Saamiɛɛ Tasoo 19:1-24
19 Okoŋ kɔɔli, mi Sɔɔ dimul Chonataŋ po ndɔ vɛlɛ a buɛiyaa nduaa kpou maa o yeema mbo dii Deeve.
2 Kɛ le mɛɛ Chonataŋ, po Sɔɔ wo ndoo kaala Deeve tau yɛ, mbo dimul Deeve aa: “Finya nuu yeema mbo dii num. Lelaŋ a yandii, mandaŋ. Kɔŋnuŋ siɔdii idii o fondaŋ wana o wana chi num te wo, ma veŋnuŋ loŋ.
3 I cho fula mi kɔ sim finya nuu ikɛi naa ŋ cho wa o viaŋnaŋ nda. I cho isɔɔ o ndu lo a num okɔɔ. Nduyɛ te I chiikuu pɛ nyɛ o nyɛ, I cho num dimul.”
4 Okoŋ, mi Chonataŋ dimul Sɔɔ finya ndɔ sɔɔŋ kɛndɔŋ a Deeve okɔɔ. Mbo dimul ndu aa: “Fallo masaa, a nɔ ma tosa nyɛ o nyɛ wɔɔŋ* a buɛi numndo Deeve le, kanifuule o tosal num suɛi wɔɔŋ te. Nduyɛ nyɛ o tosa le numndo chuu num niŋ tɔnɔɔ.
5 Mbo luei yoomu ndɔɔ o kpundɔɔ niŋ le Koolaya* diyɔɔ, okoŋ mi Chɛhowa piŋi Isɔluɛiya kpou. Ma cha keŋ pɛɛŋ a lehɔl, nduyɛ ma duaunuŋ nyaale tau. Mɛɛ le yɛɛnɛ ŋ yeema yɛ niko ma tosa haki waa nuaa, le wana tɛɛmbuu hoo isɔɔ o isɔɔ le wo diyɔɔ o fondo fuu wo choo?”
6 Mi Sɔɔ yaŋ Chonataŋ nilaŋ, okoŋ mbo dimi aa: “I mɛnaŋ po o Chɛhowa, Mɛlɛka cho yoomu wo lo maa, I cho ndu diyɔɔ le.”
7 Okoŋ kɔɔli, mi Chonataŋ veelu Deeve, mbo dimul ndu sɔɔŋ muŋ kpou. Nduyɛ mi Chonataŋ huŋ a Deeve naa Sɔɔ chua, okoŋ mbo hiau lachi a wallo tosaa le ndu maa paandu.
8 Mɛɛ teleŋ tiŋ hiou, mi chɔu cheleŋ del vɛlɛ. Okoŋ, mi Deeve kɔ sɔŋga a Filitiaŋnda, mbo diu nda diuwo pila. Nduyɛ, mi a lo yoomu wa nyaanuŋ ndu.
9 Mɛɛ Sɔɔ wa ichali o ndu lo chiɛiniŋ a bal ndɔɔ o ba, nduyɛ mi Deeve wa towaa lɔɔ, mi Chɛhowa tosa mi yiyaŋ wɔɔŋndo* luɛi Sɔɔ o kɔl.
10 Okoŋ, mi Sɔɔ wuu ballo le mbo baŋ Deeve o chiɛiyo a ndu. Kɛ mi Deeve biamnuŋ, mi ballo kɔ baŋnuŋ o chiɛiyo. Mi Deeve hialuŋ ichɔl koŋ mbo nyaanuŋ.
11 Okoŋ kɔɔli, mi Sɔɔ viam waŋnda o chiɛi Deeve wo le chiɛi ndɔɔ mɛŋgɛlaa, le halikpeŋ mbo dii ndu diimandɔɔ. Kɛ mi Maikaa laa ndɔ dimul ndu aa: “Te a nyeenuŋ chuɛllɛŋ te, a cho num diyɔɔ siɔdii.”
12 O lepilɛ niŋ kpe, mi Maikaa tusi Deeve o wundɛiyo,* le mbo nyaanuŋ.
13 Okoŋ mi Maikaa chua piɔm leyuŋgoo, mbo yambu ndu o kpele. Mbo chua kola nda toosiaa a yiiŋii chuiŋndo wo, mbo handu naa Deeve yambu bolleŋ nda, mbo kumbu ndu mulaa.
