Saamiɛɛ Tasoo 20:1-42
-
Chonataŋ chɔm Deeve lo lechoo wo (1-42)
20 Okoŋ, mi Deeve faŋaŋ Nayɔti o Luama niŋ mbo nyaanuŋ. Mbo kua naa Chonataŋ chua. Mbo nyuna ndu aa: “Yɛɛnɛ ya tosa yɛ? Suɛi wɔɔŋ kuɛɛ kpeekpei ya tosallɛ finya num mbo wa nɛilaŋ nuuviaa le ya diyɔɔ?”
2 Okoŋ mi Chonataŋ dimul ndu aa: “Tuunuŋ bɛɛ pɛŋ keŋ o kɔl te! A cho wu le. Yaŋ ya nilaŋ! Finya nuu ve nyɛ o nyɛ tosa mbo kɛɛ ya dimul a ndi okɔɔ le, o wa o pɔmbɔ, o wa o bɛndu. Le yɛɛnɛ mi finya nuu viŋ ya suɛi waa nuaa? Pesiŋ bɛɛ hei yɔŋnuŋ te.”
3 Mi Deeve hiau lachi a suɛi aa: “Finya num sina kɛsɛ maa a kaala ya tau. Naapum yiyaŋndo o cho ni aa, ‘Te I tosa pɛ mi Chonataŋ sina a suɛi hei okɔɔ, o cho kɔllo tambu tau.’ Kɛ mi mɛnaŋ po o Chɛhowa, Mɛlɛka cho yoomu wo lo, nduyɛ mi mɛnaŋ po num o hɔl maa, o piɔmndo hɔlndɔ ya cho nuaa ni!”
4 Okoŋ mi Chonataŋ dimul Deeve aa: “Nyɛ o nyɛ ŋ dimul la pɛ, I cho num tosal.”
5 Mi Deeve dimul Chonataŋ aa: “Bɔŋaŋ paŋgii sɛnɛiyo cho siɔdii, nduyɛ masaa cho kɔl le mi wa loŋ miŋ de nyɛdiaa latulu. Lelaŋ, mala ya mi kɔ vioŋnuŋ yondoo niŋ, nduyɛ mi lo loŋ haaa diɛŋ ichɔllo.
6 Te finya num nyuna pɛ a ya okɔɔ, dimul ndu aa, ‘Deeve nyɔɔlu ya le mi chɛl ndu mbo kuɛ chɔ chɔ o ndu lo chiee Bɛtilɛhɛm, kanifuule a cho sala iwɔsioo solioo loŋ nda yuŋgu ndɔɔ kpou.’
7 Te o dimi pɛ aa, ‘Keŋ cho suɛi wɔɔŋ te,’ mɛɛ kɔl nyuloo cho le buɛi numndo. Kɛ te o dɔɔnuŋ pɛ tumbe, mɛɛ kɛsiŋ o kɔl maa o tuu le ya nyɛ tosal.
8 Chɔm buɛi numndo kaala lo lechoo wo, kanifuule a yii kpemaa a buɛi numndo Chɛhowa o hɔl. Kɛ te suɛi wɔɔŋnde ya tosa ni, mɛɛ numpila dii ya. Le yɛɛnɛ ma mal la finya num o ba?”
9 Mi Chonataŋ dimul ndu aa: “Fɛɛŋ bɛɛ I del kɔl le num i waa lende tosal te! Te I chiikuu dɔɔ pɛ maa finya nuu tuu le num nyɛ tosal, I cho num dimul.”
10 Okoŋ mi Deeve nyuna Chonataŋ aa: “Nɛɛnɛ cho yɛ ya dimul te o yɔŋ pɛ mi finya num chiee num mulul te?”
11 Mi Chonataŋ dimul Deeve aa: “Huŋ kɔ yondoo niŋ.” Okoŋ ma kua yondoo niŋ nda ŋiɔɔŋ.
12 Mi Chonataŋ dimul Deeve aa: “Chɛhowa, Mɛlɛka Isɔluɛiya cho lesei maa siɔdii ɔɔ diɛŋ a teleŋ waa nuaa, I cho finya nuu dimul a num okɔɔ. Te finya nuu nɔ pɛ yiyaŋ kɛndɔɔ a num okɔɔ, I cho num diomndeŋ yɔŋ ma sina a ndi okɔɔ.
13 Kɛ te finya nuu tuu pɛ le num nyɛ tosal mi dimul num a ndi okɔɔ le, nduyɛ mi mal num ma kuɛŋnuŋ o kɔl nyulu niŋ te, maa Chɛhowa tusi ya nyɛpalaa bɛndoo choo. Maa Chɛhowa wa a num latulu, mɛɛ o wa a finya nuu latulu yɛ.
