Pitɛ Tasoo 4:1-19
4 Mi Kiliti sɔla saŋgaa teleŋ o wa o dialloŋ niŋndo. Nya bɛɛ la bɛɛndiaŋ mi la nɔ yiyaŋ pilɛ koŋ kpe. Kanifuule, wana o wana sɔla pɛ saŋgaa o dialloŋ niŋ, o chɔm maa o soli balaŋ po o hakioo niŋ.
2 Okoŋ, boondii o cho wa yoomu chieeŋ nanuŋ nde, hɛnaŋ Mɛlɛkaa o cho wa tosaa ni, kɛ o wou lɛ laba o yeemaŋ ŋwana chieeyaŋ niŋ te.
3 Teleŋ hiou niŋndo cho letuu, le sɔɔŋ nyaa tosa paandu latulu nya wanaa sina Mɛlɛka le wa. Sɔɔŋ nyaa tosa woŋ cho muŋ ni: kaa kɔl vesɛiyo,* yeemɛi le sɔɔŋ wɔɔŋndoŋ tosaa, kolɔɔ bɛndoo, yelelaŋ bɛndoo, kuuliaa o muɛiyaŋ choo, a piɔmnda sooluuwo.
4 Te a che pɛ maa la cho lɛ o kaala nya wa paandu tosaa nya ndaa latulu laŋ niŋ te, mi kɔndɔfillo bii nda. Le hei, ma dimi sɔɔŋ wɔɔŋndoŋ a nya okɔɔ.
5 Kɛ wana cho o bɛɛndiaŋ le wanaa cho yoomu wa, a wanaa vi niŋnda yamɛi kilullo wo, waŋnda haa cho hunɔɔ kona dɔɔnɔŋ o ndu lo.
6 Le sabu koŋ kpeekpei nda dimul wanaa vi wa* yooŋgu kɛndɔɔ ni. Mi che bɛɛ ma kilul nda yamɛi o nɛi iwana chieeyaa choo, kɛ Mɛlɛka o hɔl ndu, a cho yoomu a mɛɛ i cho i chɛlaŋ a kpaaya* ndɔɔ yɛ.
7 Mɛɛlula nyɛ o nyɛ la sɔɔŋguu niŋ kpɛɛluŋ. Lelaŋ, la wa wanaa taasi, nduyɛ mi la wa a bɛɛndiaŋ lɔɔlɔɔ le piɛileŋ.
8 I hiou kpou ve, la kaaliaŋ vellaa velle a kɔllo kpou, kanifuule kaalaa kumbu hakila bɔɔbɔɔ.
9 La tosalaŋ kɛndɛi* vellaa velle, kɛ o wa a ŋɔɔchiaŋ te.
10 Mɛɛ wana o wana sɔla kioo yɛ, o soliŋ ndu kpeku le maaliaŋndo vellaa velle. Nya cho buɛiyaa Mɛlɛka tosal kɛndɛi nduɛi bɛnduei o nɛila yɛ yɛlaŋ niŋnda ni.
11 Te le suɛi waŋndo sɔla kioo ni, mɛɛ o dimul waŋnda yooŋgu Mɛlɛkaa. Te le wallo tosaa ni, o tosa ndu mɛɛ Mɛlɛka ke ndu yoomuaŋ yɛ, le halikpeŋ mi Mɛlɛka sɔla saŋgalaa o nyɛ o nyɛ niŋ, sanaa o Chiisu Kiliti niŋ. Mɛlɛka nɔ kpaayaa a biiloo le fɛɛŋ a fɛɛŋ ni. Amiina.*
12 Chaaŋaa niaa kaalaa, kɔndɔfili bii nya le tɔɔndaŋnda kala kalala cho nya komallo laŋ te, mɛɛ wana yɔŋ ko aa suɛi woolaa.
13 Kɛ mɛɛ nya bɛɛ cho saŋgaa maa Kiliti yɛ, la hiou lachi a nyaaloo dɔɔnɔŋndo. Okoŋ, te biilu ndɔɔ huŋ chɔɔmuŋ pɛ, la cho dɔɔnɔŋ nyaale tau tau.
14 Te a dimi pɛ sɔɔŋ wɔɔŋndoŋ a nya okɔɔ le diola Kiliti laŋ, la wa a kɔl kɛndɛ, kanifuule nyina kɔndɔfili bɛndoo cho nya choo. Koŋ cho ni, nyina Mɛlɛkaa.
15 Te waŋnda tusi nya nyɛpalaa choo pɛ, o wa le wanachiee diyɔɔ, ɔɔ le levii le. Nduyɛ o wa le dɛnɛ wɔɔŋndo, ɔɔ le sondoo wouwo o suɛi pila niŋ te.
16 Kɛ wana o wana nda tusi pɛ nyɛpalaa choo le mɛɛ o cho Kilisiɔŋnɔɔ yɛ, siɔmbula bii ndu le. O hiou lachi a Mɛlɛka saŋgalaa le mɛɛ o cho Kilisiɔŋnɔɔ yɛ.
17 Teleŋndo fuuluu hoo ni le mi kɔɔsɔɔ kanduŋ. Nduyɛ o chiɛi Mɛlɛkaa niŋ fɛlɛŋ o cho kandɔŋ. Te o yɔŋ pɛ mi kɔɔsɔɔ kanduŋ a naa, vɛɛnɛ i wa yɛ niŋ a wanaa kɛɛ le nilaŋ yaŋɔɔ o yooŋgu kɛndɛ Mɛlɛkaa wa?
18 Yau Mɛlɛkaa dimi aa: “Te i wa pɛ ikala le mi wana cho sakpo wo sɔla chindaa, yɛɛnɛ yɔŋnuŋ yɛ niŋ a wana sina Mɛlɛka le wo, ɔɔ wana hakioo?”
19 Lelaŋ, wanaa nda cho nyɛpalaa tusioo choo le mɛɛ nda cho hɛnaŋ Mɛlɛkaa tosaa yɛ wa, a hiou lachi a nyɛ cho o kɛndɔɔ wo tosaa, nduyɛ ma yɔŋguŋ wana toosiaa o ba bɛŋgu. O cho wana lo o lediom.
Tɛɛsiaalaŋ
^ Ɔɔ “sɔɔŋ lasiɔmboŋ.” Kilikiiye, asɛlchiaa. Tofa Tɛɛsiaa.
^ Koŋ cho ni, wanaa wa a vilɛi o hakila ndalaŋ niŋnda.
^ Ɔɔ “nyina.”
^ Ɔɔ “La wa wanaa chaa mialla biyɔɔ.”
^ Koŋ cho ni, i yɔŋnuŋ lende fɔ.
