Saamiɛɛ Tasoo 17:1-58
17 Mi Filitiaŋnda chuuŋgiaa puaa ndaa chɔuwa* le chɔuwo. Ma chuuŋgiaŋ Sokɔ o Chuda niŋ, nduyɛ ma kila dɔɔŋgɔɔ Sokɔ a Asikaa tɛɛŋ, o Ɛfɛsi-damim niŋ.
2 Mi Sɔɔ nda puaa Isɔluɛi chuuŋgiaŋ, okoŋ ma kila dɔɔŋgɔɔ o Kpoloŋndo Ɛlaa. Nduyɛ, ma bɛɛndiaŋ le Filitiaŋnda kuello a sɔŋgɔɔ.
3 Filitiaŋnda wa o pembei choo kumbuei i pilɛ, mi Isɔluɛiya nda wa o pembei choo kumbuei i pilɛi, nduyɛ mi kpoloŋndo wa nda tɛɛŋ.
4 Mi kuubanɔɔ fula o dɔɔŋgɔla Filitiaŋnda niŋ diolaŋ Koolaya, wana waa Kaati. Nduyɛ, bandii nduɛi wa nɛiyo le ŋɔmahiɔɔlu a nyɛ lechoo.*
5 Mɔsil chɔu nda toosiaa a chiliŋii siaŋɛi yo* wa ndu o lebol, nduyɛ doma puaa chɔuwa wa ndu lekɔɔ a nyɔɔŋ ŋ hɛɛndaa maa la kɛkɛu. A chiliŋii siaŋɛi nda toosiaa domaa hoo ni, nduyɛ lusul ndɔɔ wa le Siɛkɛlloŋ 5,000.*
6 Nyɛla o wounuŋ le peluŋ ndɔŋ mandaa laŋ vɛlɛ a bal wa ndu o kɔɔ wo, a chiliŋii siaŋɛi nda toosiaa laŋ ni.
7 Piau bal ndɔɔ wa chelullo maa yɔm nda simbul kola luaa wo. Yɛŋnde bal ndɔɔ wa lusullo le Siɛkɛlloŋ 600.* Nduyɛ wana biilul ndu boo puaa chɔuwa wo wa ndu kɔlaŋ lachi.
8 Okoŋ, mi Koolaya sim mbo veelu Isɔluɛiya choo choo kpeleŋ naa nda wa a bɛɛndiaŋ le sɔŋgɔɔ wa. Mbo nyuna nda aa: “Le yɛɛnɛ nya hiŋ yɛ sɔŋgɔɔ a naa? La sina nuaa maa ya le cho Filitiaŋnɔɔ nduyɛ mi nya wa buɛiyaa Sɔɔ wa le? La hɛli waŋndo o pilɛ nya tɛɛŋ mbo komal la nanuŋ.
9 Te ŋ sɔŋga pɛ naa ndu mbo tiu ya ba, ŋ cho simnɔŋ buɛiyaa nyaa. Kɛ te ŋ sɔŋga pɛ naa ndu mi tiu ndu ba, mɛɛ la cho simnɔŋ buɛiyaa naa.”
10 Mi Koolaya* dimi aa: “Nya Isɔluɛiyaa sim haa le sɔŋgɔɔ wa, I simul nya paale hauleŋ ndeŋ. Lelaŋ, la ke ya waŋndo miŋ sɔŋga naa ndu!”
11 Mɛɛ Sɔɔ nda Isɔluɛiyaa tuaa kpou tuei nyɛ Filitiaŋnɔɔ hoo dimi wo, mi siooŋii bɛndu bɛnduei bii nda.
12 Po Chɛɛse wo Deeve wa ni, wana waa Ɛfiluata, fulaa Bɛtilɛhɛm o Chuda niŋ. Chɛɛse ndoo nɔ puaa a ŋɔmaa. Nduyɛ teleŋ Sɔɔ wa masaa wo, Chɛɛse wa niŋ o yuuwɛi.
