Saamiɛɛ Tasoo 2:1-36
2 Mi Hana dimi o piɛileŋ niŋ aa:
“Chɛhowa tosa mi nyaaloo pia o kɔl nuu niŋ cha.Kpaaya nuu* chɔɔluŋ a mala Chɛhowa wo.
I sɔla niŋ kɔl simulaa le mi mulul yaamɔɔwaa niaa.Kanifuule, I dɔɔnuŋ nyaale o nɛila ŋ soliŋ kpeku le waŋnda piŋioo laŋ niŋ.
2 Wana o wana cho o diandaa maa Chɛhowa le,Wana o wana cho maa num te.Nduyɛ, pou kpoowa cheleŋ cho maa Mɛlɛka naa le.
3 La pɛŋgi suɛi a heelɔŋndo.La chɛl mi suɛi yoŋga fula nya o sondo le.Kanifuule Chɛhowa, Mɛlɛka sina nyɛ o nyɛ fee wo o cho ni.Ndupilɛ kpe nɔla ni mbo kilul waŋndo yamɛi le kaala ndɔlaŋ.
4 Chiɔula puaa chɔuwaa kpaayaa bɛnduaa la yomi yomi.Kɛ wanaa nɔ mayoomu le wa sɔla yoomuaŋ.
5 Wanaa ndaa dia nyɛkɛndɛiya miiŋgu wali wali leŋ le o diaa sɔlaa.Kɛ wanaa yiaaŋ ma wa paandu choo wa cho lɛ a mayi le.
Wana lanɔ ndoo vilu le wo velu chuauwa a ŋɔmmɛu,Kɛ mi wana lanɔ ndoo nɔ puaa* tau wo lo ndupilɛ kpeele.
6 Chɛhowa nɔla mbo dii, nduyɛ mbo miŋgi yoomu.O nɔla mbo tusi o Sɛiyo* niŋ, nduyɛ mbo soli.
7 Chɛhowa nɔla mbo siiŋguu waŋndo wana bala fondo, ɔɔ wana sulaa.O nɔla mbo tusi waŋndo toolo ɔɔ mbo heelu ndu.
8 O nɔla mbo chua wana bala fondo cho o chundoo niŋndo mbo simi ndu.O nɔla mbo chua wana ikɔɔ cho o pultaŋ niŋndo,* mbo simi ndu,Le ma chal latulu nda laŋgbaa kalla,Nduyɛ mbo ke nda foofola lebɛɛlaŋ.
Chɛhowa nɔ suŋgbuma saa lɛŋndeŋ ndaŋ ni,Nduyɛ o maŋ choo o kɛsi lɛŋndeŋ ni.
9 Mbo manda wanaa chɔm lo lechoo wo o ndu lo wa.Kɛ wanaa dɛnɛ wɔɔŋnda nda, o cho nda hunɔɔ tɛɛmbuu o nyumndaŋ niŋ.Kanifuule, wanachioo nɔla mbo sɔla batiuwaa o kpaaya ndɔ ndupila wo niŋ te.
10 Chɛhowa cho hunɔɔ wanaa cho ndu simullo wa tɛɛmbuu.O cho lo o fondaŋ ndɔɔ choo choo mbo deŋul nda maa letaŋ.
Chɛhowa cho hunɔɔ chieeŋndo kpou yamɛi kilul.O cho hunɔɔ masa ndɔɔ kpaayaa ke,Nduyɛ, o cho kpaaya* wana o pɔya wo chɔɔlu.”
11 Okoŋ mi Ɛlikana miiŋguŋ o ndu lo Luama, kɛ mi poombɔɔ lo nda Ilai wana soliaa lasalaa, nduyɛ mbo kandu wallo tosaa le Chɛhowa.
12 Wanaa dɛnɛ wɔɔŋnda Ilai puaa nduaa wa ni. Nduyɛ, ndaa nɔ lebɛɛ le Chɛhowa le.
13 Yɔŋii ndaa hini kɔl a nyɛ wanaa soliaa lasalaa ndaa nɔ le sɔlaa wo, nyɛ ndaa tosal waŋnda wo wa hoo ni: Teleŋ o teleŋ waŋndo ndoo wa pɛ salaa solioo nduyɛ mbo wa visiŋ muŋ yauwo, buɛi wana soliaa lasalaa kuɛ a chu saŋgi chiŋuŋ yaa wo,
14 okoŋ o kɔ chɔŋ ndu o hɛŋgɛiyo niŋ, ɔɔ o kpɛɛnɛi kɛ kɛ nda wa visiŋ muŋ yauwo wo niŋ. Visii kɛ kɛ chu koŋ soli pɛ, o yoo wana soliaa lasalaa. Isɔluɛiyaa ndaa huŋ salalaŋ solioo Silɔɔ wa kpou, nuaa ndaa tosal nda ni.
