Koloniko Tasoo 11:1-47
11 Mɛɛ teleŋ tiŋ hiou, mi Isɔluɛiya kpou kua naa Deeve chua Hɛbulɔŋ ma dimul ndu aa: “Fallo, kooma piliaŋ kpe naŋ cho naa nyaa ni.
2 Boondii Sɔɔ wa naa choo masa ve, num wa Isɔluɛiya simndaŋ lachi ni le kɔlaŋ o chɔuwo. Nduyɛ mi Chɛhowa Mɛlɛka numndo dimul num aa: ‘Num cho wanaa niaa Isɔluɛiya manda ni, nduyɛ ma wa simlachinɔɔ le nda.’”
3 Mi waŋ banaa o Isɔluɛi niŋ kpou huŋ naa Masaa Deeve chua Hɛbulɔŋ, nduyɛ mbo yii kpemaa a nda loŋ Chɛhowa lachi. Okoŋ, ma pɔya Deeve le mbo wa masaa o Isɔluɛi niŋ, a mɛɛ Chɛhowa dimul Saamiɛɛ yɛ.
4 Okoŋ kɔɔli, mi Deeve a Isɔluɛiya kpou chaŋ le kɔlaŋ Chulusalɛm, koŋ cho ni Chɛbusi, naa Chɛbusaitiiya wa ichali wa.
5 Mi Chɛbusaitiiya pɛɛsa Deeve, ma dimul ndu aa: “Fɛɛŋ bɛɛ a nɔla ma luɛi nanuŋ te!” Kɛ mi Deeve kɔ bii Saayɔŋ, chiee nda taŋgul a kpaki kala kalaa wo. Ndu nda veelu hau ni aa Chiee Deeve Wo.
6 Mi Deeve dimi aa: “Wana tase cho lakɔ Chɛbusaitiiya chiŋalaŋ ndo cho simnɔŋ wana banaa a masaa.” Le hei, Chowaabi po Sɛluiya wo wa wana tasoo ni le kɔlaŋ. Nduyɛ, mbo simnuŋ masaa.
7 Okoŋ, mi Deeve kɔ kila chaltaŋ o chiee nɔ hoo kpaki kala kalaa wo niŋ. Ndu ndaa veelu ni aa Chiee Deeve Wo.
8 Mbo kandu taŋgullo o bembelaŋ choo a o fondaŋnda cheleŋ o chioo niŋ. Okoŋ, mi Chowaabi miŋgi chioo kpou bɛɛndiaa.
9 Mi Deeve hiau lachi a simnɔŋndo wana kpaaya bɛndu. Nduyɛ Chɛhowa, Mɛlɛka puaa chɔuwa* wa a ndu latulu.
10 Deeve ndoo nɔ wanaa wa puaa nduaa chɔuwaa kpaayaa bɛnduaa bolleŋ nda. Nda toolu ndu o masale ndɔleŋ choo ni nda Isɔluɛiyaa tuaa kpou. Ma siiŋguu ndu masaa a mɛɛ Chɛhowa dimi a Isɔluɛi okɔɔ yɛ.
11 Puaa chɔuwaa kpaayaa bɛnduaa Deeve wa cho haa ni: Chasiɔbiam, Hakimɔnaitiinɔɔ po ndɔɔ. Masa puaa chɔuwaa kpaayaa bɛnduaa yaawa o wa ni. Teleŋ pilɛ, mbo dii yaamɔɔwa 300 a bal ndɔɔ.
12 Wana diiŋ ndɔɔ wa Ɛlieesa ni, po Dodo wo. Dodo yɛ, finya ndɔ wa Ahohi ni. Ɛlieesa wa wana pilɛ o puaa yaawaa kpaayaa bɛnduaa Deeve wa tɛɛŋ.
13 O wa a Deeve latulu Pasi-damim, naa nda chuuŋgiaŋ le sɔŋgɔɔ a Filitiaŋnda wa. Chiɛi ndaa waa baliiyoŋ nde wa loŋ, nduyɛ mi waŋnda nyaanuŋ Filitiaŋnda.
