Saamiɛɛ Tasoo 4:1-22
4 Mi Saamiɛɛ hiau lachi a waŋnda Isɔluɛi kpou yooŋgu Mɛlɛkaa dimullo.
Okoŋ, mi waŋnda Isɔluɛi kua le Filitiaŋnda chiŋalaŋndo a sɔŋgɔɔ. Ma kila dɔɔŋgɔɔ Ɛbɛnisa ikɛi, nduyɛ mi Filitiaŋnda kila dɔɔŋgɔɔ Afɛki.
2 Mi Filitiaŋnda bɛɛndiaŋ, ma kɔ del Isɔluɛiya choo a sɔŋgɔɔ. Kɛ mi chɔuwo tuulu ketu ketu, nduyɛ mi Filitiaŋnda yam Isɔluɛiya. Ma diu puaa chɔuwaa Isɔluɛiya 4,000 o chɔu koŋ niŋ.
3 Mɛɛ puaa chɔuwa miiŋgu o dɔɔŋgɔɔ, mi waŋ banaa Isɔluɛi dimi aa: “Le yɛɛnɛ Chɛhowa chɛllɛ hau mi Filitiaŋnda yam naa? La ŋ kɔ chuaŋnuŋ kɔfu kpema Chɛhowa wo Silɔɔ. Te ŋ hiŋ a ndu pɛ, o nɔla mbo piŋi naa yaamɔɔwaa naa o ba.”
4 Okoŋ, mi waŋnda viam puaa Silɔɔ, ma kɔ chua kɔfu kpema Chɛhowa wo, Mɛlɛka puaa chɔuwa, o cho ichali o kpeŋgbei* ndɔ leMasaa choo chɛlɔbiiya choo wo.* Mɛɛ nda wa kɔlaŋ a kɔfu kpema Mɛlɛka tonyaa, Ilai puaa nduaa ŋiɔɔŋ nda, Hɔfini nda Finihaasi bɛɛ wa a nda latulu.
5 Dimioo nuaa ma huŋ a kɔfu kpema Chɛhowa wo o dɔɔŋgɔɔ niŋ, mi Isɔluɛiya kpou deŋi choo choo kpeleŋ. Okoŋ mi lɛŋndeŋ le nyiiya.
6 Mɛɛ Filitiaŋnda tuei nda bɔɔluu bɛndu koŋ, ma nyuna aa: “Bɔɔluu bɛndu yɛɛ waŋnda cho yɛ hoo o dɔɔŋgɔ Hibuluiya niŋ?” O mɛɛlulaŋ kpɔŋ, ma sina maa Isɔluɛiya hiŋ a kɔfu kpema Chɛhowa wo o dɔɔŋgɔ ndaa niŋ.
7 Mi siooŋnde bii Filitiaŋnda, okoŋ ma dimi aa: “Mɛlɛka hiŋ o dɔɔŋgɔ ndaa niŋ.” Ma chɔɔlu dimi aa: “Hei wɔu bɔɔ le naa, kanifuule le pilɛ bɛɛ suɛi waa nuaa yɔŋnuŋ ndɔ le!
8 Hei wɔu bɔɔ le naa! O nɛɛnɛ cho yɛ naa piŋi Mɛlɛka kpaaya bɛndoo hoo o ba? Mɛlɛkaa hoo tusi waŋnda Ichipi nyɛpalaa bɛndoo choo ni, nduyɛ mbo diu diu nda o pollo niŋ.
9 Nya waŋnda Filitiaa, la nɔ kɔl simulaa maa ŋwaŋ piaandu, yɔŋii nya wa Hibuluiya o ba bɛŋgu, mɛɛ nda wa nya o ba bɛŋgu yɛ. La sɔŋga maa ŋwaŋ piaandu!”
10 Okoŋ, mi Filitiaŋnda kɔ sɔŋga a Isɔluɛiya, ma yam nda, nduyɛ ma diu nda diuwo pila. Mi wana o wana nyaanuŋ o tɛndii ndɔɔ. Nduyɛ puaa chɔuwaa Isɔluɛiya 30,000 nda dii ni.
11 Okoŋ kɔɔli, ma bii Kɔfu Mɛlɛkaa, nduyɛ ma dii Hofini nda Finihaasi, puaa ŋiɔɔŋaa Ilai ya.
12 O paale leŋ choo, mi po pilɛ fulaa o yuŋgu Bɛŋjamiŋ ndo choo mal a kiltaŋ naa nda wa chɔuwo wa, mbo kua Silɔɔ. Nyɛlaŋ la wa ndu la sɛɛsiɛi lekɔɔ, nduyɛ chundoo wa ndu o lebol.
