Pitɛ Tasoo 1:1-25
1 Ya Pitɛ, ya cho hoo kiilanɔɔ le Chiisu Kiliti wo cho yauwo hoo poonyiaa ni. I cho ndu poonyiaa o nya mialaa sɔla haa hɛlioo mi la wa a saŋnaŋ o Pɔŋtɔɔ niŋ, Kaleesiaa, Kapadoosiaa, Eesiaa, a o Bitiniaa niŋnda lo.
2 Sindɛ pa Mɛlɛka Finya naa hɛli nya ni, mbo ke nya nyina ndɔ diandaa le mi la sɔla diondɔɔ. O tosa hei le mi la diikuŋ ndu, nduyɛ mbo fasaŋiaa nya kooma Chiisu Kiliti waŋ:
Maa Mɛlɛka chɔɔlu nya kɔl nyuloo a kɛndɛi nduɛi bɛnduei fɔ!
3 Saŋgalaa cho le Mɛlɛka, o cho Finyaa le Masanɔ naa Chiisu Kiliti wo, kanifuule o chɔm naa nyiɛɛye miŋ sɔla violɔŋ sɛnɛiyo, le miŋ nɔ tiindaŋ kpeekpeiyo. Le mɛɛ Chiisu Kiliti miiŋgu yoomu yɛ naŋ sɔla tiindaŋndo hoo ni.
4 Nyɛm kɛŋ Mɛlɛka ke nya woŋ, ŋ se le, ŋ tembu le, nduyɛ ŋ fula o baa niŋ te. O kɛsul nya muŋ o choo choo niŋ kɔdɔ.
5 Le laalaŋ nyaa Mɛlɛka cho nya mandaa a kpaaya ndɔɔ ni. O cho nya mandaa le mi la huŋ sɔla pioŋɔɔ o teleŋ mɛɛlaa niŋ.
6 Le hei, la cho nyaaloo dɔɔnɔŋndo kpeekpei. Mi che bɛɛ tɔɔndaŋnda yɛ yɛlaŋ la cho nya komallo, kɛ le teleŋ biŋgi koni la cho nya choo ni.
7 Tɔɔndaŋ ndaŋ la keeku nya choo le sinaa mɛɛ kpɛ laalaŋ nyaa kendu yɛ. Laalaŋ waa nuaa cho o sɔvɛ mbo hiau kooliŋ tambu woŋ, mi che bɛɛ ma keeku muŋ o yiŋ. Nduyɛ, laalaŋ suu waa nuaa tosa mi la sɔla saŋgalaa, biiloo, a bɛɛleŋ, teleŋ Chiisu Kiliti cho chɔɔmɔŋ ndo.
8 Mi che bɛɛ la chi ndu le, kɛ mi la kaala ndu. Mi che bɛɛ la cho ndu chɔ suŋ suŋ te, kɛ la dɔu laalaŋndo o ndu niŋ. Le hei nya cho a nyaale bɛndu wana nɔla tɛɛsiaa le wo ni.
9 Kanifuule, la sina maa laalaŋ nyaa cho nya hunɔɔ piŋi.
10 Mi wanaa ndaa suaa le Mɛlɛka wa suaa a kɛndɛi bɛnduii Mɛlɛkɛi wa le nya ve okɔɔ. Nduyɛ, ma yaasiaa a pioŋɔɔ hoo okɔɔ fɛsɛ fɛsɛ.
11 Tuupa mi sɔɔŋ muŋ yɔŋnuŋ, mi Mɛlɛka soliŋ kpaaya ndɔɔ* kpeku le nda dimullo maa Kiliti cho saŋgaa sɔla, okoŋ mbo heelu ndu. Le sabu koŋ nda wa kindiŋndo ni le sinaa nyɛ wa Kiliti yɔŋnɔŋndo, a teleŋ i wa ndu yɔŋnɔŋndo.
