Tɛsaloniaŋ Tasoo 2:1-20
2 Puaapiliaa, nyapila sina kɛsɛ maa o cho fondo fuu le naŋ kuɛ o nya lo le.
2 A mɛɛ nya sina yɛ, miŋ sɔla saŋgaa tau Filipai a nyɛpalaa nda tusi naa choo wo. Kɛ a saŋga bɛndu wa naa koŋ choo wo kpou, mi Mɛlɛka ke naa kɔl simulaa le nya yooŋgu kɛndɔɔ dimullo.
3 Nyɛ naŋ dimul nya wo, ŋ hol lachoo, ɔɔ miŋ dimul nya ndu a yiyaŋ wɔɔŋ te. Nduyɛ o cho le nya hui le.
4 Mɛlɛka pila chɛl naa ni maa ŋ bɛnda le yooŋgu kɛndɔɔ hoo dimioo. Lelaŋ, o cho le wanachiee kɔl nɛŋi le naŋ dimi ndu le, kɛ le Mɛlɛka, o sina yiyaŋnda naalaŋ ndo.
5 Nyapila sina maa le pilɛ bɛɛ ŋ dimul nya sɔɔŋ sondo yeelɛi le. Ŋ viŋ vɛlɛ wanaa suu naŋ cho wa, ɔɔ miŋ luɛi lehɔl o nyɛm nyaŋ te. Mɛlɛka cho lesei!
6 Nduyɛ, ŋ cho wallo hoo tosa le mi waŋnda chandu naa le, o wa nya, ɔɔ wanaa cheleŋ. Le mɛɛ naŋ cho kiilaa Kiliti wa yɛ, naŋ tiuba miŋ siiluu nya kalaŋ naa.
7 Kɛ a koŋ kpou, miŋ bii nya mɛɛ komsaa bii nuaa chuauwaa nduaa yɛ.
8 Lelaŋ, le mɛɛ naŋ kaala nya tau yɛ, miŋ naŋ kɔl le nya yooŋgu kɛndɛ Mɛlɛkaa dimullo, nduyɛ miŋ yɔŋgu yoomula naalaŋ le nya malaa.
9 Puaapiliaa, nyapila loonuŋ mɛɛ naŋ wa saŋgaa yɛ. Boondii naŋ wa nya yooŋgu kɛndɛ Mɛlɛkaa dimullo ve, idii a ichɔl ŋ wa wallo o kala kala, le halikpeŋ ŋ siiluu wana o wana kalaŋ naa le.
10 Nyapila cho lesei. Nduyɛ Mɛlɛka bɛɛ cho lesei maa boondii naŋ wa nya wanaa laalaŋnda tɛɛŋnde, kaala bɛnda laŋ a nyɛ wa sakpo wo naŋ wa tosaa ni. Nduyɛ ŋ tosa suɛi tɔɔ wɔɔŋ te.
11 La sina walaŋ maa ŋ wa nya kɔllo dɛɛniaa, a nya silaa mɛɛ nya nɔ mi la bii yoomula nyalaŋ yɛ, mɛɛ finyaa tosa a chuauwaa nduaa yɛ.
12 Ŋ tosa hei le halikpeŋ mi la hiou lachi a kɔlaŋ o nɛi Mɛlɛka hɛnaŋ ndo choo. Ndu veelu nya ni le mi la luɛi o Masale ndɔleŋ niŋ, a o biilu ndɔɔ niŋ.
13 Le sabu koŋ naŋ cho Mɛlɛka balikaa mello lɔɔlɔɔ o piɛileŋ niŋ ni, kanifuule mɛɛ nya tuei diom Mɛlɛka naŋ dimul nya wo, mi la chɛl ndu. La chue ndu maa diom wanachiee le, kɛ maa diom Mɛlɛkaa kpeekpei o cho ni. Diom koŋ cho nya wallo o ŋdial ni.
14 Nya puaapiliaa, nyɛ yɔŋnuŋ a kundala wanaa laalaŋaa Mɛlɛkaa o Chudiaa niŋndo, a cho diompilɛ a Chiisu Kiliti wa, ndu koni cho nya yɔŋnɔŋndo ni. Kanifuule, nyɛpalaa pilachieeyaa nyaa tusi nya choo wo, ndu koni Chuuwa bɛɛ cho nda tusioo choo ni.
15 Nda koni dii Masanɔɔ Chiisu ni, a wanaa ndaa suaa le Mɛlɛka wa. Nda cho naa nyɛpalaa tusioo choo ni. A tosa nyɛ nɛŋi Mɛlɛka kɔllo wo le. Nduyɛ yaamɔɔwa nda cho le waŋnda ni.
16 A wa kindiŋndo le naa kuunaa wanaa cho ŋChuu le wa yooŋgu Mɛlɛkaa dimullo, yɔŋii nda sɔla pioŋɔɔ. O hei niŋ, a cho hakila ndalaŋ chɔɔloo deŋgelaŋndo choo lɔɔlɔɔ. Kɛ o lo niŋ chobe mi Mɛlɛka dɔɔnuŋ tumbe a nda.
17 Puaapiliaa, mɛɛ naŋ piɔuwaŋ naa nyaa le teleŋ biŋgi, ŋ feŋa kɔltaŋ o nya lo le. Nduyɛ le mɛɛ yeemɛi nyɛi wa naa tau yɛ, miŋ kindiŋ o nɛi o nɛi niŋ le miŋ chiikaŋ naa nyaa.
18 Le saboo hoo, naŋ yeema le miiŋgoo naa nya chua. Ya Pɔɔl, mi kindiŋ bɛmbɔɔ le diiŋ kpulukuu, kɛ mi Setana kasa naa o nɛi.
19 Yɛɛ cho yɛ tiindaŋ naa ɔɔ nyaale naa ɔɔ fanda naa, o naŋ kialu yoŋgaa a ndu Masanɔɔ Chiisu o hɔl, boondii o cho miiŋgu naŋnde? Baa o cho nya le?
20 Nya kpeekpei tosa ni miŋ pɛɛluŋ, nduyɛ miŋ wa a nyaale.