14 Mbo sim o chiɛi keŋ tɛɛŋ, o chɛl mi Filitiaŋnda poonda ndi le. Mbo hiau lachi a nda diu diuwo. Mi Chɛhowa tosa mbo yam Filitiaŋnda.
15 O puaa 30 wa puaa chɔuwa bolleŋ nda tɛɛŋ, mi a yaa kua o pouwo naa Deeve wa o viaŋnaŋ o buuloo niŋ Adulam nda. A teleŋ koŋ, puaa chɔuwaa Filitiaŋnda wa o dɔɔŋgɔɔ niŋ o Kpoloŋndo* Luɛfem.
16 Deeve wa o vioŋnɔŋndo niŋ, mi kunda puaa chɔuwaa Filitiaŋnda wa Bɛtilɛhɛm.
17 Okoŋ mi Deeve dimi aa: “Te yaa sɔla pɛ mɛŋma cho o sooŋ mamɛŋ cho o dio kpaki chioo Bɛtilɛhɛm ndo le kolɔɔ, nyɔɔ wa ya bɔɔ hɛnaŋ!”
18 Mi puaa yaawaa kpaayaa bɛnduaa kaŋ mal ma kua o dɔɔŋgɔ Filitiaŋnda niŋ a kaka, okoŋ ma kɔ kɔndu mɛŋndaŋ o sooŋ mamɛŋ cho o dio kpaki chioo Bɛtilɛhɛm ndo, ma chuu Deeve le mbo kol. Kɛ mbo kɛɛ le maŋ kolɔɔ, nduyɛ mbo chuiŋi maŋ Chɛhowa lachi.
19 Mi Deeve dimi aa: “Oo Mɛlɛka, kɔl del la bɛɛ pɛŋ le i waa nuaa tosa le. Baa o bɛnda pa mi kol kooma puaa luei haa yoomula ndalaŋ o kpundɔɔ niŋnda?” Le hei, mbo kɛɛ le maŋ kolɔɔ. Puaa chɔuwaa yaawaa kpaayaa bɛnduaa Deeve wa, sɔɔŋ nda tosa woŋ cho muŋ ni.
20 Abisiaa bɛndoo Chowaabi wa kunda wanaa yaa cheleŋ bolleŋ ni. A teleŋ pilɛ, mbo dii yaamɔɔwa 300 a bal ndɔɔ. Ndu bɛɛ, mi tɔɔ ndɔɔ tiu maa puaa yaawa.
21 O kunda wanaa yaawaa kaŋ tɛɛŋ, ndu ndoo hiou tɔɔ fula a a ŋiɔɔŋnda, nduyɛ ndu wa nda bolleŋ ni. Kɛ o sɔla foofoo maa puaa yaawaa tasiaa le.
22 Bɛnaya, po Chɛhoyada wo wa wana kɔl simulaa, nduyɛ mbo tosa sɔɔŋ kɔndɔfiliŋ bɛndoŋ tau tau o Kabisɛɛ niŋ. Mbo dii puaa ŋiɔɔŋaa Aluɛɛ wa, wana waa Mowaabi. Nduyɛ, mbo tual o sooŋ mamɛŋndo niŋ a teleŋ mɔmndo wa chuchɔɔ tau wo, okoŋ mbo dii kpɔkuŋndo.*
23 Mbo dii vɛlɛ po Ichipiaŋnɔɔ, nduyɛ poo hoo wa o bɛndu heu. O wa bandei nɛiyo le ŋɔmmɛu a tɛndaa tɛɛŋ. Mi che bɛɛ po Ichipiaŋnɔ koŋ ndoo nɔ ballo o ba, nduyɛ piau bal ndɔɔ wa chelullo maa yɔm nda simbul kola luaa wo, kɛ mbo kuel ndu a yɔmndo, mbo poonda ndu ballo o ba, okoŋ mbo dii ndu a bal ndɔɔ.
