Koloniko Tasoo 10:1-14
-
Piɔm Sɔɔ wo a puaa o velu wa (1-14)
10 Filitiaŋnda wa sɔŋgɔɔ kpeekpei a Isɔluɛiya. Nduyɛ mi puaa Isɔluɛiya nyaanuŋ Filitiaŋnda. Ma diu a bɔɔbɔɔ o Pembii Kibuaa Ve.
2 Mi Filitiaŋnda sɔɔŋguu Sɔɔ nda puaa nduaa ikɛi kpɛɛluŋ, okoŋ ma dii puaa Sɔɔ wa, Chonataŋ, Abinadabi a Maliki-suaa.
3 Mi chɔuwo hiau lachi a tuuloo ketu ketu Sɔɔ choo. Nduyɛ mi wanaa wuu chiŋuaŋ nda saaluŋ Sɔɔ, ma via ndu a chiŋuaŋ, ma boli ndu tau.
4 Okoŋ, mi Sɔɔ dimul wana biilul ndu wolɔɔla chɔulaŋ ndo aa: “Soli muɛi num ii faŋnde ma dii ya a ndi, yɔŋii puaa sɔla haa hivi chiɛi kɔɔli le wa huŋ dii ya, okoŋ ma tɛɛmbuu ya labɛɛ.” Kɛ mi wana biilul ndu wolɔɔla chɔulaŋ ndo kɛɛ, kanifuule siooŋnde wa ndu tau tau. Le hei, mi Sɔɔ pila chua muɛi faŋnde, mbo del lechoo.
5 Mɛɛ wana biilul Sɔɔ wolɔɔla chɔulaŋ ndo che maa o vi, mi ndu bɛɛ del o muɛi nduɛi faŋnde choo mbo wu.
6 Okoŋ mi Sɔɔ, puaa nduaa yaawa, a waŋnda o yuŋgu ndɔɔ niŋ, a wa a ndu latulu wa kpou wu o paale leŋ choo.
7 Mɛɛ Isɔluɛiyaa wa o kpoloŋndo* niŋnda kpou che maa wana o wana nyaanuŋ, nduyɛ maa Sɔɔ nda puaa nduaa sɔla piɔmndo, ma kandu chieeŋ ndaŋ bɛndoŋ malɔɔ ma nyaanuŋ. Okoŋ kɔɔli, mi Filitiaŋnda huŋ hiɔlu chieeŋ muŋ.
8 Diimandɔɔ, mɛɛ Filitiaŋnda hiŋ le ma puŋga nyɛm wanaa nda diu diu wa, ma saaluŋ Sɔɔ nda puaa nduaa ihini a vilɛiya o Pembii Kibuaa Ve.
9 Okoŋ ma chɔuviaa nyɛm ndɔŋ chɔuwoŋ, nduyɛ ma kialu ndu bolleŋ. Okoŋ kɔɔli, ma viam waŋnda o lɛŋnde Filitiaa leŋ niŋ le ma kuɛ a yooŋgoo o mɛlɛkaa ndaa lo a o wanaa tuaa lo kpou.
10 Okoŋ, ma kɛsi nyɛm ndɔŋ chɔuwoŋ o chiɛi mɛlɛka ndaa niŋ, nduyɛ ma baŋ kpokpo ndɔɔ o chiɛi Dakɔŋ ndo.
11 Mɛɛ waŋnda Chabɛsi Kiliaadi kpou tuei nyɛ waŋnda Filitiaa tosa a Sɔɔ wo,
12 mi puaa chɔuwa kpou chaŋ ma kɔ chua dialuŋ Sɔɔ woŋ a dialuŋ puaa nduaa, ma kua a muŋ Chabɛsi. Okoŋ ma kumbu paala ndalaŋ o yɔm bɛndoo bɛŋgu Chabɛsi. Nduyɛ ma bii sumndo le palɛi i ŋɔmmɛu.
13 Le mɛɛ Sɔɔ kɛɛ lo lechoo wo chɔmndo o Chɛhowa lo, nduyɛ mbo kɛɛ le Chɛhowa diikɔŋndo yɛ o sɔla piɔmndo ni. Mbo nyuna vɛlɛ wana ŋwaŋ vilɛiyo le nɛi chɔmaa,
14 yɔŋii o nyuna Chɛhowa. Le hei Mɛlɛka tosa ni mbo sɔla piɔmndo, okoŋ mbo chua masaleŋ mbo ke Deeve, po Chɛɛse wo.
Tɛɛsiaalaŋ
^ Ɔɔ “lɛŋnde dɛŋgbɛleŋ.”