13 Mɛɛ poo fuuluu, Ilai wa ichali o kpeŋgbeiyo* choo o nɛiyo ikɛi, mbo wa tofaa. Kanifuule, kɔllo wa ndu fulaa le Kɔfu Mɛlɛka tonyaa. Mi poo hel chiee mbo kɔ dimul waŋnda yooŋgoo. Okoŋ, mi chioo kpou kandu chaŋndo.
14 Mɛɛ Ilai tuei waŋnda bɔɔluuwo, mbo nyuna aa: “Wooluŋ wooluŋ bɛndu yɛɛ suaa yɛ hoo?” Mi po hiŋ a yooŋgoo wo kua chɔ chɔ, mbo dounuŋ Ilai kona.
15 (A teleŋ koŋ, Ilai wa niŋ wɔsilaŋ 98, nduyɛ ndoo chi lɛ le.)
16 Okoŋ mbo dimul Ilai aa: “Ya laŋga fula o fondaŋ chɔuwo ni! Nduyɛ, nyaanɔŋndo ya nyaanuŋ ni.” Mi Ilai nyuna ndu aa: “Po nuu, yɛɛnɛ yɔŋnuŋ yɛ?”
17 Okoŋ, mi po hiŋ a yooŋgoo wo dimul ndu aa: “Isɔluɛiya nyaanuŋ Filitiaŋnda, kanifuule a yem nda o chɔuwo, nduyɛ ma diu wanaa bɔɔbɔɔ. Puaa num aa ŋiɔɔŋnda, Hɔfini nda Finihaasi bɛɛ vi. Nduyɛ, Filitiaŋnda bii Kɔfu Mɛlɛka tonyaa.”
18 Mɛɛ Ilai tuei maa a bii Kɔfu Mɛlɛka tonyaa, mbo del amakɔɔ o kpeŋgbei o wa ichali choo o dio kpakioo ikɛiyo, mi kɛsei yom ndu mbo wu. O wa niŋ o yuuwɛi kudɛɛ, nduyɛ chelullo pila ndoo chelul ni. Le wɔsilaŋ 40 o wa wana kialaa ŋyamaa o Isɔluɛi niŋ.
19 A teleŋ koŋ, lanɔɔ Finihaasi po Ilai yo wa a folioo,* nduyɛ boondii nduɛi vialɛi ndii fuuluu niŋ. Mɛɛ chuaa hoo tuei yooŋgoo maa a bii Kɔfu Kpema Mɛlɛka tonyaa, nduyɛ maa finyaa pɔnɔ ndɔ a pɔnɔ ndɔ bɛɛ vi, o le pilɛ niŋ kpe mi pulii vialɛi kandu ndu nɛiyo, okoŋ mbo vialu.
20 Mɛɛ o wa piɔmndo, mi waŋ laanduaa wa ndu isisi ikɛiya dimul ndu aa: “Buulaŋ te, a velu poo.” Kɛ o mulul nda le, nduyɛ o hendu pɛŋ kɔllo o nyɛ nda wa ndu dimullo wo choo le.
21 Mbo ke poombɔ o velu wo diolaŋ aa Ikabɔɔ.* Mbo dimi aa: “Tɔɔ Isɔluɛiya ndaa nɔ wo kuɛŋnuŋ o lɛŋnde cheleŋ niŋ.” Le mɛɛ nda bii Kɔfu Mɛlɛka tonyaa, a nyɛ yɔŋnuŋ finyaa pɔnɔ ndɔ a pɔnɔ ndɔ wo yɛ o dimi diomndaŋ ndaŋ ni.
22 Mbo dimi aa: “Tɔɔ Isɔluɛiya ndaa nɔ wo kuɛŋnuŋ o lɛŋnde cheleŋ niŋ. Kanifuule, a bii Kɔfu Mɛlɛka tonyaa.”
Tɛɛsiaalaŋ
^ Ɔɔ “kpɛŋɛ.”
^ Ɔɔ naapum, “tɛɛŋ ndo.”
^ Ɔɔ “kpɛŋɔɔ.”
^ Ɔɔ “yollo.”
^ Koŋ sim ni, “Kuɛɛnɛ Tɔɔ Cho Yɛ?”
