Saamiɛɛ Tasoo 10:1-27
10 Okoŋ, mi Saamiɛɛ chua sanioo a chuɛiyaŋ leniŋ, mbo tala maŋ Sɔɔ o lebol. Mi Saamiɛɛ sɔsa ndu kuuwo mbo dimi aa: “Num Chɛhowa pɔya ni le ma wa simlachinɔɔ nyɛm kɛŋ ndɔŋ choo.
2 Te a mal pɛ hau ma wa miiŋgoo, a cho saalɔŋ puaa a ŋiɔɔŋ o sɛi Luechɛɛ wo ikɛi, o tanda Bɛŋjamiŋ ndo niŋ Sɛlisa. A cho num dimul aa, ‘Sofɛliaa num oo kuɛ nuuviaa wa, a saaluŋ nda. Kɛ finya num puɛɛnuŋ niŋ a sofɛliaa kaŋ okɔɔ, mbo wa buulaŋndo le num. O cho dimioo aa: “Vɛɛ kpeekpei ya cho yɛ looku po nuu saalɔŋ?”’
3 Te a mal loŋ pɛ, lo kɔlaŋ haaa ma fuuluu o yɔm bɛndoo Tabɔɔ. A cho puaa a yaa komal loŋ, nduyɛ Bɛtɛl nda cho kɔlaŋ ni o Mɛlɛka tonyaa lo. O pilɛ cho wa kɔlaŋ a chuiŋaa fɔŋnduaa a yaa, hoo cho wa kɔlaŋ a beediiyo* kpuŋgbaŋ ŋgaa, nduyɛ o pilɔɔ cho wa kɔlaŋ a kpɛɛnɛi bɛnduei a muɛiyaŋ leniŋ.
4 A cho num nyuna a numpila okɔɔ, okoŋ ma ke num beediiyo kpuŋgbaŋ ŋ muuŋ. Nduyɛ a nɔ ma bii nda beedii koŋ o ba.
5 Okoŋ kɔɔli, a cho fuuluu o pembii Mɛlɛka tonyaa, naa puaa chɔuwaa Filitiaŋnda cho kunda wa. Te a fuuluu pɛ chiee, la cho kei bɔŋaŋ nya wanaa suaa le Mɛlɛka wa, ma wa fulaa o fondaŋ filioŋndo, nduyɛ a cho wa kunda. A cho wa kɔlaŋ a yooŋgu Mɛlɛkaa dimioo, mi waŋnda kua nda lachi a nyɛchaa iyoo, dundu pɔmbɔɔ, vɛlɛ a towaa lɔɔ, nduyɛ ma hɔŋ sɛŋndeŋ.
6 Nyina Chɛhowa wo cho num kpaayaa ke, ma kandu yooŋgu Mɛlɛkaa dimioo a nda latulu. Nduyɛ a cho siŋgaŋ ma simnuŋ wana cheleŋ.
7 Te sɔɔŋ muŋ kpou yɔŋnuŋ pɛ, tosa nyɛ ŋ yiyaŋ maa o bɛnda wo, kanifuule Mɛlɛka tonyaa cho a num latulu.
8 Okoŋ kɔɔli, ma kuɛ ya pɔɔ lachi Kikaa. I cho num komal loŋ, mi kɔ soli salala luamaa laŋ a salala kɔl nyulu laŋ. Te a kuɛ pɛ, a chum ya le palɛi i ŋɔmmɛu. Okoŋ te I hiŋ pɛ, I chɔm num nyɛ ŋ nɔ le tosaa wo.”
9 Dimioo nuaa mi Sɔɔ muliŋ le kɔŋndaŋ, mi Mɛlɛka kandu ndu kɔllo siŋgaa, nduyɛ mi sɔɔŋ muŋ kpou yɔŋnuŋ o paale leŋ choo.”
10 Mɛɛ nda chɛŋ loŋ, ma kua o pembei choo, okoŋ mi wanaa suaa le Mɛlɛka wa komal ndu loŋ. O lepilɛ niŋ kpe, mi nyina Mɛlɛkaa ke ndu kpaayaa, mbo kandu yooŋgu Mɛlɛkaa dimioo nda tɛɛŋ.
11 Mɛɛ wanaa ndaa sina ndu paandu wa kpou che ndu yooŋgu Mɛlɛkaa dimioo latulu a wanaa suaa le Mɛlɛka wa, ma dimulaŋ aa: “Yɛɛnɛ yɔŋnuŋ yɛ a po Kisi wo? Baa wana suaa le Mɛlɛka wo Sɔɔ bɛɛ cho niŋ ni?”
12 Okoŋ mi po pilɛ o nda tɛɛŋ nyuna aa: “O nɛɛnɛ cho yɛ finya nda?” Mi hei simnuŋ niko maa tale aa: “Baa wana suaa le Mɛlɛka wo Sɔɔ bɛɛ cho niŋ ni?”
