Saamiɛɛ Tasoo 24:1-22
24 Dimioo nuaa Sɔɔ fula Filitiaŋnda touwɔɔ, ma dimul ndu aa: “Fallo, Deeve cho o pollo niŋ Ɛŋ-kɛdi.”
2 Mi Sɔɔ hɛli puaa 3,000 o Isɔluɛi niŋ kpou, ma kua Deeve a puaa nduaa chɔuwa nuuviaa o fondaŋ poutaŋ la cho feke feke wo, naa chuiŋaa bandilaa balu wa.
3 Mi Sɔɔ fuuluu o fondaŋ mandaa lasaa nda toosiaa a poutaŋ ndo o nɛiyo ikɛi, nduyɛ buuloo wa loŋ. Okoŋ mbo luɛi leniŋ le hiouwɔɔ o chiɛi kɔɔli.* A teleŋ koŋ, Deeve nda puaa nduaa wa ichali o buulu koŋ niŋ nda amakɔɔ.
4 Mi puaa Deeve wa dimul ndu aa: “Chɛhowa cho num dimullo o paale hauleŋ ndeŋ choo aa, ‘I mal num yaamɔɔnɔ numndo o ba. Nyɛ o nyɛ ŋ sina pɛ maa o bɛnda le ma tosal ndu, tosa.’” Okoŋ mi Deeve chaŋ mbo kua yɛlɛŋ yɛlɛŋ, mbo kɔ kiolu bɔɔle doma bala biŋgi wa Sɔɔ lekɔɔ wo.
5 Kɛ okoŋ kɔɔli, mi kɔl iyama ndɔɔ kandu ndu paaliaŋndo le mɛɛ o kelu bɔɔle doma bala biŋgi Sɔɔ wo yɛ.
6 Mi Deeve dimul puaa nduaa aa: “I nɔ mi tosal masanɔ nuu suɛi waa nuaa le, kanifuule wana Chɛhowa pɔya wo o cho ni. Nduyɛ pesiŋ bɛɛ Chɛhowa chɛl le mi hol wana ndu Chɛhowa pɔya wo baa le.”
7 Mɛɛ nuaa Deeve looku puaa nduaa kpaa ni, nduyɛ o chɛl nda ma del Sɔɔ choo le. Okoŋ, mi Sɔɔ chaŋ mbo fula naa o wa o buuloo niŋnda mbo kuaŋnuŋ.
8 Mi Deeve bɛɛ chaŋ mbo fula naa o wa o buuloo niŋnda, mbo veelu Sɔɔ choo choo kpeleŋ aa: “Masanɔ nuu!” Mɛɛ Sɔɔ tofaŋ kɔɔli, mi Deeve baŋ wulaŋ okoŋ mbo fuuluu hɔlla lɛŋ.
9 Mi Deeve dimul Sɔɔ aa: “Waŋnda cho num dimullo maa I cho num nuuviaa le num diyɔɔ. Le yɛɛnɛ ŋ cho yɛ nda nilaŋ yaŋɔɔ?
10 Numpila che hau a lehɔl pɛɛŋ mɛɛ Chɛhowa mal num ya o ba o buuloo niŋ yɛ. Kɛ mɛɛ waŋndo dimi le num diyɔɔ, mi tuiinuŋ num inyiɛɛ. Okoŋ mi dimi aa, ‘I cho masanɔ nuu baa holɔɔ le, kanifuule wana Chɛhowa pɔya wo o cho ni.’
11 Tofawɔ kɛkɛ, bɔɔle doma num bala biŋgioo cho ya leŋ o ba ni. Ya kelu bɔɔle doma num bala biŋgioo ni, kɛ I dii num te. Numpila che niko kpendekele maa I nɔ iyeema le mi dii num ɔɔ mi simul num te. Nduyɛ I tosal num suɛi wɔɔŋ kɛ kɛ le. Kɛ mi num wa ya nuuviaa le ya diyɔɔ.
12 Maa Chɛhowa kiolu naa yamɛi tɛɛŋ, nduyɛ maa Chɛhowa miŋgul num maa le ya. Kɛ ya fɛɛŋ bɛɛ I hol num baa le.
13 A mɛɛ tale masindɛ pilɛ dimi yɛ, ‘O wana dɛnɛ wɔɔŋndo niŋ dɛnɛ wɔɔŋndo fula ni.’ Kɛ ya fɛɛŋ bɛɛ I hol num baa le.
14 O nɛɛnɛ kpeekpei masaa Isɔluɛi cho yɛ kiltaŋ kɔɔli? O nɛɛnɛ kpeekpei ŋ cho yɛ touwɔɔ? Baa ya tuŋ vilɛiyo hoo? Ya nyɛ fondoo hoo?
15 Maa Chɛhowa wa wana kialaa ŋyamaa, nduyɛ mbo kelu naa yamɛi tɛɛŋ. Ndupila cho chɔ mbo suŋgu le ya, mbo kelu yamɛi le ya, okoŋ mbo piŋi ya num o ba.”
16 Mɛɛ Deeve chii diomndaŋ ndaŋ dimi, mi Sɔɔ nyuna ndu aa: “Po nuu Deeve, baa diom numndo ya cho hoo tueiyɔɔ ni?” Okoŋ mi Sɔɔ kandu chaŋndo choo choo kpeleŋ.
17 Mbo dimul Deeve aa: “A cho wana sakpo ma hiau ya, kanifuule a tosal la o kɛndɔɔ, mi ya miŋgul num a o wɔɔŋndo.
18 A tonya, a chɔm ya hau suɛi kɛndɛi ŋ tosal la ve. Kanifuule, mi Chɛhowa mal la num o ba, kɛ a dii ya le.
19 O nɛɛnɛ kpeekpei komallɛ yaamɔɔnɔ ndɔɔ mbo mal ndu lende, o yɔŋ ndu nyɛ o nyɛ le? Chɛhowa cho num salaa dɔwɔɔ le nyɛ ŋ tosal la o paale hauleŋ ndeŋ choo wo.
20 I sina niŋ kɛsɛ maa num cho wa masaa ni. Nduyɛ o yuŋgu numndo niŋ masaleŋ Isɔluɛi le cho wa le teleŋ o teleŋ ni.
21 Lelaŋ, mɛnaŋ o diola Chɛhowa laŋ niŋ maa o yɔŋ bɛɛ mi vi, a cho chuauwaa niaa mamaa* diu diu le. Nduyɛ maa a cho diola nilaŋ wɔɔsuu o yuŋgu finya nuu choo le.”
22 Mi Deeve mɛnaŋ, okoŋ mi Sɔɔ miiŋguŋ o ndu lo. Kɛ mi Deeve nda puaa nduaa miiŋgu naa nda wa o vioŋnɔŋndo niŋ nda.
