Saamiɛɛ Tasoo 25:1-44
25 Mɛɛ teleŋ tiŋ hiou, mi Saamiɛɛ wu. Okoŋ mi Isɔluɛiya kpou chuuŋgiaŋ naapilɛ le ndu chaŋndo, nduyɛ ma kumbu ndu o chiɛi ndɔɔ ikɛi Luama. Okoŋ kɔɔli, mi Deeve chaŋ mbo kua o pollo niŋ Paluaŋ.
2 A teleŋ koŋ, po pilɛ wa Mawɔŋ, nduyɛ o Kamɛɛ* niŋ chɔluaa nduaa wa ni. Wana sulaa pila o wa ni. Ndoo nɔ saa 3,000 a chuiŋnda 1,000. Nduyɛ o wa saa nduaa yiiŋnde kilioo Kamɛɛ.
3 Poo hoo diola ndɔlaŋ la wa Nabaa ni, fulaa o yuŋgu Kelɛbi wo choo. Nduyɛ laa ndɔ diolaŋ aa Abikɛɛ. Chuaa hoo ndoo nɔ taasioo nduyɛ naŋɔɔ pila ndoo naŋ ni. Kɛ pɔnɔ ndɔ ndu wa ŋuasu ŋuasu, nduyɛ kɔl vesɛiyo pila ndoo nɔ ni.
4 Deeve wa o pollo niŋ mbo tuɛi maa Nabaa cho saa nduaa yiiŋnde kilioo.
5 Okoŋ, mi Deeve viam puaa feleŋguaa tɔ o ndu lo. Mbo dimul nda aa: “La kɔ Kamɛɛ. Te la fuuluu pɛ naa Nabaa chua, la yil la ndu lapi.
6 Okoŋ mi la dimul ndu aa, ‘Maa viou yoomu,* nduyɛ mi nyɛ o nyɛ wa o kɛndɛ a num fɔ! Maa yuŋgu numndo wa kɛndɛ, nduyɛ mi salaa wa o nyɛm num ndoŋ choo fɔ!
7 I tuei maa a cho saa numnda yiiŋnde kilioo. Teleŋ wanaa num aa mandaa lasaa wa a naa latulu wo, ŋ yɔŋ nda nyɛ o nyɛ le. Nduyɛ boondii nda wa Kamɛɛ ve kpou, nyɛ o nyɛ luusiaŋ nda o ba le.
8 Puaa numnda cho lesei, nyuna nda. Maa puaa niaa feleŋguaa wa wanaa sɔvɛ num o hɔl fɔ, kanifuule a teleŋ kɔl kɛndɔɔ* naŋ hiŋ ni. A yandii, te a nɔ pɛ nyɛdiaa pɔmbɔ o kɛsiaa, ke buɛiyaa numnda a Deeve po num.’”
9 Okoŋ mi puaa feleŋguaa Deeve wa kɔ dimul Nabaa nyɛ o nyɛ Deeve dimul nda. Mɛɛ nda chii ndu kona dounɔŋ,
10 mi Nabaa dimul buɛiyaa Deeve wa aa: “Wana maavɛɛ Deeve, po Chɛɛse wo cho yɛ? Mbɔ buɛiyaa cho masaa ndaa malɔɔ ma nyaanuŋ nda kui niŋ bɔɔ waalioo fɔ!
11 Baa I nɔ pa mi chua beedii* nuu a mɛŋma niaŋ, vɛlɛ a visiŋ niŋ ya kili le puaa cho yiiŋii saa niaa kilioo wa, mi ke puaa wana sina haa naa nda fula le wa?”
12 Okoŋ mi puaa Deeve wa miiŋgu, ma kɔ dounuŋ ndu kona kpou.
13 O lepilɛ niŋ kpe, mi Deeve dimul puaa nduaa aa: “Wana o wana sayiaŋ muɛi nduɛi faŋnde!” Okoŋ mi nda kpou sayiaŋ mɔɔŋ ndaŋ faŋndoŋ, nduyɛ mi Deeve bɛɛ sayiaŋ muɛi nduɛi faŋnde. Puaa le 400 kuɛ a Deeve latulu ni, nduyɛ mi puaa 200 lo wolɔɔlaŋ ikɛi.
