Saamiɛɛ Tasoo 6:1-21
-
Filitiaŋnda miŋgi kɔfu kpemaa Isɔluɛi (1-21)
6 Kɔfu Chɛhowa wo wa o tanda Filitiaŋnda niŋ le paŋgoŋ ŋɔmmɛu.
2 Okoŋ kɔɔli, mi Filitiaŋnda veelu wanaa soliaa lasalaa a wanaa viamaa layawaa, ma nyuna nda aa: “Yɛɛnɛ naŋ tosa yɛ a Kɔfu Chɛhowa wo? La chɔm naa mɛɛ naŋ looku miŋ miŋgi ndu pila o fonda ndɔɔ yɛ.”
3 Ma muli aa: “Te la wa kɔfu kpema Chɛhowa wo, Mɛlɛka Isɔluɛiya miŋgioo pɛ, la nɔ mi la miŋgi ndu bala fondo le. La nɔ mi la soli salaa le mbo mal nya haki. Hei kinɛi cho tosa ni mi la seŋgu, nduyɛ mi la sina le sabu kpeekpei o cho wɔ nya nyɛpalaa tusioo choo wo.”
4 Okoŋ mi Filitiaŋnda nyuna aa: “Sala suu kuɛɛ kpeekpei naŋ nɔ yɛ miŋ soli o ndu lo le mbo mal naa haki?” Ma dimi aa: “Mɛɛ masaa Filitiaŋnda cho a ŋuɛɛnu yɛ, la yɔŋ bondokpala ŋkooliilaŋ la ŋuɛɛnu, a bɛlaa ŋkooliiya a ŋuɛɛnu, kanifuule kpundɛ pilɔɔ hoo kpe komal nya a masaa nyaa ni.
5 La toosiaa velaŋ bondokpala nyalaŋ, a velaŋ bɛlaa cho lɛŋndeŋ tɛɛmbuuwo wa, okoŋ mi la ke Mɛlɛka Isɔluɛiya bɛɛleŋ. Kɛlɛŋgaa dɔɔ mbo tosa mi dɛnɛ palaa cho nya, mɛlɛka nyaa, a lɛŋnde nyaleŋ choo wo pɔlul.
6 La vɛ kɔlta nyalaŋ kindioo mɛɛ waŋnda Ichipi a Felo kindi kɔlta ndalaŋ yɛ? Mɛɛ Mɛlɛka tusi nda nyɛpalaa bɛndoo choo, ma mal Isɔluɛiya, ma kuaŋnuŋ.
7 La toosiaa nyɛ nyaanaŋ suaa naŋndo, mi la bii nauwaa komsaa a ŋiɔɔŋ, a nda bee wɔ yɔm o ikɛsu le waa le wa. Okoŋ, mi la baa nauwaa ŋiɔɔŋnda o nyɛ nyaanaŋ suaa naŋndo, kɛ mi la faŋa nda chuauwaa ndaa ikɛi, mi la kuɛ a nda chiee.
8 Okoŋ kɔɔli, mi la chua Kɔfu Chɛhowa wo, mi la kɛsi ndu o nyɛ nyaanaŋ suaa naŋ koŋ ndo choo. Nduyɛ, nyɛm ŋkoolii nya toosiaa le salaa solioo o ndu lo mbo mal nya haki woŋ, la chua muŋ mi la wou muŋ o kɔfu cho muŋ ikɛi yo niŋ. Okoŋ mi la mal nauwa ma kuɛ.
9 Nduyɛ la wa nda tofaa. Te o yɔŋ pɛ ma kuɛ a ndu sanaa o nɛi kuɛ Bɛti-siɛmɛsi wo o tanda ndɔɔ niŋ, ŋ cho sina maa Mɛlɛka Isɔluɛiya tusi naa kpundɛ bɛndoo hoo choo ni. Kɛ te a kue loŋ te, mɛɛ ŋ cho sina maa o cho Mɛlɛka Isɔluɛiya le tosa mi kpundɔɔ hoo wa naa choo le. Mɛɛ nyɛ hiŋ le yɔŋnɔŋndo wo koni komal naa ni.”
10 Mi puaa haa tosa mɛɛ nda dimul nda yɛ. Ma bii nauwaa komsaa a ŋiɔɔŋ, okoŋ ma baa nda o nyɛ nyaanaŋ suaa naŋndo. Kɛ ma miŋgi chuauwaa ndaa chiee, ma wou nda o kpakioo niŋ.