13 Mɛɛ o chii yooŋgu Mɛlɛkaa dimi, mbo kua o fondaŋ filioŋndo.
14 Mi bom ndɔ nyuna ndu nda buɛi ndɔɔ aa: “Kuɛɛnɛ nya wa yɛ?” Mbo muli aa: “Sofɛliaa naŋ wa nuuviaa ni, kɛ ŋ seeluŋ nda le. Okoŋ miŋ kua o Saamiɛɛ lo.”
15 Mi bom ndɔ nyuna ndu aa: “A yandii dimullɔ ya. Yɛɛnɛ Saamiɛɛ dimullɛ nya?”
16 Mi Sɔɔ mulul bom ndɔ aa: “Mbo dimul naa maa a saaluŋ sofɛliaa ndaa luusiaŋ nda.” Kɛ Sɔɔ dimul bom ndɔ a nyɛ Saamiɛɛ dimul ndu a masaleŋ okɔɔ wo le.
17 Okoŋ kɔɔli, mi Saamiɛɛ chuuŋgiaa Isɔluɛiya Chɛhowa lachi Misipa.
18 Mbo dimul nda aa: “Nyɛ Chɛhowa, Mɛlɛka Isɔluɛiya dimi wo cho hoo ni: ‘Ya soli nya o lɛŋnde Ichipi leŋ niŋ ni, nduyɛ mi piŋi nya waŋnda Ichipi vɛlɛ a masɛi wa nya nyɛpalaa tusioo choo ve kpou o ba.
19 Kɛ hau, la kɛɛ Mɛlɛka nyaa, o piŋi nya o kpundɛla nyalaŋ niŋ, a o saŋga nya wa niŋ kpou wo, mi la dimi aa: “Hɛli waŋndo mbo wa naa choo masa.” Lelaŋ, la sim Chɛhowa lachi a kaala nyalaŋ, vɛlɛ a yuŋgula nyala yɛ yɛlaŋ.’*
20 Okoŋ mi Saamiɛɛ tosa mi kaalaŋ o Isɔluɛi niŋ kpou sɔɔŋguu kpɛɛluŋ, nduyɛ mi kaale Bɛŋjamiŋ ndeŋ le sɔla hɛlioo.
21 Okoŋ kɔɔli, mbo tosa mi kaale Bɛŋjamiŋ ndeŋ le sɔɔŋguu kpɛɛluŋ a yuŋgula ndɔlaŋ, nduyɛ mi yuŋgu Matili wo sɔla hɛlioo. O mɛɛlulaŋ kpɔŋ, mi Sɔɔ po Kisi wo sɔla hɛlioo. Kɛ mɛɛ nda kuɛ ndu nuuviaa, a seeluŋ ndu ba o ba le.
22 Ma nyuna Chɛhowa aa: “Baa po koŋ cho pa nanuŋ?” Mi Chɛhowa muli aa: “Mi che ndu o viaŋnaŋ o wolɔɔlaŋ kɔɔli.”
23 Okoŋ ma nyaanuŋ ma kɔ huŋ a ndu. Mɛɛ o sim waŋnda tɛɛŋ, mbo hiau wana o wana bandei, kanifuule o wa o vilɛi kpoloŋ.
24 Mi Saamiɛɛ dimul waŋnda kpou aa: “Wana Chɛhowa hɛli wo cho hoo ni. Nduyɛ o waŋnda tɛɛŋ kinɛi, wana o wana cho maa ndu le.” Okoŋ mi waŋnda kpou deŋi choo choo aa: “Maa masaa viou naa choo fɔ!”
25 Mi Saamiɛɛ dimul waŋnda a sɔɔŋ masaa nɔ niŋ di le mbo tosa woŋ, nduyɛ mbo poonyiaa muŋ o yauwo niŋ mbo kɛsi Chɛhowa lachi. Okoŋ mi Saamiɛɛ mal waŋnda, mi wana o wana miiŋgu o ndu lo.
26 Mi Sɔɔ bɛɛ miiŋguŋ o ndu lo Kibiya, nduyɛ mi Chɛhowa tosa mi puaa chɔuwaa kpaayaa bɛnduaa liila ndu.
27 Kɛ mi puaa fonduaa pum dimi aa: “Vɛɛ poo hoo nɔla yɛ mbo piŋi naa?” Le hei, ma pɛɛsa ndu, nduyɛ a chuu ndu ke o ke le. Kɛ Sɔɔ dimi nyɛ o nyɛ a ndi okɔɔ le.*
Tɛɛsiaalaŋ
^ Ɔɔ “buloo.”
^ Hibuluiye, “kunda kɛ kɛ waŋnda waapilɛ.”
^ Hibuluiye, “mbo simnuŋ maa bobonɔ.”