14 Mɛɛ teleŋ tiŋ hiou, mi buɛiyaa Nabaa la o pilɛ kɔ dimul Abikɛɛ laa ndɔ aa: “Wɛɛŋndo, mi Deeve viam waŋnda fulaa o pollo niŋ le ma huŋ yil masanɔ naa. Kɛ mbo deŋul nda, nduyɛ mbo tusi nda siɔmbulaŋ.
15 Puaa kaŋ a chaa naa bɔɔ biyɔɔ. Nduyɛ, boondii naŋ wa o pollo niŋ naa ndaa latulu ve, nyɛ o nyɛ luusiaŋ naa o ba le, nduyɛ a yɔŋ naa nyɛ o nyɛ le.
16 Boondii naŋ wa nda saa mandaa ikɛi kpou ve, idii a ichɔl, puaa kaŋ wa ko maa kpaki le naa mandaa.
17 Kɛɛsiaa le nyɛ ŋ nɔ ma tosa wo, kanifuule kpundɔɔ cho nuaa hunɔɔ le masanɔ naa a yuŋgu ndɔɔ kpou ni. Nduyɛ, wana fondoo fuu o cho ni, o yeŋ wana lani le.”
18 Okoŋ mi Abikɛɛ chaŋ chɔ chɔ, mbo chua beediiyo* kpuŋgbaŋ 200, muɛiyaŋ kpɛɛnɛŋ bɛndoŋ ŋmuuŋ, saa nda bɛɛndiaa le yauwo wa a ŋuɛɛnu, baliŋ tuaŋaŋ kambɛiyo le ŋuɛɛnu,* beedii kilepiima vesɛiyo kpuŋgbaŋ 100, a fikiima vesɛiyaŋ kpuŋgbaŋ 200, mbo handu muŋ kpou sofɛliaa o lakɔɔ.
19 Mi Abikɛɛ dimul buɛiyaa nduaa aa: “La hiou pɔɔ ya lachi. I cho nya kɔɔli.” Kɛ o dimul pɔnɔ ndɔ nyɛ o nyɛ a ndi okɔɔ le.
20 Teleŋ Abikɛɛ wa pembei tolɔɔ o sofɛlɛ ndɔɔ choo wo, Deeve nda puaa nduaa wa ndu hunɔɔ o ibuŋ, kɛ a chi ndu le, kanifuule mi pembei kumbu ndu. Okoŋ ma bɔŋaŋ o nɛi tɛɛŋ.
21 Deeve wa hunɔɔ a dimioo aa: “Saŋga fondoo fuu ya wa o pollo niŋ ni le nyɛm laŋunɔɔ hoo kpou mandaa. Nyɛm ndɔŋ o pilɛ bɛɛ luusiaŋ te. Kɛ a koŋ kpou, mbo tosal la dɛnɛ wɔɔŋndo le ikɛndɛi ya tosal ndu ve.
22 Nanuŋ a siɔdii idii, te I mɛi pɛ wana pɔnɔɔ* o pilɛ bɛɛ yoomu o ndu lo chiɛiniŋ, maa Mɛlɛka tusi yaamɔɔwaa Deeve wa* nyɛpalaa bɛndoo choo.”
23 Mɛɛ Abikɛɛ che Deeve, mbo tual chɔ chɔ o sofɛlɛ ndɔɔ choo, mbo baŋ wulaŋ Deeve lachi, okoŋ mbo tundu bolleŋ lɛŋ.
24 Mbo kɔ del ndu o labɛŋguniŋ mbo dimi aa: “Masanɔ nuu, bii ya tɔɔyaŋ le nyɛ yɔŋnuŋ ndo. A yandii, chɛl mi buɛi num laandoo soo o numndo, nduyɛ ma yaŋ ya nilaŋ.
