Saamiɛɛ Tasoo 9:1-27
-
Saamiɛɛ kuɛ o Sɔɔ lo (1-27)
9 Po pilɛ wa diolaŋ aa Kisi, fulaa o yuŋgu Bɛŋjamiŋ ndo choo. Kisi yɛ, finya ndɔ wa Abiɛɛ ni. Abiɛɛ, finya ndɔ wa Sɛlɔɔ ni. Sɛlɔɔ, finya ndɔ wa Bikɔluati ni. Bikɔluati, finya ndɔ wa Afaaya ni, fulaa o yuŋgu Bɛŋjamiŋ ndo choo. Nduyɛ wana sulaa pila o wa ni.
2 Kisi ndoo nɔ poo diolaŋ aa Sɔɔ. O wa feleŋgɔnɔ, nduyɛ naŋɔɔ pila ndoo naŋ ni. O Isɔluɛiya tɛɛŋ kpou, wana o wana ndoo hiu ndu naŋɔɔ le. O wa o vilɛi kpoloŋ nduyɛ ndoo hiou wana o wana bandei.
3 Paale pilɛ, mɛɛ sofɛliaa* Kisi wa luusiaŋ, mbo dimul Sɔɔ po ndɔ aa: “Yandii, chua buɛiyo o pilɛ mi la kɔ nuuviaa sofɛliaa luusiaŋ nda.”
4 Ma keeku o fondaŋ ŋpemboo Ifiluem a o tanda Sialiisiaa wo niŋ, kɛ a seeluŋ nda le. Ma balu o tanda Siaalim ndo niŋ kpou, kɛ a chi sofɛliaa loŋ te. Ma balu vɛlɛ o tanda Bɛŋjamiŋ ndo niŋ kpou, kɛ a seeluŋ nda le.
5 Mɛɛ nda fuuluu o tanda Sufi wo niŋ, mi Sɔɔ dimul buɛi ndɔ nda kuɛ wo aa: “Ŋ miiŋguŋ, yɔŋii finya nuu mal buulaŋndo le sofɛliaa, mbo muliŋ buulaŋndo le naa.”
6 Kɛ mi buɛiyo dimul ndu aa: “Wana suaa le Mɛlɛka wo cho o chioo hoo niŋ. Nduyɛ bɛɛleŋ pila waŋnda nɔ le ndu ni. Nyɛ o nyɛ o dimi pɛ, mɛɛ mbo yɔŋnuŋ. Ŋ kɔ loŋ suŋ suŋ, naapum o cho naa chɔm naa naŋ saaluŋ sofɛliaa wa.”
7 Okoŋ mi Sɔɔ nyuna buɛi ndɔɔ aa: “Te ŋ kuɛ pɛ, yɛɛnɛ naŋ cho yɛ ndu ke? Ŋ nɔ beedii* o bɔlɔla naalaŋ niŋ te. Ŋ nɔ nyɛ o nyɛ o ba maa ke, le wana Mɛlɛka tonyaa le. Yɛɛnɛ naŋ nɔ yɛ?”
8 Mi buɛiyo mulul vɛlɛ Sɔɔ aa: “I nɔ kanii humbuii* pɔmbɔ o ba. I cho ndi wana Mɛlɛka tonyaa ke, okoŋ mbo chɔm naa fonda naŋ kua miŋ saaluŋ sofɛliaa wo.”
9 (O Isɔluɛi niŋ sindɛ, te waŋndo ndoo yeema pɛ Mɛlɛka nyunaa le nɛi chɔmaa, nuaa ndoo dimi ni aa: “La ŋ kɔŋnuŋ o wana cha wo lo.” Kanifuule, wana suaa le Mɛlɛka wo ndaa veelu ni aa wana cha wo.)
10 Okoŋ mi Sɔɔ dimul buɛi ndɔɔ aa: “Nyɛ ŋ dimi wo cho tonya. Ŋ kɔ.” Ma kua o chiee wana suaa le Mɛlɛka tonyaa wo wa wo.
11 Mɛɛ nda wa helɔɔ chiee, ma bɔŋaŋ a chuaa laanduaa wa kɔlaŋ mɛŋndaŋ kɔndɔɔ wa. Okoŋ ma nyuna nda aa: “Baa wana cha wo cho pa o chioo hoo niŋ?”
12 Ma muli aa: “Ei, o cho naŋ. Mi cheŋ ndu nya kɔlaŋ lachi. La keleŋa, kanifuule o hiŋ hau chiee naŋ, le mɛɛ waŋnda cho hau salaa solioo o fondaŋ filioŋndo yɛ.
13 Te la luɛi dɔɔ pɛ chiee, la cho ndu saalɔŋ tuupa mbo kuɛ o fondaŋ filioŋndo le nyɛdiaa dioo. Te o kue le, waŋnda di nyɛdiaa le, kanifuule ndu nɔ ni mbo piɛi o salaa choo. Te o chii pɛ piɛileŋ, wanaa nda veelu wa de niko nyɛdiaa. Lelaŋ, la kɔ niko sakpo. La cho ndu komal.”
