Pitɛ Tasoo 3:1-22
3 Nya laanduaa bɛɛ, la tusiŋ piaandaa nyaa o ba bɛŋgu. Okoŋ, o yɔŋ bɛɛ mi apum ve wanaa laalaŋ te, kaala nyalaŋ la tosa ma simnuŋ wanaa laalaŋnda, mi la dimul nda bɛɛ nyɛ o nyɛ le.
2 Kanifuule, a cho chɔ kaala nyala kɛndɛlaŋ a bɛɛle yiŋgoloŋnde nya nɔ le nda leŋ.
3 La chɛl mi naŋɔɔ nyaa wa o kɔɔ suee le. Ndu cho ni, lawɔɔlaŋ, nyɛm ŋkooliiyoŋ, ɔɔ nyɛla baa kalalaŋ chuɛɛnɔŋndo.
4 Kɛ naŋɔɔ nyaa nɔ mbo wa mɛɛ nya cho o kɔlta nyalaŋ niŋ yɛ. Le saboo hoo, la chuɛɛnuŋ kaa mɔɔsɔlɔɔ wo a kaa tusiaŋndo. Hei Mɛlɛka chua nyɛ sɔvɛ bɛndu ni. Nduyɛ chuɛɛnɔŋ waa nuaa ndu tembu le.
5 Kanifuule, nuaa koni waŋ laanduaa masindiaa ndaa nɔ siooŋii Mɛlɛkɛi, nduyɛ ma tiindaŋ o ndu niŋnda ndaa chuɛɛnuŋ ni. Mi ndaa tusiŋ piaandaa ndaa o ba bɛŋgu.
6 Lende koni Sela ndoo diikuŋ Ebilaham ni. Mi ndoo veelu ndu aa masanɔɔ. Nya bɛɛ te la hiou pɛ lachi a sɔɔŋ kɛndɔŋ tosaa, nduyɛ mi la nɔ isiooŋ te, mɛɛ chuauwaa nduaa nya cho ni.
7 Nya piaanduaa bɛɛ, la hiou lachi a laandaa nyaa sinaa nyɛkɛndɛi* o chalii nyɛi niŋ. La ke nda bɛɛleŋ, kanifuule a cho ko maa nyɛi laandii kindu piɔl te ve. Nduyɛ yoomu Mɛlɛka cho nya hunɔɔ ke sanaa o kɛndɛi nduɛi bɛnduei niŋndo, ndu koni nda bɛɛ cho hunɔɔ sɔla ni. Te la tosa lende le, Mɛlɛka tuii niŋ piɛile nyaleŋ te.
8 I mɛɛlɛi kpɔŋ, nya kpou la nɔ yiyaŋ pilɔɔ, mi la bii mɔnɛi latulu, mi la kaala puaapiliaa, mi la chɔm nda nyiɛɛye, nduyɛ mi la tusiŋ.
9 Te waŋndo tosal nya suɛi wɔɔŋnde pɛ, la miŋgul ndu maa le. Te o yei nya pɛ, la miŋgi le. Kɛ la dɔu wana koŋ sala, kanifuule le hei nya sɔla veeloo ni, le halikpeŋ mi Mɛlɛka bɛɛ dɔu nya sala.
10 “Wana o wana kaala pɛ yoomoo, nduyɛ mbo yeema ndu tueiyɔɔ yeela, o nɔ mbo manda diɔɔmule ndɔleŋ yɔŋii o dimi sɔɔŋ wɔɔŋndoŋ. Nduyɛ mbo manda sondo ndɔɔ yɔŋii o dimi choolaŋ.
11 Wana koŋ nɔ mbo mulul yɔŋ wɔɔŋndo kɔɔ, mbo tosa nyɛ cho o kɛndɔɔ wo. O nɔ mbo nuuviaa kɔl nyuloo, nduyɛ mbo manda ndu.