13 Mi puaa kaasoŋnda a yaa o puaa Chɛɛse wa tɛɛŋ kua Sɔɔ kɔɔli o chɔuwo. Po ndɔ tasoo wa Ɛliaabi ni, o diiŋ ndɔɔ wa Abinadabi ni, nduyɛ o yaa ndɔɔ wa Siamaa ni.
14 Deeve wa lumndo ni, nduyɛ mi bɛndaa nduaa yaawa kua Sɔɔ kɔɔli.
15 Deeve wa wallo le Sɔɔ, kɛ mi ndoo miiŋgu vɛlɛ saa finya ndɔ wa mandaa Bɛtilɛhɛm.
16 Le palɛi 40, Koolaya* wa hunɔɔ Isɔluɛiya simullo idii a ichɔl.
17 Okoŋ mi Chɛɛse dimul Deeve po ndɔ aa: “Yandii, chua baliŋ tuaŋaŋ muŋ o bɔlɔɔ niŋ,* a beedii* kpuŋgbaŋ tɔ wo hoo, ma yoo bɛndaa numnda chɔ chɔ naa nda cho o dɔɔŋgɔɔ niŋnda.
18 Chua vɛlɛ milikiiyaŋ* kpuŋgbaŋ tɔ, ma yoo wana cho puaa chɔuwa 1,000 bolleŋ ndo. Nduyɛ ma tofa mɛɛ bɛndaa numnda cho yɛ. Okoŋ, ma ke num nyɛ ma chuu ya le sinaa te a cho pɛ kɛndɛ.”
19 Bɛndaa nduaa wa latulu a Sɔɔ vɛlɛ a puaa Isɔluɛiyaa tuaa kpou o Kpoloŋndo* Ɛlaa, le sɔŋgɔɔ a Filitiaŋnda.
20 Okoŋ, mi Deeve chaŋ idiiyo puŋ, mbo mel waŋndo saa le mbo wa nda hɔlteŋ. Mbo dovi nyɔɔŋ, okoŋ mbo kua a mɛɛ Chɛɛse finya ndɔ ndoo dimul ndu yɛ. Mɛɛ o sɔɔŋguu dɔɔŋgɔɔ ikɛi, mbo cha puaa chɔuwaa Isɔluɛiya kɔlaŋ o chɔuwo, nduyɛ a wa kɔlaŋ a deŋioo kpeekpei.
21 Mi Isɔluɛiya a Filitiaŋnda kɔ sim, ma mululaŋ hɔlla vellaa velle le sɔŋgɔɔ.
22 O lepilɛ niŋ kpe, mi Deeve kɛsi bɔlɔ ndɔɔ wana wa wolɔɔlaŋ mandaa wo ikɛi, mbo nyaanuŋ naa nda wa isisi le chɔuwo wa. Mɛɛ o fuuluu, mbo kandu bɛndaa nduaa nyuuniaa le sinaa te a cho pɛ kɛndɛ.
23 Deeve lo suɛi, mi kuubanɔɔ diolaŋ aa Koolaya huŋ, nduyɛ Filitiaŋnɔɔ o wa ni fulaa Kaati. Ndoo fula naa Filitiaŋnda wa isisi le sɔŋgɔɔ wa. Diomnda ndoo dimi paandu laŋ, mbo miŋgi laŋ sondo, nduyɛ mi Deeve tuɛi.
24 Mɛɛ puaa Isɔluɛiya kpou che ndu, mi siooŋnde bii nda, okoŋ ma nyaanuŋ.
25 Puaa Isɔluɛi wa dimioo aa: “La che laŋunɔ cho koŋ hunɔɔ wo, Isɔluɛiya o hiŋ nuaa simullo ni. Masaa dimi maa wana o wana tiu ndu pɛ ba, o cho ndu nyɛsɔlaa ke tau, mbo ke wana koŋ chua ndɔɔ mbo wa laa ndɔ, nduyɛ wana koŋ chiɛi finya ndɔ wo kinɛi, a mel lɛ paawa* o Isɔluɛi niŋ te.”
