Saamiɛɛ Tasoo 28:1-25
-
Sɔɔ kuɛ o wana ŋwaŋ vilɛiyo lo Ɛŋ-dɔɔ (1-25)
28 A teleŋ koŋ, mi Filitiaŋnda chuuŋgiaa puaa ndaa chɔuwa le kɔlaŋ Isɔluɛiya chiŋalaŋndo a sɔŋgɔɔ. Le hei, mi Akisi dimul Deeve aa: “Numpila sina kɛsɛ maa num a puaa numnda la nɔ mi la kuɛ a ya latulu o chɔuwo.”
2 Okoŋ mi Deeve dimul Akisi aa: “Numpila sina nyɛ buɛi numndo cho tosa wo.” Mi Akisi dimul Deeve aa: “Le saboo hoo ya cho num yulɔɔ iso ni le ma wa wana manda ya wo le teleŋ o teleŋ.”*
3 A boondei hei, Saamiɛɛ ndoo vi niŋ, nduyɛ Isɔluɛiya kpou ndaa chii ndu niŋ chaŋ, ma kumbu ndu o ndu lo chiee Luama. Sɔɔ bɛɛ ndoo chii niŋ wanaa ŋwaŋ vilɛiya, a wanaa dimi sɔɔŋ waa lachioŋ nda soli o lɛŋndeŋ niŋ.
4 Mi Filitiaŋnda chuuŋgiaŋ, ma kɔ kila dɔɔŋgɔɔ Siunim. Mi Sɔɔ bɛɛ chuuŋgiaa Isɔluɛiya kpou, ma kɔ kila dɔɔŋgɔɔ Kibuaa.
5 Mɛɛ Sɔɔ che dɔɔŋgɔ Filitiaŋnda, mi siooŋnde bii ndu, okoŋ mi kɔllo kandu ndu lɔɔ kpu kpu.
6 Mi che bɛɛ Sɔɔ wa Chɛhowa nyunaa le nɛi chɔmaa, kɛ Chɛhowa mulul ndu le. O lɔma sɔlaa niŋ ni, a Yuluim ni, ɔɔ sanaa a wanaa suaa le Mɛlɛka wa, pesiŋ bɛɛ o mulul ndu le.
7 O mɛɛlulaŋ kpɔŋ, mi Sɔɔ dimul buɛiyaa nduaa aa: “La nuuvial la wana lanɔ ŋwaŋ vilɛiyo, mi kuɛ o ndu lo, mi kɔ nyuna ndu le nɛi chɔmaa.” Mi buɛiyaa nduaa dimul ndu aa: “Fallo, chua pilɛ cho Ɛŋ-dɔɔ wana ŋwaŋ vilɛiyo o cho ni.”
8 Okoŋ, mi Sɔɔ wounuŋ nyɛla cheleŋ yɔŋii wana sina ndu. Mbo kua nda puaa nduaa a ŋiɔɔŋ o wana lanɔ koŋ lo a nyumndaŋ. Mbo dimul ndu aa: “A yandii, soliŋ kpaaya num ŋwaŋ vilɛiyo kpeku ma vim ya yawaa, nduyɛ ma solul la wana ya cho num chɔm ndo.”
9 Kɛ mi chuaa dimul ndu aa: “Numpila sina walaŋ nyɛ Sɔɔ tosa wo. Ndu soli wanaa ŋwaŋ vilɛiya a wanaa dimi sɔɔŋ waa lachioŋ nda o lɛŋndeŋ niŋ ni. Mɛɛ le yɛɛnɛ ŋ cho yɛ ya yaŋɔɔleŋ yeŋndo le ya diyɔɔ?”
10 Okoŋ mi Sɔɔ mɛnaŋ po o Chɛhowa lo mbo dimul chuaa aa: “I mɛnaŋ po o Chɛhowa, Mɛlɛka cho yoomu wo lo, tɔɔyaŋ kɛ kɛ cho num wa choo le suɛi hei le!”
11 Okoŋ mi chuaa nyuna Sɔɔ aa: “O nɛɛnɛ ŋ yeema yɛ mi solul num?” Mbo muli aa: “Solul la Saamiɛɛ.”
12 Mɛɛ chuaa che “Saamiɛɛ”* mbo deŋi choo choo kpeleŋ a chaŋndo, mbo dimul Sɔɔ aa: “Le yɛɛnɛ ŋ hui yɛ ya? Num cho Sɔɔ ni!”
13 Mi masaa dimul ndu aa: “Yɔŋ isiooŋ te. Yɛɛnɛ ŋ che yɛ?” Mi chuaa mulul Sɔɔ aa: “I cho waŋndo chɔɔ maa mɛlɛka mbo wa fulaa lɛŋ.”