25 A yandii masanɔ nuu, nua Nabaa le, kanifuule wana fondoo fuu o cho ni. Mɛɛ diola ndɔlaŋ la cho yɛ koni o tosa sɔɔŋ ni. Diola ndɔlaŋ aa Nabaa,* nduyɛ kɔl kalu bɛɛ o nɔ le. Kɛ ya buɛi num laandoo, I chi puaa num aa ŋ vem nda a lehɔl kposoŋ te.
26 Lelaŋ masanɔ nuu, I mɛnaŋ po o Chɛhowa, Mɛlɛka cho yoomu wo lo, a num o hɔl maa, Chɛhowa pila tosa ni tɔɔyaŋ piɔm wana cho num choo le. Nduyɛ a kue ma kɔ miŋgi maa a ba num te. Maa yaamɔɔwaa numnda a wana o wana cho nɛilaŋ nuuviaa le masanɔ nuu suɛi wɔɔŋnde tosallo simnuŋ maa Nabaa fɔ!
27 Lelaŋ, a yandii masanɔ nuu, bii nyɛdiaa buɛi num laandoo chuu num maa ke* wo, ma ke puaa cho num kɔɔli wa.
28 A yandii, mal buɛi num laandoo haki. Chɛhowa cho tosa mi masaleŋ le hiou lachi a waa o yuŋgu numndo choo le teleŋ vilɛi, kanifuule masanɔ nuu cho sɔŋgaa a yaamɔɔwaa Chɛhowa wa. Nduyɛ kani ma vialuŋ, a tosa wɔ suɛi dɛnɛ wɔɔŋ kɛ kɛ le.
29 Te wana o wana tisa num kɔɔli pɛ, nduyɛ mbo yeema le num diyɔɔ, Chɛhowa Mɛlɛka numndo cho yoomu masanɔ nuu kɛsi kɔdɔ o bɔlɔ yoomoo niŋ. Kɛ o cho yoomula yaamɔɔwaa numnda viouwɔɔ poloŋ, mɛɛ nda viau nuaa poutaŋ o faandaa niŋ yɛ.
30 Te Chɛhowa huŋ tosal pɛ masanɔ nuu sɔɔŋ kɛndɛŋ o dimi le ndu tosallo woŋ kpou, nduyɛ mbo siiŋguu ndu masaa Isɔluɛi,
31 a tembu niŋ kɔl ɔɔ ma kel iso le, kanifuule masanɔ nuu soli koowaŋ o fondo fuu wo choo ɔɔ mbo miŋgi maa a ba ndɔ le. A yandii masanɔ nuu, te Chɛhowa huŋ dɔu num sala pɛ, loonuŋ a buɛi num laandoo.”
32 Le hei, mi Deeve dimul Abikɛɛ aa: “Saŋgalaa cho le Chɛhowa, Mɛlɛka Isɔluɛiya, o vem num naa ya chua paale hauleŋ ndeŋ ndo!
33 Maa salaa wa num choo le yiyaŋ num kɛndɔɔ! Maa salaa wa num choo le mɛɛ ŋ kuuna ya koowaŋ solioo, vɛlɛ a maa miŋgioo a ba ni o paale hauleŋ ndeŋ choo yɛ.
34 I mɛnaŋ po maa te Chɛhowa, Mɛlɛka Isɔluɛiya, o kuuna ya kɔlaŋ num suɛi wɔɔŋnde tosallo wo cho pɛ yoomu, te num oo keleŋa hunɔɔ chɔ chɔ naa ya chua le, nanuŋ a siɔ idii, puaa Nabaa la kinɛi o pilɛ bɛɛ I ve mɛi yoomu le.”
35 Okoŋ mi Deeve bii nyɛm o chuu ndu woŋ, mbo dimul ndu aa: “Miiŋgu o numndo, nduyɛ buulaŋ te. I tuei nyɛ ŋ dimi wo, I cho tosa mɛɛ ŋ dimi yɛ.”