26 Okoŋ, mi Deeve nyuna puaa wa ndu isisi ikɛiya aa: “Te wana dii pɛ Filitiaŋnɔ koŋ nduyɛ ma kelu Isɔluɛiya siɔmbulaŋ, o yɛɛnɛ nda cho yɛ wana koŋ ke? Wana maavɛɛ po Filitiaŋnɔ sɔla hoo hivi chiɛi kɔɔli le wo cho yɛ, le mbo simul puaa chɔuwaa Mɛlɛka cho yoomu wo?”
27 Okoŋ mi waŋnda miŋgi sondo o nyɛ pilɛ koŋ choo aa: “Wana cho ndu diyɔɔ wo, nyɛ nda cho ndu tosal lo cho hoo ni.”
28 Mɛɛ Ɛliaabi bɛ ndɔ tuei Deeve suukaŋndo a puaa, mbo tuulu kɔllo tau a ndu, okoŋ mbo dimi aa: “Yɛɛnɛ ŋ hiŋ yɛ tosa nanuŋ? Nɛɛnɛ ŋ mɛi yɛ saa pɔmbuaa kaŋ ikɛi o pollo niŋ? I sina maa wana heelaŋndo ŋ cho ni, nduyɛ a nɔ yiyaŋnda kɛndɛ o kɔl te. Hunɔɔ koni ŋ hiŋ ni le chɔɔ mɛɛ chɔuwo cho kɔlaŋ yɛ.”
29 Okoŋ mi Deeve dimi aa: “Yɛɛnɛ ya tosa yɛ? Nyunaa kinɛi ya wa ni!”
30 Le hei, mi Deeve nyuna wana cheleŋ, nyuna pilɛ koŋ kpe. Nduyɛ muli pilɛ koŋ kpe nda ke ndu ni.
31 Mi nyɛ Deeve dimi hoo wo del waŋnda o lani, ma kɔ dimul Sɔɔ. Okoŋ, mi Sɔɔ yooŋgu le ndu.
32 Mi Deeve dimul Sɔɔ aa: “Wana o wana wu ŋdial le ndu le. Buɛi numndo cho lakɔ mbo kɔ sɔŋga a Filitiaŋnɔ koŋ.”
33 Kɛ mi Sɔɔ dimul Deeve aa: “A nɔla ma sɔŋga a Filitiaŋnɔ koŋ te, kanifuule poombɔɔ ŋ cho ni, nduyɛ wana chɔuwo o cho ni chɔŋ o feleŋgɔyɛi nduɛi niŋ.”
34 Okoŋ mi Deeve dimul Sɔɔ aa: “Buɛi numndo wa saa finya ndɔ wa mandaa, mi kpɔkuŋndo* huŋ bii saa. Nduyɛ a teleŋ cheleŋ, mi sulukoo bɛɛ huŋ bii saa le kɔŋndaŋ a ndu.
35 Kɛ mi tisa ndu kɔɔli, mi poonda ndu saa o sondo. Mɛɛ o mululaŋ ya, mi saa ndu yaaloo,* okoŋ mi dii ndu.
36 Mi buɛi numndo dii kpɔkuŋndo a sulukoo. Nduyɛ, Filitiaŋnɔ sɔla hoo hivi chiɛi kɔɔli le wo bɛɛ, lende ya cho ndu diyɔɔ ni, kanifuule o simul puaa chɔuwaa Mɛlɛka cho yoomu wo.”
37 Mi Deeve chɔɔlu dimi aa: “Chɛhowa piŋi ya kpɔkuŋndo a sulukoo o ba ni. Nduyɛ, o cho ya vɛlɛ piŋi Filitiaŋnɔɔ hoo o ba.” Okoŋ mi Sɔɔ dimul Deeve aa: “Mɛɛ kɔ, maa Chɛhowa wa a num latulu fɔ!”
38 Okoŋ mi Sɔɔ wou Deeve wolɔɔla ndɔla chɔulaŋ. Mbo wou ndu mɔsil chɔu nda toosiaa a chiliŋii siaŋɛi yo. Okoŋ kɔɔli, mbo wou ndu doma ndɔ chɔuwo.
