Tɛsaloniaŋ Tasoo 3:1-13
3 Mɛɛ naŋ che maa ŋ nɔla lɛ hiouwɔɔ lachi a biuwɔŋndo le nya chɔɔ le, miŋ kɛɛsiaa maa o bɛnda miŋ lo Atɛŋ naa kpeele.
2 Okoŋ miŋ viam puaapilɛnɔ naa Timoti naa nya chua. Naa ndaa cho wali Mɛlɛkaa tosaa le yooŋgu kɛndɔɔ dimioo a Kiliti okɔɔ ni. Ŋ vem ndu le mbo luei nya yoomuaŋ, nduyɛ mbo dɛɛniaa nya kɔltaŋ o laalaŋ nyaa niŋ,
3 le halikpeŋ nyɛpalaa hoo faŋa nya o laalaŋ nyaa choo le. Kanifuule, nyapila sina maa sɔɔŋ muŋ nɔ le naa yɔŋnɔŋndo.
4 Teleŋ naŋ wa naa nyaa wo, mi naŋ dimul nya maa nyɛpalaa nɔ le naa komallo. Nduyɛ a mɛɛ nya sina yɛ, ndi yɔŋnuŋ hei ni.
5 Le sabu koŋ, mɛɛ ya che maa I nɔla lɛ hiouwɔɔ lachi a biuwɔŋndo le nya chɔɔ le, mi viam wana le mi sina a laalaŋ nyaa okɔɔ. I wa buulaŋndo yɔŋii Setana* ndoo tɔɔndaŋ nya mi saŋga naa ndoo simnuŋ nyɛ fondoo fuu.
6 Kɛ Timoti laŋga fula o nya lo mbo komal naa, mbo dounuŋ naa kona kɛndɔɔ a laalaŋ nyaa okɔɔ. Nduyɛ maa kaalaa cho nya tɛɛŋ vellaa velle. Mbo dimul naa vɛlɛ maa teleŋ o teleŋ la cho yiyaŋndo a naa okɔɔ. Nduyɛ maa yeemɛi cho nya tau le naa chɔɔ, mɛɛ naa bɛɛ cho a yeemɛi le nya chɔɔ yɛ.
7 Lelaŋ puaapiliaa, mi che bɛɛ saŋgaa a nyɛpalaa cho naa choo, kɛ mɛɛ naŋ tuei a nya okɔɔ, a lo lechoo nya cho chɔmndo wo, miŋ sɔla kɔl dɛɛniaa tau.
8 Kanifuule, te la hiou pɛ lachi a simndaŋ nyɛkɛndɛ yi o Masanɔɔ niŋ, hei tosa miŋ miiŋgu yoomuaŋ sɔla.
9 Ŋ nɔla bɛɛ miŋ mel Mɛlɛka balika le nya le, kanifuule la tosa miŋ duaunuŋ nyaale tau tau.
10 Idii a ichɔl, ŋ cho Mɛlɛka nyɔɔloo o piɛileŋ niŋ kpeekpei le miŋ chiikaŋ naa nyaa, okoŋ miŋ siou peelu nyɛ lo wɔ nya le sɔlaa o laalaŋ nyaa niŋndo.
11 Maa Mɛlɛka Finyaa, a Masanɔ naa Chiisu mala naa miŋ hiŋ naa nya chua fɔ!
12 Maa Masanɔɔ tosa mi kaala cho nya tɛɛŋndo, a kaala nya nɔ le wana o wana wo hiou lachi a chɔɔlɔŋndo, mɛɛ naŋ kaala nya yɛ.
13 O hei niŋ, o nɔla mbo tosa mi kɔltaŋ la simul nya. Okoŋ, boondii Masanɔ naa Chiisu cho hunɔɔ a wanaa nduaa diandaa ve, la nɔla mi la wa a diandaa Mɛlɛka Finya naa o hɔl, la nɔ sɔŋ o sɔŋ te.
Tɛɛsiaalaŋ
^ Kilikiiye, diabolos. O sim le “wana tɛɛmbuu acheleŋnda tɔɔ wo.”