Saamiɛɛ Tasoo 11:1-15
11 Okoŋ mi Nahasi, Amɔnaitiinɔɔ huŋ kila dɔɔŋgɔɔ le Chabɛsi o Kiliaadi niŋ chiŋalaŋndo a sɔŋgɔɔ. Mi puaa o Chabɛsi niŋ kpou dimul Nahasi aa: “Yii kpemaa* a naa, okoŋ miŋ wa num o ba bɛŋgu.”
2 Mi Nahasi dimul nda aa: “I cho kpemaa yii a nya, te la chɛl pɛ mi pesi hɔlta nyala ba kɛndɛ laŋ kpou. I cho hei tosa le mi tusi Isɔluɛiya kpou siɔmbulaŋ.”
3 Mi waŋ banaa o Chabɛsi niŋ dimul ndu aa: “Ke naa palɛi i ŋɔmmɛu, le miŋ yɔŋ yooŋgoo o tanda Isɔluɛiyo niŋ kpou. Okoŋ te ŋ sɔla wana baŋa naa le, ŋ cho num yɔŋgɔŋ o ba bɛŋgu.”
4 Mɛɛ teleŋ tiŋ hiou, mi wanaa nda vem a yooŋgoo wa kua Kibiya o Sɔɔ lo chiee, ma dounuŋ waŋnda kona. Okoŋ, mi waŋnda kpou koŋul choo choo kpeleŋ a chaŋndo.
5 A teleŋ koŋ, Sɔɔ wa fulaa yondoo niŋ mbo wa hunɔɔ a chɔluaa ndu lachi. Okoŋ mbo nyuna aa: “Yɛɛnɛ yɔŋnuŋ yɛ? Chaŋnda yɛɛ waŋnda cho yɛ laŋ?” Ma dimul ndu nyɛ waŋnda Chabɛsi dimi wo.
6 Mɛɛ Sɔɔ tuei hei, mi nyina Mɛlɛkaa ke ndu kpaayaa, nduyɛ mbo duaunuŋ tumbe o kala kala.
7 Okoŋ mbo chua nauwaa towaa a ŋiɔɔŋ, mbo kili kili nda a buŋgaŋ. Mbo chua buŋgaŋ muŋ mbo ke wanaa nda vem a yooŋgoo wa, ma piɔu piɔu muŋ o tanda Isɔluɛiyo niŋ kpou. Ma dimul waŋnda aa: “Wana o wana kɛɛ pɛ le Sɔɔ nda Saamiɛɛ tolɔɔ kɔɔli, nuaa nda cho tosa a nauwaa nduaa ni.” Mi siooŋii bɛnduei bii waŋnda le Chɛhowa, okoŋ ma fula ma chuuŋgiaŋ naapilɛ.
8 Mi Sɔɔ chɔm waŋnda o Bisɛki niŋ. Isɔluɛiya wa 300,000 nduyɛ puaa Chuda wa 30,000.
9 Ma dimul wanaa hiŋ a yooŋgoo wa aa: “Nyɛ nya nɔ mi la dimul puaa Chabɛsi o Kiliaadi niŋndo cho hoo ni, ‘Siɔdii a paale kalaleŋ, la cho pioŋɔɔ sɔla.’” Mi wanaa hiŋ a yooŋgoo wa miiŋgu ma kɔ dounuŋ waŋnda Chabɛsi kona, okoŋ ma duaunuŋ nyaale tau.
10 Le hei, mi puaa Chabɛsi dimul Amɔnaitiiya aa: “Siɔdii ŋ cho nya yɔŋgɔŋ o ba bɛŋgu, mi la tosal naa nyɛ bɛnda nya o hɔllo.”
11 Diimandɔɔ, mi Sɔɔ piɔu waŋnda kundalaŋ la yaa, ma kua sɔɔ sɔɔ o dɔɔŋgɔ Amɔnaitiiya niŋ a ditɛɛŋ paale siaa.* A lo nda diuwo haaa mi paaleŋ le kiandu. Mi wanaa lo yoomu wa saŋnuŋ a pilɛŋ pilɛŋnda kpou.
12 Okoŋ mi waŋnda nyuna Saamiɛɛ aa: “Nɛɛ yaa wa yɛ dimioo aa, ‘Baa Sɔɔ nɔ pa mbo wa naa choo masa?’ Soli nda nanuŋ miŋ dii nda.”
13 Kɛ mi Sɔɔ dimi aa: “Sako bɛɛ, wana o wana nɔ mbo sɔla piɔmndo paale hauleŋ ndeŋ te. Kanifuule, Chɛhowa piŋi hau waŋnda Isɔluɛi.”
14 Mɛɛ teleŋ tiŋ hiou, mi Saamiɛɛ dimul waŋnda aa: “La ŋ kɔŋnuŋ Kikaa, miŋ kɔ miŋgi yonda maa Sɔɔ cho masaa ni.”
15 Okoŋ mi waŋnda kpou kua Kikaa, ma kɔ siiŋguu Sɔɔ masaa Chɛhowa lachi. Ma soli salala kɔl nyulu laŋ Chɛhowa lachi loŋ. Mi Sɔɔ a puaa o Isɔluɛi niŋ kpou tosa dunyɛi, nduyɛ ma duaunuŋ nyaale tau.
