Saamiɛɛ Tasoo 3:1-21
-
Saamiɛɛ sɔla suei yulɔɔ le mbo wa wana suaa le Mɛlɛka wo (1-21)
3 A boondii keŋ, Saamiɛɛ wa hiouwɔɔ lachi a wali Chɛhowa wo tosaa Ilai o ba bɛŋgu. Kɛ a teleŋ koŋ, Chɛhowa ndoo suu ko nuaa o waŋnda chieeya lo le. Nduyɛ yilaŋndoŋ bɛɛ muŋ kuiyɔ tau le.
2 Paale pilɛ, Ilai wa ihini o lumui ndɔɔ niŋ. Hɔlta ndɔlaŋ la wa niŋ yifidii, nduyɛ ndoo chi lɛ lapi le.
3 Saamiɛɛ wa ihini o chiɛi Chɛhowa wo niŋ, naa Kɔfu Kpemaa wa o kɛsiaa wa. Nduyɛ ndaa nyumi wɔ lambui wa o chiɛi Mɛlɛkaa niŋndo le.
4 Mi Chɛhowa veelu Saamiɛɛ. Mbo chɛl aa: “Ee, mi cheŋ ya.”
5 Mbo nyaanuŋ naa Ilai chua mbo dimul ndu aa: “Mi cheŋ ya, I tuei ma wa ya veeloo.” Kɛ mi Ilai dimul ndu aa: “I veelu num te. Miiŋgu ma kɔ hini.” Okoŋ, mbo miiŋgu mbo kɔ hini.
6 Mi Chɛhowa veelu vɛlɛ aa: “Saamiɛɛ!” Okoŋ mi Saamiɛɛ chaŋ mbo kua naa Ilai chua, mbo dimul ndu aa: “Mi cheŋ ya, I tuei ma wa ya veeloo.” Kɛ mi Ilai dimul ndu aa: “I veelu num te po nuu. Miiŋgu ma kɔ hini.”
7 (Saamiɛɛ ndoo sina wɔ Chɛhowa nyɛkɛndɛi le. Nduyɛ, Chɛhowa ndoo suu wɔ paandu o ndu lo le.)
8 Mi Chɛhowa veelu Saamiɛɛ veelu yaa ndɔɔ aa: “Saamiɛɛ!” Okoŋ mbo chaŋ, mbo kua naa Ilai chua mbo dimi aa: “Mi cheŋ ya, I tuei ma wa ya veeloo.”
Okoŋ, mi Ilai sina niko kɛsɛ maa Chɛhowa wa poombɔɔ veeloo ni.
9 Mbo dimul Saamiɛɛ aa: “Kɔ hini, nduyɛ te o veelu num niŋ pɛ, a dimi aa, ‘Soo Chɛhowa, buɛi numndo cho num nilaŋ yaŋɔɔ.’” Okoŋ mi Saamiɛɛ kua, mbo kɔ hini o lumui ndɔɔ niŋ.
10 Mi Chɛhowa huŋ sim o fondaŋ koŋ, mbo veelu vɛlɛ aa: “Saamiɛɛ, Saamiɛɛ!” Okoŋ mi Saamiɛɛ dimi aa: “A yandii, soo, buɛi numndo cho num nilaŋ yaŋɔɔ.”
11 Mi Chɛhowa dimul Saamiɛɛ aa: “I cho hunɔɔ nyɛ tosa o Isɔluɛi niŋ, te wana o wana huŋ tuei a ndu okɔɔ pɛ, o cho lɔlulaŋ lɔɔ.*
12 O paale leŋ choo, nyɛ o nyɛ ya dimi le tosaa a yuŋgu Ilai yo okɔɔ, I cho ndu tosa, nduyɛ o pilɛ bɛɛ I mɛi kɔɔli le.
13 Dimul Ilai maa, I cho hunɔɔ yuŋgu ndɔɔ yamɛi fafɛɛŋnde kilul, le dɛnɛ wɔɔŋ o sina a ndu okɔɔ wo. Kanifuule, puaa nduaa cho diola Mɛlɛkalaŋ tɛɛmbuuwo,* kɛ o tosa nyɛ o nyɛ le nda kuunaa le.
14 Lelaŋ, I mɛnaŋ po a yuŋgu Ilai yo maa, o yɔŋ bɛɛ ma soli salalaŋ o ya lo ɔɔ ma yɔŋgu ya ke laŋ, salala laŋ la ve letuu le haki ndaa kumbɔɔ le.”
15 Mi Saamiɛɛ lo o luaŋ haaa mi paaleŋ le sia. Okoŋ, mbo kuumbuu diolaŋ o chiɛi Chɛhowa wo. Nduyɛ siooŋnde wa ndu le Ilai dimullo a yilaŋnde hei okɔɔ.
16 Kɛ mi Ilai veelu Saamiɛɛ aa: “Saamiɛɛ po ni!” Mbo chɛl aa: “Ee, mi cheŋ ya.”
17 Mbo nyuna ndu aa: “Yɛɛnɛ Mɛlɛka dimullɛ num? Yandii, viŋ ya nyɛ o nyɛ le. Nyɛ o nyɛ Mɛlɛka dimul num, o pilɛ bɛɛ te a viŋ ya ndu pɛ, nuaa Mɛlɛka tusi num nyɛpalaa bɛndoo choo.”
18 Okoŋ mi Saamiɛɛ dimul Ilai nyɛ o nyɛ Mɛlɛka dimul ndu, nduyɛ o pilɛ bɛɛ o viŋ ndu le. Mi Ilai dimi aa: “Hɛnaŋ Chɛhowa wo ni. O tosa nyɛ bɛnda ndu o hɔl lo.”
19 Mi Saamiɛɛ hiau lachi a hindɔɔ, nduyɛ Chɛhowa wa a ndu latulu. Nyɛ o nyɛ o dimi le tosaa, o pilɛ bɛɛ del lɛŋ te.
20 Mi waŋnda Isɔluɛi kpou, chɔŋ Daŋ kɔ bii Biaa-siɛba sina kpendekele maa, Saamiɛɛ simnuŋ wana suaa le Chɛhowa wo.
21 Mi Chɛhowa hiau lachi a chɔɔmɔŋndo o Silɔɔ niŋ. Loŋ Chɛhowa chɔɔmuŋ Saamiɛɛ ni, nduyɛ loŋ Chɛhowa soo o Saamiɛɛ lo ni.