14 Okoŋ ma hel chiee. Mɛɛ nda wa kɔlaŋ o chioo tɛɛŋ, ma cha Saamiɛɛ hunɔɔ nda lachi, le ma kuɛ nda ndaa o fondaŋ filioŋndo.
15 Tuupa mi Sɔɔ huŋ, Chɛhowa ndoo chii niŋ Saamiɛɛ dimul* aa:
16 “Siɔdii a teleŋ waa nuaa, I cho waŋndo viomɔɔ naa num chua fulaa o yuŋgu Bɛŋjamiŋ ndo choo. A nɔ ma pɔya ndu mbo wa simlachinɔɔ le wanaa niaa, Isɔluɛiya. Ndu cho wanaa niaa piŋi Filiitiaŋnda o ba ni, kanifuule I cho chɔɔ nyɛkindilaa wanaa niaa cho niŋndo, nduyɛ mi wa tueiyɔɔ chaŋnda nda cho laŋ.”
17 Mɛɛ Saamiɛɛ che Sɔɔ, mi Chɛhowa dimul ndu aa: “A poo hoo okɔɔ ya dimul num ni maa, ‘Ndu cho wa masaa wanaa niaa choo ni.’”
18 Okoŋ mi Sɔɔ sɔɔŋguu Saamiɛɛ ikɛi o dio kpakioo, mbo dimul ndu aa: “Yandii chɔm ya chiɛi wana cha wo.”
19 Mi Saamiɛɛ dimul Sɔɔ aa: “Ya cho wana cha wo ni. Sim ya lachi miŋ kuɛ o fondaŋ filioŋndo, okoŋ miŋ kɔ dioŋnuŋ hau nyɛdiaa latulu. Te paaleŋ le sɛ pɛ, I chɔm num nyɛ o nyɛ ŋ nɔ ma sina, okoŋ I mal num a kuɛŋnuŋ.
20 Sofɛliaa ndaa luusiaŋ o cho niŋ hau le palɛi i yaa wa, la buulaŋ a nda okɔɔ le, kanifuule a saaluŋ nda. Nyɛm sɔviɔŋ o Isɔluɛi niŋ kpou, le nɛɛnɛ ŋ cho yɛ? O cho le num a yuŋgu finya numndo kpou le?”
21 Okoŋ mi Sɔɔ dimi aa: “O kaale Bɛŋjamiŋ ndeŋ choo ya fula ni, kaale hiou dɔɔnaŋ o kaalaŋ Isɔluɛi tɛɛŋ kpou leŋ. Nduyɛ, yuŋgula cho o kaale Bɛŋjamiŋ ndeŋ niŋndaŋ kinɛi, yuŋgu nuu cho o sɔvɛ le. Baa ya ŋ dimul suɛi waa lende ni?”
22 Okoŋ mi Saamiɛɛ chua Sɔɔ a buɛi ndɔɔ, mbo kua a nda o fondaŋ diaa nyɛdiaa, nduyɛ mbo ke nda fondaŋ kɛndɛ kɛndɔɔ wanaa wa loŋ nda lachi. Puaa wa loŋ nda ndaa wa le ŋwaŋ 30.
23 Mi Saamiɛɛ dimul wana yawaa aa: “Huŋ niko a visiŋ ya ke num le kɛsioo woŋ.”
24 Okoŋ mi wana yawaa chua lɔloo a visii wa lechoo ve, mbo kɛsi Sɔɔ lachi. Mi Saamiɛɛ dimul ndu aa: “Nyɛ naŋ kɛsul numndo cho koŋ ni. Dio, kanifuule num naŋ kɛsul ni le ma de o chuuŋgiaŋndo hoo choo. Nduyɛ, yaa dimul nda niŋ maa I nɔ mialla.” Okoŋ, mi Sɔɔ nda Saamiɛɛ dia nyɛdiaa o paale leŋ choo.
25 Okoŋ kɔɔli, ma tual o fondaŋ filioŋndo, ma kua chiee. Nduyɛ, mi Saamiɛɛ nda Sɔɔ hiau lachi a baltaŋ dɔwɔɔ o chiɛiyo tullo.
26 Ma pena chɔnɔŋ a paale siaa leŋ, okoŋ mi Saamiɛɛ veelu Sɔɔ naa o wa o chiɛiyo tullo wa. Mbo dimul ndu aa: “La bɛɛndiaŋ, mi liila nya nyɛɛmbɔ.” Mi Sɔɔ bɛɛndiaŋ, ma fula o bɛɛ nda Saamiɛɛ.
27 Mɛɛ nda mal chioo ma wa pembei tolɔɔ, mi Saamiɛɛ dimul Sɔɔ aa: “Dimul buɛi numndo le mbo kuɛ pɔɔ lachi. Kɛ num sim ndɔ nanuŋ, le mi dimul num yooŋgu ya sɔla Mɛlɛka o ba wo.” Okoŋ, mi buɛiyo kua pɔɔ lachi.
Tɛɛsiaalaŋ
^ Hibuluiye, “sofɛliaa laanduaa.”
^ Ɔɔ “bulu.”
^ Hibuluiye, Tofa Tɛɛsiaa.
^ Hibuluiye, “nileŋ buli.”
