Saamiɛɛ Tasoo 7:1-17
7 Okoŋ, mi waŋnda Kiliaati-chiaaluim kɔ chua Kɔfu Chɛhowa wo, ma kua a ndu pembei choo o chiɛi Abinadabi wo. Nduyɛ, ma dimul Ɛlieesa po ndɔ le mbo wa Kɔfu Chɛhowa wo hɔlteŋ.
2 Wɔsilaŋ 20 la hiou ni chɔŋ a paale nda hiŋ a Kɔfoo Kiliaati-chiaaluim ndeŋ. Nduyɛ mi waŋnda o Isɔluɛi niŋ kpou muliŋ o Chɛhowa lo le malaa.
3 Okoŋ mi Saamiɛɛ dimul Isɔluɛiya kpou aa: “Te a kɔlta nyalaŋ kpou nya cho miiŋgoo Chɛhowa o ibuŋ ni, mɛɛ la soli mɛlɛkaa cheleŋ nya sooluu wa a suŋgbuma Asitɔluɛɛ waŋ nya tɛɛŋ, okoŋ mi la muli kɔlta nyalaŋ o Chɛhowa lo, nduyɛ mi la piɛi ndu ndupilɛ kpe. Koŋ cho tosa mbo piŋi nya Filitiaŋnda o ba.”
4 Okoŋ, mi Isɔluɛiya tɛɛmbuu suŋgbuma Baal laŋ a suŋgbuma Asitɔluɛɛ waŋ, ma wa niŋ Chɛhowa piɛiyo ndupilɛ kpe.
5 Mi Saamiɛɛ dimi aa: “La chuuŋgiaa Isɔluɛiya kpou naapilɛ Misipa, okoŋ mi piɛi Chɛhowa le nya.”
6 Mi nda kpou chuuŋgiaŋ Misipa, ma kuandu mɛŋndaŋ, ma chuiŋi maŋ Chɛhowa lachi, nduyɛ ma bii sumndo o paale leŋ choo. Ma dimi aa: “Ŋ tosa hakioo a Chɛhowa.” Okoŋ, mi Saamiɛɛ kandu waŋnda Isɔluɛi yamaŋ kiolɔɔ tɛɛŋ o Misipa niŋ.
7 Mɛɛ Filitiaŋnda tuei maa Isɔluɛiya chuuŋgiaŋ naapilɛ Misipa, mi waŋ banaa Filitiaŋnda kua le sɔŋgɔɔ a Isɔluɛiya. Mɛɛ Isɔluɛiya tuei hei, mi siooŋnde bii nda.
8 Ma dimul Saamiɛɛ aa: “Yandii, hiou lachi a Chɛhowa Mɛlɛka naa nyɔɔloo le mbo mala naa, nduyɛ mbo piŋi naa Filitiaŋnda o ba.”
9 Okoŋ mi Saamiɛɛ bii saa fɔŋndɔɔ, mbo soli ndu sala luamaa o Chɛhowa lo. Mi Saamiɛɛ piɛi o Chɛhowa lo le mbo mala Isɔluɛiya, nduyɛ mi Chɛhowa muli piɛile ndɔleŋ.
10 Mɛɛ Saamiɛɛ wa sala koŋ solioo, mi Filitiaŋnda sɔɔŋguu Isɔluɛiya ikɛi kpɛɛluŋ le sɔŋgɔɔ a nda. O paale leŋ choo, mi Chɛhowa tosa mi taŋndaŋ ma deŋi deŋioo pila. Nduyɛ mbo tosa mi kɔltaŋ la laasiaŋ Filitiaŋnda, okoŋ mi Isɔluɛiya yam nda.
11 Okoŋ kɔɔli, mi puaa Isɔluɛi chaŋ Misipa ma tisa Filitiaŋnda kɔɔli. A lo kɔlaŋ a nda diu diuwo haaa Bɛti-kaa ba tou wo.
12 Okoŋ mi Saamiɛɛ chua pouwo, mbo kɛsi ndu Misipa a Chɛsiaana tɛɛŋ, mbo ke fondaŋ koŋ diolaŋ aa Ɛbɛnisa. Mbo dimi aa: “Haaa huŋ bii a hau, Chɛhowa cho wɔ naa malaa.”
13 Mi Isɔluɛiya yam Filitiaŋnda, nduyɛ a miiŋgu lɛ o tanda Isɔluɛiya niŋ te. Palɛi Saamiɛɛ wa yoomu ve kinɛi, Chɛhowa chɛllɛ mi Filitiaŋnda huŋ del Isɔluɛi choo a sɔŋgɔɔ le.
14 Chieeŋ bɛnduŋ Filitiaŋnda ndaa bii Isɔluɛiya o ba chɔŋ Ɛkulɔŋ kɔ Kaati woŋ, ma miŋgi Isɔluɛiya muŋ o ba. Nduyɛ, mi Isɔluɛiya miŋgi tanda ndaa biyɔɔ Filitiaŋnda o ba.
Mi kɔl nyuloo miiŋgu vɛlɛ Isɔluɛiya nda Amɔluaitiiya tɛɛŋ.
15 A teleŋ Saamiɛɛ wa yoomu wo kpou, o wa yamaŋ kiolɔɔ o Isɔluɛi niŋ.
16 Iwɔsi o iwɔsi, mi ndoo kuɛ Bɛtɛl, Kikaa, a Misipa. Nduyɛ mi ndoo kelu waŋnda yamaŋ tɛɛŋ o fondaŋnda laŋ kpou.
17 Kɛ te ndoo chii pɛ balɔɔ o fondaŋnda laŋ, o miiŋguŋ Luama, kanifuule loŋ chiɛi ndɔɔ wa ni, nduyɛ loŋ bɛɛ mi ndoo kelu Isɔluɛiya yamaŋ tɛɛŋ. Mbo taŋgul bandu luamaa lasalaa loŋ le Chɛhowa.
