Saamiɛɛ Tasoo 22:1-23
22 Okoŋ mi Deeve faŋaŋ loŋ, mbo kɔ vioŋnuŋ o buuloo niŋ Adulam. Mɛɛ bɛndaa nduaa a yuŋgu finya ndɔ wo kpou tuei a ndi okɔɔ, ma kua naa o wa wa.
2 Nduyɛ mi wanaa wa o nyɛpalaa niŋnda, a ndaa nɔ kueela pilalaŋ nda, a wanaa wa a kɔlta tambɛilaŋ nda kpou kɔ chuuŋgiaŋ naa o wa wa. Okoŋ mbo simnuŋ masa ndaa. Puaa le 400 wa a ndu latulu ni.
3 Okoŋ kɔɔli, mi Deeve faŋaŋ loŋ, mbo kua Misipɛ o Mowaabi niŋ. Mbo dimul masaa le Mowaabi aa: “A yandii, mala ya mi finya nuu a kala nuu wa num o bɛŋgu choo haaa mi che nyɛ Mɛlɛka cho ya tosal lo.”
4 Okoŋ mbo mɛi nda masaa Mowaabi o ba. Nduyɛ, a lo loŋ haaa a boondii Deeve wa o vioŋnɔŋndo niŋnde kpou.
5 Mɛɛ teleŋ tiŋ hiou, mi Kaadi wana suaa le Mɛlɛka wo dimul Deeve aa: “A nɔ ma lo o vioŋnɔŋndo niŋ te. Faŋaŋ loŋ ma miiŋgu o lɛŋnde Chuda leŋ niŋ.” Okoŋ mi Deeve mal, mbo kua o bundɔɔ Hɛluɛti.
6 Mi Sɔɔ tuɛi maa a saaluŋ Deeve a puaa wa latulu a ndu wa. Sɔɔ wa ichali o Kibiya niŋ o yɔm tamalikiiyo bɛŋgu, o fondaŋ filioŋndo a bal ndɔɔ o ba. Nduyɛ buɛiyaa nduaa kpou wa ndu a balaa silɔ.
7 Okoŋ mi Sɔɔ dimul buɛiyaa nduaa kaŋ aa: “Nya yuŋgu Bɛŋjamiŋ ndo, a yandii, la yaŋ ya nilaŋ. Baa po Chɛɛse wo nɔla pa mbo ke nya kpou yondolaŋ a kpelela makilepiilaŋ? Baa o nɔla pa mbo siiŋguu nya kpou masaa, mi apum waŋnda waapilɛ wa nda o ba bɛŋgu, apum waŋnda kɛmɛ?
8 Nya kpou la yii ya dumbu! Teleŋ Chonataŋ po ni a po Chɛɛse wo yii kpemaa wo, wana o wana dimul la a ndi okɔɔ le. Nya kpou wana pilɛ bɛɛ tuiinuŋ ya inyiɛɛ, mbo dimul la maa po nuu hiou buɛi nuu kɔɔli le ya yaŋɔɔleŋ yeŋndo, a mɛɛ i cho suŋ suŋ yɛ le.”
9 Mi Duɛki, Idɔmaitiinɔ wa buɛiyaa Sɔɔ wa chilaŋ loŋ ndo dimi aa: “Mi cha po Chɛɛse wo Nɔbi o Ahimɛlɛki lo, po Ahitubi wo.
10 Mbo piɛi o Chɛhowa lo a Deeve okɔɔ, nduyɛ mbo ke ndu nyɛdiaa. Mbo ke ndu vɛlɛ pɛŋ muɛi faŋii Koolaya ve, Filitiaŋnɔɔ.”
11 O lepilɛ niŋ kpe, mi masaa yooŋgu le Ahimɛlɛki, wana soliaa lasalaa, a wanaa soliaa lasalaa wa o yuŋgu finya ndɔ wo niŋnda kpou, a wa o Nɔbi niŋnda. Okoŋ mi nda kpou kua o masaa lo.