11 Okoŋ, ma kɛsi Kɔfu Chɛhowa wo o nyɛ nyaanaŋ koŋ choo. Nduyɛ, kɔfu nda wou velaŋ bɛlaa ŋkooliiya a velaŋ bondokpala ndalaŋ ndo bɛɛ, ma kɛsi ndu lechoo.
12 Mi nauwa kua sakpo o nɛi kuɛ Bɛti-siɛmɛsi wo. A wa kɔlaŋ o nɛi bɛndoo choo a chaŋndo, nduyɛ a sei o ba kɛndɔɔ choo ɔɔ o ba miallo choo le. A boondii keŋ, masaa Filitiaŋnda wa nda kɔlaŋ kɔɔli haaa ma fuuluu o pɛŋgulaŋ Bɛti-siɛmɛsi.
13 Waŋnda Bɛti-siɛmɛsi wa witiiŋ ndaŋ kouwɔɔ o dɛŋgbɔɔ niŋ. Mɛɛ nda chua hɔlla ma cha Kɔfoo, ma duaunuŋ nyaale tau tau.
14 Nauwa lo kɔlaŋ a nyɛ nyaanaŋ suaa naŋndo haaa ma fuuluu o chiɛi Chɔɔsuaa ve niŋ, wana waa Bɛti-siɛmɛsi. Okoŋ ma sim o pou bɛndoo ikɛi. Nduyɛ yɔmii wa o nyɛ nyaanaŋ suaa naŋndo ve, ma kili kili ndi, okoŋ ma soli nauwaa kaŋ sala luamaa o Chɛhowa lo.
15 Okoŋ kɔɔli, mi Livaiya tusi Kɔfu Chɛhowa wo a kɔfu wa ndu ikɛi yo, o ndoo nɔ nyɛm nda toosiaa a kooliiyoŋ leniŋ ndo. Ma kɛsi laŋ o pou bɛndoo choo. O paale leŋ choo, mi puaa Bɛti-siɛmɛsi soli salala luamaa laŋ vɛlɛ a salala cheleŋ o Chɛhowa lo.
16 Mɛɛ masaa ŋuɛɛnuaa Filitiaŋnda che hei, ma miiŋguŋ Ɛkulɔŋ o paale leŋ choo.
17 Bondokpala ŋkoolii Filitiaŋnda yɔŋgu le salaa solioo o Chɛhowa lo laŋ la cho laŋ ni: Asidɔɔ o pilɛ, Kaasa o pilɛ, Asikɛlɔŋ o pilɛ, Kaati o pilɛ, a Ɛkulɔŋ o pilɛ.
18 Mɛɛ chieeŋ bɛnduŋ masaa ŋuɛɛnuaa Filitiaŋnda kpou wa yɛ, lende koni bɛlaa ŋkooliiya wa ni. Chieeŋ bɛnduŋ nda taŋgul a kpakila kala kalalaŋ ndoŋ vɛlɛ a sɔndɔkɔltaŋ bɛɛ.
Nduyɛ haaa a paale hauleŋ ndeŋ, pou bɛndu nda kɛsi Kɔfu Chɛhowa wo lechoo wo cho lesei. Pouwo hoo yɛ, o chiɛi Chɔɔsuaa ve niŋ o cho ni, wana waa Bɛti-siɛmɛsi.
19 Kɛ mi Mɛlɛka diu diu waŋnda Bɛti-siɛmɛsi, le mɛɛ nda tofa Kɔfu Chɛhowa wo yɛ. Mbo diu diu waŋnda 50,070* nda tɛɛŋ, okoŋ mi waŋnda kandu mɔnɛi biyɔɔ le mɛɛ Chɛhowa diu nda diu bɛndoo yɛ.
20 Mi waŋnda Bɛti-siɛmɛsi nyuna aa: “O nɛɛnɛ nɔla yɛ mbo sim Chɛhowa, Mɛlɛka diandaa hoo lachi? Nduyɛ, o nɛɛ waa lo o cho yɛ lakɔ te o mal naa pɛ?”
21 Okoŋ, ma viam waŋnda le ma kɔ dimul waŋnda Kiliaati-chiaaluim aa: “Filitiaŋnda miŋgi Kɔfu Chɛhowa wo nanuŋ. La huŋ chua mi la kuɛ a ndu.”
Tɛɛsiaalaŋ
^ Hibuluiye, “puaa 70, puaa 50,000.”