14 Chɔm ya kaala lo lechoo Chɛhowa wo teleŋ ya cho yoomu wo, nduyɛ o yɔŋ bɛɛ mi vi.
15 Chɛhowa wɔɔsuu bɛɛ yaamɔɔwaa numnda kpou o lɛŋndeŋ choo, fɛɛŋ bɛɛ puɛɛnuŋ le yuŋgu nuu kaala lo lechoo wo chɔmndo le.”
16 Okoŋ mi Chonataŋ yii kpemaa a yuŋgu Deeve wo. Mbo dimi aa: “Maa Chɛhowa tusi yaamɔɔwaa Deeve wa nyɛpalaa choo fɔ!”
17 Le hei, mi Chonataŋ dimul Deeve maa o mɛnaŋ vɛlɛ po maa o kaala ndu. Kanifuule, Chonataŋ ndoo kaala Deeve mɛɛ o kaala ndupila yɛ.
18 Okoŋ mi Chonataŋ dimul Deeve aa: “Bɔŋaŋ paŋgii sɛnɛiyo cho siɔdii. Nduyɛ kpeŋgbei* numndo cho wa fondo, kanifuule a ve niŋ loŋ te.
19 Diɛŋ bɛɛ a cho wa loŋ te. Lelaŋ a nɔ ma huŋ vioŋnuŋ naa ŋ veŋnuŋ paale leŋ nda, nduyɛ ma wa o pouwo hoo ikɛi.
20 I cho chiŋuaŋ wuu ma yaa o pouwo ikɛi, mɛɛ wana yɔŋ ko aa nyɔɔ ya yeema viɔɔ ni.
21 Okoŋ mi dimul buɛi nuu aa, ‘Kɔ nuuviaa chiŋuaŋ.’ Te I dimul pɛ ndu aa, ‘Nuawɔ chiŋuaŋ num ikɛi loŋ, chua ma chuu ya,’ mɛɛ a nɔ ma fula. I mɛnaŋ po o Chɛhowa, Mɛlɛka cho yoomu wo lo maa, kpundɛ kɛ kɛ cho num komal te, nduyɛ nyɛ o nyɛ cho bɛnda.
22 Kɛ te I dimul pɛ poombɔɔ aa, ‘Nuawɔ! Chiŋuaŋ ma cho num lachi pɔɔli,’ mɛɛ kɔŋnuŋ. Kanifuule Chɛhowa yeema num ma nyaanuŋ.
23 Maa Chɛhowa wa seiyo naa tɛɛŋ lefafɛɛŋ, le kpema naŋ yii naa num ndo.”
24 Okoŋ mi Deeve kɔ vioŋnuŋ yondoo niŋ. Mɛɛ bɔŋaŋ paŋgii sɛnɛiyo kanduŋ, mi masaa kɔ chal le nyɛdiaa dioo.
25 Masaa wa ichali o fondaŋ ndoo chal paandu wo. Chonataŋ wa ichali ma mululaŋ hɔlla, nduyɛ Abina wa ichali Sɔɔ ikɛi, kɛ Deeve ndu kpeŋgbei ndɔɔ wa fondo.
26 Sɔɔ suu nyɛ o nyɛ paale leŋ te. Kanifuule o wa yiyaŋndo aa: ‘Kɛlɛŋgaa dɔɔ nyɛ yɔŋnuŋ ni mbo tosa o cho o diandaa le. I laalaŋ maa o cho o diandaa le.’
27 Mɛɛ paale tasele bɔŋaŋ paŋgii sɛnɛiyo le hiou, diimandɔɔ, kpeŋgbei Deeve wo wa wɔ fondo. Okoŋ mi Sɔɔ nyuna Chonataŋ po ndɔ aa: “Le yɛɛnɛ po Chɛɛse wo hiŋ le nyɛdiaa dioo chiɛi a hau le?”
28 Mi Chonataŋ mulul Sɔɔ aa: “Nyɔɔloo Deeve nyɔɔlu ya ni maa ya chɛl ndu mbo kuɛ Bɛtilɛhɛm.
29 Mbo dimul la aa, ‘Yandii chɛl la mi kuɛ, kanifuule ŋ nɔ le sala yuŋgoo solioo, nduyɛ bɛ nuu dimi maa I nɔ mi kuɛ. Lelaŋ, te I cho pɛ wana sɔvɛ num o hɔl, a yandii, I kua wɔ chuke mi kɔ chɔ bɛndaa niaa.’ Le saboo hoo o hiŋ le nyɛdiaa dioo a masaa latulu le ni.”
