Saamiɛɛ Tasoo 8:1-22
8 Mɛɛ Saamiɛɛ yuuwa, mbo yulu puaa nduaa iso le ma wa wanaa kialaa ŋyamaa le Isɔluɛi.
2 Po ndɔ tasoo ndoo nɔ diolaŋ ni aa Chowɛɛ, nduyɛ o diiŋ ndɔɔ wa Abaicha ni. Wanaa kialaa ŋyamaa nda wa o Biaa-siɛba niŋ ni.
3 Kɛ puaa nduaa tul tamasi ndɔɔ kɔɔli le. Ma muliŋ nyɔɔŋ nuuviaa o kafalaŋ choo, luɛiyɔɔla niŋndaŋ biyɔɔ, a yamaŋ lakafaŋ kiolɔɔ.
4 A teleŋ pilɛ, mi waŋ banaa kpou Isɔluɛi chuuŋgiaŋ naapilɛ, ma kua naa Saamiɛɛ chua Luama.
5 Ma dimul ndu aa: “Fallo, ŋ cho chɔɔ maa a cho niŋ o yuuwɛi, nduyɛ puaa numnda cho tamasi numndo tolɔɔ kɔɔli le. Lelaŋ, hɛlul naa waŋndo mbo wa naa choo masa maa lɛŋii tuɛi kpou.”
6 Kɛ mi suɛi hei tɛɛmbuu Saamiɛɛ kɔllo tau mɛɛ nda dimul ndu aa: “Ke naa waŋndo mbo wa naa choo masa.” Okoŋ mi Saamiɛɛ piɛi o Chɛhowa lo.
7 Mi Chɛhowa dimul Saamiɛɛ aa: “Nyɛ o nyɛ waŋnda dimul num pɛ, yaŋ nda nilaŋ, kanifuule o cho num te nda kɛɛ le, kɛ ya nda kɛɛ ni le mi wa nda choo masa.
8 Nyɛ nda cho hoo tosaa wo, ndu koni nda wa tosaa ni chɔŋ a paale ya soli nda Ichipi leŋ, haaa huŋ bii a paale hauleŋ ndeŋ. Ma kɛɛ ya nduyɛ ma muliŋ mɛlɛkaa cheleŋnda sooluuwo. Nyɛ pilɛ koŋ kpe nda cho num tosallo ni.
9 Lelaŋ, yaŋ nda nilaŋ. Kɛ sila nda o kala kala, nduyɛ ma chɔm nda nyɛ wana cho nda wa choo masa wo nɔ niŋ dioo le tosaa wo.”
10 Nyɛ o nyɛ Chɛhowa dimul Saamiɛɛ, mbo dimul wanaa wa ndu nyunaa le masaa wa.
11 Mbo dimul nda aa: “Nyɛ wana cho nya wa choo masa wo nɔ niŋ dioo le tosaa wo cho hoo ni: O cho hunɔɔ puaa nyaa chua mbo wou nda o nyɛm ndɔŋ nyaanaŋ suaa naŋndoŋ niŋ, nduyɛ mbo siiŋguu nda wanaa kua a suaa nduaa wa. Apum cho wa nyɛm nyaanaŋ suaa nduaa naŋndoŋ nyaanɔŋndo lachi.
12 O cho hunɔɔ masaa hɛli le ndupila, ma wa waŋnda waalaŋ choo masa, nduyɛ ma wa waŋnda bele ŋuɛɛnulaŋ choo masa. Apum cho wa waa le ndu, mi haa kuau le ndu, nduyɛ mi apum toosiaa nyɛm chɔuwoŋ le ndu, a nyɛm ndɔŋ nyaanaŋ suaa naŋndoŋ.
13 O cho chuauwaa nyaa laanduaa chua, mbo siiŋguu nda wanaa toosiaa chuɛima chuŋ kɛndiaŋ nda, wanaa yawaa, a wanaa toosiaa beediiyo* wa.
14 O cho hunɔɔ yondola nyala kɛndɛ kɛndɛlaŋ poondiaa, mbo bii kpelela nyala makilepiilaŋ, a yɔmii nyɛi ma ɔlifiive, okoŋ mbo ke buɛiyaa nduaa.
15 Tɔlɔɔla nya kuau o chiɔɔŋ nyaŋ niŋ a o kpelela makilepiilaŋ niŋndaŋ, o cho hunɔɔ o tɔ ndɔɔ faŋa lechoo mbo ke laŋgbaa nduaa kalla a buɛiyaa nduaa.
16 O cho hunɔɔ buɛiyaa nyaa piaanduaa a buɛiyaa nyaa laanduaa, chɔluaa nyaa kɛndɛ kɛndiaa, a sofɛliaa nyaa chua, mbo soliŋ nda kpeku le wali ndɔɔ tosaa.
17 O cho hunɔɔ o tɔ ndɔɔ chua o chɔluaa nyaa choo, nduyɛ mi la simnuŋ buɛiyaa nduaa.
18 Paale cho fuuluu mi la wa koŋullo le masa nyapila hɛli wo, kɛ Chɛhowa yeŋ nya niŋ lani le.”
19 A koŋ kpou, mi waŋnda kɛɛ le nilaŋ yaŋɔɔ o nyɛ Saamiɛɛ wa nda dimullo wo, okoŋ ma dimi aa: “O wa bɛɛ lende, ŋ chii kɛɛsiaa le mi waŋndo wa naa choo masa.
20 Hei cho tosa miŋ wa maa lɛŋii cheleŋnde kpou. Nduyɛ, masa naa cho naa wa yamaŋ kilullo, mbo wa simlachinɔ naa, nduyɛ mbo chɔulaba a yaamɔɔwaa naa.”
21 Mɛɛ Saamiɛɛ chii nyɛ waŋnda dimul ndu wo tueiyɔɔ kpou, mbo dimul Chɛhowa nyɛ nda dimul ndu wo.
22 Mi Chɛhowa dimul Saamiɛɛ aa: “Tosa nyɛ nda dimul num ndo. Hɛli waŋndo le mbo wa nda choo masa.” Okoŋ mi Saamiɛɛ dimul puaa Isɔluɛi aa: “Wana o wana miiŋgu o ndu lo chiee.”
Tɛɛsiaalaŋ
^ Ɔɔ “buloo.”