12 Mi Sɔɔ dimi aa: “A yandii, yaŋ ya nilaŋ, num po Ahitubi wo!” Mi Ahimɛlɛki dimi aa: “I cho num lani, masanɔ nuu.”
13 Mi Sɔɔ nyuna ndu aa: “Le yɛɛnɛ num a po Chɛɛse wo yii yɛ ya dumbu? Le yɛɛnɛ ŋ ke yɛ ndu beediiyo* a muɛi faŋnde, nduyɛ ma nyuna Mɛlɛka le mbo mala ndu? O simul la nduyɛ mbo yeŋ ya yaŋɔɔleŋ, a mɛɛ i cho suŋ suŋ yɛ.”
14 Le hei mi Ahimɛlɛki mulul masaa aa: “O buɛiyaa numnda tɛɛŋ kinɛi, o nɛɛnɛ kpeekpei ŋ laalaŋ yɛ mbo hiau Deeve? Lefoo masaa o cho ni, nduyɛ ndu cho masaa le buɛiyaa manda num nda ni. Wana lebiɔɔ o cho o numndo chiɛiniŋ ni.
15 Baa paale leŋ koni ya piɛi o Mɛlɛka lo o a Deeve okɔɔ ni? Fɛɛŋ bɛɛ I bii kɔllo mi tosa nyɛ ŋ cho hoo dimioo wo le fallo! Bii buɛi numndo a yuŋgu finya nuu kpou tɔɔyaŋ le hei le, kanifuule I sina nyɛ o nyɛ a suɛi hei okɔɔ le.”
16 Kɛ mi masaa dimi aa: “Num Ahimɛlɛki vɛlɛ a yuŋgu finya numndo kpou, la nɔ mi la sɔla piɔmndo.”
17 Okoŋ, mi masaa dimul wanaa wa ndu mandaa wa aa: “La chɔŋ mi la diu diu wanaa soliaa lasalaa Chɛhowa wa, kanifuule a tol Deeve kɔɔli! A sina walaŋ maa o nyaanɔŋndo niŋ o cho ni, kɛ a dimul la le.” Kɛ buɛiyaa Sɔɔ wa ndaa yeema ma hol wanaa soliaa lasaa Chɛhowa wa baa, ma diu nda le.
18 Mi masaa dimul Duɛki aa: “Chɔŋ ma diu wanaa soliaa lasalaa.” O lepilɛ niŋ kpe, mi Duɛki, Idɔmaitiinɔɔ chaŋ mbo diu diu nda. O paale leŋ choo, mbo dii puaa 85. O kɛ kɛ ndoo nɔ doma biŋgi* nda toosiaa a feŋgbɔɔ wo lekɔɔ.
19 Mbo kɔ del vɛlɛ Nɔbi, chiee wanaa soliaa lasalaa choo a muɛi faŋnde. Nduyɛ wana pɔnɔ ni, wana lanɔ ni, chuaambɔ ni, chɛlɛkpɛ ni, nau ni, sofɛlɛ ni, saa ni, kpou mbo diu nda a muɛi faŋnde.
20 Kɛ mi Abiaata hialuŋ mbo nyaanuŋ naa Deeve chua. Abiaata yɛ, Ahimɛlɛki velu ndu ni, po Ahitubi wo.
21 Mi Abiaata dimul Deeve aa: “Sɔɔ chii wanaa soliaa lasalaa Chɛhowa wa kpou diu.”
22 Okoŋ mi Deeve dimul Abiaata aa: “Mɛɛ ya che Duɛki, Idɔmaitiinɔɔ paale leŋ, mi sina kɛsɛ maa o cho lakɔ Sɔɔ dimul. Ya kpeekpei tosa ni mi wana o wana o yuŋgu finya numndo niŋ sɔla piɔmndo.
23 Wa nanuŋ, yɔŋ isiooŋ te, I cho num manda. Wana o wana yeema pɛ le num diyɔɔ, mɛɛ ya o yeema koŋ diyɔɔ ni.”
