Saamiɛɛ Tasoo 15:1-35
15 Okoŋ mi Saamiɛɛ dimul Sɔɔ aa: “Mi Chɛhowa viam ya le mi pɔya num ma simnuŋ masaa wanaa nduaa choo, Isɔluɛiya. Lelaŋ, yaŋ nilaŋ o nyɛ Chɛhowa nɔ le dimioo wo.
2 Nyɛ Chɛhowa, Mɛlɛka puaa chɔuwa dimi wo cho hoo ni: ‘I cho Amalɛkaitiiya nyɛpalaa tusi choo le nyɛ nda tosal Isɔluɛiya wo. Kanifuule teleŋ nda chɛŋ Ichipi wo, ma kei nda simul o nɛi tɛɛŋ.
3 Lelaŋ, kɔ chiŋalaŋ Amalɛkaitiiya a sɔŋgɔɔ, nduyɛ ma tɛɛmbuu nda vɛlɛ a nyɛ o nyɛ nda nɔ. A nɔ ma tuiinuŋ wana o wana inyiɛɛ le. Wana pɔnɔ ni, wana lanɔ ni, chuaambɔ ni, chɛlɛkpɛ ni, nau ni, saa ni, nyɔɔmɛ ni, sofɛlɛ ni, a nɔ ma diu diu nda kpou.’”
4 Okoŋ, mi Sɔɔ chuuŋgiaa waŋnda o Tɛlem niŋ, nduyɛ mbo chɔm nda. Puaa chɔuwaa kua a ŋpelu wa, a wa 200,000, nduyɛ puaa Chuda wa 10,000.
5 Mi Sɔɔ nda puaa nduaa kua haaa Amalɛki, ma kɔ vioŋnuŋ o kpoloŋndo niŋ.
6 Okoŋ mi Sɔɔ dimul Kenaitiiya aa: “La fula Amalɛkaitiiya tɛɛŋ, yɔŋii ya kɔ tɛɛmbuu nya a nda latulu. Kanifuule, mi la chɔm Isɔluɛiya kpou kaala lo lechoo wo teleŋ nda fula Ichipi wo.” Le hei, mi Kenaitiiya fula Amalɛkaitiiya tɛɛŋ.
7 Okoŋ kɔɔli, mi Sɔɔ nda puaa nduaa chɔuwa diu diu Amalɛkaitiiya chɔŋ Havila haaa Suɔɔ, chiee cho Ichipi ikɛiyo.
8 Ma diu diu wanaa wa loŋ nda kpou a muɛi faŋnde, kɛ ma mɛi Akaki, masa Amalɛkaitiiya yoomu.
9 Mi Sɔɔ nda puaa nduaa chɔuwa tuiinuŋ masaa Akaki inyiɛɛ. Nduyɛ saa kɛndɛ kɛndiaa, nauwa, a chɔluaa chelulɛiyaa cheleŋ kpou, a diu nda le. Nyɛm kɛndɛŋ cheleŋndoŋ kpou bɛɛ ma mɛi. Ndaa yeema le muŋ tɛɛmbuu le. Kɛ nyɛm fondoŋ a nyɛm nda yeema le woŋ kpou, ma tɛɛmbuu muŋ.
10 Okoŋ kɔɔli, mi Chɛhowa suaa o Saamiɛɛ lo aa:
11 “I tambu kɔl* le mɛɛ ya siiŋguu Sɔɔ masaa yɛ. Kanifuule o mal la, mbo kɛɛ le nyɛ ya dimul ndu wo tosaa.” Mi Saamiɛɛ tambu kɔllo tau, nduyɛ mbo lɔl chaŋndo pii o Chɛhowa lo.
12 Mɛɛ Saamiɛɛ chɛŋ idiiyo puŋ le mbo kuɛ naa Sɔɔ chua, ma dimul ndu aa: “Sɔɔ kuɛ Kamɛɛ, mbo kɔ simi suŋgbuleŋ ndoŋ le ndupila. Okoŋ, mbo muliŋ mbo kua Kikaa.”
