Saamiɛɛ Tasoo 31:1-13
-
Piɔm Sɔɔ wo a puaa nduaa a yaa (1-13)
31 Filitiaŋnda wa sɔŋgɔɔ kpeekpei a Isɔluɛiya. Nduyɛ mi puaa Isɔluɛiya nyaanuŋ Filitiaŋnda. Ma dii a bɔɔbɔɔ o Pembei Kibuaa.
2 Mi Filitiaŋnda sɔɔŋguu Sɔɔ nda puaa nduaa ikɛi kpɛɛluŋ, okoŋ ma dii puaa Sɔɔ wa, Chonataŋ, Abinadabi, a Maliki-suaa.
3 Mi chɔuwo hiau lachi a tuuloo ketu ketu Sɔɔ choo. Nduyɛ mi wanaa wuu chiŋuaŋ nda saaluŋ Sɔɔ, ma via ndu a chiŋuaŋ, ma boli ndu tau tau.
4 Okoŋ mi Sɔɔ dimul wana biilul ndu wolɔɔla chɔulaŋ ndo aa: “Soli muɛi num ii faŋnde ma dii ya a ndi, yɔŋii puaa sɔla haa hivi chiɛi kɔɔli le wa huŋ dii ya, okoŋ ma tɛɛmbuu ya labɛɛ.” Kɛ mi wana biilul ndu wolɔɔla chɔulaŋ ndo kɛɛ, kanifuule siooŋnde wa ndu tau tau. Le hei, mi Sɔɔ pila chua muɛi faŋnde, mbo del lechoo.
5 Mɛɛ wana biilul Sɔɔ wolɔɔla chɔulaŋ ndo che maa o vi, mi ndu bɛɛ del o muɛi nduɛi faŋnde choo, mbo wu a ndu latulu.
6 Okoŋ mi Sɔɔ, puaa nduaa yaawa, wana biilul ndu wolɔɔla chɔulaŋ ndo, a puaa nduaa chɔuwa kpou* wu o paale leŋ choo.
7 Mɛɛ Isɔluɛiyaa wa o kpoloŋndo* niŋ a o tanda Chɔɔdaŋ ndo niŋnda che maa puaa Isɔluɛi nyaanuŋ, nduyɛ maa Sɔɔ nda puaa nduaa sɔla piɔmndo, ma kandu chieeŋ bɛndoŋ malɔɔ ma nyaanuŋ. Okoŋ kɔɔli, mi Filitiaŋnda huŋ hiɔlu chieeŋ muŋ.
8 Diimandɔɔ, mɛɛ Filitiaŋnda hiŋ le ma puŋga nyɛm wanaa nda diu diu wa, ma saaluŋ Sɔɔ nda puaa nduaa yaawa ihini a vilɛiya o Pembei Kibuaa.
9 Okoŋ ma kialu ndu bolleŋ, nduyɛ ma chɔuviaa nyɛm ndɔŋ chɔuwoŋ. Okoŋ kɔɔli, ma viam waŋnda o lɛŋnde Filitiaa leŋ niŋ le ma kuɛ a yooŋgoo hoo o chiɛila* mɛlɛkaa ndaa niŋ, nduyɛ ma kɔ dimul wanaa tuaa kpou a ndi okɔɔ.
10 Okoŋ, ma kɛsi nyɛm ndɔŋ chɔuwoŋ o chiɛi Asitɔluɛɛ wo niŋ, nduyɛ ma baŋ dialuŋ ndɔŋ o chiɛi Bɛti-saŋ ndo.
11 Mɛɛ waŋnda Chabɛsi-kiliaadi tuei nyɛ waŋnda Filitiaa tosa a Sɔɔ wo,
12 mi puaa chɔuwa kpou chaŋ ichɔl koŋ, ma lɔl kɔlaŋ pii. Ma kɔ chua dialuŋ Sɔɔ woŋ a dialuŋ puaa nduaa wa ŋ baŋaa o chiɛi Bɛti-saŋ ndo woŋ, ma miiŋgu Chabɛsi a muŋ ma kɔ lom.
13 Okoŋ kɔɔli, ma chua paala ndalaŋ ma kɔ kumbu laŋ o yɔm tamalikiiyo bɛŋgu Chabɛsi. Nduyɛ ma bii sumndo le palɛi i ŋɔmmɛu.