14 Mi Maikaa dimul wanaa Sɔɔ vem le kɔlaŋ a Deeve wa aa: “O cho kɛndiaa le.”
15 Okoŋ mi Sɔɔ miŋgi wanaa o vem nda pila le ma kɔ chɔ Deeve. Mbo dimul nda aa: “La chua ndu a kpele ndɔɔ fau mi la chuu ya ndu nanuŋ le mi dii ndu.”
16 Mɛɛ wanaa Sɔɔ vem nda luɛi chiɛiniŋ, ma cha piɔm leyuŋgoo o yambaa o kpele a kola nda toosiaa a yiiŋii chuiŋndo ve o handaa naa o yambu bolleŋ nda.
17 Mi Sɔɔ nyuna Maikaa aa: “Le yɛɛnɛ ŋ hui yɛ ya nuaa, ma tosa mi yaamɔɔnɔ nuu hialuŋ ya mbo nyaanuŋ?” Mi Maikaa mulul ndu aa: “Ndu dimul la ni aa, ‘Mala ya mi nyaanuŋ, te o cho koŋ te I cho num diyɔɔ!’”
18 Mɛɛ Deeve hɛluŋ mbo nyaanuŋ, mbo kua o Saamiɛɛ lo Luama. Mbo kɔ dimul ndu nyɛ o nyɛ Sɔɔ tosal ndu. Okoŋ mi Deeve nda Saamiɛɛ kuaŋnuŋ Nayɔti, ma kɔ chal loŋ.
19 Mɛɛ teleŋ tiŋ hiou, ma dimul Sɔɔ aa: “Fallo, Deeve cho Nayɔti o Luama niŋ.”
20 O lepilɛ niŋ kpe, mi Sɔɔ viam waŋnda le ma kɔ bii Deeve. Mɛɛ nda kuɛ, ma cha waŋ banaa o wanaa suaa le Mɛlɛka wa tɛɛŋ yooŋgu Mɛlɛkaa dimioo. Nduyɛ, Saamiɛɛ wa isisi loŋ mbo wa nda chilaŋ chuaa. Okoŋ, mi nyina Mɛlɛkaa tosa mi wanaa Sɔɔ vem nda kandu sɔɔŋ tosaa maa wanaa suaa le Mɛlɛka wa.
21 Mɛɛ nda dimul Sɔɔ a ndi okɔɔ, mbo viam wanaa cheleŋ chɔ chɔ, nduyɛ mi nda bɛɛ kandu sɔɔŋ tosaa maa wanaa suaa le Mɛlɛka wa. Okoŋ kɔɔli, mi Sɔɔ viam vɛlɛ wanaa cheleŋ, kunda yaa ndɔɔ. Kɛ mi nda bɛɛ kandu sɔɔŋ tosaa maa wanaa suaa le Mɛlɛka wa.
22 O mɛɛlulaŋ kpɔŋ, mi ndupila kua Luama. Mɛɛ o fuuluu o sooŋ bɛndu kɛsiaa mamɛŋ cho Sɛku wo, mbo nyuna aa: “Kuɛɛnɛ Saamiɛɛ nda Deeve cho yɛ?” Ma mulul ndu aa: “A cho Nayɔti o Luama niŋ.”
23 Mɛɛ Sɔɔ mal loŋ le kɔlaŋ Nayɔti o Luama niŋ, o lo o nɛi tɛɛŋ mi nyina Mɛlɛkaa tosa mbo kandu sɔɔŋ tosaa maa wana suaa le Mɛlɛka wo. Nduyɛ, o lo kɔlaŋ a tosaa lende haaa mbo fuuluu Nayɔti o Luama niŋ.
24 Mbo soli nyɛla wa ndu lekɔɔ laŋ, okoŋ mi ndu bɛɛ kandu sɔɔŋ tosaa Saamiɛɛ o hɔl maa wana suaa le Mɛlɛka wo. Paale leŋ kpɛŋ, o wa ihini lɛŋ ndoŋ fondo* nduyɛ mbo lɔl lende pii. Mi hei simnuŋ niko maa tale aa: “Baa wana suaa le Mɛlɛka wo Sɔɔ bɛɛ cho niŋ ni?”
Tɛɛsiaalaŋ
^ Hibuluiye, “hakioo.”
^ Hibuluiye, “Filiitiaŋnɔɔ.”
^ Hibuluiye, “nyina wɔɔŋndo.”
^ Ɔɔ “finɛteloo.”
^ Ɔɔ “a nyɛla lebɛŋgu laŋ lekɔɔ kinɛi.”