39 Mi Deeve chua muɛi faŋii Sɔɔ ve mbo sayiaŋ. Mbo kindi kindiŋ le kɔlaŋ, kɛ o tiu ba le, kanifuule ndoo wounuŋ ndɔ nyɛla waa lende paandu le. Mi Deeve dimul Sɔɔ aa: “I nɔla kɔlaŋ o nyɛlaŋ ndaŋ niŋ te, kanifuule I wounuŋ ndɔ nyɛla waa nuaa paandu le.” Okoŋ mi Deeve soli laŋ.
40 Mbo chua tinda ndɔ mandaa lasaa, okoŋ mbo chɔuviaa pouta kpɔlɔkɛilaŋ la ŋuɛɛnu o peelo, mbo wou o bɔlɔ ndɔɔ niŋ. Nduyɛ faanda ndɔɔ wa ndu o ba. Okoŋ, mbo kandu sɔɔŋguuwo Koolaya* ikɛi.
41 Koolaya* wa sɔɔŋguuwo Deeve ikɛi kpɛɛluŋ, nduyɛ wana biilul ndu boo chɔuwo wo wa ndu lachi.
42 Mɛɛ Koolaya* tofa mbo cha Deeve, mbo mam ndu, kanifuule Deeve wa o diiyaa nyɛkɛndɛi, nduyɛ naŋɔɔ pila ndoo naŋ ni.
43 Okoŋ mi Koolaya* nyuna Deeve aa: “Baa tuŋndo ya cho ni, le ma hinul la a yɔmndo?” Le hei, mi Koolaya* mɛna Deeve o mɛlɛkaa nduaa lo.
44 Mi Koolaya* dimul Deeve aa: “Huŋ niko ma komal la. I cho youwa a visiaa yonduaa dialuŋ numndoŋ ke.”
45 Mi Deeve mulul Koolaya* aa: “A cho hunɔɔ le sɔŋgɔɔ a ya a muɛi faŋnde vɛlɛ a balta numndaŋ. Kɛ ya, o diola Chɛhowa, Mɛlɛka puaa chɔuwa niŋ ya cho kɔlaŋ sɔŋgɔɔ a num ni, Mɛlɛka puaa chɔuwa Isɔluɛi, Mɛlɛka ŋ simul lo.
46 O paale hauleŋ ndeŋ choo, Chɛhowa cho num malɔɔ ya o ba. I cho num diyɔɔ, nduyɛ mi kelu num bolleŋ. O paale hauleŋ ndeŋ choo, Filitiaŋaa cho o dɔɔŋgɔɔ niŋ nda, I cho tosa mi youwa a visiaa yonduaa de dialuŋ ndaŋ vilɛiyoŋ. Nduyɛ, waŋnda o chieeŋndo choo kpou cho sina maa Mɛlɛka cho o Isɔluɛi niŋ.
47 Wanaa cho haa a chuuŋgiaŋ naŋ nda kpou cho sina maa, o cho a muɛi faŋnde ɔɔ a ballo le Chɛhowa piŋi le. Kanifuule, Chɛhowa tosa ni mi wana yem chɔuwo. Nduyɛ, o cho nya kpou malɔɔ naa o ba.”
48 Okoŋ, mi Koolaya* kandu Deeve sɔɔŋguuwo ikɛi. Kɛ mi Deeve nyaanuŋ ndu o ibuŋ le sɔŋgɔɔ.
49 Mi Deeve wou baa o bɔlɔ ndɔɔ niŋ mbo soli pouwo, mbo wou ndu o faandaa niŋ, okoŋ mbo wuu ndu. Mi pouwo kɔ viɔ Koolaya* tendei, mbo pial ndu kpokpoo, okoŋ mbo del o kuumbaŋ lɛŋ wɔ.
50 Mi Deeve tiu Koolaya* ba a pou faandaa. Mbo via ndu a ndu, nduyɛ mbo dii ndu, mi che bɛɛ muɛi faŋii ve Deeve o ba le.
51 Mi Deeve hiau lachi a kiltaŋ mbo kɔ sim ndu choo. Okoŋ mbo chua muɛi faŋii Koolaya* ve, mbo soli ndi o boo niŋ, mbo kialu ndu bolleŋ le sinaa kɛsɛ maa o vi. Mɛɛ Filitiaŋnda che maa kuubanɔ ndaa vi, ma nyaanuŋ.