12 Mi Mɛlɛka chɔm wanaa ndaa suaa le ndu wa maa sɔɔŋ nda wa dimioo woŋ, o cho le ndapila le, kɛ le nya. Ma poonyiaa sɔɔŋ nda dimul nya woŋ, nduyɛ mi la tuɛi muŋ sanaa a wanaa wa nya yooŋgu kɛndɔɔ dimullo wa. Nyina diandaa mala nda ni le hei tosaa. Nduyɛ maalikɛiya bɛɛ cho a yeemɛi kpeekpei le ma bii sɔɔŋ muŋ bila.
13 Lelaŋ, la bɛɛndiaa kɔlta nyalaŋ le wallo, nduyɛ mi la manda yiyaŋnda nyalaŋ nyɛkɛndɛi. La kɛsi kɔllo o kɛndɛi bɛnduii Mɛlɛka cho nya hunɔɔ tosal le choo, a teleŋ Chiisu Kiliti cho chɔɔmɔŋ ndo.
14 Chuauwaa Mɛlɛkaa nya cho niŋ ni. Nduyɛ, la cho ndu diikɔŋndo. Lelaŋ, la pɛŋgi sɔɔŋ tosaa mɛɛ yeemaŋ nyaa nɔ paandu tuupa mi la sina Mɛlɛka woŋ wa yɛ.
15 Kɛ mɛɛ wana veelu nya wo cho o diandaa yɛ, nya bɛɛ nɔ mi la wa a diandaa o kaala nyalaŋ niŋ.
16 Kanifuule, i cho i poonyiaa aa: “La nɔ mi la wa a diandaa, mɛɛ ya cho o diandaa yɛ.”
17 Te la wa pɛ Mɛlɛka Finyaa, o kilu iyama o lakafa choo le wo nyunaa le nyɛ o piɛileŋ niŋ, mɛɛ la nɔ siooŋii nduɛi o sɔɔŋ tosaa niŋ teleŋ nya cho wɔ hoo mialla o chieeŋndo hoo niŋndo.
18 Kanifuule, la sina maa o cho a nyɛm tambu woŋ, mɛɛ kaniŋ humboŋ, ɔɔ kooliiyoŋ cho nuaa yɛ le nya sɔla baŋaa o yoomu finyaa nyaa mamaa mɛi nya niŋndo le.
19 Kɛ a kooma sɔvɛ Kiliti waŋ nya sɔla baŋaa ni, saa fɔŋndɔ nɔ sɔŋ o sɔŋ te wo.
20 Tuupa mi chieeŋndo kanduŋ, mi Mɛlɛka hɛli ndu. Kɛ mbo chɔmnuŋ o teleŋ mɛɛlaa niŋ le sabu nyaa.
21 Ndu tosa ni mi la duau laalaŋndo o Mɛlɛka miŋgi ndu yoomu wo niŋ. Okoŋ mi Mɛlɛka tosa mbo sɔla biiloo, le halikpeŋ mi laalaŋ nyaa a tiindaŋ nyaa wa o Mɛlɛka niŋ.
22 La dindi nyapila le mɛɛ nya diikuŋ tonyaa yɛ. Koŋ tosa ni la nɔ kaala mulu muluaŋ le puaapiliaa nyaa le. Lelaŋ, la kaaliaŋ vellaa velle o kɔllo niŋ di.
23 Kanifuule, Mɛlɛka cho yoomu le fɛɛŋ a fɛɛŋndo tosa mi la sɔla violɔŋ sɛnɛiyo. O cho a kulii wu ve le, kɛ a kulii vi le ve.* Hei yɔŋnuŋ sanaa a diom ndɔɔ.
24 “Waŋchieeya kpou cho ko maa bil puiyaa. Nduyɛ naŋɔɔ ndaa kpou cho ko mɛɛ peeŋgela kɛndɛlaŋ la pɛɛŋga nuaa yɛ. Te billo vesa pɛ, peeŋgelaŋ la deli.
25 Kɛ diom Chɛhowa* wo ndu cho le fɛɛŋ a fɛɛŋ.” Nduyɛ “diom” koŋ cho yooŋgu kɛndɛ nda dimul nya wo ni.
