Saamiɛɛ Tasoo 5:1-12
5 Mɛɛ Filitiaŋnda bii Kɔfu Mɛlɛka tonyaa, ma faŋa ndu Ɛbɛnisa ma kua a ndu Asidɔɔ.
2 Mi Filitiaŋnda chua Kɔfu Mɛlɛka tonyaa, ma kua a ndu o chiɛi* mɛlɛka nda nɔ diolaŋ aa Dakɔŋ ndo niŋ, ma kɛsi ndu ikɛi.
3 Mɛɛ waŋnda Asidɔɔ chɛŋ diimandɔɔ idiiyo puŋ, a komal Dakɔŋ del lɛŋ nduyɛ o wa o kuumbaŋ kpu Kɔfu Chɛhowa wo lachi. Okoŋ ma chua ndu, ma miŋgi ndu o fonda ndɔɔ.
4 Mɛɛ nda chɛŋ vɛlɛ diimandɔɔ pilɔɔ idiiyo puŋ, a komal vɛlɛ Dakɔŋ del lɛŋ nduyɛ o wa o kuumbaŋ kpu Kɔfu Chɛhowa wo lachi. Mi bolle ndɔleŋ a bala ndɔlaŋ la yomi, nduyɛ la wa o dioo bɛŋgu. Dialuŋ ndɔŋ wa maa suu woŋ kinɛi muŋ lo niŋ ni.*
5 Le saboo hoo, haaa huŋ bii a paale hauleŋ ndeŋ, wanaa soliaa lasalaa le Dakɔŋ a wanaa ndaa kua o chiɛi Dakɔŋ ndo niŋnda kpou, a nɛi lɛ o dio koŋ sondoo naa Dakɔŋ del o Asidɔɔ niŋnda le.
6 Mi Chɛhowa tusi waŋnda Asidɔɔ nyɛpalaa bɛndu bɛndoo choo, a wanaa ndaa kua o chiɛi Dakɔŋ ndo niŋnda kpou. Okoŋ kɔɔli, mbo tosa mi bondokpalaŋ la fula waŋnda Asidɔɔ a tandala balu ndu laŋ kpou.
7 Mɛɛ waŋnda Asidɔɔ che nyɛ wa yɔŋnɔŋndo wo, ma dimi aa: “O bɛnda mi Kɔfu Mɛlɛka Isɔluɛiya wa naa tɛɛŋ te. Kanifuule, o cho naa a mɛlɛka naa Dakɔŋ nyɛpalaa bɛndoo tusioo choo.”
8 Le hei, ma chuuŋgiaa waŋ banaa Filitiaŋnda kpou naapilɛ, ma nyuna nda aa: “Yɛɛnɛ naŋ tosa yɛ a Kɔfu Mɛlɛka Isɔluɛiya?” Ma muli aa: “La chua Kɔfu Mɛlɛka Isɔluɛiya mi la kuɛ a ndu Kaati.” Okoŋ, ma kua a Kɔfu Mɛlɛka Isɔluɛiya loŋ.
9 Mɛɛ nda kuɛ a ndu, mi Chɛhowa tusi waŋnda o chiee koŋ niŋ nyɛpalaa bɛndoo choo, nduyɛ mi siooŋii bɛnduei bii nda. Wanaa wa o chiee koŋ niŋnda kinɛi, chuaambɔ ni, bɛndu ni, mbo tosa mi bondokpalaŋ la fula nda.
10 Okoŋ kɔɔli, ma chua Kɔfu Mɛlɛka tonyaa, ma kua a ndu Ɛkulɔŋ. Kɛ dimioo nuaa a fuuluu a Kɔfu Mɛlɛka tonyaa Ɛkulɔŋ, mi waŋnda Ɛkulɔŋ kandu chaŋndo aa: “A chuu naa Kɔfu Mɛlɛka Isɔluɛiya le naa a wanaa naa kpou diuwo!”
11 Okoŋ, ma chuuŋgiaa waŋ banaa Filitiaŋnda kpou naapilɛ, ma dimul nda aa: “La faŋa Kɔfu Mɛlɛka Isɔluɛiya nanuŋ, mi la miŋgi ndu naa o wa wa, yɔŋii naa a yuŋgula naalaŋ kpou chuu wu.” Mi siooŋii piɔmnde bii waŋnda o chioo niŋ kpou. Nduyɛ, Mɛlɛka tonyaa wa nda nyɛpalaa bɛndoo tusioo choo.
12 Wanaa lo yoomu wa kinɛi, mi Mɛlɛka tosa mi bondokpalaŋ la fula nda. Nduyɛ waŋnda kpou o chioo niŋ wa chaŋndo le malaa, mi diomnda ndalaŋ la fuuluu choo choo di.