12 Wanaa cho sakpo Chɛhowa* o hɔl la, hɔlte* ndɔleŋ le cho nda choo. Nduyɛ te a nyɔɔlu ndu pɛ o piɛileŋ niŋ, nilaŋ o yaŋ nda ni. Kɛ wanaa tosa sɔɔŋ wɔɔŋndoŋ nda, Chɛhowa* yeema bɛɛ mbo che nda le.”
13 Te la nɔ pɛ dialuŋ fulaŋ le dɛnɛ kɛndɔɔ tosaa, nɛɛnɛ yɔŋ yɛ nya nyɛ?
14 Kɛ o yɔŋ bɛɛ mi la sɔla nyɛpalaa le suɛi cho sakpo ve tosaa, la cho wa a kɔl kɛndɛ. Lelaŋ, la yɔŋ isiooŋ le nyɛ waŋnda nɔ siooŋnde wo le.* Nduyɛ la chɛl mi nyɛ o nyɛ paaliaŋ nya le.
15 Kɛ la ke Masanɔ nyaa Kiliti bɛɛleŋ o kɔlta nyalaŋ niŋ. Wana o wana yeema pɛ mbo sina sabu nya nɔ tiindaŋndo wo, la wa a bɛɛndiaŋnda lɔɔlɔɔ le mi la tɛɛsial ndu. Kɛ la tosa ndi dɛɛ, nduyɛ a bɛɛle yiŋgoloŋndeŋ.
16 La nɔ kɔlta iyamala walaŋndaŋ. Okoŋ, o yɔŋ bɛɛ mi waŋnda dimi sɔɔŋ wɔɔŋndoŋ a nya okɔɔ le mɛɛ nya cho buɛiyaa Kiliti wa yɛ, kaa nya kɛndɔɔ cho tosa mi siɔmbulaŋ la bii nda.
17 Kanifuule, te hɛnaŋ Mɛlɛkaa i cho ni, o bɛnda ma sɔla saŋgaa le mɛɛ ŋ cho nyɛ bɛnda wo tosaa yɛ, mbo hiau saŋgaa sɔlaa le suɛi wɔɔŋnde.
18 Lepilɛ kpe Kiliti vi le hakilaŋ ni. Ndu wana sakpoo, mbo wu le wanaa sendu le wa, le halikpeŋ mbo miŋgi nya o diompilɔɔ niŋ a Mɛlɛka. O wa o iwana chieeya ma dii ndu. Kɛ mi Mɛlɛka miŋgi ndu yoomu o inyinaya.
19 O wa o inyinaya mbo kɔ dimul maalikɛiyaa wa o chiɛi manyumndo niŋnda yooŋgu kɔɔsɔɔ.
20 Maalikɛiya haa ndaa kɛɛ Mɛlɛka diomndo tueiyɔɔ ni teleŋ Nuuwa wa dɛndɔɔ taŋgullo wo. A boondii keŋ, mi Mɛlɛka hiau lachi a biuwɔŋndo. Nduyɛ waŋnda nyɛɛmbɔ koni Mɛlɛka piŋi o mɛŋma maŋ niŋ ni. Wanaa ŋɔmaa kpe.
21 Nyɛ velaŋ a heiyo cho yiŋɔɔ ni. Ndu cho nya hau piŋioo ni sanaa a miiŋgu Chiisu Kiliti miiŋgu yoomu wo. Yiŋɔɔ cho le nɔɔ faŋaŋndo o ŋdial te, kɛ piɛileŋ o Mɛlɛka lo le kɔl iyama walaŋndo.
22 O cho o ba kɛndɛ Mɛlɛka choo. Mɛɛ o hel o choo choo niŋ, mi Mɛlɛka tosa mi maalikɛiya, a kpaayalaŋ la wa ndu o ba bɛŋgu.
Tɛɛsiaalaŋ
^ Ɔɔ “sinapɛŋgoo chɔmndo.”
^ Tofa Tɛɛsiaa.
^ Kilikiiye, “hɔltaŋ.”
^ Tofa Tɛɛsiaa.
^ Ɔɔ naapum, “la yɔŋ isiooŋ le kɔŋgɔliaŋnda ndalaŋ te.”