15 O fulawɔ okoŋ kɔɔli, tuupa mi wana cho salaa solioo wo ndoo lom chuɛima visioo, buɛi wana soliaa lasalaa hiŋ o dimul ndu aa: “Ke wana soliaa lasalaa visiei mbo tuɛi. O cho lɛ num visiŋ yauwaŋ biyɔɔ o ba le. Ŋ kiyɛiyoŋ o yeema ni.”
16 Te wana cho salaa solioo wo dimul ndu pɛ aa: “Chum ndɔ fɛlɛŋ miŋ lom chuɛiyaŋ, okoŋ ma chua niko visii kɛ kɛ ŋ yeema pɛ,” o dimul ndu aa: “Ɛ ɛ, ke ya suŋ suŋ. Te o cho koŋ te, I chua a kaka!”
17 Le hei, mi buɛiya haa tosa hakioo tau Chɛhowa o hɔl. Kanifuule, a ve lebɛɛ chɔm le salala waŋnda wa solioo o Chɛhowa lo laŋ te.
18 A boondii keŋ, Saamiɛɛ wa wallo tosaa le Chɛhowa,* mi che bɛɛ poombɔɔ o wa ni. Nduyɛ, doma biŋgi nda toosiaa a feŋgbɔɔ wo wa ndu lekɔɔ.
19 Iwɔsi o iwɔsi, te kala ndɔ ndoo wa pɛ kɔlaŋ sala iwɔsioo solioo nda pɔnɔ ndɔ, mi ndoo sondul ndu domaa mbo yoo ndu.
20 Okoŋ, mi Ilai duau Ɛlikana nda laa ndɔ sala aa: “Maa Chɛhowa tosa mi laa num velu vɛlɛ hɔɔ le sɔŋgɔ o nya yɔŋgu hoo Chɛhowa wo fɔ!” Okoŋ ma miiŋguŋ o nda lo.
21 Mi Chɛhowa mulul vɛlɛ Hana hɔlla, mbo vialu puaa a yaa, a waŋ laanduaa a ŋiɔɔŋ. Nduyɛ Saamiɛɛ wa hiouwɔɔ lachi a hindɔɔ Chɛhowa lachi.
22 A boondii keŋ, Ilai wa niŋ o yuuwɛi kudɛɛ. Kɛ mbo tuɛi nyɛ o nyɛ puaa nduaa wa Isɔluɛiya kpou tosallo, nduyɛ a mɛɛ ndaa hini a waŋ laanduaa ndaa tosa wallo o tɛndii bɔŋaŋndo sondoo wa yɛ.
23 Mi ndoo dimul nda aa: “Le yɛɛnɛ nya cho yɛ sɔɔŋ waa nuaa tosaa? Sɔɔŋ ya cho tueiyɔɔ a nya okɔɔ woŋ ŋ cho sɔɔŋ kɛndɛ kposoŋ te.
24 La pɛŋgi keŋ tosaa puaa niaa. Sɔɔŋ ya cho tueiyɔɔ wanaa Chɛhowa wa tɛɛŋ a nya okɔɔ woŋ ŋ niŋ kposoŋ te.
25 Te waŋndo tosal pɛ chaaŋ ndɔ wanachioo hakioo, mi waŋndo nyɔɔlu Chɛhowa le ndu.* Kɛ te waŋndo tosa pɛ hakioo a Chɛhowa, nɛɛnɛ piɛi yɛ le ndu?” Ma kɛɛ le finya nda nilaŋ yaŋɔɔ, nduyɛ Chɛhowa ndoo chii niŋ kɛɛsiaa le nda diyɔɔ.
26 A teleŋ koŋ, Saamiɛɛ wa hiouwɔɔ lachi a hindɔɔ. Nduyɛ Chɛhowa a waŋnda kpou ndaa hɛnaŋ a suɛi nduɛi.
27 Mi Mɛlɛka viam waŋndo naa Ilai chua, mbo dimul ndu aa: “Nyɛ Chɛhowa dimi wo cho hoo ni: ‘Baa o cho Ichipi le ya chɔɔmuŋ finya num mama kpendekele, teleŋ nda wa Felo o ba o chɛleŋ niŋndo le?
