Saamiɛɛ Tasoo 12:1-25
12 O mɛɛlulaŋ kpɔŋ, mi Saamiɛɛ dimul Isɔluɛiya kpou aa: “Nyɛ o nyɛ nya dimul la le tosaa, I chii ndu tosa.* Nduyɛ, mi hɛli waŋndo le mbo wa nya choo masa.
2 La sɔla niko masa cho nya chilaŋ ndo!* Ya wa nya chilaŋ ni chɔŋ o chua piaanduyɛi nii niŋ mbo huŋ bii a paale hauleŋ ndeŋ. Kɛ I yuuwa niŋ, nduyɛ yuluŋnde kpu ya o lebol. Puaa niaa cho wa a nya latulu.
3 La che ya nanuŋ. La timbi seileŋ kpendekele Chɛhowa o hɔl a wana o pɔya wo: O nɛɛnɛ cho yɛ nanuŋ mi bii ndu nau ndɔɔ ɔɔ sofɛlɛ ndɔɔ o ba? O nɛɛnɛ ya tosallɛ kafalaŋ ɔɔ mi tɛɛmbuu ndu kɔllo? O nɛɛnɛ cho yɛ mi bii ndu luɛiyɔɔ niŋndo o ba le sɔɔŋ kiɔɔ dimioo o nɛi sakpoo choo? Sɔɔŋ muŋ kinɛi i pilɛ bɛɛ te I tosal wana pɛ, I nɔla mi miŋgi bɛɛndiaa.”
4 Okoŋ ma dimi aa: “A tosal naa lakafa ɔɔ ma tɛɛmbuu naa kɔl te. Nduyɛ, a bii wana nyɛ o nyɛ o ba le.”
5 Mbo dimul nda aa: “Chɛhowa a wana ndɔ o pɔya wo cho hau lesei maa, la seeluŋ nyɛ o nyɛ nya bii ya tɔɔyaŋ le ndu le.” Mi nda kpou dimi aa: “Ŋ chɛl maa o cho lesei.”
6 Okoŋ kɔɔli, mi Saamiɛɛ dimul waŋnda aa: “Chɛhowa, o soliŋ Muuse nda Elɔŋ kpeku, nduyɛ mbo soli finyaa nyaa mamaa o lɛŋnde Ichipi leŋ niŋndo cho lesei.
7 Lelaŋ, la sim Chɛhowa lachi le mi chɔm nya walta kɔndɔfilta Chɛhowa tosal nya vɛlɛ a finyaa nyaa mamaa laŋ kpou.
8 “Mɛɛ Chekɔpu kuɛ dɔɔ Ichipi, mi finyaa nyaa mamaa kandu Chɛhowa nyunaa le malaa. Okoŋ, mi Chɛhowa yɔŋ Muuse nda Elɔŋ le ma sim finyaa nyaa mamaa lachi ma soli nda Ichipi, le ma huŋ wa o fondaa hoo.
9 Kɛ ma puɛɛnuŋ a Chɛhowa Mɛlɛka ndaa. Le hei, mbo mal nda Sisɛlua, masa puaa chɔuwa Hasɔɔ o ba, a Filitiaŋnda vɛlɛ a masaa Mowaabi, okoŋ ma chiŋalaŋ nda a sɔŋgɔɔ.
10 Ma nyuna Chɛhowa le malaa, ma dimi aa: ‘Ŋ tosa hakioo, kanifuule ŋ mal Chɛhowa miŋ muliŋ suŋgbuma Baal laŋ a suŋgbuma Asitɔluɛɛ waŋ sooluuwo. Lelaŋ a yandii, piŋi naa yaamɔɔwaa naa o ba, le miŋ miiŋgu num piɛiyo.’
11 Mi Chɛhowa yɔŋ Chɛlubaal, Bidaŋ, Chɛfita, a Saamiɛɛ, le ma piŋi nya yaamɔɔwaa ndaa balu nya wa kpou o ba, okoŋ mi la wa o kɔl nyulu niŋ.
