Tɛsaloniaŋ Tasoo 1:1-10
1 Ya Pɔɔl, Sivanɔɔ* a Timoti cho nya yauwo hoo poonyiallo ni. Nya cho o kundaa niŋ Tɛsalonaika, mi la wa o diompilɔɔ niŋ a Mɛlɛka Finyaa, a Masanɔɔ Chiisu Kiliti wa:
Maa Mɛlɛka tosal nya kɛndɛi nduɛi bɛnduei, nduyɛ mbo ke nya kɔl nyuloo fɔ!
2 Teleŋ o teleŋ ŋ cho Mɛlɛka balikaa mello o piɛileŋ niŋ le nya.
3 Ŋ cho loonɔŋndo lɔɔlɔɔ a wali kɛndɛ nya cho tosaa wo. La cho ndu tosaa o kaalaa niŋ Mɛlɛka Finya naa o hɔl, nduyɛ mi la wa simultaŋ biuwɔŋndo le tiindaŋ nya nɔ o Masanɔ naa Chiisu Kiliti niŋndo.
4 Puaapiliaa naa, ŋ sina maa Mɛlɛka kaala nya, nduyɛ mbo hɛli nya.
5 Kanifuule, yooŋgu kɛndɛ naŋ dimul nya wo, o cho ko a sondo le naŋ dimul nya ndu le, kɛ miŋ dimi ndu a mala nyina diandaa. Ŋ laalaŋ kɛsɛ maa yooŋgu naŋ dimul nya wo cho tonya. Nduyɛ mbo luei nya yoomuaŋ tau. Boondii naŋ wa nya tɛɛŋnde, nyapila sina mɛɛ kaala naalaŋ la wa yɛ. Nduyɛ le tɔnɔ nyaa naŋ wa lende ni.
6 Mi la tual tamasi naa a tamasi Masanɔɔ kɔɔli. A nyɛpalaa wa nya choo wo kpou, mi la chɛl yooŋgu Mɛlɛkaa a nyaale fula nyina diandaa o ba wo.
7 Okoŋ, mi la kɛsi tamasioo le wanaa laalaŋnda o Masidooniaa niŋ a Akeya kpou.
8 O fulawɔ o yooŋgu nya dimi a Chɛhowa* okɔɔ o Masidooniaa a Akeya niŋndo kɔɔli, waŋnda ba o ba fee cho vɛlɛ tɔɔlaŋ tueiyɔɔ a laalaŋ nya nɔ o Mɛlɛka niŋndo okɔɔ. Nduyɛ ŋ nɔ lɛ miŋ dimi nyɛ o nyɛ cheleŋ te.
9 Kanifuule, ndapila cho konaa dɔɔnɔŋndo a teleŋ tase naŋ komal nya, mi la mal piɔmnda sooluuwo, okoŋ mi la simnuŋ chiaa le Mɛlɛka tonya cho yoomu wo.
10 Nduyɛ mi la wa chumndo le teleŋ Po ndɔ o miŋgi yoomu wo fula niŋ choo choo mbo hiŋ ndo. Ndu cho yɛ Chiisu ni. Ndu cho naa hunɔɔ baŋa ni a boondii tumbe Mɛlɛkaa.