36 Okoŋ kɔɔli, mi Abikɛɛ miiŋgu naa Nabaa chua. Nduyɛ o komal ndu diolaŋ maa masa o ndu lo chiɛiniŋ. Nabaa waŋnuŋ a kɔl kɛndɛ, nduyɛ o waŋnuŋ o muɛiyaŋ niŋ yikpi. Lelaŋ o dimul ndu nyɛ o nyɛ le haaa mi paaleŋ le sia.
37 Idiiyo, mɛɛ Nabaa miiŋgu o ndupila niŋ, mi laa ndɔ chɔm ndu nyɛ o nyɛ yɔŋnuŋ. Mɛɛ Nabaa tuei hei, mbo simnuŋ maa wana vilɛi,* nduyɛ mbo hini o bɛvɛi maa pou.
38 Palɛi tɔ okoŋ kɔɔli, mi Chɛhowa tosa mi Nabaa wu.
39 Mɛɛ Deeve tuei maa Nabaa vi, mbo dimi aa: “Saŋgalaa cho le Chɛhowa, kanifuule ndu miŋgul Nabaa, laŋunɔ tɛɛmbuu ya bɛɛlaŋ ndo maa ni. Nduyɛ mbo tosa buɛi ndɔɔ tosa suɛi o suɛi wɔɔŋ te. Chɛhowa paawa* Nabaa le dɛnɛ wɔɔŋ o tosa wo.”* Okoŋ kɔɔli, mi Deeve viam waŋndo le ma dimul Abikɛɛ maa o yeema ndu le mbo wa laa ndɔ.
40 Mi buɛiyaa Deeve wa kua naa Abikɛɛ chua Kamɛɛ ma dimul ndu aa: “Deeve vem naa naa num chua ni. O dimi maa naŋ kɔ a num le ma wa laa ndɔ.”
41 O lepilɛ niŋ kpe, mbo chaŋ mbo baŋ wulaŋ, mbo tundu bolleŋ lɛŋ. Okoŋ mbo dimi aa: “I cho o yɔŋgaŋ wulee le mi pulu buɛiyaa masanɔ nuu peloŋ.”
42 Mi Abikɛɛ hel o sofɛlɛ ndɔɔ choo chɔ chɔ a buɛiyaa nduaa laanduaa a ŋuɛɛnu ndu kɔɔli. Mbo kua nda wanaa Deeve vem nda latulu, nduyɛ mbo simnuŋ laa ndɔ.
43 Deeve ndoo nɔ niŋ lanɔ cheleŋ diolaŋ aa Ahinowam, wana waa Chɛsiluɛɛ. Mi nda ŋiɔɔŋ kpou simnuŋ laandaa nduaa.
44 Lanɔ tase Deeve wo wa Maikaa ni, chua Sɔɔ wo. Kɛ mi Sɔɔ chua ndu, mbo yɔŋgu Paati po Laisi wo o nɔɔ niŋ, wana waa Kalim.
Tɛɛsiaalaŋ
^ Chioo o Chuda niŋ, kɛ o cho nyɛpilɛ a Pembii Kamɛlle le.
^ Ɔɔ “maa wa a kɔl nyulu.”
^ Hibuluiye, “paale kɛndɛleŋ.”
^ Ɔɔ “bulu.”
^ Ɔɔ “buloo.”
^ Hibuluiye, “siaa le ŋuɛɛnu.” Tofa Tɛɛsiaa.
^ Hibuluiye, “wana o wana tuiili o chiɛiyo.” Tale maHibuluiyo le waŋ piaanduaa chuaa chɔndɔ.
^ Ɔɔ naapum, “tusi Deeve.”
^ O sim, “wana nɔ kɔl kalu le wo.” “Diɔmndo.”
^ Hibuluiye, “sala.”
^ Hibuluiye, “mi kɔllo wu ndu niŋ.”
^ Ɔɔ “sala.”
^ Hibuluiye, “handu ndu dɛnɛ wɔɔŋ ndupilaa o lebol.”