13 Mɛɛ Saamiɛɛ saaluŋ ndu niŋ yɔɔfɛɛ, mi Sɔɔ dimul ndu aa: “Maa Chɛhowa dɔu num sala fɔ! I tosa nyɛ o nyɛ Chɛhowa dimul la le tosaa.”
14 Mi Saamiɛɛ dimi aa: “Kɛ vɛ mi wa bɔɔluu saa a nauwa tueinɔŋndo o lani?”
15 Mi Sɔɔ muli aa: “Amalɛki nda fula a nda ni. Kanifuule, puaa niaa chɔuwa mɛi saa kɛndɛ kɛndiaa a nauwaa kɛndiaa ni le salaa solioo o Chɛhowa Mɛlɛka numndo lo. Kɛ nyɛm tɔɔŋ kpou miŋ tɛɛmbuu muŋ.”
16 Okoŋ mi Saamiɛɛ dimul Sɔɔ aa: “Mɛɛlu loŋ! I dimullɔ num nyɛ Chɛhowa dimul la chɔchɔl lo.” Mi Sɔɔ dimi aa: “Awa, soo!”
17 Mi Saamiɛɛ hiau lachi a suɛi aa: “Teleŋ Chɛhowa siiŋguu num masaa kaalaŋ Isɔluɛi choo, nduyɛ mbo pɔya num le ma wa masaa o Isɔluɛi niŋndo, ma chuaŋnuŋ maa a cho wana sɔvɛ le, lende le?
18 Mɛɛ nyɔɔ viou tiŋ, mi Chɛhowa viam num, mbo dimi aa, ‘Kɔ tɛɛmbuu Amalɛkaitiiyaa dɛnɛ wɔɔŋaa kaŋ, ma lo sɔŋgɔɔ a nda haaa ma basu nda tɛɛ.’
19 Mɛɛ le yɛɛnɛ ŋ kɛɛ yɛ nyɛ Chɛhowa dimul numndo tosaa? Yɔŋii ŋ diikuŋ, ma luɛi nyɛm nya puŋga yaamɔɔwaa nyaa o ba woŋ lehɔl. Nduyɛ, ma tosa nyɛ bɛnda Chɛhowa o hɔl te wo!”
20 Mi Sɔɔ dimul Saamiɛɛ aa: “Kɛ I tosa nyɛ Chɛhowa dimul la wo! Chɛhowa vem ya mi kua, nduyɛ mi huŋ a Akaki, masaa le Amalɛki. Mi tɛɛmbuu vɛlɛ Amalɛkaitiiya.
21 Puaa niaa chɔuwa koni chua saa a nauwaa kɛndɛ kɛndiaa ni, o nyɛm muŋ nɔ le tambei sɔlaa woŋ tɛɛŋ, le salaa solioo o Chɛhowa Mɛlɛka numndo lo Kikaa.”
22 Mi Saamiɛɛ dimi aa: “Yɛɛnɛ kpeekpei nɛŋi yɛ Chɛhowa kɔllo? Baa salala luamaa laŋ a salala cheleŋ ndaŋ solioo o ndu lo, ɔɔ nyɛ Chɛhowa dimi wo tosaa? I dimullɔ num! Diikɔŋndo bɛnda mbo hiau salaa solioo, nduyɛ nilaŋ yaŋɔɔ bɛnda mbo hiau chuɛima saa salaa solioo.
23 Nilakalulaŋ a walta nyinaa wɔɔŋnda, nyɛpilɔɔ kpe la cho ni. Nduyɛ heelɔŋndo, maŋgaliaalaŋ, a piɔmnda sooluuwo* bɛɛ, nyɛpilɔɔ kpe la cho ni. Le mɛɛ ŋ kɛɛ le nyɛ Chɛhowa dimul numndo tosaa yɛ, ndu bɛɛ kɛɛ num le waa masa.”