12 Mɛɛ nya che mi Nahasi, masa Amɔnaitiiya huŋ chiŋalaŋ nya a sɔŋgɔɔ, mi che bɛɛ Chɛhowa Mɛlɛka nyaa cho masa nyaa ni, kɛ mi la wa lambaŋndo ya dimullo aa, ‘Ŋ chii kɛɛsiaa le mi waŋndo wa naa choo masa!’
13 Lelaŋ, la sɔla niko masa nya yeema nduyɛ mi la nyuna le ndu wo. Chɛhowa hɛlul nya waŋndo le mbo wa nya choo masa.
14 Te la nɔ pɛ siooŋii Chɛhowa ve, mi la piɛi ndu, mi la tuei ndu diom, mi la tosa nyɛ Chɛhowa dimul nya wo, nduyɛ mi nya a masa nyaa tol Chɛhowa Mɛlɛka nyaa kɔɔli, mɛɛ o naŋ.
15 Kɛ te la kɛɛ pɛ le Chɛhowa diomndo tueiyɔɔ, nduyɛ mi la kɛɛ nyɛ Chɛhowa dimul nya wo tosaa, Chɛhowa cho nya nyɛpalaa tusi choo vɛlɛ a finyaa nyaa.
16 Lelaŋ, la sim mi la che suɛi kɔndɔfilii bɛndu Chɛhowa cho nya tosa o hɔl le.
17 Baa o cho boondii kialaa ŋwitiiye le cho hei le? I cho Chɛhowa dimul mbo tosa mi taŋndaŋ ma deŋi nduyɛ mi piɔɔ sia. Okoŋ mi la sina nduyɛ mi la bii bila maa suɛi wɔɔŋnde nya tosa Chɛhowa o hɔl ni, le ndu nyunaa le mbo ke nya masaa.”
18 O paale leŋ choo, mi Saamiɛɛ piɛi o Chɛhowa lo, okoŋ mi Chɛhowa tosa mi taŋndaŋ ma deŋi, nduyɛ mi piɔɔ sia. Mi siooŋii bɛnduei bii waŋnda kpou le Chɛhowa a le Saamiɛɛ.
19 Mi waŋnda kpou dimul Saamiɛɛ aa: “Piɛi o Chɛhowa Mɛlɛka numndo lo le buɛiyaa numnda, kanifuule ŋ yeema miŋ vi le. Naapila chɔɔlu hakilaŋ handɔŋ choo le suɛi wɔɔŋii naŋ tosa miŋ nyuna le masaa wo.”
20 Okoŋ mi Saamiɛɛ dimul waŋnda aa: “La yɔŋ isiooŋ te. A tonya, nya tosa dɛnɛ wɔɔŋndo hoo ni. Kɛ nduyɛ, la mulul Chɛhowa kɔɔ le. La piɛi Chɛhowa a kɔl nyaa kpou.
21 La tual nyɛm fondoŋ kɔɔli le, kanifuule ŋ nɔ tɔnɔ le nduyɛ ŋ nɔla miŋ piŋi nya le. Nyɛm fondoŋ fuu koni ŋ cho ni.
22 Le sabu diola ndɔla tɔɔmalaŋ, Chɛhowa mel wanaa nduaa le. Kanifuule, Chɛhowa ndupila kɛsɛ hɛli nya ni le mi la wa wanaa nduaa.
23 Kɛ ya, te I kɛɛ pɛ piɛileŋ le nya, mɛɛ hakioo ya cho wa koŋ tosaa a Chɛhowa ni. I cho hiouwɔɔ lachi a nya pɛɛkoo o nɛi bɛnda wo choo.
24 La nɔ tuŋ siooŋii Chɛhowa ve, nduyɛ mi la piɛi ndu o nɛi tonyaa choo a kɔl nyaa kpou, kanifuule o tosa sɔɔŋ kɔndɔfiliŋ bɛndoŋ le nya.
25 Kɛ te la hiou pɛ lachi a nyɛ cho o wɔɔŋndo wo tosaa a siɛlɛi fuu, nya ni, masa nyaa ni, o cho nya basɔɔ tɛɛ.”