14 O lepilɛ niŋ kpe, mbo nyuna chuaa aa: “Vɛɛnɛ o cho yɛ?” Mi chuaa muli aa: “Fal yuuwɛiyo cho fulaa lɛŋ ni, nduyɛ doma bɛndu bala biŋgioo cho ndu lekɔɔ.” Okoŋ mi Sɔɔ sina maa “Saamiɛɛ” ni. Le hei, mbo baŋ wulaŋ, mbo fuuluu hɔlla lɛŋ.
15 Mi “Saamiɛɛ” nyuna Sɔɔ aa: “Le yɛɛnɛ ŋ pala yɛ ya ma tosa mi fula?” Mi Sɔɔ muli aa: “O kpundɛ bɛndoo niŋ ya cho ni. Filitiaŋnda chiŋalaŋ ya a sɔŋgɔɔ, nduyɛ Mɛlɛka faŋaŋ ya kɔɔli. I nyuna ndu niŋ bɛɛ, o mulul la le. O wa o lɔma sɔlaa niŋ, ɔɔ sanaa a wanaa suaa le ndu wa. Lelaŋ ya cho num veeloo ni le ma chɔm ya nyɛ ya nɔ mi tosa wo.”
16 Mi “Saamiɛɛ” dimul ndu aa: “Numpila sina maa Chɛhowa faŋaŋ num kɔɔli, nduyɛ mbo simnuŋ yaamɔɔnɔ numndo. Le yɛɛnɛ ŋ cho yɛ ya nyunaa le nɛi chɔmaa?
17 Chɛhowa pila cho tosa nyɛ o dimi sanaa a ya wo: Chɛhowa cho num masaleŋ poonda o ba, okoŋ mbo ke Deeve chaaŋ num wanachioo.
18 Kanifuule, ma kɛɛ le Chɛhowa diikɔŋndo, nduyɛ ma kɛɛ le tosaa nyɛ o dimul num le ma tosa a Amalɛkaitiiyaa o dɔɔnuŋ tumbe a nda wa. Le sabu koŋ Chɛhowa cho num hei tosallo paale hauleŋ ndeŋ ni.
19 Nduyɛ num ni, Isɔluɛiya ni, Chɛhowa cho nya malɔɔ Filitiaŋnda o ba. Siɔdii, num a puaa numnda cho wa latulu a ya. Chɛhowa cho vɛlɛ puaa chɔuwaa Isɔluɛiya malɔɔ Filitiaŋnda o ba.”
20 Mɛɛ Sɔɔ tuei diomnda “Saamiɛɛ” dimi laŋ ndaŋ, o lepilɛ niŋ kpe mi siooŋii bɛnduei bii ndu, okoŋ mbo hini lɛŋ sakpo. Nduyɛ yoomuleŋ bɛɛ le ve ndu le, kanifuule mbo niilu kpɛŋ nduyɛ mbo lɔl pii o di nyɛdiaa le.
21 Mɛɛ chuaa hiŋ naa Sɔɔ chua mbo cha maa suɛi hei paaliaŋ ndu tau, mbo dimul ndu aa: “Ya buɛi num laandoo diikuŋ nyɛ ŋ dimul la wo. Nduyɛ mi luei yoomu* nuu o kpundɔɔ niŋ, mi tosa nyɛ ŋ dimul la le tosaa wo.
22 Lelaŋ a yandii, yaŋ nilaŋ o nyɛ buɛi numndo nɔ le dimioo wo. I ke wɔ num beediiyo* ma de, okoŋ ma sɔla yoomuaŋ le ma kuɛŋnuŋ.”
23 Kɛ mi Sɔɔ kɛɛ mbo dimi aa: “I cho nyɛ o nyɛ dio le.” Kɛ, mi buɛiyaa nduaa a chuaa hoo hiau lachi a ndu dɛɛniaa. O mɛɛlulaŋ kpɔŋ, mbo yaŋ nda nilaŋ. Mbo chaŋ lɛŋ, mbo chal o kpele.
24 Chuaa hoo ndoo nɔ nau chelulɛiyo o ba. Okoŋ, mbo kɔ dii ndu chɔ chɔ, mbo chua kpeyaŋndo mbo muuliaŋ ndu, nduyɛ mbo luam beedii nɔ yiisii* leniŋ te wo.
25 Okoŋ kɔɔli, mbo ke Sɔɔ nda buɛiyaa nduaa ma dia. Mɛɛ nda chii dio, ma chaŋ ma kuaŋnuŋ a nyumma maŋ.
Tɛɛsiaalaŋ
^ Hibuluiye, “wana manda bolle nileŋ le teleŋ o teleŋ ndo.”
^ Ɔɔ “nyɔɔ maa Saamiɛɛ.”
^ Ɔɔ “chua yoomu nuu o ba.”
^ Ɔɔ “buloo.”
^ Ɔɔ “lɛvɛŋ.”
