Saamiɛɛ Tasoo 21:1-15
21 Okoŋ kɔɔli, mi Deeve kua Nɔbi naa Ahimɛlɛki chua, wana soliaa lasalaa. Mɛɛ Ahimɛlɛki che Deeve, mbo kandu nyiiyaa a siooŋnde. Okoŋ mbo nyuna ndu aa: “Le yɛɛnɛ ŋ hiŋ yɛ nanuŋ numpilɛ kpeele, wana o wana cho num kɔɔli le?”
2 Mi Deeve mulul Ahimɛlɛki aa: “Masaa vem ya nyɛ tosa ni. Kɛ mbo dimul la aa, ‘Nyɛ ya cho num hoo viomɔɔ le tosaa wo, tosa mi wana o wana sina a ndu okɔɔ le. Nduyɛ tosa mi wana sina nɛila chɔmaala ya ke num ndaŋ te.’ I tosa kɛɛsiaa a puaa niaa le miŋ bɔŋaŋ o fondaŋ pum.
3 Lelaŋ, te a nɔ pɛ beediiyo* kpuŋgbaŋ ŋuɛɛnu, ɔɔ nyɛ o nyɛ ŋ nɔ pɛ, yandii ke ya.”
4 Kɛ mi Ahimɛlɛki dimul Deeve aa: “I nɔ beedii yɔŋaa o ba le. Kɛ beedii diandaa cho nanuŋ. Nduyɛ te o yɔŋ pɛ mi puaa numnda pilaŋ ndɔ wana lanɔ kɛ kɛ waalioo le,* a nɔla ma de.”
5 Mi Deeve dimul Ahimɛlɛki aa: “Teleŋ o teleŋ naŋ wa pɛ o viomɔɔla waa nuaa bɛŋgu naa puaa niaa, ŋ pilaŋ wana lanɔ le, o yɔŋ bɛɛ maa o viomɔɔ yɔŋaa bɛŋgu koni naŋ cho ni. Lelaŋ, te dialuŋ ndaŋ wa pɛ ŋ diandaa a teleŋnda waa lende, mɛɛ hau bɛɛ dialuŋ ndaŋ cho ŋ diandaa.”
6 Okoŋ, mi Ahimɛlɛki ke ndu beedii diandaa. Kanifuule, beedii cheleŋ ve loŋ te, mɛɛ beedii wa o yɔŋgaŋ o Mɛlɛka lo wo. Nduyɛ ndaa faŋa ndu niŋ Chɛhowa lachi le ma miŋgi o sɛnɛiyo o paale nda faŋa ndu leŋ choo.
7 O paale leŋ choo, buɛiyaa Sɔɔ wa o pilɛ wa o biyɔɔ niŋ loŋ* Chɛhowa lachi. Diola ndɔlaŋ la wa Duɛki ni, Idɔmaitiinɔɔ. Ndu wa masa wanaa mandaa lasaa Sɔɔ wa ni.
8 Mi Deeve nyuna Ahimɛlɛki aa: “Baa a nɔ pa ballo ɔɔ muɛi faŋnde o ba nanuŋ? Le mɛɛ masaa vem ya choŋ choŋ yɛ, I chue muɛi nii faŋnde ɔɔ wolɔɔla nila chɔulaŋ te.”
9 Mi Ahimɛlɛki dimul ndu aa: “Muɛi faŋii Koolaya ve cho nanuŋ, Filitiaŋnɔ ŋ dii o Kpoloŋndo Ɛlaa wo. I cho i simbulaa o kolaa niŋ, o doma biŋgioo* amakɔɔ. Te a yeema pɛ ma chua ndi, mɛɛ chua, kanifuule ndi koni cho nanuŋ ni.” Mi Deeve dimi aa: “Muɛi faŋii kɛ kɛ cho maa ndi le. Ke ya ndi.”
10 O paale leŋ choo, mi Deeve hiau lachi a Sɔɔ nyaanɔŋndo, mbo kua o masaa Akisi lo Kaati.
11 Mi buɛiyaa Akisi wa nyuna ndu aa: “Baa o cho Deeve, masaa le lɛŋnde Isɔluɛi leŋ te cho hoo le? Baa o cho a ndu okɔɔ le waŋnda wa chondei solioo a yolaŋ ma dimi aa,
‘Sɔɔ dii waŋnda o waalaŋ niŋ,
Kɛ Deeve ndu waalaŋ o tɔ tɔ laŋ niŋ’ te?”
12 Mi Deeve kɛsiŋ diomndaŋ ndaŋ o kɔl, nduyɛ mi siooŋnde bii ndu tau le masaa Akisi o Kaati niŋ.
13 Mbo chɔm maa wana seemɛiyo o cho ni, okoŋ mbo kandu sɔɔŋ tosaa maa wana seemɛi nda tɛɛŋ.* O wa keiyo poonyiaa o diola kpaki chioo, nduyɛ mbo tosa mi lɔluaŋ ma tual ndu pala pala o siɛiye.
14 O mɛɛlulaŋ kpɔŋ, mi Akisi dimul buɛiyaa nduaa aa: “La cho chɔɔ maa wana seemɛiyo poo hoo cho ni! Le yɛɛnɛ nya chuu yɛ ya ndu?
15 Baa wanaa seemɛiya cho ya pɛŋndeŋ ni, le mi la chuu ya hoo mbo wa ya sɔɔŋ ŋdiɔmndoŋ tosaa lachi? Baa I nɔ pa mi chɛl mi laŋunɔɔ hoo luɛi o ya lo chiɛiniŋ?”
Tɛɛsiaalaŋ
^ Ɔɔ “buloo.”
^ Ɔɔ “tosa wɔ suɛi wana lanɔ waalioo le.”
^ Naapum le buŋgɛi o chua ve, o ve o diandaa le, ɔɔ le mɛɛ nda chiikuu ndu a lɛlɔŋ yɛ.
^ Tofa Tɛɛsiaa.
^ Hibuluiye, “nda o ba.”
