiaa le tosa miŋ sɔɔŋguu Mɛlɛka ikɛi le. Miŋ di bɛɛ nyɛdiaa le, ŋ fula nyɛ le laŋ te. Nduyɛ ŋ dio bɛɛ ndu, ŋ sɔla nyɛ le laŋ te.
9 Kɛ la wa yekeŋ, yɔŋii di nya nɔ le sɔɔŋ hɛlioo wo simnuŋ pou wana boŋ ma del lo, le wanaa kɔl nda iyamaa kindu le wa.
10 Kanifuule, num wana nɔ hoo sinapɛŋgoo wo, te wana kɔl iyama ndɔɔ kindu le wo che num pɛ nyɛdiaa dioo o maaŋ lasooluuwo niŋ, baa keŋ nyindu ndu le nyɛdiaa lasooluuwo dioo le?
11 O hei niŋ, sinapɛŋgu numndo cho tosa ma dii laalaŋ puaapilɛnɔ numndo, o Kiliti vi koŋ le ndu wo.
12 Te a tosa pɛ hakioo a puaapiliaa numnda o nɛiyo hoo choo, nduyɛ ma yɔŋul kɔlta ndala iyamalaŋ, mɛɛ Kiliti ŋ tosal koŋ hakioo ni.
13 Lelaŋ, te nyɛdiaa tosa pɛ mi puaapilɛnɔ nuu tambu kɔl, fɛɛŋ bɛɛ I di lɛ nyɛdiaa koŋ te, yɔŋii ya tosa mi puaapilɛnɔ nuu tambu kɔl.