28 O kaalaŋ Isɔluɛi tɛɛŋ kpou, mbo sɔla hɛlioo le mbo wa wana ni soliaa lasalaa, nduyɛ mbo sim bandu luamaa lasalaa lachi le salalaŋ solioo, le nyɛm chuŋ kɛndɔŋ lomɔɔ, nduyɛ mbo wounuŋ doma biŋgioo* mbo sim ya lachi. Salala waŋnda Isɔluɛi ndaa luam ndaŋ kpou, mi ke yuŋgu finya num mama wo.
29 Le yɛɛnɛ nya chua yɛ salala nilaŋ, a nyɛm ya dimul nya le mi la chuu ya o fondaŋ nuu woŋ chɔdɔ? Le yɛɛnɛ ŋ cho yɛ puaa numnda bɛɛleŋ kioo mbo hiau ya? Nduyɛ, le yɛɛnɛ ŋ cho yɛ puaa numnda chɛlɔɔ ma chua buŋgaŋ kɛndɛ kɛndɔŋ o salala wanaa niaa Isɔluɛiya cho solioo laŋ tɛɛŋ, ma dia ma chelul pimbiliŋ pimbiliŋ?
30 “‘Lelaŋ ya Chɛhowa, Mɛlɛka Isɔluɛiya dimul num ni aa: “O kpeekpei niŋ, mi yaa dimi maa yuŋgu numndo a yuŋgu finya num mama wo cho wa wallo tosaa lɔɔlɔɔ ya lachi.” Kɛ suŋ suŋ niŋ, nyɛ ya Chɛhowa dimi wo cho hoo ni: “Fɛɛŋ bɛɛ keŋ yɔŋnuŋ lɛ le, kanifuule wanaa ke ya bɛɛleŋ nda, nda ya ke bɛɛleŋ ni. Kɛ wanaa chua ya chɔdɔ wa, ya bɛɛ mi bii nda o nɛi koŋ choo.”
31 Teleŋ cho hunɔɔ fuuluu, mi faŋa kpaaya* numndo vɛlɛ a kpaaya yuŋgu finya num mama wo. Okoŋ, wana o wana cho o yuŋgu numndo niŋ lo lɛ yoomu haaa mbo yuuwa kudɛɛ le.
32 A boondii ya cho Isɔluɛiya sɔɔŋ kɛndɔŋ tosal le, a cho tofa o fondaŋ nuu ma che yaamɔɔnɔ numndo. Nduyɛ fɛɛŋ bɛɛ wana yuuwa lɛ niŋ o yuŋgu numndo niŋ te.
33 Kɛ waŋndo cho o yuŋgu numndo niŋ, o ya cho chɛlɔɔ mbo hiou lachi a wallo tosaa o bandu ni luamaa lasalaa choo wo. O cho tosa mi hɔltaŋ la yɔŋnuŋ num yifidii, nduyɛ ma bii mɔnɛi. Kɛ wanaa bɔɔbɔɔ o yuŋgu numndo niŋ cho hunɔɔ piɔmndo sɔla a muɛi faŋnde.
34 Nduyɛ nyɛ yɔŋnuŋ niŋ puaa num aa ŋiɔɔŋnda, Hɔfini nda Finihaasi wo, cho wa maa tamasi le num. Nda ŋiɔɔŋ kpou cho wu o paale pilɛ leŋ choo.
35 I cho wana soliaa lasala ya tiindaŋ ndo hɛli le yapila. O cho wa sɔɔŋ nɛŋi ya kɔllo woŋ tosaa. I cho ndu chiɛi cho wa le fɛɛŋ a fɛɛŋndo teŋgul, nduyɛ mbo wa wana soliaa lasalaa wana ni ya pɔya wo lachi le teleŋ o teleŋ.
36 Wana o wana cho lo yoomu o yuŋgu numndo choo cho ndu hunɔɔ wulaŋ beŋ, mbo nyɔɔlu ndu le mbo ke ndu wallo le halikpeŋ mbo sɔla kanii* pɔmbɔ a nyɛdiaa. Nduyɛ o cho hunɔɔ dimi aa: “A yandii, mala ya mi sɔla walta wanaa soliaa lasalaa, le halikpeŋ mi sɔla o diaa.”’”
Tɛɛsiaalaŋ
^ Hibuluiye, “lee nuu.”
^ Ɔɔ “chuauwa.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Ɔɔ naapum, “sallo choo wo.”
^ Hibuluiye, “lee.”
^ Ɔɔ “Chɛhowa lachi.”
^ Ɔɔ naapum, “mi Mɛlɛka soo le ndu.”
^ Tofa Tɛɛsiaa.
^ Hibuluiye, “choŋgu.”
^ Ɔɔ “wolii.”