30 Okoŋ, mi Sɔɔ duaunuŋ tumbe o kala kala a Chonataŋ. Mbo dimul ndu aa: “Num po wana lanɔ bolle kalaa hoo, I sina walaŋ maa po Chɛɛse wo ŋ bii ichaŋya ni. Nduyɛ hei cho num siɔmbulaŋ chuu vɛlɛ a kala num.*
31 Te po Chɛɛse wo cho wɔ pɛ yoomu o lɛŋndeŋ choo, num ni, masale numndeŋ ni, la cho lo le. Lelaŋ, viom waŋndo mbo kɔ chuu ya ndu suŋ suŋ, kanifuule o nɔ mbo sɔla piɔmndo.”*
32 Kɛ, mi Chonataŋ nyuna Sɔɔ finya ndɔ aa: “Le yɛɛnɛ o nɔ yɛ mbo sɔla piɔmndo? Yɛɛnɛ o tosa yɛ?”
33 Le hei, mi Sɔɔ chua ballo mbo wuu le Chonataŋ diyɔɔ. Okoŋ mi Chonataŋ sina niko kɛsɛ maa finya ndɔ yeema mbo dii Deeve.
34 O lepilɛ niŋ kpe, mi Chonataŋ faŋaŋ o tibiiyo* a tumbe bɛndoo. Nduyɛ, o di nyɛdiaa kɛ kɛ o paale diiŋ ndɔle bɔŋaŋ paŋgii sɛnɛi koŋ choo le. Kanifuule, mbo tambu kɔl tau le Deeve, nduyɛ mi finya ndɔ tusi ndu siɔmbulaŋ.
35 Diimandɔɔ, mi Chonataŋ kua yondoo niŋ o fondaŋ nda mɛyaŋ nda Deeve le chiikaŋndo wo. Nduyɛ buɛi ndɔɔ wa a ndu latulu.
36 Mi Chonataŋ dimul buɛi ndɔɔ aa: “Yandii nyaanuŋ ma kɔ chuel la chiŋɔma ya cho hunɔɔ wuu waŋ.” Mi buɛi ndɔɔ nyaanuŋ, okoŋ mi Chonataŋ wuu ndu chiŋuaŋ lachi.
37 Mɛɛ buɛi Chonataŋ ndo fuuluu naa o wuu chiŋɔleŋ nda, mi Chonataŋ dimul buɛi ndɔɔ choo choo aa: “Chiŋɔleŋ le cho num lachi.”
38 Mi Chonataŋ dimul buɛi ndɔɔ choo choo kpeleŋ aa: “Keleŋa! Kɔ chɔ chɔ! Duaunuŋ tamala le!” Okoŋ mi buɛi Chonataŋ ndo kɔ chɔuviaa chiŋuaŋ, mbo chuu masanɔ ndɔɔ.
39 Buɛi Chonataŋ ndo ndoo sina nyɛ o nyɛ wa yɔŋnɔŋndo wo le. Chonataŋ nda Deeve kinɛi ndaa sina nyɛ hei sim ndo ni.
40 Okoŋ, mi Chonataŋ chua wolɔɔla ndɔla chɔulaŋ mbo ke buɛi ndɔɔ. Mbo dimul ndu aa: “Miiŋgu a laŋ chiee.”
41 Mɛɛ buɛi ndɔɔ kuɛŋnuŋ, mi Deeve fula naa o wa o viaŋnaŋ ba tou wo wa. Okoŋ mbo baŋ wulaŋ, nduyɛ mbo tunduŋ bɛmbɔɔ leyaa Chonataŋ lachi. Ma kɔɔmiaŋ,* nduyɛ ma chaŋ vellaa velle. Kɛ Deeve ndoo hiou chaŋ.
42 Mi Chonataŋ dimul Deeve aa: “Kɔ wa kɛndɛ, kanifuule naa ŋiɔɔŋ kpou chua buŋgɛi o diola Chɛhowa laŋ niŋ, miŋ dimi aa, ‘Maa Chɛhowa wa seiyo naa tɛɛŋ, nduyɛ mbo wa seiyo chuauwaa numnda tɛɛŋ a chuauwaa niaa lefafɛɛŋ.’”
Okoŋ mi Deeve kuaŋnuŋ, nduyɛ mi Chonataŋ bɛɛ miiŋgu chiee.
Tɛɛsiaalaŋ
^ Ɔɔ “kpɛŋɛ.”
^ Hibuluiye, “a yuŋga kala num o luŋ.”
^ Hibuluiye, “kanifuule po nɔ le piɔmndo sɔlaa wo o cho ni.”
^ Ɔɔ “tabalioo.”
^ Hibuluiye, “sɔɔsiaŋ kuulaŋ.”