24 Okoŋ, mi Sɔɔ dimul Saamiɛɛ aa: “I tosa hakioo, kanifuule I kɛɛ le nyɛ Chɛhowa dimul la wo tosaa, vɛlɛ a nyɛ ŋ dimi wo. Siooŋnde bii ya ni le waŋnda, mi yaŋ nda nilaŋ.
25 Lelaŋ a yandii, mal la haki, nduyɛ miŋ miiŋgu naa num le mi kɔ beŋ Chɛhowa wulaŋ.”
26 Kɛ mi Saamiɛɛ dimul Sɔɔ aa: “I cho miiŋgu a num latulu le, kanifuule a kɛɛ nyɛ Chɛhowa dimi wo tosaa. Nduyɛ Chɛhowa bɛɛ cho lɛ num chɛlɔɔ le ma hiou lachi a waa masaa o Isɔluɛi niŋ te.”
27 Dimioo nuaa Saamiɛɛ muliŋ le kɔŋndaŋ, mi Sɔɔ saa bɔɔle doma ndɔɔ nyau, okoŋ mi domaa sɛɛsa.
28 Mi Saamiɛɛ dimul ndu aa: “Chɛhowa poonda num hau masaleŋ Isɔluɛi o ba. Nduyɛ o cho leŋ chua mbo ke wana cheleŋ, o bɛnda mbo hiau num ndo.
29 Mɛlɛka Tɔɔma Bɛndoo le Isɔluɛi dimi lachoo ɔɔ mbo siŋga kɔl ndɔɔ le. Kanifuule, o cho maa wanachiee mbo siŋga kɔl ndɔɔ le.”*
30 Okoŋ mi Sɔɔ dimi aa: “I tosa hakioo. Kɛ a yandii, tusi ya lasiɔmbu waŋ banaa a Isɔluɛiya o hɔl te. Ŋ miiŋgu naa num, mi kɔ beŋ Chɛhowa Mɛlɛka numndo wulaŋ.”
31 Okoŋ mi Saamiɛɛ miiŋgu nda Sɔɔ, mi Sɔɔ kɔ beŋ Chɛhowa wulaŋ.
32 Mi Saamiɛɛ dimi aa: “La huŋ a Akaki, masaa le Amalɛki naa ya chua.” Okoŋ, mi Akaki kua o ndu lo a kiisaŋndo.* Kanifuule, o wa dimioo o kɔl niŋ aa: ‘I laalaŋ maa a cho lɛ ya diyɔɔ le.’
33 Kɛ mi Saamiɛɛ dimi aa: “Mɛɛ muɛi num ii faŋnde tosa mi waŋ laanduaa bii mɔnɛi le chuauwaa ndaa yɛ, lende koni kala num cho mɔnɛi biyɔɔ mbo hiou waŋ laanduaa kpou ni.” Okoŋ, mi Saamiɛɛ lɔuviaa Akaki a muɛi faŋnde, mbo kili kili ndu buŋgaŋ Chɛhowa lachi Kikaa.
34 Mi Saamiɛɛ kua Luama, nduyɛ mi Sɔɔ kua o ndu lo chiee Kibiya.
35 Saamiɛɛ vi niŋ lende a chiikaŋ lɛ nda Sɔɔ le. Mi Saamiɛɛ bii mɔnɛi tau le Sɔɔ. Nduyɛ, mi Chɛhowa tambu kɔl le mɛɛ o siiŋguu Sɔɔ masaa Isɔluɛi yɛ.
Tɛɛsiaalaŋ
^ Ɔɔ “I kel suei.”
^ Hibuluiye, “piɔmaa leyuŋguaa.”
^ Ɔɔ “kel suei le.”
^ Ɔɔ naapum, “a tiindaŋndo.”