24 Sɔɔŋ Bɛnaya, po Chɛhoyada wo tosa woŋ cho muŋ ni. Nduyɛ ndu bɛɛ, mi tɔɔ ndɔɔ tiu maa puaa chɔuwaa yaawaa kpaayaa bɛnduaa.
25 Mi che bɛɛ ndu ndoo hiou tɔɔ fula o puaa chɔuwaa 30 wa tɛɛŋ, kɛ o sɔla foofoo maa puaa yaawa le. A koŋ kpou, mi Deeve siiŋguu ndu wana bɛndoo le puaa chɔuwaa manda ndu wa.
26 Puaa chɔuwaa kpaayaa bɛnduaa wa haa ni: Asahɛɛ pɔmbɔɔ Chowaabi, Ɛlihanaŋ po Dodo wo, wana waa Bɛtilɛhɛm,
27 Siamɔti Halɔluaitiinɔɔ, Hilɛɛsi Pɛlonaitiinɔɔ,
28 Ilua po Ikɛɛsi wo, wana waa Tɛkowa, Abi-isa wana waa Anatɔti,
29 Sibɛkai Husiataitiinɔɔ, Aalai wana waa Ahohi,
30 Mahalai wana waa Nɛtofa, Hɛlɛdi po Bana wo, wana waa Nɛtofa,
31 Itai po Luibai yo, wana waa Kibiya, fulaa o yuŋgu Bɛŋjamiŋ ndo choo, Bɛnaya wana waa Piluatɔŋ,
32 Huluai wana waa o kpoloŋndo* Kaasi, Abiɛɛ wana waa Abati,
33 Asimavɛti wana waa Bahuluim, Ɛliaaba wana waa Siaabɔŋ,
34 puaa Hasiɛm nda, wana waa Kisiɔŋ, Chonataŋ po Siakii wo, Halaluaitiinɔɔ,
35 Ahayam po Saka wo, Halaluaitiinɔɔ, Ɛlifaa po Ɔɔ wo,
36 Hɛfa wana waa Mɛkilua, Ahicha Pɛlonaitiinɔɔ,
37 Hɛsilo wana waa Kamɛɛ, Naaluai po Ɛsibai yo,
38 Chowɛɛ pɔmbɔɔ Netaŋ, Mibihaa po Hakilui wo,
39 Silɛki Amɔnaitiinɔɔ, Nahaluai wana waa Biaalɔti, wana biilul Chowaabi, po Sɛluiya wo wolɔɔla chɔulaŋ ndo,
40 Ilua wana waa Itiluai, Keluɛbi wana waa Itiluai,
41 Yuulaya Hitaitiinɔɔ, Sabadi po Alai yo,
42 Adana po Sisa wo, fulaa o yuŋgu Lubɛŋ ndo choo, ndu wa yuŋgu Lubɛŋ ndo bolleŋ ni, nduyɛ ndoo nɔ puaa chɔuwa 30 ndu o ba bɛŋgu.
43 Henaŋ po Maaka wo, Choosiafati Mitinaitiinɔɔ,
44 Yuusaya wana waa Asitalɔɔ, Siema nda Chɛyɛɛ puaa Hotam nda, wana waa Aloya.
45 Chɛdiya po Similua wo, a Choha pɔmbɔ ndɔ Tisaitiinɔɔ,
46 Iliɛɛ Mahavaitiinɔɔ, Chɛluibai nda Choosiavaya, puaa Ɛlinam nda, a Itima wana waa Mowaabi,
47 Iliɛɛ, Obɛdi, a Chaasiɛɛ, wana waa Mɛsobaa.
Tɛɛsiaalaŋ
^ Koŋ cho ni, puaa chɔuwa o choo choo niŋ.
^ Ɔɔ “Lɛŋnde Dɛŋgbɛleŋ.”
^ Ɔɔ “yalakanaa.”
^ Tofa Tɛɛsiaa.