52 Okoŋ, mi puaa chɔuwa Isɔluɛi a Chuda deŋi choo choo a nyaaloo , nduyɛ ma tisa Filitiaŋnda kɔɔli chɔŋ o dɛŋgbɔɔ haaa o diola kpakilaŋ Ɛkulɔŋ. Nduyɛ, a lo kɔlaŋ a Filitiaŋnda diu diuwo o nɛi tɛɛŋ chɔŋ Sialuem haaa Kaati a Ɛkulɔŋ.
53 Mɛɛ Isɔluɛiya mal Filitiaŋnda touwɔɔ ma miiŋgu, ma kɔ puŋga nyɛm wa o dɔɔŋgɔla ndalaŋ niŋndoŋ.
54 Okoŋ mi Deeve chua bolle Koolaya* leŋ, mbo kua a leŋ Chulusalɛm. Kɛ wolɔɔla ndɔla chɔulaŋ, mi Deeve wou laŋ o tɛndii ndɔɔ niŋ.
55 Mɛɛ Sɔɔ che Deeve kɔlaŋ le mbo kɔ sɔŋga a Koolaya,* mbo nyuna Abina masa puaa chɔuwa aa: “Abina, po nɛɛnɛ cho yɛ hoo?” Mi Abina muli aa: “Fallo masaa, mi mɛnaŋ po,* I sina ndu le!”
56 Mi masaa dimi aa: “Mɛɛ nyuuniaa le ma sina wana velu ndu wo.”
57 Dimioo nuaa Deeve kɔ dii Koolaya* mbo miiŋgu, mi Abina chua ndu mbo kua a ndu naa Sɔɔ chua, nduyɛ bolle Koolaya* leŋ le wa Deeve o ba.
58 Okoŋ mi Sɔɔ nyuna ndu aa: “Poo sei, o nɛɛnɛ velu yɛ num?” Mi Deeve muli aa: “Po Chɛɛse buɛi numndo ya cho ni, wana waa Bɛtilɛhɛm.”
Tɛɛsiaalaŋ
^ Hibuluiye, “dɔɔŋgɔlaŋ.”
^ Tofa Tɛɛsiaa B14.
^ Ɔɔ “kapaa wo.”
^ Tofa Tɛɛsiaa B14.
^ Tofa Tɛɛsiaa B14.
^ Hibuluiye, “Filitiaŋnɔɔ.”
^ Hibuluiye, “Filitiaŋnɔɔ.”
^ Hibuluiye, “ɛfa.” Tofa Tɛɛsiaa B14.
^ Ɔɔ “bulu.”
^ Ɔɔ “nɔnɔɔ.”
^ Ɔɔ “Dɛŋgbɔɔ.”
^ Ɔɔ “mulu.”
^ Ɔɔ “yalakanaa.”
^ Hibuluiye, “siɛiye.”
^ Hibuluiye, “Filitiaŋnɔɔ.”
^ Hibuluiye, “Filitiaŋnɔɔ.”
^ Hibuluiye, “Filitiaŋnɔɔ.”
^ Hibuluiye, “Filitiaŋnɔɔ.”
^ Hibuluiye, “Filitiaŋnɔɔ.”
^ Hibuluiye, “Filitiaŋnɔɔ.”
^ Hibuluiye, “Filitiaŋnɔɔ.”
^ Hibuluiye, “Filitiaŋnɔɔ.”
^ Hibuluiye, “Filitiaŋnɔɔ.”
^ Hibuluiye, “Filitiaŋnɔɔ.”
^ Hibuluiye, “Filitiaŋnɔɔ.”
^ Hibuluiye, “Filitiaŋnɔɔ.”
^ Hibuluiye, “Filitiaŋnɔɔ.”
^ Ɔɔ “te a cho wɔ pɛ yoomu.”
^ Hibuluiye, “Filitiaŋnɔɔ.”
^ Hibuluiye, “Filitiaŋnɔɔ.”
